୧୭ରେ ସର୍ବଦଳୀୟ ବୈଠକ, ସ୍ୱତନ୍ତ୍ର ଅଧିବେଶନରେ ଆସିବ ୪ଟି ବିଲ୍!

ଆସନ୍ତା ୧୮ରୁ ୫ ଦିନ ଧରି ସଂସଦର ସ୍ୱତନ୍ତ୍ର ଅଧିବେଶନ ବସିବ। ଏହାର ଦିନକ ପୂର୍ବରୁ ଅର୍ଥାତ ସେପ୍ଟେମ୍ବରରେ ୧୭ରେ ସର୍ବଦଳୀୟ ବୈଠକ ବସିବ। ଆଜି କେନ୍ଦ୍ର ସଂସଦୀୟ ବ୍ୟାପର ମନ୍ତ୍ରୀ ପ୍ରହ୍ଲାଦ ଯୋଶୀ ଟ୍ୱିଟ କରି ୧୭ ତାରିଖରେ ସର୍ବଦଳୀୟ ବୈଠକ ବସିବାକୁ ଯାଉଥିବା ସୂଚନା ଦେଇଛନ୍ତି।

ସେ କହିଛନ୍ତି, ଚଳିତ ମାସ ୧୮ ତାରିଖରୁ ଆରମ୍ଭ ହେଉଥିବା ସଂସଦର ବିଶେଷ ଅଧିବେଶନ ପୂର୍ବରୁ ୧୭ ତାରିଖ ଅପରାହ୍ନ ୪.୩୦ରେ ସମସ୍ତ ଦଳର ଫ୍ଲୋର ନେତାମାନଙ୍କ ବୈଠକ ବସିବ। ସମାନ ନିମନ୍ତ୍ରଣ ନେତାମାନଙ୍କୁ ଇ-ମେଲ ଯୋଗେ ମଧ୍ୟ ପଠାଇ ଦିଆଯାଇଛି। ଚିଠି ପଠାଯିବ ବୋଲି ସେ କହିଛନ୍ତି। ଏହାକୁ ସେ କନ୍ନଡ ଭାଷାରେ ମଧ୍ୟ ଲେଖିଛନ୍ତି।

ପ୍ରହ୍ଲାଦ ଯୋଶୀ କର୍ଣ୍ଣାଟକା ଧରୱାଡ ନିର୍ବାଚନ ମଣ୍ଡଳୀରୁ ଲୋକସଭାକୁ ଯାଇଛନ୍ତି। ତେଣୁ ସେ ଇଂରାଜୀ ବ୍ୟତୀତ କନ୍ନଡ ଭାଷାରେ ମଧ୍ୟ ସର୍ବଦଳୀୟ ବୈଠକ ବସିବାକୁ ଯାଇଥିବା ସୂଚନା ଦେଇଛନ୍ତି।

Ahead of the parliament session from the 18th of this month, an all-party floor leaders meeting has been convened on the 17th at 4.30 PM. The invitation for the same has been sent to concerned leaders through email.
Letter to follow

ಇದೇ ಸೆಪ್ಟೆಂಬರ್ 18 ರಿಂದ ಆರಂಭವಾಗಲಿರುವ ವಿಶೇಷ…

— Pralhad Joshi (@JoshiPralhad) September 13, 2023

୧୭ ତାରିଖରେ ବସିବାକୁ ଯାଉଥିବା ସର୍ବଦଳୀୟ ବୈଠକରେ ସମ୍ଭବତଃ ଅଧିବେଶନର ଏଜେଣ୍ଡା ସମ୍ପର୍କରେ ଆଲୋଚନା ହେବ। କାରଣ ଏଯାଏ ସରକାର କ’ଣ ପାଇଁ ୫ ଦିନିଆ ଅଧିବେଶନ ଡାକୁଛନ୍ତି, ତା’ର ସୂଚନା ମିଳିନାହିଁ।

କେନ୍ଦ୍ର ସରକାର ସ୍ୱତନ୍ତ୍ର ଅଧିବେଶନ ବେଳେ ୪ଟି ବିଲ୍‌ ଆଣିବାର ସମ୍ଭାବନା ରହିଛି। ବୁଧବାର କେନ୍ଦ୍ର ସରକାରଙ୍କ ପକ୍ଷରୁ ଅଧିବେଶର ସମ୍ଭାବ୍ୟ ଏଜେଣ୍ଡା ବିଷୟରେ ସୂଚନା ଦିଆଯାଇଛି। ଲୋକସଭାରେ କେନ୍ଦ୍ର ସରକାର The Advocates (Amendment) Bill, 2023 ଓ The Press and Registeration of Periodicals Bill, 2023 ଆଣିବେ। ଏହି ଦୁଇ ବିଲ୍‌ ଅଗଷ୍ଟ ୩ ତାରିଖରେ ରାଜ୍ୟସଭାରେ ପାରିତ ହୋଇଥିଲା। ତେଣୁ ଏବେ ଏଗୁଡ଼ିକ ଲୋକସଭାରେ ଆଗତ ହେବ। 

ସେହିପରି ରାଜ୍ୟସଭାରେ ସାଂସଦମାନେ The Post Office Bill, 2023 ଓ The Chief Election Commissioner and other Election Commissioners (Appointment, Conditions of Service and Term of Office) Bill, 2023 ଉପରେ ବିତର୍କ କରି ପାରନ୍ତି। ଏହି ଦୁଇ ବିଲ୍‌କୁ ଅଗଷ୍ଟ ୧୦ ତାରିଖରେ ରାଜ୍ୟସଭାରେ ଉପସ୍ଥାପନ କରାଯାଇଥିଲା। ଏବେ ଏହା ଉପରେ ବିତର୍କ ହୋଇପାରେ। 

ଅନ୍ୟପକ୍ଷରେ ସରକାରୀ ସୂତ୍ରକୁ ଆଧାର କରି କିଛି ରିପୋର୍ଟ ମଧ୍ୟ ପ୍ରକାଶ କରାଯାଇଛି। ରିପୋର୍ଟ ଅନୁସାରେ, ସରକାର ଦେଶର ନାଁକୁ ଇଣ୍ଡିଆରୁ କେବଳ ଭାରତ କରିବାକୁ ସ୍ୱତନ୍ତ୍ର ବିଲ୍‌ ଏହି ଅଧିବେଶନରେ ଆଣିବେ। ଏହାବାଦ ଗୋଟିଏ ଦେଶ, ଗୋଟିଏ ନିର୍ବାଚନ, ମହିଳା ସଂରକ୍ଷଣ ବିଲ ଓ ୟୁସିସି ବିଲ୍‌ ମଧ୍ୟ ଏହି ଅଧିବେଶନରେ ଆସି ପାରେ ବୋଲି କୁହାଯାଉଛି।