ଭୁବନେଶ୍ୱର (ଓଡ଼ିଶା ରିପୋର୍ଟର): ସାଧାରଣ ନିର୍ବାଚନ ପାଇଁ ଜୋରଦାର ପ୍ରସ୍ତୁତି କରୁଥିବା କଂଗ୍ରେସ ରାଜ୍ୟରେ ନିଜର ସହଯୋଗୀ ଖୋଜିବାରେ ବ୍ୟସ୍ତ । ବିଜେଡି ଓ ବିଜେପିକୁ କଡ଼ା ଟକ୍କର ଦେବା ପାଇଁ କଂଗ୍ରେସ ଏବେ ଅନ୍ୟ ରାଜନୀତିକ ଦଳ ଓ ଶକ୍ତି ସହ ବୁଝାମଣା ପାଇଁ ମାର୍ଗ ପ୍ରଶସ୍ତ କରିଛି। ଆଜି ଖୋର୍ଦ୍ଧା ଜିଲ୍ଲାର ଟାଙ୍ଗୀଠାରେ ଅନୁଷ୍ଠିତ ମହାସମାବେଶ ଏଭଳି ଦିଗକୁ ଇସାରା କରୁଛି।
ସୂଚନା ଅନୁସାରେ ରାଜ୍ୟ ସରକାର ଓ ଖୋର୍ଦ୍ଧା ବିଧାୟକଙ୍କ ଅନ୍ୟାୟ ଓ ଦୁର୍ନୀତି ବିରୁଦ୍ଧରେ ଆଜି ଅପରାହ୍ନରେ ଟାଙ୍ଗୀଠାରେ ଖୋରଧା ଜନଜାଗରଣ ମହାମେଣ୍ଟ ପକ୍ଷରୁ ଏକ ମହାସମାବେଶ ଅନୁଷ୍ଠିତ ହୋଇଥିଲା। ଏହି ସମାବେଶରେ ପିସିସି ଅଧ୍ୟକ୍ଷ ନିରଞ୍ଜନ ପଟ୍ଟନାୟକ, ବିଜେଡିରୁ ବହିଷ୍କୃତ ନେତା ଡାକ୍ତର ଦାମୋଦର ରାଉତ, ବାମଦଳର ଜନାର୍ଦ୍ଦନ ପତି ଓ ରାମକୃଷ୍ଣ ପଣ୍ଡା, ବରିଷ୍ଠ ନେତା ପଞ୍ଚାନନ କାନୁନଗୋ, କଂଗ୍ରେସ ନେତା ସୁର ରାଉତରାୟ ଓ ଦିଲ୍ଲୀପ ଶ୍ରୀଚନ୍ଦନ ପ୍ରମୁଖ ଗୋଟିଏ ମଞ୍ଚରେ ଏକଜୁଟ ହୋଇ ଉଭୟ ରାଜ୍ୟ ଓ କେନ୍ଦ୍ର ସରକାରଙ୍କ ଉପରେ ବର୍ଷିଥିଲେ। ବାତ୍ୟା ‘ତିତଲି’ ଆଶଙ୍କା ଭୟ ଓ ବର୍ଷା ସତ୍ତ୍ୱେ ଏହି ସମାବେଶରେ ପ୍ରାୟ ୩ହଜାର ଲୋକ ସାମିଲ ହୋଇଥିଲେ।
ଉଭୟ ବିଜେଡି ଓ ବିଜେପି ସରକାରର ଦୁର୍ନୀତି ଓ ଅରାଜକତା ବିରୋଧରେ ଆଗାମୀ ଦିନରେ ସମଗ୍ର ରାଜ୍ୟରେ ଏଭଳି ସମଭାବାପନ୍ନ ଦଳକୁ ନେଇ ୩୦ରୁ ୪୦ଟି ସମାବେଶ କରିବା ନିମନ୍ତେ ସ୍ଥିର ହୋଇଛି। ତେବେ ସବୁଠୁ ବଡ଼ କଥା ହେଉଛି, ଡାକ୍ତର ରାଉତ ଓ ବାମଦଳର ନେତାମାନଙ୍କୁ ଏକଜୁଟ କରି କଂଗ୍ରେସ ଏଭଳି ସମାବେଶ ମାଧ୍ୟମରେ ଆଗାମୀ ନିର୍ବାଚନ ପାଇଁ କ୍ଷେତ୍ର ପ୍ରସ୍ତୁତ କରୁଛି।
ସୂଚନା ଅନୁସାରେ ବାମଦଳ ଓ ଅନ୍ୟାନ୍ୟ ଛୋଟ ରାଜନୀତିକ ଦଳଗୁଡ଼ିକ ସହ କଂଗ୍ରେସ ନିର୍ବାଚନୀ ବୁଝାମଣା କରିବାର ସମ୍ଭାବନା ରହିଛି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
