OR 
ସାଧାରଣ ନିର୍ବାଚନ ପୂର୍ବରୁ ରାଜ୍ୟପାଳ ରଘୁବର ଦାସଙ୍କ ମୁହଁରେ ସରକାର ନିଜର ପ୍ରଶଂସାର ଲମ୍ବାଚଉଡ଼ା ଚିଠା ଉପସ୍ଥାପନ କରିଛନ୍ତି। ଷୋଡ଼ଶ ବିଧାନସଭାର ଏହି ସ୍ୱଳ୍ପକାଳୀନ ଓ ଶେଷ ଅଧିବେଶନରେ ରାଜ୍ୟପାଳ ଶ୍ରୀ ଦାସ ପ୍ରଥମଥର ପାଇଁ ଅଭିଭାଷଣ ରଖିଛନ୍ତି । ଆଉ ରାଜ୍ୟପାଳଙ୍କ ମୁହଁରେ ରାଜ୍ୟ ସରକାର ନିଜ ପିଠି ଥାପୁଡ଼ାଇବାର କୌଣସି ସୁଯୋଗ ହାତଛଡ଼ା କରିନାହାନ୍ତି । ମଠମନ୍ଦିରର ଭଙ୍ଗାଗଢ଼ା, ସ୍କୁଲ-କଲେଜ କାନ୍ଥରେ ରଙ୍ଗବୋଳି ରୂପାନ୍ତରଣର ନୂଆ ପରିଭାଷା ଦେଇଥିବା ରାଜ୍ୟ ସରକାର ‘ପ୍ରଥମ ବିଶ୍ୱ ଓଡ଼ିଆ ଭାଷା ସମ୍ମିଳନୀ’କୁ ବିରଳ ପଦକ୍ଷେପ ବୋଲି କହିବାକୁ ପଛାଇ ନାହାନ୍ତି । ରାଜ୍ୟରେ ସବୁ ଚାଷ ଜମିକୁ ଜଳସେଚନ ସୁବିଧା ମିଳିଛି କି ନାହିଁ ତାକୁ ନେଇ ଅନିଶ୍ଚିତତା ଲାଗି ରହିଥିବାବେଳେ ୫ବର୍ଷରେ ମାତ୍ର ୫୩୩୮୯ଜଣଙ୍କୁ ସରକାରୀ ନିଯୁକ୍ତି ମିଳିଛି ବୋଲି ରାଜ୍ୟପାଳଙ୍କ ଅଭିଭାଷଣରୁ ଜଣାପଡ଼ିଛି ।
ସୂଚନା ଅନୁସାରେ, କ୍ରମାଗତ ୨୪ବର୍ଷ ଧରି କ୍ଷମତାରେ ରହିଥିଲେ ମଧ୍ୟ ରାଜ୍ୟରେ ସ୍ଥାୟୀ ଭିତ୍ତିଭୂମି ନିର୍ମାଣ ଓ ବିକାଶ ସହ ନିଯୁକ୍ତି ଓ ଜଳସେଚନ କ୍ଷମତା ବୃଦ୍ଧି ଦିଗରେ ଆଖିଦୃଶିଆ ପଦକ୍ଷେପ ନେବାରେ ବିଫଳ ହୋଇଥିବା ଆଜି ରାଜ୍ୟପାଳଙ୍କ ଅଭିଭାଷଣରୁ ସ୍ପଷ୍ଟ ହୋଇଛି । ରାଜ୍ୟରେ ଶତପ୍ରତିଶତ ବ୍ଲକକୁ ସର୍ବନିମ୍ନ ୩୫ପ୍ରତିଶତ ଜଳସେଚନ ସୁବିଧା କଥା କହିବାର ଦୁଇ ଦଶନ୍ଧି ପରେ ବି ସରକାର ଏହି ଲକ୍ଷ୍ୟକୁ ହାସଲ କରିପାରିନାହାନ୍ତି । ଆଉ ଚଳିତବର୍ଷ ରାଜ୍ୟପାଳଙ୍କ ଅଭିଭାଷଣରେ ବି ରାଜ୍ୟରେ କେତେ ଜମିକୁ ଜଳସେଚନ ସୁବିଧା ରହିଛି ତାକୁ ସମ୍ପୂର୍ଣ୍ଣ ଲୁଚାଇ ରଖିବାକୁ ଚେଷ୍ଟା କରିଛନ୍ତି । କେବଳ ସେତିକି ନୁହେଁ ରାଜ୍ୟରେ ଗତ ୫ବର୍ଷ ମଧ୍ୟରେ ମାତ୍ର ୫୩୩୮୯ଜଣଙ୍କୁ ସରକାରୀ ନିଯୁକ୍ତି ମିଳିପାରିଥିବା ରାଜ୍ୟପାଳଙ୍କ ମୁହଁରେ ସରକାର ସ୍ୱୀକାର କରିଛନ୍ତି । ରାଜ୍ୟରେ ବେକାରୀ ଅଭିବୃଦ୍ଧି ହାର ଏକ ପ୍ରତିଶତ ହ୍ରାସ ପାଇଛି ବୋଲି ସରକାର ଦାବି କରୁଛନ୍ତି । ମାତ୍ର ମୁଖ୍ୟମନ୍ତ୍ରୀ ନିଯୁକ୍ତି ସୃଷ୍ଟି ଯୋଜନାରେ ଏପର୍ଯ୍ୟନ୍ତ କେତେ ତାହା ରାଜ୍ୟପାଳଙ୍କ ଅଭିଭାଷଣରେ ଉଲ୍ଲେଖ ନାହିଁ ।
ରାଜ୍ୟପାଳଙ୍କ ଅଭିଭାଷଣ ଅନୁସାରେ, ବିଗତ ୫ବର୍ଷ ମଧ୍ୟରେ ରାଜ୍ୟ ସରକାରଙ୍କ ନିଯୁକ୍ତି ସଂସ୍ଥା ଓଡ଼ିଶା ଲୋକସେବା ଆୟୋଗ ୧୫୦୬୯ଜଣଙ୍କୁ, ଓଡ଼ିଶା ଷ୍ଟାଫ ସିଲେକ୍ସନ ଆୟୋଗ ୧୨୯୮୮ଜଣଙ୍କୁ ଓ ଓଡ଼ିଶା ସବଅର୍ଡିନେଟ୍ ଷ୍ଟାଫ ସିଲେକ୍ସନ କମିଶନଙ୍କ ମାଧ୍ୟମରେ ୧୮୯୦୨ଜଣ ଏବଂ ପୁଲିସ ବୋର୍ଡ ମାଧ୍ୟମରେ ୬୪୪୦ଜଣଙ୍କୁ ସରକାରଙ୍କ ବିଭିନ୍ନ ବିଭାଗ ଓ ଜିଲ୍ଲାସ୍ତରୀୟ କାର୍ଯ୍ୟାଳୟରେ ନିଯୁକ୍ତି ଦେବାକୁ ସୁପାରିଶ କରିଛନ୍ତି । ତେବେ ଏହି ୫ବର୍ଷ ମଧ୍ୟରେ ସରକାର ୬୬ଟି ନୂଆ ଥାନା, ୨ଟି ପୁଲିସ ଆଉଟପୋଷ୍ଟ ଓ ୨ଟି ଏସଡିପିଓ ଅଫିସ୍ ଖୋଲି ମୋଟ ୫୫୭୭ଟି ନୂଆ ପଦବୀ ସୃଷ୍ଟି କରିଥିଲେ ମଧ୍ୟ ପୁଲିସ ବାହିନୀରେ ମାତ୍ର ୬୪୪୦ଜଣଙ୍କୁ ନିଯୁକ୍ତି ମିଳିଛି । ଏହି ୫ବର୍ଷ ମଧ୍ୟରେ ବହୁ ସଂଖ୍ୟାରେ ପୁଲିସ କର୍ମଚାରୀ ଅବସର ନେଇଥିବେ ।
Also Read
ସେହିପରି ପ୍ରଧାନମନ୍ତ୍ରୀ ନିଯୁକ୍ତି ସୃଷ୍ଟି କାର୍ଯ୍ୟକ୍ରମ ମାଧ୍ୟମରେ ୨୦୦୮-୦୯ରୁ ୨୦୨୨-୨୩ ମସିହା ମଧ୍ୟରେ ବିଗତ ୧୫ବର୍ଷରେ ମୋଟ ୪୧୪୫୨ଟି ଉଦ୍ୟୋଗକୁ ସର୍ବାଧିକ ୯୪୯.୯୯କୋଟି ଟଙ୍କା ସହାୟତା ଦିଆଯାଇଥିବାବେଳେ ୩ଲକ୍ଷ ୩୭ହଜାର ୮୩ଜଣଙ୍କ ବ୍ୟକ୍ତିଙ୍କ ପାଇଁ ନିଯୁକ୍ତି ସୁଯୋଗ ସୃଷ୍ଟି ହୋଇଛି ।
ଅନ୍ୟପକ୍ଷରେ ରାଜ୍ୟ ସରକାର କେତେଜଣଙ୍କୁ ନିଯୁକ୍ତି ସୁଯୋଗ ଦେଇଛନ୍ତି ତା’ର ବିବରଣୀ ରଖିନାହାନ୍ତି । ଓଲଟା ୨୦୨୩ ଡିସେମ୍ବର ସୁଦ୍ଧା ରାଜ୍ୟରେ ମୋଟ ଏମଏସଏମଇ କ୍ଷେତ୍ରରେ ମୋଟ ୪.୬୨ଲକ୍ଷ ଉଦ୍ୟୋଗ ‘ଉଦ୍ୟମ’ପୋର୍ଟାଲରେ ପଞ୍ଜିକୃତ ହୋଇଛି ବୋଲି ହିସାବ ଦେଇଛନ୍ତି । ମାତ୍ର ରାଜ୍ୟ ସରକାରଙ୍କ ଦକ୍ଷତା ବିକାଶ କାର୍ଯ୍ୟକ୍ରମ ଓ ମୁଖ୍ୟମନ୍ତ୍ରୀ ନିଯୁକ୍ତି ସୃଷ୍ଟି କାର୍ଯ୍ୟକ୍ରମରେ କେତେଜଣଙ୍କୁ ନିଯୁକ୍ତି ସୁଯୋଗ ଅବା ଆତ୍ମସ୍ୱାବଲମ୍ବୀ ହୋଇଛନ୍ତି ତା’ର ହିସାବ ସରକାର ଦେଇନାହାନ୍ତି ।
ସେହିପରି ରାଜ୍ୟ ସରକାର ‘ମେକ୍ ଇନ୍ ଓଡ଼ିଶା’ରେ ଲକ୍ଷ ଲକ୍ଷ କୋଟି ଟଙ୍କା ପୁଞ୍ଜି ନିବେଶର ସମ୍ଭାବନା ଥିବାର ହିସାବ ଦେଇଥିଲେ ମଧ୍ୟ ତାହା ଆଜି ପର୍ଯ୍ୟନ୍ତ କାର୍ଯ୍ୟକ୍ଷମ ହୋଇପାରିନି । ରାଜ୍ୟରେ କେତେ ବୃହତ୍ ଶିଳ୍ପ ଏବେ କାର୍ଯ୍ୟକ୍ଷମ ଅଛି ଓ ସେମାନଙ୍କ ଯୋଗୁ କେତେ ନିଯୁକ୍ତି ସୁଯୋଗ ସୃଷ୍ଟି ହୋଇଛି ତାକୁ ନେଇ ମଧ୍ୟ ସରକାର ନିରବ ରହିଛନ୍ତି ।
କୌଣସି ଗୋଟିଏ ସ୍ଥାୟୀ ଭିତ୍ତିଭୂମି ବିକାଶ ଯାହା ମାଧ୍ୟମରେ ରାଜ୍ୟରେ ଅଧିକ ନିଯୁକ୍ତି ସୁଯୋଗ ସୃଷ୍ଟି ହୋଇପାରିବ ତାହା ଉଲ୍ଲେଖ କରିବାକୁ ଉଚିତ୍ ମଣିନାହାନ୍ତି । ଆଉ ନିଜର ପ୍ରଚାର ପାଇଁ ୮୦୦କୋଟି ଟଙ୍କା ବ୍ୟୟରେ ଶ୍ରୀମନ୍ଦିର ପ୍ରକଳ୍ପ, ୨୦୦କୋଟି ଟଙ୍କାର ସମଲେଇ ପ୍ରକଳ୍ପ ଓ ୨୮୩କୋଟି ଟଙ୍କାରେ ଏକାମ୍ର ପ୍ରକଳ୍ପ କାର୍ଯ୍ୟ କଥା କହି ନିଜର ପିଠି ଥାପୁଡ଼େଇଛନ୍ତି ।
ରାଜ୍ୟରେ ଦିନକୁ ଦିନ ବେକାରୀ ସମସ୍ୟା ବଢ଼ିବାରେ ଲାଗିଥିବାବେଳେ ସରକାରଙ୍କ ବିଭିନ୍ନ ବିଭାଗରେ ପ୍ରାୟ ୧ଲକ୍ଷରୁ ଅଧିକ ସ୍ଥାୟୀ ପଦବୀ ଖାଲି ପଡ଼ିଛି । ମାତ୍ର ସରକାର ଏସବୁ ପଦବୀ ପୂରଣ କରିବାରେ ଆନ୍ତରିକତା ଦେଖାଉନାହାନ୍ତି । ସେହିପରି ରାଜ୍ୟର ମୋଟ ଅଭିବୃଦ୍ଧିରେ କୃଷି କ୍ଷେତ୍ରର ଭାଗିଦାରୀ ୨୨.୫ପ୍ରତିଶତ ଥିବା ତଥା କୃଷି ଓ ଆନୁସଙ୍ଗିକ କ୍ଷେତ୍ର ଯୋଗୁ ରାଜ୍ୟରେ ୪୫.୮୦ପ୍ରତିଶତ ଲୋକଙ୍କୁ ନିଯୁକ୍ତି ସୁଯୋଗ ମିଳିପାରିଛି ବୋଲି କହୁଥିଲେ ମଧ୍ୟ ଏହି କ୍ଷେତ୍ର ପ୍ରତି ରାଜ୍ୟ ସରକାର ସମ୍ପୂର୍ଣ୍ଣ ଆଖିବୁଜି ଦେଇଥିବା ଜଣାପଡ଼ିଛି ।
TAGS
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
