ଭୁବନେଶ୍ୱର (ଓଡ଼ିଶା ରିପୋର୍ଟର): ପ୍ରେମ ମାନିଲାନି ସମ୍ପର୍କ। ନିଜ ଦାଦାଙ୍କ ଶାଳୀ (ମାଉସୀ)କୁ ଭଲ ପାଇ ବସିଲେ ଯୁବକ। ଏଥିପାଇଁ ଉଭୟ ଘର ଛାଡ଼ିଥିଲେ। ପେଟ ପୋଷିବା ପାଇଁ କାମ ବି କଲେ। ହେଲେ ସେଥିରେ ପେଟ ପୋଷି ହେଲାନାହିଁ। ଶେଷରେ ସେମାନେ ଦୁନିଆ ଛାଡ଼ିବାକୁ ସ୍ଥିର କଲେ। ରାଜଧାନୀ ଭୁବନେଶ୍ୱରରେ ଏକ ଅର୍ଦ୍ଧନିର୍ମିତ ଆପାର୍ଟମେଣ୍ଟରେ ଦୁହେଁ ଝୁଲି ପଡ଼ିଲେ।
ପୂରା ଘଟଣା ଏମିତି। ମୟୂରଭଞ୍ଜର ଜିଲ୍ଲାର ଏକ ପ୍ରେମୀ ଯୁଗଳ ପରସ୍ପରକୁ ବହୁ ଭଲ ପାଉଥିଲେ। ସେମାନେ ଉଭୟ ସମ୍ପର୍କରେ ମାଉସୀ-ପୁତୁରା ହୋଇଥିବାରୁ ପରିବାର ଲୋକେ ସେମାନଙ୍କ ସମ୍ପର୍କକୁ ଗ୍ରହଣ କରିପାରୁନଥିଲେ। ସେଥିପାଇଁ ଉଭୟ ଘର ଛାଡ଼ି ଭୁବନେଶ୍ୱର ଚାଲି ଆସିଥିଲେ। ହେଲେ ରାଜଧାନୀରେ ଚଳିବା ପାଇଁ ପାଖରେ ପଇସା ନଥିଲା। ତେଣୁ ପେଟ ପୋଷିବା ପାଇଁ ସେମାନେ ଚନ୍ଦ୍ରଶେଖରପୁର ଥାନା ଅଞ୍ଚଳରେ ଏକ ଅର୍ଦ୍ଧ ନିର୍ମିତ ଆପାର୍ଟମେଣ୍ଟରେ ଶ୍ରମିକ ଭାବେ କାମ କରିବାକୁ ଯାଇଥିଲେ। ଠିକାଦାର ସେମାନଙ୍କୁ କାମ ମଧ୍ୟ ଦେଇଥିଲା।
କିନ୍ତୁ ଆଜି ସେମାନଙ୍କ ମୃତଦେହ ସେହି ଅର୍ଦ୍ଧ ନିର୍ମିତ ଆପାର୍ଟମେଣ୍ଟର ଏକ ରୁମ୍ରୁ ଉଦ୍ଧାର କରାଯାଇଛି। ସେମାନେ ଓଢ଼ଣୀ ବେକରେ ଲଗାଇ ଆତ୍ମହତ୍ୟା କରିଛନ୍ତି। କମିଶନରେଟ୍ ପୁଲିସ ମୃତଦେହ ଜବତ କରି ଘଟଣାର ତଦନ୍ତ ଆରମ୍ଭ କରିଛି।
ଅନ୍ୟପକ୍ଷରେ ଉଭୟଙ୍କ ପରିବାର ଲୋକେ ଭୁବନେଶ୍ୱରରେ ପହଞ୍ଚିଛନ୍ତି।