ଓଡ଼ିଶାରେ ପୁରୀ-ହାୱାଡା ମାର୍ଗରେ ଦ୍ରୁତଗାମୀ ଟ୍ରେନ ‘ବନ୍ଦେ ଭାରତ ଏକ୍ସପ୍ରେସ’ର ଲୋକାର୍ପଣ ଆଜି ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଦ୍ୱାରା ଅନୁଷ୍ଠିତ ହୋଇଛି । ଆସନ୍ତା ୨୦ତାରିଖରୁ ନିୟମିତ ଚାଲିବାକୁ ଥିବା ଏହି ଟ୍ରେନରେ ବିଭିନ୍ନ ସୁବିଧା ଓ ଏହାର ଭଡ଼ାକୁ ନେଇ ଲୋକଙ୍କ ମଧ୍ୟରେ ଉତ୍ସାହ ବୃଦ୍ଧି ପାଇଛି। ଏହି ଟ୍ରେନରେ ପୁରୀରୁ ହାୱାଡାକୁ ଭଡ଼ା ଏକଜ୍ୟୁକୁଟିଭ ବର୍ଗରେ ୨୧୧୦ଟଙ୍କା(ଖାଇବା ଛାଡ଼ି) ଓ ଚେୟାର କାର ଭଡ଼ା ୧୦୫୦ଟଙ୍କା ରହିଛି। ତେବେ ପୁରୀରୁ ଭୁବନେଶ୍ୱରରୁ ଏକଜ୍ୟୁକୁଟିଭ ବର୍ଗର ଭଡ଼ା ୭୮୫ଟଙ୍କା ଓ ଚେୟାର କାର ଭଡ଼ା ୪୦୦ଟଙ୍କା ରହିଥିବା ଜଣାପଡ଼ିଛି ।
ରେଳବାଇ ସୂତ୍ରରୁ ମିଳିଥିବା ସୂଚନା ଅନୁସାରେ, ସମ୍ପୂର୍ଣ୍ଣ ଶୀତତାପ ନିୟନ୍ତ୍ରିତ ଆରାମଦାୟକ ସିଟ୍ ଥିବା ଏହି ଟ୍ରେନରେ ସମସ୍ତ ଆଧୁନିକ ସୁବିଧାସୁଯୋଗ ରହିଛି । ଏହି ଟ୍ରେନରେ ମୋଟ ୧୬ଟି ବଗି ଥିବାବେଳେ ସେଥିରେ ଅଟୋମେଟିକ ଡୋର, ଜିପିଏସ୍ ଆଧାରିତ ଅଡିଓ-ଭିଜୁଆଲ ଯାତ୍ରୀଙ୍କ ସୂଚନା ବ୍ୟବସ୍ଥା, ହଟସ୍ପଟ ଓ ୱାଇଫାଇ ସୁବିଧା ସହ ସମସ୍ତ ଟଏଲେଟକୁ ବାୟୋ-ଭ୍ୟାକୁମ୍ ଭଳି କରାଯାଇଛି । ଏହି ଟ୍ରେନର ଡିଜାଇନ୍ , ଆରାମଦାୟକ ସିଟ୍ ସହ ଗୁଣାତ୍ମକ ମାନର ଖାଦ୍ୟପେୟ ଏବଂ ମନୋରଞ୍ଜନ ସୁବିଧା ହିଁ ଯାତ୍ରୀଙ୍କୁ ଏହି ଟ୍ରେନ ପ୍ରତି ବିଶେଷ ଆକର୍ଷିତ କରିବ ବୋଲି କୁହାଯାଉଛି। ଏହି ଟ୍ରେନ ମାତ୍ର ୬ଘଣ୍ଟା ୨୦ମିନିଟରେ ପୁରୀରୁ ହାୱାଡାରେ ପହଂଚିବ।
ଏହି ଟ୍ରେନରେ ପୁରୀ-ହାୱାଡା ପାଇଁ ଏକଜ୍ୟୁକୁଟିଭ ବର୍ଗର ଯାତ୍ରୀଙ୍କୁ ଖାଇବା ବାବଦରେ ୧୯୫ଟଙ୍କା ଓ ଚେୟାର କାର ବର୍ଗର ଯାତ୍ରୀଙ୍କୁ ୧୬୨ଟଙ୍କା ଦେବାକୁ ପଡ଼ିବ । ଅବଶ୍ୟ ଯାତ୍ରୀ ଚାହିଁଲେ ହିଁ ଏହି ଅତିରିକ୍ତ ଦେୟ ଦେଇ ଟ୍ରେନରେ ଖାଇବା ସୁବିଧା ଉଠାଇ ପାରିବେ । ସେହିପରି ଭୁବନେଶ୍ୱର-ପୁରୀ ଚେୟାର କାର ବର୍ଗରେ ଭଡ଼ା ୪୦୦ଟଙ୍କା ରହିଥିବାବେଳେ ଏକଜ୍ୟୁକୁଟିଭ ବର୍ଗରେ ଭଡ଼ା ୭୮୫ଟଙ୍କା ରହିଛି ଓ ଏହି ଦୁଇବର୍ଗର ଯାତ୍ରୀ ଚାହିଁଲେ ଖାଇବା ସୁବିଧା ଅତିରିକ୍ତ ୫୫ଟଙ୍କା ଦେଇ ନେଇପାରିବେ । ସେହିପରି ଭୁବନେଶ୍ୱର-ବାଲେଶ୍ୱର ଭଡ଼ା ୫୯୫ଟଙ୍କା(ଚେୟାର କାର) ଓ ୧୧୯୫(ଏକଜ୍ୟୁକୁଟିଭ କ୍ଲାସ), ଭୁବନେଶ୍ୱର-ହାୱାଡା ଭଡ଼ା ୯୫୫ଟଙ୍କା(ଚେୟାର କାର) ଓ ୧୯୩୦ଟଙ୍କା(ଏକଜ୍ୟୁକୁଟିଭ କ୍ଲାସ) ପାଇଁ ରହିଛି । ଏହି ଭଡ଼ାରେ ଖାଇବା ଖର୍ଚ୍ଚ ସାମିଲ ନାହିଁ ।
ପୁରୀ-ହାୱାଡା ଏକଜ୍ୟୁକୁଟିଭ କ୍ଲାସ ଟିକେଟର ଦାମ ୨୧୧୦ଟଙ୍କା ଥିବାବେଳେ ସେଥିରେ ବେସ୍ ଚାର୍ଜ-୧୮୭୪ଟଙ୍କା, ରିଜର୍ଭେସନ ଚାର୍ଜ- ୬୦ଟଙ୍କା, ସୁପରଫାଷ୍ଟ ଚାର୍ଜ-୭୫ଟଙ୍କା ଓ ଜିଏସଟି-୧୦୧ଟଙ୍କା ରହିଛି । ଏଥିରେ ଖାଇବା ଦର ସାମିଲ ନାହିଁ ।
ସୂଚନାଯୋଗ୍ୟ, ପୁରୀ-ହାୱାଡା ବନ୍ଦେ ଭାରତ ଏକ୍ସପ୍ରେସ ଟ୍ରେନ ଗୁରୁବାରକୁ ଛାଡ଼ିଦେଲେ ବାକି ୬ଦିନ ଚଳାଚଳ କରିବ । ହାୱାଡାରୁ ସକାଳ ୬ଟା ୧୦ମିନିଟରେ ବାହାରି ଏହି ଟ୍ରେନ ଖଡ଼ଗପୁର, ବାଲେଶ୍ୱର, ଭଦ୍ରକ, ଯାଜପୁର-କେନ୍ଦୁଝର ରୋଡ, କଟକ, ଭୁବନେଶ୍ୱର, ଖୋର୍ଦ୍ଧା ରୋଡ୍ ଦେଇ ପୁରୀରେ ଦିନ ୧୨ଟା ୩୫ମିନିଟରେ ପହଂଚିବ । ସେହିପରି ପୁରୀରୁ ଦିନ ୧ଟା ୫୦ମିନିଟରେ ବାହାରି ଉକ୍ତ ମାର୍ଗ ଦେଇ ହାୱାଡାରେ ରାତି ସାଢ଼େ ୮ଟାରେ ପହଂଚିବ ବୋଲି ଜଣାପଡ଼ିଛି ।