WhatsApp Number Launched: ହ୍ୱାଟସଅପରେ ମିଳିବ ୧୧ଟି ପ୍ରମୁଖ ରାଜସ୍ୱ ସେବା, ଭାଗଚାଷୀଙ୍କ ପାଇଁ ଆସିବ ଆଇନ

 
ରାଜ୍ୟବାସୀଙ୍କୁ ହାତପାଆନ୍ତାରେ ସହଜ ଓ ପାରଦର୍ଶୀ ରାଜସ୍ୱ ସେବା ଯୋଗାଇ ଦେବା ପାଇଁ ରାଜ୍ୟ ସରକାର ନିଷ୍ପତ୍ତି ନେଇଛନ୍ତି । ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଆଜି ୧୭ଟି ଜିଲ୍ଲାର ୫୬ଟି ତହସିଲରେ ନୂଆ ସବରେଜିଷ୍ଟ୍ରେସନ୍ ଅଫିସ ଉଦଘାଟନ କରିଛନ୍ତି । ଏହାସହିତ ହ୍ୱାଟସଅପ୍ ମାଧ୍ୟମରେ ୧୧ଟି ପ୍ରମୁଖ ରାଜସ୍ୱ ସେବା ଯୋଗାଇ ଦେବା ନିମନ୍ତେ ହ୍ୱାଟସଅପ୍ ବୋଟ୍ ବ୍ୟବସ୍ଥାର ଲୋକାର୍ପଣ କରିଛନ୍ତି । ମୁଖ୍ୟମନ୍ତ୍ରୀ ଏହି ଅବସରରେ ରାଜ୍ୟରେ ଭାଗଚାଷୀଙ୍କ ସ୍ୱାର୍ଥ ରକ୍ଷା ପାଇଁ ତାଙ୍କ ସରକାର ଏକ ନୂଆ ଆଇନ ଆଣିବେ ବୋଲି ମଧ୍ୟ ସଙ୍କେତ ଦେଇଛନ୍ତି ।

ଲୋକଙ୍କ ପାଖକୁ ଯିବ ସରକାର : ମୁଖ୍ୟମନ୍ତ୍ରୀ

ଏହି ଅବସରରେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ନିଜର ଅଭିଭାଷଣରେ କହିଛନ୍ତି ଯେ, ସରକାରଙ୍କ ମୁଖ୍ୟ ଲକ୍ଷ୍ୟ ହେଉଛି ଜନସାଧାରଣଙ୍କ ସେବାକୁ ସରଳ ଓ ସହଜ କରିବା । ଲୋକେ ସରକାରଙ୍କ ପାଖକୁ ଆସିବା ପରିବର୍ତ୍ତେ ସରକାର ନିଜେ ଲୋକଙ୍କ ଦ୍ୱାର ପାଖରେ ପହଂଚିବା ଉଚିତ । ସମସ୍ତ ତହସିଲରେ ରେଜିଷ୍ଟ୍ରେସନ୍ କାର୍ଯ୍ୟାଳୟ କାର୍ଯ୍ୟକ୍ଷମ ହେବା ଦ୍ୱାରା ତହସିଲ ଓ ପଞ୍ଜିକରଣ ବିଭାଗ ମଧ୍ୟରେ ଉତ୍ତମ ସମନ୍ୱୟ ରହିବ । ଏହାଦ୍ୱାରା ଜମି ରେଜିଷ୍ଟ୍ରେସନ୍ ପରେ ମ୍ୟୁଟେସନ ପାଇଁ ଆଉ ଅପେକ୍ଷା କରିବାକୁ ପଡ଼ିବ ନାହିଁ । ଏହି ବ୍ୟବସ୍ଥା ଦ୍ୱାରା ରେଜିଷ୍ଟ୍ରେସନ ପ୍ରକ୍ରିୟାରେ ପାରଦର୍ଶିତା ଆସିବ ଓ ମଧ୍ୟସ୍ଥ ବା ଦଲାଲମାନଙ୍କ ହସ୍ତକ୍ଷେପରେ ପୂର୍ଣ୍ଣଚ୍ଛେଦ ପଡ଼ିବ ।

ହ୍ୱାଟସଆପରେ ମିଳିବ ୧୧ଟି ପ୍ରମୁଖ ରାଜସ୍ୱ ସେବା

ରାଜସ୍ୱ ସେବାକୁ ଅଧିକ  ଲୋକାଭିମୁଖୀ କରିବା ପାଇଁ ମୁଖ୍ୟମନ୍ତ୍ରୀ ଶ୍ରୀ ମାଝୀ ଆଜି ଏକ ସ୍ୱତନ୍ତ୍ର ‘ହ୍ୱାଟସଆପ୍ ବଟ’ ବ୍ୟବସ୍ଥାର ଲୋକାର୍ପଣ କରିଛନ୍ତି । ଏଣିକି ଲୋକମାନେ ୯୪୩୭୨୯୨୦୦୦ Whatsapp ନମ୍ବର ବ୍ୟବହାର କରି ଘରେ ବସି ବିଭିନ୍ନ ପ୍ରମାଣପତ୍ର ପାଇଁ ଆବେଦନ ଓ ହାସଲ କରିପାରିବେ । ଏହି ବ୍ୟବସ୍ଥା ମାଧ୍ୟମରେ ଲୋକମାନେ ଆଉ ତହସିଲ କାର୍ଯ୍ୟାଳୟକୁ ନଯାଇ ନିଜ ମୋବାଇଲରୁ ହିଁ ୧୧ଟି ଗୁରୁତ୍ୱର୍ପୂର୍ଣ୍ଣ ସେବା ପାଇଁ ଆବେଦନ କରିପାରିବେ । ଏଥିରେ ଜମି ମ୍ୟୁଟେସନ କେସ୍‌, କୃଷି ଜମି କିସମ ପରିବର୍ତ୍ତନ, ବାସିନ୍ଦା ପ୍ରମାଣ ପତ୍ର, ଜାତି, ଆୟ, ଜନଜାତି, ଓବିସି, ଏସଇବିସି, ଲିଗାଲ ହେୟାର, ଇନକମ୍ ଆଣ୍ଡ ଆସେଟ୍ ଓ ଗାଡିଆନସିପ୍ ପ୍ରମାଣପତ୍ର ଭଳି ସେବାଗୁଡ଼ିକୁ ସାମିଲ କରାଯାଇଛି । ଆବେଦନ କରିବା ପରେ ପ୍ରମାଣପତ୍ର ମଧ୍ୟ ସେହି ହ୍ୱାଟସଆପ୍ ନମ୍ବରରେ ହିଁ ଉପଲବ୍ଧ ହେବ ।

ଭାଗଚାଷୀଙ୍କ ସ୍ୱାର୍ଥ ରକ୍ଷା ପାଇଁ ଆସିବ ନୂଆ ଆଇନ

ଏହି କାର୍ଯ୍ୟକ୍ରମରେ ମୁଖ୍ୟମନ୍ତ୍ରୀ ଶ୍ରୀ ମାଝୀ ଭାଗଚାଷୀଙ୍କ ସମସ୍ୟା ଉପରେ ଗୁରୁତ୍ୱାରୋପ କରିଛନ୍ତି । ବର୍ତ୍ତମାନର ବ୍ୟବସ୍ଥାରେ ଭାଗଚାଷୀଙ୍କର କୌଣସି ଆଇନଗତ ଅଧିକାର ନଥିବାରୁ ସେମାନେ ଅନେକ ସରକାରୀ ସୁବିଧାରୁ ବଞ୍ôଚତ ହେଉଛନ୍ତି । ଏହି ସମସ୍ୟାର ସମାଧାନ ପାଇଁ ଉଭୟ ଜମି ମାଲିକ ଓ ଭାଗଚାଷୀଙ୍କ ସ୍ୱାର୍ଥରକ୍ଷା ହେଲା ଭଳି ଏକ ସନ୍ତୁଳିତ ଆଇନ ଆଣିବାକୁ ରାଜସ୍ୱ ମନ୍ତ୍ରୀ ସୁରେଶ ପୂଜାରୀଙ୍କୁ ମୁଖ୍ୟମନ୍ତ୍ରୀ ଶ୍ରୀ ମାଝୀ ପରାମର୍ଶ ଦେଇଛନ୍ତି ।

ରାଜସ୍ୱ ମନ୍ତ୍ରୀ ଶ୍ରୀପୂଜାରୀ କହିଛନ୍ତି ଯେ, ଜମି ଓ ଏସମ୍ପତ୍ତି ସମ୍ପର୍କିତ ସମସ୍ତ ଦସ୍ତାବିଜ୍ ଶୀଘ୍ର ଓ ସମୟୋପଯୁକ୍ତ ଭାବେ ରେଜିଷ୍ଟ୍ରେସନ ହେବ । ରେଜିଷ୍ଟ୍ରେସନ ପ୍ରକ୍ରିୟାରେ ମଧ୍ୟସ୍ଥଙ୍କ ହସ୍ତକ୍ଷେପ ହ୍ରାସ ପାଇବ । ଆଗାମୀ ଦିନରେ ସେବା ପାଇବାରେ ବିଳମ୍ବ ଘଟିଲେ, ଅଭିଯୋଗଗୁଡିକୁ ସିଧାସଳଖ ହ୍ୱାଟସଆପ୍ ମାଧ୍ୟମରେ ପଠାଯିବାର ବ୍ୟବସ୍ଥା କରାଯାଉଛି । ସରକାରଙ୍କ ଏହି ପ୍ରତିଶ୍ରୁତିବଦ୍ଧତାକୁ ଦୋହରାଇବା ସହ ଆଗାମୀ ଦିନରେ ଅଭିଯୋଗ ସମାଧାନ ପ୍ରକ୍ରିୟାକୁ ମଧ୍ୟ ହ୍ୱାଟସଆପ୍ ସହ ଯୋଡ଼ାଯିବ ବୋଲି ସୂଚନା ଦେଇଛନ୍ତି ।

ସୂଚନାଯୋଗ୍ୟ, ଆଜି ରାଜ୍ୟର ୧୭ଟି ଜିଲ୍ଲାର ୫୬ଟି ତହସିଲରେ ୫୭ଟି ନୂଆ ସବ୍ ରେଜିଷ୍ଟ୍ରେସନ୍ କାର୍ଯ୍ୟାଳୟ ଉଦଘାଟିତ ହୋଇଛି । ଗତବର୍ଷ ନଭେମ୍ବର ମାସରେ ରାଜ୍ୟର ୧୩ଟି ଜିଲ୍ଲାର ୪୪ଟି ତହସିଲରେ ଏହି କାର୍ଯ୍ୟାଳୟ ଖୋଲାଯାଇଥିଲା ।