ଭୁବନେଶ୍ୱର(ଓଡ଼ିଶା ରିପୋର୍ଟର): ସାଧାରଣ ନିର୍ବାଚନ ପୂର୍ବରୁ ମହିଳା ଭୋଟ ବ୍ୟାଙ୍କକୁ ଆକର୍ଷିତ କରିବାକୁ ନବୀନ ପକାଇଛନ୍ତି ଥୋପ। ଆସନ୍ତା ଲୋକସଭା ନିର୍ବାଚନରେ ଏକ ତୃତୀୟାଂଶ ଆସନରେ ମହିଳା ପ୍ରାର୍ଥୀ ଦେବ ବିଜେଡି। କେନ୍ଦ୍ରାପଡ଼ାରେ ଆୟୋଜିତ ମିଶନ ଶକ୍ତି ସମାବେଶରେ ମୁଖ୍ୟମନ୍ତ୍ରୀ ଏହି ଘୋଷଣା କରିବା ସହ ମହିଳା ସଶକ୍ତିକରଣ ନେଇ ଜାତୀୟ ଦଳମାନେ ଯାହା କହୁଛନ୍ତି, ତାହା ପାଳନ କରନ୍ତୁ ବୋଲି ନବୀନ ଆହ୍ୱାନ ଦେଇଛନ୍ତି । ସେପଟେ ଠିକ୍ ନିର୍ବାଚନ ପୂର୍ବରୁ ଏ ଘୋଷଣାକୁ ବିଜେପି ପ୍ରବଞ୍ଚନା କହିଥିବା ବେଳେ ଓ କଂଗ୍ରେସ ବି ତୀବ୍ର ସମାଲୋଚନା କରିଛି।
ନିର୍ବାଚନ ପୂର୍ବରୁ ବିଜେଡିର ଏହା ଏକ ରଣନୀତି ବୋଲି କୁହାଯାଉଛି। ନାରୀ ସଶକ୍ତିକରଣ ବାହାନାରେ ନିର୍ବାଚନ ପୂର୍ବରୁ ମହିଳାଙ୍କ ପାଇଁ ମୁଖ୍ୟମନ୍ତ୍ରୀଙ୍କ ଏହି ବଡ଼ ଘୋଷଣା ଦଳକୁ କି ଫାଇଦା ଦେବ ଦେଖିବାକୁ ରହିଲା। ଏଥର ଲୋକସଭା ନିର୍ବାଚନରେ ୩୩ ପ୍ରତିଶତ ଆସନରେ ମହିଳାଙ୍କୁ ପ୍ରାର୍ଥୀ କରିବ ବିଜେଡି। ଅର୍ଥାତ ରାଜ୍ୟର ୨୧ଟି ଲୋକସଭା ଆସନରୁ ବିଜେଡି ୭ଟିରେ ମହିଳା ପ୍ରାର୍ଥୀଦେବ।
ପୂର୍ବରୁ ଉଭୟ ଲୋକସଭା ଓ ବିଧାନସଭା ନିର୍ବାଚନରେ ମହିଳାଙ୍କ ପାଇଁ ୩୩ ପ୍ରତିଶତ ସଂରକ୍ଷଣ ନେଇ ଗତବର୍ଷ ବିଧାନସଭାରେ ଏକ ସଂକଳ୍ପ ପାରିତ କରିବା ସହ ଏ ପ୍ରସଙ୍ଗରେ ସମର୍ଥନ ଯୋଗାଡ଼ ଲାଗି ନବୀନ ସମସ୍ତ ଜାତୀୟ ଦଳ ଓ ମୁଖ୍ୟମନ୍ତ୍ରୀମାନଙ୍କୁ ପ୍ରସ୍ତାବ ବି ପଠାଇଥିଲେ।
ହେଲେ ଲୋକସଭା ପରି ବିଧାନସଭା ଲାଗି ସମାନ ଘୋଷଣା କରି ନାହାନ୍ତି ନବୀନ। ୪୯ ଜଣ ମହିଳାଙ୍କୁ ପ୍ରାର୍ଥୀ କଲେ ବହୁ ସଂଖ୍ୟଙ୍କ ଆଶାୟୀଙ୍କ ଟିକଟ କାଟିବାକୁ ପଡିବ। ସେ ଦୃଷ୍ଟିରୁ ହୁଏତ ଦଳ ସୁପ୍ରିମୋ ରିସ୍କ ନେବାକୁ ଚାହିଁଲେ ନାହିଁ ବୋଲି ଚର୍ଚ୍ଚା ହେଉଛି। ହେଲେ ଏହା ଦଳ ପାଇଁ ବୁମେରାଂ ହେବ ବୋଲି ବିଜେପି କହିଛି। ମହିଳା ସଶକ୍ତିକରଣ ନାରା ପ୍ରବଞ୍ଚନା ବୋଲି କହିଛି କଂଗ୍ରେସ।
ରାଜ୍ୟରେ ପାଖାପାଖି ୫୦ ପ୍ରତିଶତ ଭୋଟର ହେଉଛନ୍ତି ମହିଳା। ତେଣୁ ଲୋକସଭାରେ ୩୩ ପ୍ରତିଶତ ଆସନ ଦେବାକୁ ଘୋଷଣା କରି ଏକ ବଡ଼ ଭୋଟ୍ ବ୍ୟାଙ୍କକୁ ଖୁସ୍ କରିବାକୁ ବିଜେଡି ଉଦ୍ୟମ କରିଛି । ଅନ୍ୟପଟେ ପିପିଲି, କୁନ୍ଦୁଲି ପୀଡ଼ିତାଙ୍କୁ ନ୍ୟାୟ ନ ମିଳିବା ଓ ରାଜ୍ୟରେ ପ୍ରତ୍ୟେକ ଦିନ ବଢୁଥିବା ନାବାଳିକା ଦୁଷ୍କର୍ମର କଳଙ୍କ ଭିତରେ ବିଜେଡିର ଏ ଫନ୍ଦି କେତେ କାମ ଦେବ ତାହା ଦେଖିବାକୁ ରହିଲା।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
