ଦେହ ତୁଳନାରେ ବଢ଼ିଯାଉଛି ମୁଣ୍ଡ

ବାଲେଶ୍ୱର(ରଣଜିତ ପାକଳ): ବୟସ ଅନୁସାରେ ନୁହେଁ, ଅପ୍ରାକୃତିକ ଭାବେ ବଢୁଛି ମୁଣ୍ଡ। ଚିକିତ୍ସା ପାଇଁ ଅର୍ଥ ସାଜିଛି ବାଧକ। ପ୍ରଶାସନକୁ ଅନେକ ଗୁହାରି ପରେ ବି ସାହାଯ୍ୟ ସହଯୋଗ ମିଳୁନି। ଏହା ହେଉଛି  ବାଲେଶ୍ୱର ଜିଲ୍ଲା ପଦ୍ମପୁରର ପ୍ରକାଶ ପାତ୍ରଙ୍କ ପରିବାରର କରୁଣ କାହାଣୀ।

ପ୍ରକାଶଙ୍କ ଦୁଇ ଝିଅ ମଧ୍ୟରୁ ସାନ ଝିଅ ଗାୟତ୍ରୀ ଏକ ବିରଳ ରୋଗରେ ପୀଡ଼ିତ। ଗାୟିତ୍ରୀଙ୍କ ମାତ୍ର ବୟସ ୫ବର୍ଷ। ହେଲେ ବୟସ ବଢିବା ସହିତ ଝିଅର ଆଶ୍ଚର୍ଯ୍ୟଜନକ ଭାବେ ବଢୁଛି ମୁଣ୍ଡ। ଯେଉଁ କଅଁଳ ବୟସରେ ଖେଳି ବୁଲିବା କଥା ସେହି ବୟସରେ ଦାଉ ସାଜିଛି ରୋଗ। ଗାୟତ୍ରୀଙ୍କ ଅବସ୍ଥା ଦେଖିଲେ କାହାର ବି ଆଖିରେ ଲୁହ ଆସିଯିବ। ଡାକ୍ତରଙ୍କ କହିବାନୁସାରେ ଝିଅର ମୁଣ୍ଡର ହାଡ ବଢୁଛି।  ପ୍ରକାଶ ଏକ ହୋଟେଲରେ କାମ କରି ପରିବାର ଚଳାନ୍ତି। ତେଣୁ ଝିଅର ଚିକିତ୍ସା ପାଇଁ ଅର୍ଥ ସାଜିଛି ବାଧକ।

ପ୍ରକାଶ ଝିଅକୁ ବଞ୍ଚାଇବା ପାଇଁ ରାଜଧାନୀ ଆଣିଥିଲେ। ହେଲେ ଦିଲ୍ଲୀ ଏମ୍ସ ନେବାକୁ ‌ଏଠାରେ ଡାକ୍ତର କହିଥିଲେ। ତେବେ ଝିଅର ଚିକିତ୍ସା ପାଇଁ ଯେଉଁ ଅର୍ଥ ଖର୍ଚ୍ଚ ହେବ ତାହା ବହନ କରିବା ପ୍ରକାଶଙ୍କ ପକ୍ଷେ ସମ୍ଭବ ନୁହେଁ। ଏଣୁ ସେ ଜିଲ୍ଲାପାଳଙ୍କୁ ଗୁହାରି କରି ରେଡକ୍ରସରୁ ଅଳ୍ପ କିଛି ଟଙ୍କା  ଯୋଗାଡ଼ କରିବାକୁ  ନିବେଦନ କରିଥିଲେ। ହେଲେ ଜିଲ୍ଲାପାଳ ଚିଠି ଖଣ୍ଡିଏ ଲେଖି ଦାୟିତ୍ୱ ସାରିଦେଇଛନ୍ତି।  ସେ ପ୍ରତିଶ୍ରୁତି ଦେଇଥିଲେ ସବୁ ମାଗଣାରେ ହୋଇଯିବ।  ହେଲେ MRI ରୁ ସିଟି ସ୍କାନ୍ ପର୍ଯ୍ୟନ୍ତ ସବୁଥିରେ ଖର୍ଚ୍ଚ କରି କରି ସର୍ବସାନ୍ତ ହୋଇଗଲେଣି ପ୍ରକାଶ। ଏବେ ସାହାଯ୍ୟ ପାଇଁ ସେ ପ୍ରଶାସନକୁ ଆକୁଳ ନିବେଦନ କରିଛନ୍ତି।