SC Slams : ପୁଲିସ ଡିଜିଙ୍କୁ ସୁପ୍ରିମକୋର୍ଟଙ୍କ ଶୋ’କଜ୍ ନୋଟିସ୍‌ , ଅଡ଼ୁଆରେ କ୍ରାଇମବ୍ରାଂଚ ଡିଜି, ସରକାରଙ୍କୁ ରିପୋର୍ଟ

ସଡ଼କ ଦୁର୍ଘଟଣା ବୀମା ଜାଲିଆତି ମାମଲାର ତଦନ୍ତରେ ‘ଅତ୍ୟନ୍ତ ଖାମଖିଆଲି ମନୋଭାବ’ ପ୍ରଦର୍ଶନ କରିବା ଓ କ୍ରାଇମବ୍ରାଂଚକୁ ତଦନ୍ତ ହସ୍ତାନ୍ତର କରିବା ପୁଲିସ ଡିଜି ୱାଇବି ଖୁରାନିଆଙ୍କୁ ମହଙ୍ଗା ପଡ଼ିଛି । ସୁପ୍ରିମକୋର୍ଟ କଡ଼ା ଭର୍ତ୍ସନା କରିବା ସହ କାହିଁକି କାର୍ଯ୍ୟାନୁଷ୍ଠାନ ନିଆ ନଯିବ ସେନେଇ ପୁଲିସ ଡିଜିଙ୍କୁ କୈଫୟିତ ତଲବ କରି ୧୫ତାରିଖ ସୁଦ୍ଧା ବ୍ୟକ୍ତିଗତ ସତ୍ୟପାଠ ଦାଖଲ ନିମନ୍ତେ ନିର୍ଦ୍ଦେଶ ଦେଇଛନ୍ତି । ଆଉ ସୁପ୍ରିମକୋର୍ଟଙ୍କ ଏଭଳି କଡ଼ା ଆଭିମୁଖ୍ୟ ପରେ ରାଜ୍ୟ ପୁଲିସ ମୁଖ୍ୟାଳୟରେ କମ୍ପନ ସୃଷ୍ଟି ହୋଇଛି । ଡିଜିପି ଶ୍ରୀ ଖୁରାନିଆ ଏନେଇ କ୍ରାଇମବ୍ରାଂଚ ଡିଜି ବିନୟତୋଷ ମିଶ୍ରଙ୍କ ଉପରେ କ୍ଷୁବ୍ଧ ହେବା ସହ ତାଙ୍କୁ କାରଣଦର୍ଶାଅ ନୋଟିସ୍ ଜାରି କରିଥିବା ଓ ରାଜ୍ୟ ସରକାରଙ୍କୁ ଏନେଇ ମଧ୍ୟ ଅବଗତ କରାଇଥିବା ନିର୍ଭରଯୋଗ୍ୟ ସୂତ୍ରରୁ ସୂଚନା ମିଳିଛି ।

ଡିଜିପିଙ୍କ ଦାୟିତ୍ୱହୀନତା, ସୁପ୍ରିମକୋର୍ଟ ବର୍ଷିଲେ, ଲଜ୍ଜିତ ହେଲା ପୁଲିସ

ସୁପ୍ରିମକୋର୍ଟ ବିଚାରପତି ଜଷ୍ଟିସ ଅହସାନୁଦ୍ଦିନ ଅମାନୁଲ୍ଲା ଓ ଜଷ୍ଟିସ ପ୍ରସନ୍ନ ବି. ଭରାଲେଙ୍କୁ ନେଇ ଗଠିତ ଖଣ୍ଡପୀଠ ରାଜ୍ୟ ପୁଲିସ ଡିଜିଙ୍କ କାର୍ଯ୍ୟଶୈଳୀକୁ କଡ଼ା ଭର୍ତ୍ସନା କରିଛନ୍ତି । ଏକ ସଡ଼କ ଦୁର୍ଘଟଣା ମାମଲାରେ ବୀମାରାଶି ପ୍ରଦାନକୁ ନେଇ ଉପୁଜିଥିବା ବିବାଦ ଓ ଜାଲିଆତି ଆଶଙ୍କା କରି ଖଣ୍ଡପୀଠ ଗତ ମାର୍ଚ୍ଚ ୬ତାରିଖରେ ଏହାର ଏସଆଇଟି ତଦନ୍ତ ସହ ମାସକ ମଧ୍ୟରେ ରିପୋର୍ଟ ଦାଖଲ ନିମନ୍ତେ ପୁଲିସ ଡିଜିଙ୍କୁ ନିର୍ଦ୍ଦେଶ ଦେଇଥିଲେ ।  ମାତ୍ର ପୁଲିସ ଡିଜି ଏହି ମାମଲାର ତଦନ୍ତର ତଦାରଖ ନିଜେ କରିବା ପରିବର୍ତ୍ତେ ଏହାକୁ କ୍ରାଇମବ୍ରାଂଚକୁ ହସ୍ତାନ୍ତର କରିଥିଲେ । ଆଉ କ୍ରାଇମବ୍ରାଂଚର ବରିଷ୍ଠ ଅଫିସରମାନେ ଏଥିପ୍ରତି ବିଶେଷ ଗୁରୁତ୍ୱ ନଦେଇ ଜଣେ ଡିଏସପି ପାହ୍ୟାର ଅଫିସରଙ୍କ ଉପରେ ଛାଡ଼ି ଦେଇ ଚୁପ୍ ବସିଯାଇଥିଲେ ।

ଖଣ୍ଡପୀଠ ନଭେମ୍ବର ୨୭ତାରିଖରେ ଶୁଣାଣିବେଳେ ପୁଲିସ ଡିଜିଙ୍କ ଏଭଳି ଦାୟିତ୍ୱହୀନତାକୁ ଖାମଖିଆଲି ମନୋଭାବ ବୋଲି ବିବେଚନା କରି ଡିସେମ୍ବର ୧୫ତାରିଖ ସୁଦ୍ଧା ତାଙ୍କୁ ‘ବ୍ୟକ୍ତିଗତ ସତ୍ୟପାଠ’ ଦାଖଲ ନିମନ୍ତେ ନିର୍ଦ୍ଦେଶ ଦେଇଛନ୍ତି ।  ଖଣ୍ଡପୀଠ କହିଛନ୍ତି ଯେ, କୋର୍ଟ ସିଧାସଳଖ ପୁଲିସ ଡିଜିଙ୍କୁ ଏହି ତଦନ୍ତର ଦାୟିତ୍ୱ ଦେଇଥିଲେ । କିନ୍ତୁ ତଦନ୍ତକାରୀ ଡିଏସପି ଏନେଇ ବିଶେଷ ତଦନ୍ତ ନକରି ରିପୋର୍ଟ ଦାଖଲ କରିଦେଇଛନ୍ତି । ଏପରିକି ବୀମା କମ୍ପାନୀଠାରୁ ଆବଶ୍ୟକ ଦସ୍ତାବିଜ ମାଗିବାକୁ ଉଚିତ୍ ମଣିନଥିଲେ କିମ୍ବା ତାଙ୍କର ତଦନ୍ତ ରିପୋର୍ଟକୁ ମଧ୍ୟ ପୁଲିସ ଡିଜି ଯାଂଚ କରିନଥିଲେ ବୋଲି ଖଣ୍ଡପୀଠ ଜାଣିବାକୁ ପାଇଛନ୍ତି । 

 ଏଭଳି ଚରମ ଅବହେଳା ପାଇଁ କାହିଁକି ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ନାହିଁ ବୋଲି ପୁଲିସ ଡିଜିଙ୍କୁ କାରଣଦର୍ଶାଅ ନୋଟିସ୍ ଜାରି କରି ଡିସେମ୍ବର ୧୫ତାରିଖରେ ପରବର୍ତ୍ତୀ ଶୁଣାଣି ସୁଦ୍ଧା ବ୍ୟକ୍ତିଗତ ସତ୍ୟପାଠ ଜରିଆରେ ପକ୍ଷ ରଖିବାକୁ ନିର୍ଦ୍ଦେଶ ଦେଇଛନ୍ତି । ଆଉ ଏହି ଅବଧି ସୁଦ୍ଧା ତଦନ୍ତ ସମ୍ପୂର୍ଣ୍ଣ ନକଲେ କୋର୍ଟ ଆହୁରି କଠୋର ଆଭିମୁଖ୍ୟ ଗ୍ରହଣ କରିବେ ବୋଲି ଖଣ୍ଡପୀଠ ଚେତାବନୀ ଦେଇଛନ୍ତି । ତଦନ୍ତ ପ୍ରକ୍ରିୟାରେ କ୍ରାଇମବ୍ରାଂଚର ଅବହେଳା ଓ ମାମଲାକୁ ହାଲୁକା ଭାବେ ଗ୍ରହଣ କରିବାର ମନୋଭାବ ଯୋଗୁଁ ସୁପ୍ରିମକୋର୍ଟରେ ମଧ୍ୟ ଓଡ଼ିଶା ପୁଲିସକୁ ଲଜ୍ଜିତ ହେବାକୁ ପଡ଼ିଛି ।

କ୍ରାଇମବ୍ରାଂଚ ଡିଜି ଅଡ଼ୁଆରେ, ପୁଲିସ କରିଡ଼ରରେ ଚର୍ଚ୍ଚା

ପୁଲିସ ମୁଖ୍ୟାଳୟ ସୂତ୍ରରୁ ଜଣାପଡ଼ିଛି ଯେ, ସୁପ୍ରିମକୋର୍ଟଙ୍କ ଏଭଳି କଠୋର ଆଭିମୁଖ୍ୟ ପରେ ପୁଲିସ ଡିଜି ୱାଇବି ଖୁରାନିଆ କ୍ରାଇମବ୍ରାଂଚ ଉପରେ କ୍ଷୁବ୍ଧ ହୋଇଛନ୍ତି । ସୁପ୍ରିମକୋର୍ଟରେ ଡିଏସପିଙ୍କ ଦ୍ୱାରା ଯେଉଁ ଏସଆଇଟି(ସ୍ୱତନ୍ତ୍ର ତଦନ୍ତ କମିଟି) ରିପୋର୍ଟ ଦାଖଲ କରାଗଲା ତାକୁ କାହିଁକି କୌଣସି ବରିଷ୍ଠ ଅଫିସର ଯାଂଚ କରିଲେ ନାହିଁ ବୋଲି କ୍ରାଇମବ୍ରାଂଚ ଡିଜି ବିନୟତୋଷ ମିଶ୍ରଙ୍କୁ ପ୍ରଶ୍ନ କରିଥିବା ଜଣାପଡ଼ିଛି । ଏପରିକି ତଦନ୍ତ ଭାର କ୍ରାଇମବ୍ରାଂଚ ଦିଆଯାଇଥିବା କହି ପୁଲିସ ଡିଜି ନିଜ ଦୋଷ ଛଡ଼ାଇବାକୁ ପ୍ରୟାସ କରୁଥିବା ଏବଂ କ୍ରାଇମବ୍ରାଂଚ ଡିଜି ଶ୍ରୀ ମିଶ୍ରଙ୍କୁ କାରଣଦର୍ଶାଅ ନୋଟିସ୍ ଜାରି କରିଥିବା ନିର୍ଭରଯୋଗ୍ୟ ସୂତ୍ରରୁ ସୂଚନା ମିଳିଛି । ଏହି ମାମଲାର ତଦନ୍ତ ପ୍ରକ୍ରିୟାକୁ ନେଇ ଉଭୟଙ୍କ ମଧ୍ୟରେ କଥା କଟାକଟି ହୋଇଥିବା ଓ ରାଜ୍ୟ ସରକାରଙ୍କୁ ମଧ୍ୟ ପୁଲିସ ଡିଜି ଶ୍ରୀ ଖୁରାନିଆ ତାଙ୍କ ବିରୁଦ୍ଧରେ ପ୍ରତିକୂଳ ରିପୋର୍ଟ ପଠାଇଥିବା ପୁଲିସ ମୁଖ୍ୟାଳୟରେ ଚର୍ଚ୍ଚା ହେଉଛି । 

କେଉଁ ମାମଲା ପାଇଁ ସୁପ୍ରିମକୋର୍ଟ ହେଲେ କଠୋର ?

୨୦୧୭ ଅକ୍ଟୋବର ୧୯ତାରିଖରେ ଘଟିଥିବା ଏକ ରାସ୍ତା ଦୁର୍ଘଟଣାକୁ ନେଇ ‘ଦି ଓରିଏଂଟାଲ୍ ଇନସ୍ୟୁରାନ୍ସ କଂପାନୀ ଲିମିଟେଡ୍ ବନାମ ଟୁନି ପତି ଓ ଅନ୍ୟମାନେ' ମାମଲାରେ ରାଜ୍ୟ ପୁଲିସର ଖାମଖିଆଲି ମନୋଭାବକୁ ନେଇ ସୁପ୍ରିମକୋର୍ଟ କଠୋର ଆଭିମୁଖ୍ୟ ପୋଷଣ କରିଛନ୍ତି । ଏହି ଦୁର୍ଘଟଣା ମାମଲାରେ ମୃତକଙ୍କ ପରିବାରକୁ କ୍ଷତିପୂରଣ ଦେବା ପାଇଁ ହାଇକୋର୍ଟ ନିର୍ଦ୍ଦେଶ ଦେଇଥିଲେ । 

କିନ୍ତୁ ବୀମା କମ୍ପାନୀ ଅଭିଯୋଗ କରିଥିଲା ଯେ, ମାତ୍ର ବର୍ଷକ ମଧ୍ୟରେ ସେହି ସମାନ ଗାଡ଼ିକୁ ବ୍ୟବହାର କରି ୫ଟି ଅଲଗା ଅଲଗା ସଡ଼କ ଦୁର୍ଘଟଣା ମାମଲାରେ କ୍ଷତିପୂରଣ ଦାବି କରାଯାଇଛି । ଯାହାକି ଏକ ବଡ଼ଧରଣର ଜାଲିଆତି ବୋଲି ବୀମା କମ୍ପାନୀ ସନ୍ଦେହ କରି ସୁପ୍ରିମକୋର୍ଟ ଯାଇଛି । ଏହି ଜାଲିଆତିର ସତ୍ୟାସତ୍ୟ ଜାଣିବା ପାଇଁ ସୁପ୍ରିମକୋର୍ଟ ମାର୍ଚ୍ଚ ୬ତାରିଖରେ ଏସଆଇଟି  ତଦନ୍ତ ପାଇଁ ପୁଲିସ ଡିଜିଙ୍କୁ ନିର୍ଦ୍ଦେଶ ଦେଇଥିଲେ ।

ବୀମା କମ୍ପାନୀ ଦେଇଥିବା ଦସ୍ତାବିଜଗୁଡ଼ିକ ଅସ୍ପଷ୍ଟ ଥିବା ଦର୍ଶାଇ କ୍ରାଇମବ୍ରାଂଚର ତଦନ୍ତକାରୀ ଅଧିକାରୀ  ଚୁପ୍ ବସିଯାଇଥିଲେ ଓ ଅଧିକ ତଥ୍ୟ ମଧ୍ୟ ମାଗିନଥିଲେ , ଯାହାକୁ ନେଇ କୋର୍ଟ କ୍ଷୁବ୍ଧ ହୋଇଛନ୍ତି । ପୁଲିସ ଡିଜି ନିଜେ ତଦନ୍ତର ତଦାରଖ ନକରି ଡିଏସପି ପାହ୍ୟାର ଅଫିସରଙ୍କ ଉପରେ ଏହାକୁ ନ୍ୟସ୍ତ କଲେ ଓ ତାଙ୍କ ବିରୁଦ୍ଧରେ କାର୍ଯ୍ୟାନୁଷ୍ଠାନ କାହିଁକି ଗ୍ରହଣ କରାଯିବ ନାହିଁ ବୋଲି କୋର୍ଟ ପ୍ରଶ୍ନ କରିଛନ୍ତି ।

ଉଲ୍ଲେଖଯୋଗ୍ୟ, ଏହି ସଡ଼କ ଦୁର୍ଘଟଣା ମାମଲାରେ ହୋଇଥିବା ଏଫଆଇଆରରେ ପୁଲିସର ତ୍ରୁଟି ଥିବା ଓ ଦୁର୍ଘଟଣା ଘଟାଇଥିବା ଗାଡ଼ିକୁ ସୁରକ୍ଷା ଦେବାକୁ ଜାଲ ଗାଡ଼ିର ନମ୍ବର ଦିଆଯାଇଥିବା ସନ୍ଦେହ କରାଯାଉଛି ।