ନୂଆଦିଲ୍ଲୀ (ଓଡ଼ିଶା ରିପୋର୍ଟର): ପୋଲାଭରମ୍ ମାମଲାର ଆଜି ସୁପ୍ରମିକୋର୍ଟରେ ଶୁଣାଣି ହୋଇଥିଲା। ଏଥିରେ କୋର୍ଟ ମାଗିଥିବା ବ୍ୟାକ୍ ୱାଟର୍ ଷ୍ଟଡି ରିପୋର୍ଟ ଉପରେ କେନ୍ଦ୍ର ସରକାର ମତ ରଖିଥିଲେ। ଏହାପରେ ନଭେମ୍ବର ୧୫ ତାରିଖରେ ପୋଲାଭରମ୍ ମାମଲାର ଚୂଡ଼ାନ୍ତ ଶୁଣାଣି କରାଯିବାକୁ କୋର୍ଟ ରାୟ ଦେଇଛନ୍ତି।
ପରିବେଶ ଆଇନ ଉଲ୍ଲଂଘନ ନେଇ ଓଡ଼ିଶାର ଆବେଦନ ଉପରେ ଗତକାଲି କୋର୍ଟ ଶୁଣାଣି କରିଥିଲେ। ପ୍ରକଳ୍ପର ଜଳଧାରଣ କ୍ଷମତା ବୃଦ୍ଧି କରାଯାଇଥିବାରୁ ଆଉ ଥରେ ବ୍ୟାକ୍ ୱାଟର୍ ଷ୍ଟଡି କରାଯାଇଥିଲା ନା ନାହିଁ ଜଣାଇବାକୁ ସୁପ୍ରିମ୍କୋର୍ଟ କେନ୍ଦ୍ରକୁ ନିର୍ଦ୍ଦେଶ ଦେଇଥିଲେ।
ଆଜି କେନ୍ଦ୍ର ତା’ର ପକ୍ଷ ରଖିଥିଲା। ୨୦୧୧ରେ ଗୋପାଳ କୃଷ୍ଣ କମିଟି ବ୍ୟାକ୍ ୱାଟର ଷ୍ଟଡି କରି ରିପୋର୍ଟ ଦେଇଥିବାରୁ ଆଉ ଥରେ ଏହା କରାଯିବାର ଆବଶ୍ୟକତା ନାହିଁ ବୋଲି କେନ୍ଦ୍ର ସରକାର ଜଣାଇଥିଲେ। ଏହାପରେ କୋର୍ଟ ନଭେମ୍ବର ୧୫ ତାରିଖରେ ଚୂଡ଼ାନ୍ତ ଶୁଣାଣି ପାଇଁ ଦିନ ଧାର୍ଯ୍ୟ କରିଥିଲେ।