ବଲାଙ୍ଗିର (ସସ୍ମିତା ସାହୁ): ବଲାଙ୍ଗିର-ଖୋର୍ଦ୍ଧା ରେଳପଥରେ ଆରମ୍ଭ ହେବ ରେଳଯାତ୍ରା। ବଲାଙ୍ଗିରରୁ ଭଇଁଷାପାଲି ଦୂରତା ୧୯ କିଲୋମିଟର ରେଳ ଲାଇନ୍ ବିଛାଇବା କାମ ସରିଯାଇଛି। ତେଣୁ ଭଇଁଷାପାଲି ଷ୍ଟେସନର କାମ ଜୋର୍ସୋର୍ରେ ଚାଲିଛି। ନୂଆକରି ପଡିଥିବା ରେଳ ଲାଇନ୍ରେ ଟ୍ରାଏଲ ରନ୍ ବି ଆରମ୍ଭ ହୋଇଛି।
ଦଶହରାରେ ଆରମ୍ଭ ହୋଇପାରେ ରେଳ ସେବା। ତେଣୁ ଧୀରେ ଧୀରେ ବାସ୍ତବତା ହେବାକୁ ଯାଉଛି ପ୍ରାକ୍ ସ୍ୱାଧୀନତାର ପରିକଳ୍ପନା। ନିଜ ଗାଁ ଦେଇ ରେଳରେ ଯିବେ ଲୋକେ। ରେଳ ସେବା ଆରମ୍ଭ ହେବାର ଖବର ପାଇବା ପରେ ଲୋକଙ୍କ ଭିତରେ ଉତ୍ସାହ ବଢିଯାଇଛି। ସାଧାରଣ ଲୋକଙ୍କଠାରୁ ଆରମ୍ଭ କରି ନେତାଙ୍କ ପର୍ଯ୍ୟନ୍ତ, ସମସ୍ତେ ଖୁସି ଅନୁଭବ କରୁଛନ୍ତି। କିନ୍ତୁ ଭଇଁଷାପାଲି ଆଗକୁ ସୋନପୁର ଜିଲ୍ଲାକୁ ଜମି ଅଧିଗ୍ରହଣକୁ ନେଇ ସମସ୍ୟା ରହିଛି। ତଥାପି କାମକୁ ତ୍ୱରାନ୍ୱିତ କରିବା ପାଇଁ ଅଣ୍ଟା ଭିଡ଼ିଛି ସୋନପୁର ପ୍ରଶାସନ।
୨୮୯ କିଲୋମିଟର ବିଶିଷ୍ଟ ଏହି ରେଳପଥକୁ ନିର୍ମାଣ ସଂପୂର୍ଣ୍ଣ କରିବା ପାଇଁ ୨୦୨୧ ମସିହାରେ ସାରିବାକୁ ଲକ୍ଷ୍ୟ ରଖାଯାଇଛି। କିନ୍ତୁ ବର୍ତ୍ତମାନ ସୁଦ୍ଧା ବୌଦ୍ଧ ଜିଲ୍ଲାରେ କୌଣସି ଜମି ଅଧିଗ୍ରହଣ ହୋଇନଥିବା ବିଭାଗୀୟ ସୂତ୍ରରୁ ଜଣାପଡିଛି।