ଓଡ଼ିଶା କ୍ୟାଡ଼ରର ଆଇପିଏସଙ୍କୁ ଜୀବନସାଥୀ କରିବା ପରେ ପଶ୍ଚିମବଙ୍ଗ କ୍ୟାଡ଼ର ଛାଡ଼ିଛନ୍ତି ୨ଜଣ ଆଇପିଏସ୍ । ଆଉ କେନ୍ଦ୍ର ସରକାରଙ୍କ ଅନୁମତି ପରେ ଆନୁଷ୍ଠାନିକ ଭାବେ ଓଡ଼ିଶା କ୍ୟାଡ଼ରରେ ଯୋଗ ଦେଇଛନ୍ତି । ମୟୂରଭଞ୍ଜ ଜିଲ୍ଲା ଏସପି ଏସ.ସୁଶ୍ରୀ ଓ ନୂଆପଡ଼ା ଏସଡିପିଓ ଅମ୍ରିତ୍ପାଲ ସିଂଙ୍କୁ ବିବାହ କରିଥିବାରୁ ପଶ୍ଚିମବଙ୍ଗ କ୍ୟାଡ଼ରର ଆଇପିଏସ୍ ୨୦୧୮ ବ୍ୟାଚର ଡି.ନାଗରାଜ ଓ ୨୦୨୧ ବ୍ୟାଚ ଆଇପିଏସ୍ ଅମ୍ରିତପାଲ କୌରଙ୍କୁ ଓଡ଼ିଶା କ୍ୟାଡ଼ରକୁ ପରିବର୍ତ୍ତନ ନିମନ୍ତେ ଅନୁମତି ମିଳିଛି ।
ସୂଚନା ଅନୁସାରେ, ମୟୂରଭଞ୍ଜ ଜିଲ୍ଲା ପୁଲିସ ଏସପି ଭାବେ କାର୍ଯ୍ୟରତ ୨୦୧୮ ବ୍ୟାଚ୍ ଆଇପିଏସ୍ ଏସ.ସୁଶ୍ରୀଙ୍କ ସ୍ୱାମୀ ଡି.ନାଗରାଜ ନିଜର ମୂଳ କ୍ୟାଡ଼ର ପଶ୍ଚିମବଙ୍ଗକୁ ଛାଡ଼ି ଓଡ଼ିଶା କ୍ୟାଡ଼ରକୁ ବାଛିଛନ୍ତି । ଏଥିପାଇଁ କେନ୍ଦ୍ର ସରକାର ମଧ୍ୟ ଗତକାଲି ଅନୁମତି ଦେବା ସହ ବିଧିବଦ୍ଧ ବିଜ୍ଞପ୍ତି ପ୍ରକାଶ ପାଇଛି । ଶ୍ରୀ ନାଗରାଜ ୨୦୧୮ ବ୍ୟାଚର ପଶ୍ଚିମବଙ୍ଗ କ୍ୟାଡ଼ରର ଆଇପିଏସ୍ । ଉଭୟ ସୁଶ୍ରୀ ଓ ନାଗରାଜଙ୍କ ଘର କେରଳରେ ଏବଂ ସେମାନେ ଗତବର୍ଷ ବିବାହ କରିଥିଲେ ।
ସେହିପରି ଏବେ ନୂଆପଡ଼ା ଏସଡିପିଓ ଭାବେ କାର୍ଯ୍ୟରତ ୨୦୨୧ ବ୍ୟାଚ୍ ଆଇପିଏସ୍ ଅମ୍ରିତପାଲ ସିଂଙ୍କ ପତ୍ନୀ ଅମ୍ରିତପାଲ କୌର ନିଜର ମୂଳ କ୍ୟାଡ଼ର ପଶ୍ଚିମବଙ୍ଗ ଛାଡ଼ି ଓଡ଼ିଶା କ୍ୟାଡ଼ରକୁ ବାଛିଛନ୍ତି । କେନ୍ଦ୍ର ସରକାର ତାଙ୍କୁ ଅନୁମତି ଦେବା ପରେ ସେ ବିଧିବଦ୍ଧ ଭାବେ ଓଡ଼ିଶାରେ ଯୋଗ ଦେଇ ଏବେ ବଲାଙ୍ଗୀର ଜିଲ୍ଲା ଅତିିରିକ୍ତ ଏସପି ଭାବେ କାର୍ଯ୍ୟ କରୁଥିବା ଜଣାପଡ଼ିଛି ।