ଏଠି ବୁନ୍ଦାଏ ପାଣି ପାଇଁ ସଂଘର୍ଷ: ପଥର କୂଅ ଓ ଚୂଆ ଉପରେ ନିର୍ଭର କରନ୍ତି ଲୋକେ

ବଲାଙ୍ଗିର/କେନ୍ଦୁଝର: ସରକାରଙ୍କ ବିକାଶ ମୂଳକ ଯୋଜନା ପହଞ୍ଚି ପାରୁନି ଗ୍ରାମାଞ୍ଚଳରେ। ସବୁଦିନ ପାଣି ମୁନ୍ଦାଏ ପାଇଁ ଯିବାକୁ ପଡୁଛି ମାଇଲେ ବାଟ। ହେଲେବି ମିଳୁନି ଶୁଦ୍ଧ ପାଣି। ବିପଦସଙ୍କୁଳ ଅବସ୍ଥାରେ ଲୋକ କରୁଛନ୍ତି ପାଣି ପାଇଁ ସଂଘର୍ଷ। ବଲାଙ୍ଗିର ଜିଲ୍ଲା କରୁଆଁଝର ଗାଁ ଏବଂ କେନ୍ଦୁଝରର ତେଲକୋଇର ରାଙ୍କି ଗାଁରେ ଲୋକେ ପାଣି ମୁନ୍ଦାଏ ପାଇଁ ହେଉଛନ୍ତି ହନ୍ତସନ୍ତ।

ବଲାଙ୍ଗିର ଜିଲ୍ଲା ଖପ୍ରାଖୋଲ ବ୍ଲକ କରୁଆଁଝର ଗାଁରେ ରହିଛି ଗୋଟିଏ ନଳକୂଅ। ହେଲେ ଖରାଦିନେ ଆସିଲେ ଏଥିରୁ ପାଣି ବାହାରେ ନାହିଁ। ତେଣୁ ୨୦ ଫୁଟ୍ ତଳୁ ଗାଁ ଲେକେ ପାଣି ସଂଗ୍ରହ କରନ୍ତି। ସେ ବି ବିପଦସଙ୍କୁଳ ଅବସ୍ଥାରେ। କାଠ ପୋଲ ଉପରେ ଠିଆ ହୋଇ ପାଣି କାଢନ୍ତି। ଟିକିଏ ଅସାବଧାନ ହେଲେ ଜୀବନ ପ୍ରତି ବିପଦ ରହିଛି।  ବିଲ ମଝିରେ ଥିବା ପଥର କୂଅ ପାଲଟିଛି ଗାଁଲୋକଙ୍କ ଏକମାତ୍ର ସାହାରା।  ତେବେ ଅନ୍ୟ କିଛି ଚାରା ନ ଥିବାରୁ ସବୁଦିନ ପାଣି ପାଇଁ ଏଇଭଳି ଚାଲୁଛି ସଂଘର୍ଷ। ବାରମ୍ବାର ପାଣି ପାଇଁ ଅଭିଯୋଗ ପରେ ବି ପ୍ରଶାସନ ଶୁଣୁ ନଥିବାରୁ ଲୋକେ ଅସୁରକ୍ଷିତ ଭାବେ କୂଅକୁ ଆଦରି ନେଇଛନ୍ତି।

ସରପଞ୍ଚ ବିଜୟଲକ୍ଷ୍ମୀ ବାଗ କହିଛନ୍ତି,“ ଖୁବଶୀଘ୍ର ସମସ୍ୟାର ସମାଧାନ କରାଯିବ।”

ସେହିପରି କେନ୍ଦୁଝର ଜିଲ୍ଲା ତେଲକୋଇ ବ୍ଲକ ରାଙ୍କି ଗାଁରେ ବି ସମାନ ଜଳକଷ୍ଟ।  ୩୦ଟି ଜୁଆଙ୍ଗ ଜନଜାତି ପରିବାର ଏଠି ରହୁଥିବାବେଳେ ଗାଁରେ ଥିବା ୩ଟି ନଳକୂଅ ଲୋକଙ୍କ କାମରେ ଆସିପାରୁନି। ଗାଁଠୁ ଦୂରରେ ଥିବା ଦୁଇଟି ଚୂଆ ଉପରେ ନିର୍ଭର କରନ୍ତି ଲୋକେ। ଆଉ କିଛି ଚାରା ନଥିବାରୁ ଗରା ମୁହଁରେ ଗାମୁଛା ବାନ୍ଧି ଚୂଆର ଦୂଷିତ ପାଣି ପିଉଛନ୍ତି ଲୋକେ। ତେବେ ଏଇ ଦୂଷିତ ପାଣି ପିଇ ବିଭିନ୍ନ ରୋଗରେ ଆକ୍ରାନ୍ତ ହେଉଥିଲେ ବି ଗାଁଲୋକଙ୍କ ସମସ୍ୟା କେହି ଶୁଣୁନଥିବା ଅଭିଯୋଗ ହୋଇଛି। ଏନେଇ ତେଲକୋଇ ବିଡିଓ ଦିଲ୍ଲୀପ ବାରା କହିଛନ୍ତି,“ ପଦକ୍ଷେପ ନିଆଯିବ।”