ଅଭିନବ ପ୍ରତିବାଦ: ଠେକିରେ ଗଲା ଆଇଜିଏଚ୍‌ ମାଟି ଓ ବ୍ରାହ୍ମଣୀ ପାଣି

ରାଉରକେଲା( ସତ୍ୟାନନ୍ଦ ମହାନ୍ତି): ରାଉରକେଲାରେ ଦ୍ୱିତୀୟ ବ୍ରାହ୍ମଣୀ ସେତୁ ଓ ଆଇଜିଏଚ୍‌କୁ ସୁପର୍ ସ୍ପେସିଆଲିଟି ହସ୍ପିଟାଲ କରିବାକୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ପ୍ରତିଶ୍ରୁତି ଦେଇଥିଲେ। ଏହା ମଧ୍ୟରେ ୪ ବର୍ଷ ବିତି ଯାଇଛି। ହେଲେ ଏହି ପ୍ରତିଶ୍ରୁତି ପାଳନ କରିବା ଦିଗରେ ମୋଦି ସରକାର ସେମିତି କିଛି ପଦକ୍ଷେପ ନେଇନାହିଁ। ଯାହାକୁ ନେଇ ରାଉରକେଲାବାସୀଙ୍କ ମଧ୍ୟରେ ଅସନ୍ତୋଷ ବଢ଼ିବାରେ ଲାଗିଛି। ଏପରି ସ୍ଥିତିରେ ମୋଦିଙ୍କୁ ତାଙ୍କ ପ୍ରତିଶ୍ରୁତି ସମ୍ପର୍କରେ ମନେ ପକାଇ ଦେବାକୁ ଲିଡ୍‌ ରାଉରକେଲା ନାମକ ଏକ ସଂଗଠନ ପକ୍ଷରୁ ଅଭିନଭ ପ୍ରତିବାଦ କରାଯାଇଛି।

ଆସନ୍ତାକାଲି ୪ ବର୍ଷ ପୂର୍ତ୍ତି ଅବସରରେ ମୋଦି କଟକ ଆସୁଛନ୍ତି। ଏଠାରେ ସେ ଏକ ସାଧାରଣ ସଭାରେ ଦେଶବାସୀଙ୍କୁ ଉଦ୍‌ବୋଧନ ଦେବେ। ଏହା ପୂର୍ବରୁ ମୋଦିଙ୍କୁ ତାଙ୍କ ପ୍ରତିଶ୍ରୁତି ମନେ ପକାଇ ଦେବା ପାଇଁ ସଂଗଠନ ପକ୍ଷରୁ ଆଇଜିଏଚ୍‌ରୁ ଠେକିରେ ମାଟି ଓ ବ୍ରାହ୍ମଣୀ ନଦୀର ପାଣି ପ୍ରଧାନମନ୍ତ୍ରୀଙ୍କ ପାଖକୁ ପଠାଯାଇଛି। ଯାହାକୁ ନେଇ ପୁଣି ସରଗରମ ହୋଇଛି ରାଉରକେଲା ରାଜନୀତି।

ଚାଲିଛି ଆରୋପ-ପ୍ରତ୍ୟାରୋପ

ଅନ୍ୟପକ୍ଷରେ ଏହାକୁ ନେଇ ରାଜନୈତିକ ଆରୋପ ପ୍ରତ୍ୟାରୋପ ଆରମ୍ଭ ହୋଇଯାଇଛି। ପ୍ରଧାନମନ୍ତ୍ରୀ ପ୍ରତିଶ୍ରୁତି ପୂରଣ କରି ନଥିବାରୁ ରାଉରକେଲା ବିଧାୟକ ଦିଲୀପ ରାୟ କ୍ଷୋଭ ପ୍ରକାଶ କରିଛନ୍ତ। ଅନ୍ୟପକ୍ଷରେ ବ୍ରାହ୍ମଣୀ ସେତୁରେ କାମ ବିଳମ୍ବକୁ ନେଇ ରାଜ୍ୟ ସରକାରଙ୍କୁ ଦୋଷ ଦେଇଛନ୍ତି କେନ୍ଦ୍ରମନ୍ତ୍ରୀ ଜୁଏଲ୍ ଓରାମ୍। ସେ କହିଛନ୍ତି, “ଆଇଜିଏଚ୍‌ରେ ବର୍ତ୍ତମାନ ୧୦ କୋଟି ଟଙ୍କା ଖର୍ଚ୍ଚରେ ବିଭିନ୍ନ କାମ ଚାଲିଛି। ଯନ୍ତ୍ରପାତି କିଣା ହେଉଛି। ସେତୁ କାମ ମଧ୍ୟ ଚାଲିଛି। ଶୀଘ୍ର ଏଗ୍ରିମେଣ୍ଟ୍ ହୋଇ ଡେଟ୍‌ ନିର୍ଦ୍ଧାରଣ କରାଯିବ। ଏହିସବୁ ଜାଣି ବି କିଛି ଲୋକ ଅଯଥାରେ ସ୍ୱର ଉତ୍ତୋଳନ କରୁଛନ୍ତି।”

ସେହପରି ବିଜେଡି ଶ୍ରମିକ ସେଲ୍ ସମ୍ପାଦକ ଆନନ୍ଦ ଚନ୍ଦ୍ର ମହାନ୍ତି କହିଛନ୍ତି,“ ଓଡ଼ିଶାରେ କିଛି ହେଉ ମୋଦି ସରକାର ଚାହୁଁ ନାହାନ୍ତି। ଆଇଏଚ୍‌ରେ ସୁପର ସ୍ପେସିଆଲିଟି ମେଡିକାଲ କରିବୁ କହିଥିଲେ, ଆଜି ପର୍ଯ୍ୟନ୍ତ ହେଇପାରିଲାନି। ସେହିଭଳି ବ୍ରାହ୍ମଣୀରେ ଦ୍ୱିତୀୟ ସେତୁ ନିର୍ମାଣ ପାଇଁ ତାଙ୍କର ଇଚ୍ଛା ନାହିଁ। କେବଳ ଲୋକଙ୍କ ବିରୋଧକୁ ସମ୍ମୁଖୀନ କରି ନପାରି ରାଜ୍ୟ ସରକାରଙ୍କୁ ଦୋଷ ଦେଉଛନ୍ତି।”