ବଲାଙ୍ଗିର (ସସ୍ମିତା ସାହୁ): ଦିନକ ପରେ ପଶ୍ଚିମ ଓଡ଼ିଶାର ଗଣପର୍ବ ନୂଆଁଖାଇ। ବାହାରେ ରହୁଥିବା ପଶ୍ଚିମ ଓଡ଼ିଶାବାସୀ ଏବେ ଗାଁ ମୁହାଁ। ରେଳ ଷ୍ଟେସନ୍ ଓ ବସ୍ଷ୍ଟାଣ୍ଡରେ ଖଚାଖଚ ଭିଡ଼। ସମସ୍ତଙ୍କ ମଧ୍ୟରେ ଉତ୍ସାହ ଉଦ୍ଦୀପନା। କେମିତି ଗାଁରେ ପହଞ୍ଚିବେ ଓ ପରିଜନଙ୍କ ସହ ମିଶି ନୂଆଁଖାଇ ପାଳନ କରିବେ।
ପରିବାର ଲୋକଙ୍କ ସହ ନୂଆଁଖାଇ ପାଳନ କରିବାକୁ ଦୂରଦୂରାନ୍ତରେ ରହୁଥିବା ଲୋକେ ଘରକୁ ଫେରୁଛନ୍ତି। କିଏ ୫ ଦିନ ତ କିଏ ୧୦ ଦିନ ଛୁଟି ଆଣିଛନ୍ତି। କେବଳ ଚାକିରିଆ ଲୋକେ ନୁହଁନ୍ତି, ବାହାରେ ଶ୍ରମିକ ଭାବେ କାମ କରୁଥିବା ଲୋକେ ବି ଘରକୁ ଫେରୁଛନ୍ତି।
କାହିଁ କେଉଁ କାଳରୁ ଏହି ପ୍ରଥା ରହି ଆସିଛି। କହିବାକୁ ଗଲେ, ଘର ବାହୁଡ଼ା ନୂଆଁଖାଇର ଏକ ପରମ୍ପରା ପାଲଟି ଯାଇଛି।
ପରିବାର ଲୋକେ ଫେରୁଥିବାରୁ ପରିଜନଙ୍କ ଭିଡ଼ ଦେଖିବାକୁ ମିଳୁଛି ରେଳ ଷ୍ଟେସନ୍ ଓ ବସ୍ଷ୍ଟାଣ୍ଡରେ। ପୁଅ, ବୋହୂ, ନାତି, ନାତୁଣୀକୁ ପାଛୋଟି ନେବାକୁ କିଏ ଅନାଇ ବସିଛି ତ ଆଉ କିଏ ବାପା, ଦାଦା, ମାଆ, ଖୁଡ଼ିଙ୍କୁ। ସମସ୍ତଙ୍କ ଆଖି ଫେରୁଥିବା ଟ୍ରେନ୍ ଓ ବସ୍ ଉପରେ ରହିଛି। କାଳେ ସେଥିରୁ ସେମାନଙ୍କ ପରିଜନ ଲୋକେ ଓହ୍ଲାଇବେ।
ପଶ୍ଚିମ ଓଡ଼ିଶାର ଅନ୍ୟ ସହର ପରି ବଲାଙ୍ଗିରରେ ବି ଦେଖିବାକୁ ମିଳୁଛି ଘର ବାହୁଡ଼ା ଉତ୍ସାହ। ବାହାରେ ରହି ପଢୁଥିବା ଛାତ୍ରଛାତ୍ରୀ ଗାଁକୁ ଫେରୁଛନ୍ତି। ପରିବାର ଲୋକଙ୍କ ସହିତ ନୂଆଁ ଖାଇବେ, ତା’ପରେ ଆରମ୍ଭ ହେବ ଭେଟଘାଟ କାର୍ଯ୍ୟକ୍ରମ।
ବିଶେଷ କରି ଯୁବଗର୍ବଙ୍କ ମଧ୍ୟରେ ଦେଖିବାକୁ ମିଳୁଛି ଉତ୍ସାହର ପରିବେଶ। ସାଙ୍ଗଙ୍କ ସହ ନୂଆଁଖାଇ ବାସି, ତିଆସି ପାଳନ କରିବା ସହିତ ମଉଜ ମଜଲିସ୍ କରିବା ପାଇଁ ବେଶି ଉତ୍ସାହିତ ଅଛନ୍ତି ଯୁବଗର୍ବ।
କିଛି କିଛି ଲୋକ ତ ଘରକୁ ଫେରି ଆସି ପରିବାର ଲୋକଙ୍କ ସହ ନୂଆଁଖାଇ ପ୍ରସ୍ତୁତିରେ ଲାଗି ପଡ଼ିଛନ୍ତି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
