କରୋନା ମା’ଙ୍କୁ ବେରୋଜଗାର କରିବାରୁ ଚା ବିକୁଛନ୍ତି ୧୪ ବର୍ଷର ପୁଅ

ମୁମ୍ୱାଇ : ମହାମାରୀ କରୋନା କାହାର ଜୀବନଜୀବିକା ଛଡ଼ାଇ ନେଇଛି ତ କାହାକୁ ବଞ୍ଚିବା ପାଇଁ ନୂଆ ରାସ୍ତା ଦେଖାଇଛି। ଫଟୋରେ ଚାହା ତିଆରି କରୁଥିବା ଏହି ପିଲାଟିକୁ ଭଲ ଭାବରେ ଦେଖନ୍ତୁ। ପିଲାଟିର ବୟସ ମାତ୍ର ୧୪ ବର୍ଷ। ଯେଉଁ ବୟସରେ ସେ ଖେଳକୁଦ ଓ ପାଠପଢ଼ାରେ ସମୟ ବିତାଇବା କଥା, ସେ ବୟସରେ ସେ ତା କୁନି କାନ୍ଧରେ ପରିବାରର ଦାୟିତ୍ୱ ଉଠାଇଛି।

ସୁହ୍ୱାନ ନାମରେ ସୋଶାଲ ମିଡିଆରେ ଭାଇରାଲ୍‌ ହେଉଥିବା ଏହି ପିଲାଟିର କାହାଣୀ ଆପଣମାନେ ନିଶ୍ଚୟ ପଢ଼ିଥିବେ। ୧୪ ବର୍ଷୀୟ ସୁହ୍ୱାନଙ୍କର ମା’ ସ୍କୁଲରେ ଜଣେ ବସ୍‌ ଆଟେଣ୍ଡାଣ୍ଟ ଭାବରେ କାର୍ଯ୍ୟ କରନ୍ତି। ହେଲେ କରୋନା ଲକଡାଉନ ପାଇଁ ମା’ଙ୍କୁ କାମ ମିଳିବା ବନ୍ଦ ହୋଇଗଲା। ଏହାପରଠୁ ସୁହ୍ୱାନ ପରିବାର ଚଳାଇବା ପାଇଁ ନିଷ୍ପତ୍ତି ନେଇଛନ୍ତି।

ମିଡିଆ ରିପୋର୍ଟ ଅନୁସାରେ ପରିବାରର ଆର୍ଥିକ ସ୍ଥିତି ଠିକ୍‌ କରିବା ପାଇଁ ସେ ଚା ବିକ୍ରି କରୁଛନ୍ତି। ୧୨ ବର୍ଷ ପୂର୍ବରୁ ତାଙ୍କ ବାପାଙ୍କର ଦେହାନ୍ତ ହୋଇସାରିଛି। ଘରେ ସାନ ଭଉଣୀ ଅନଲାଇନ୍‌ କ୍ଲାସ ମାଧ୍ୟମରେ ପାଠ ପଢୁଛି। ସ୍କୁଲ ଖୋଲିଲେ ସେ ତାଙ୍କର ପାଠପଢ଼ା ଆରମ୍ଭ କରିବେ।

ମୁମ୍ୱାଇର ଭିଣ୍ଡି ବଜାରର ଏକ ଦୋକାନରେ ଚା ତିଆରି କରି ସୁହ୍ୱାନ ବିଭିନ୍ନ ସ୍ଥାନରେ ବିକ୍ରି କରିଥା’ନ୍ତି। ଦିନକୁ ପାଖାପାଖି ୩୦୦ରୁ ୪୦୦ ଟଙ୍କା ରୋଜଗାର କରନ୍ତି। ମା’ଙ୍କୁ ଦେବା ପରେ ଅବଶିଷ୍ଟ ଅର୍ଥକୁ ସେ ଭବିଷ୍ୟତ ପାଇଁ ସଞ୍ଚୟ କରିଥା’ନ୍ତି।

ସୂଚନାଯୋଗ୍ୟ, କିଛିଦିନ ତଳେ ସୁହ୍ୱାନଙ୍କର ଫଟୋ ସୋଶାଲ ମିଡିଆରେ ଭାଇରାଲ୍‌ ହେବା ପରେ ଏହି ଘଟଣା ସାମ୍ନାକୁ ଆସିଥିଲା। ତାଙ୍କର ଏହି ଉଦ୍ୟମକୁ ଚାରିଆଡେ ପ୍ରଶଂସା ମଧ୍ୟ କରାଯାଉଛି।

 

 

ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।