ଭୁବନେଶ୍ୱର/ ରାଉରକେଲା(ଓଡ଼ିଶା ରିପୋର୍ଟର): କରୋନା କାଳରେ ମେଡିକାଲ ଅକ୍ସିଜେନ୍ ପାଇଁ ସବୁଠି ହାହାକାର ସ୍ଥିତି । ସାଧାରଣ ରୋଗୀଙ୍କ କଥା ଛାଡ଼ନ୍ତୁ ଦେଶ ସାରା ଏବେ ମେଡିକାଲରେ ଥିବା ଗୁରୁତର କୋଭିଡ୍ ଆକ୍ରାନ୍ତଙ୍କୁ ବି ମିଳିପାରୁନି । ଫଳରେ ଅକାଳରେ ଚାଲିଯାଉଛି ବହୁ ଅମୂଲ୍ୟ ଜୀବନ। କରୋନାରେ ଦ୍ୱିତୀୟ ଲହର ବେଳେ ମେଡିକାଲ ଅକ୍ସିଜେନ୍ ସବୁଠୁ ବଡ଼ ଆବଶ୍ୟକତା ପାଲଟି ଥିବା ବେଳେ ଭୁବନେଶ୍ୱରର କିଛି ଶିଖ୍ ଯୁବକ ଓ ରାଉରକେଲାରେ ରୋଟାରୀ କ୍ଲବ୍ ସଦସ୍ୟ ଦେବଦୂତ ସାଜି ରୋଗୀଙ୍କ ଘରେ ପହଞ୍ଚାଉଛନ୍ତି ମୃତ୍ୟୁ ସଞ୍ଜୀବନୀ ଅକ୍ସିଜେନ୍।
କଟକ ଓ ଭୁବନେଶ୍ୱରରେ ହୋମ୍ ଆଇସୋଲେସନରେ ରହୁଥିବା କରୋନା ଆକ୍ରାନ୍ତଙ୍କୁ ବିନା ମୂଲ୍ୟରେ ଯୋଗାଇ ଦେଉଛନ୍ତି ଅକ୍ସିଜେନ୍ । ସେବା ଶିଖ୍ ଏଡ୍ ନାମକ ଏହି ଦାତବ୍ୟ ସଂସ୍ଥାର ସଦସ୍ୟ ରୋଗୀ ସମ୍ପର୍କୀୟଙ୍କ ଫୋନ୍ କଲ ପାଇବା ମାତ୍ରେ, ସେମାନଙ୍କ ଘରେ ପହଞ୍ଚାଇ ଦେଉଛନ୍ତି ଜୀବନ ରକ୍ଷାକାରୀ ଅକ୍ସିଜେନ୍ । ଏବେ ସାଧାରଣ ରୋଗୀଟିଏ ମେଡିକାଲ ଅକ୍ସିଜେନ୍ ପାଇବା ଦୂରହ ବ୍ୟାପାର ହୋଇଥିବା ବେଳେ ଶିଖ୍ ଏଡ୍ର ସ୍ୱେଚ୍ଛାସେବୀମାନେ କିନ୍ତୁ ସହଜରେ ଯୋଗାଇ ଦେଉଛନ୍ତି ଏ ବହୁମୂଲ୍ୟ ସେବା।
କୋଭିଡ୍ ମହାମାରୀ ବେଳେ ଅକ୍ସିଜେନ୍ ପାଇଁ ଚାରିଆଡ଼େ ହା ହା କାର ବେଳେ ସମାନ ଢଙ୍ଗରେ ରାଉରକେଲା ସହରରେ ବି ଅକ୍ସିଜେନ୍ ସଞ୍ଜୀବନୀ ସେବା ଯୋଗାଉଛନ୍ତି କିଛି ରୋଟାରୀ କ୍ଲବ୍ ସ୍ୱେଚ୍ଛାସେବୀ । ଫୋନ୍ କଲ ପାଇବା ମାତ୍ରେ ବଢାଇ ଦେଉଛନ୍ତି ସହାୟତାର ହାତ । ରୋଟାରୀଆନଙ୍କ ଏ ମହତ କାର୍ଯ୍ୟରେ ସହଯୋଗ କରୁଛି ସ୍ଥାନୀୟ ବାସନ୍ତୀ କଲୋନୀର ଘରୋଇ ହସ୍ପିଟାଲ ରାଜସ୍ଥାନ ସେବା ସଦନ। ହୋମ୍ ଆଇସୋଲେସନରେ ରହୁଥିବା ଆକ୍ରାନ୍ତଙ୍କୁ ଏମାନେ ଯୋଗାଇ ଦେଉଛନ୍ତି ୨୪ ଘଣ୍ଟିଆ ଅକ୍ସିଜେନ୍ ସେବା।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
