‘ଆମ ଶାସନ’ର ଆରମ୍ଭ କଲେ ମୋହନ ସରକାର, ବିଜେଡି କଲା କଟାକ୍ଷ

ରାଜ୍ୟରେ ନାଗରିକକେନ୍ଦ୍ରିକ ଶାସନ ବ୍ୟବସ୍ଥାକୁ ଅଧିକ ସୁଦୃଢ଼ କରିବା ଲାଗି ‘ଆମ ଶାସନ’ ନାମକ ଏକ ପଦକ୍ଷେପକୁ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଆଜି ଶୁଭାରମ୍ଭ କରିଛନ୍ତି । ଏହି ବୈପ୍ଲବିକ ପଦକ୍ଷେପ ସରକାରୀ ସେବାର ଗୁଣବତ୍ତା ବୃଦ୍ଧି, ସ୍ୱଚ୍ଛତା ଓ ଉତ୍ତରଦାୟିତାକୁ ପ୍ରୋତ୍ସାହନ ଏବଂ ଜନସାଧାରଣଙ୍କ ସହ ସିଧାସଳଖ ସଂପର୍କ ସ୍ଥାପନ କରିବାକୁ ଲକ୍ଷ୍ୟ ରଖିଛି ବୋଲି ସରକାରଙ୍କ ପକ୍ଷରୁ କୁହାଯାଇଛି । ତେବେ ମୁଖ୍ୟ ବିରୋଧୀ ଦଳ ବିଜେଡି ଏହାକୁ ତାଙ୍କ ସରକାରଙ୍କ କାର୍ଯ୍ୟର ‘କପି-ପେଷ୍ଟ’ ଓ ନାମକରଣ ପରିବର୍ତ୍ତନ ବୋଲି କହି କଟାକ୍ଷ କରିଛି ।

‘ଆମ ଶାସନ’ର ମୂଳ ଉଦ୍ଦେଶ୍ୟ

ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟରୁ ଜାରି ସୂଚନା ଅନୁସାରେ, ‘ଆମ ଶାସନ’ ହେଉଛି ଓଡ଼ିଶା ସରକାରଙ୍କର ଏକ ଅଭିନବ ପଦକ୍ଷେପ, ଯାହା ନାଗରିକଙ୍କ ଆଶା ଓ ଆକାଂକ୍ଷାକୁ ପୂରଣ କରିବା ସହ ସରକାରୀ ପ୍ରତିଷ୍ଠାନଗୁଡ଼ିକୁ ସ୍ମାର୍ଟ, ଆଧୁନିକ, ଦକ୍ଷ ଏବଂ ସ୍ୱଚ୍ଛ କରାଇବ ।  ଜନସାଧାରଣଙ୍କ ମତାମତକୁ ପ୍ରାଥମିକତା ଦେଇ ସେବାର ଗୁଣବତ୍ତା ଉନ୍ନତ କରିବା, ଅଧିକାରୀଙ୍କୁ ଉତ୍ତରଦାୟୀ କରିବା ଓ ସରକାରୀ କାର୍ଯ୍ୟକୁ ଅଧିକ ପାରଦର୍ଶୀ କରିବା ତଥା ଆଧୁନିକ ଟେକ୍ନୋଲୋଜି ମାଧ୍ୟମରେ ଜନସେବା ପ୍ରଦାନ ଓ ଫିଡ଼ବ୍ୟାକ ସଂଗ୍ରହ କରିବା ବୋଲି କୁହାଯାଇଛି । ଆମ ଶାସନ ହେଉଛି ଏକ ଅତ୍ୟାଧୁନିକ ଟେକ୍ନୋଲୋଜି-ଆଧାରିତ ଫିଡ଼ବ୍ୟାକ୍ ସିଷ୍ଟମ, ଯାହା ଅନଲାଇନ ଓ ଅଫଲାଇନ ପ୍ଲାଟଫର୍ମ ମାଧ୍ୟମରେ ଜନସାଧାରଣଙ୍କ ମତାମତ ସଂଗ୍ରହ କରିବ । ମୁଖ୍ୟମନ୍ତ୍ରୀ, ମନ୍ତ୍ରୀ ଓ ଉଚ୍ଚପଦସ୍ଥ ଅଧିକାରୀମାନେ ଟେଲିଫୋନ ଜରିଆରେ ମତାମତ ଗ୍ରହଣ କରିବା ସହ  ଅଧିକାରୀମାନେ କ୍ଷେତ୍ର ପରିଦର୍ଶନ ସମୟରେ ମୋବାଇଲ ଆପ୍ ମାଧ୍ୟମରେ ଫିଡ଼ବ୍ୟାକ୍ ସଂଗ୍ରହ କରିବେ । ।

ଏହା ଜରିଆରେ ନାଗରିକମାନେ ନିମ୍ନଲିଖିତ ମାଧ୍ୟମରେ ସେମାନଙ୍କ ଅଭିଯୋଗ ଓ ପରାମର୍ଶ ପ୍ରଦାନ କରିପାରିବେ:

ୱେବସାଇଟ୍ ଚାଟବଟ୍: https://amashasana.odisha.gov.in/ ମାଧ୍ୟମରେ ସିଧାସଳଖ ମତାମତ।

ହ୍ୱାଟସଆପ୍ ଚାଟବଟ୍: +91-7400221903 ନମ୍ବରରେ ମତାମତ ପ୍ରଦାନ।

ଟୋଲ-ଫ୍ରି ନମ୍ବର: 14471 ମାଧ୍ୟମରେ ଅଭିଯୋଗ ଓ ପରାମର୍ଶ।

ମୁଖ୍ୟମନ୍ତ୍ରୀ କ’ଣ କହିଲେ

ଅବସରରେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଚାରିଟି ଜିଲ୍ଲାର ହିତାଧିକାରୀଙ୍କ ସହ ଭିଡିଓ କନଫରେନ୍ସ ଜରିଆରେ ଆଲୋଚନା କରି ସରକାରୀ ଯୋଜନାର ସୁଫଳ ସଂପର୍କରେ ଜାଣିଥିଲେ । ସେ କହିଥିଲେ, ‘ଲୋକଙ୍କ ମତାମତ ଓ ପରାମର୍ଶ ହେଉଛି ସୁଶାସନର ମୁଖ୍ୟ ଉପାଦାନ । ଏହା ଶାସନ ବ୍ୟବସ୍ଥାକୁ ଅଧିକ ଦକ୍ଷ, ସ୍ୱଚ୍ଛ ଓ ଉତ୍‌ତରଦାୟୀ କରିବ ।’ ଏହି କାର୍ଯ୍ୟକ୍ରମ ସରକାର ଓ ଜନସାଧାରଣଙ୍କ ମଧ୍ୟରେ ଦୂରତ୍ୱ କମାଇବାରେ ସହାୟକ ହେବ ।  କାର୍ଯ୍ୟପ୍ରଣାଳୀ‘ଆମ ଶାସନ’ ନାଗରିକଙ୍କ ମତାମତ ସଂଗ୍ରହ କରିବା ପାଇଁ ଏକ ସୁନିର୍ଦ୍ଧିଷ୍ଟ ପ୍ରକ୍ରିୟା ଅନୁସରଣ କରୁଛି ।  ନାଗରିକଙ୍କ ଭୂମିକା‘ଆମ ଶାସନ’ରେ ନାଗରିକମାନେ ଏକ ପ୍ରମୁଖ ସ୍ତମ୍ଭ । ସେମାନଙ୍କର ନିରପେକ୍ଷ ମତାମତ ଓ ପରାମର୍ଶ ଶାସନ ବ୍ୟବସ୍ଥାକୁ ପ୍ରମାଣ-ଭିତ୍ତିକ, ଦକ୍ଷ ଓ ବଳିଷ୍ଠ କରିବାରେ ସହାୟକ । ଜନସାଧାରଣଙ୍କ ମତାମତ ବିନା କୌଣସି ଯୋଜନା ସଫଳ ହୋଇପାରିବ ନାହିଁ । ଏହା ସରକାର ଓ ଜନସାଧାରଣଙ୍କ ମଧ୍ୟରେ ଏକ ସେତୁ ସ୍ଥାପନ କରିବ ବୋଲି ମୁଖ୍ୟମନ୍ତ୍ରୀ କହିଛନ୍ତି ।

ବିଜେଡିର ସମାଲୋଚନା

ବିଜେଡିର ଉପସଭାପତି ଅତନୁ ସବ୍ୟସାଚୀ ନାୟକ ଏକ ସାମ୍ବାଦିକ ସମ୍ମିଳନୀ କରି ‘ଆମ ଶାସନ’କୁ କଟାକ୍ଷ କରିବା ସହ ରାଜ୍ୟରେ ଏକ କପି-ପେଷ୍ଟ ସରକାର ଚାଲିଛି ବୋଲି ଅଭିଯୋଗ କରିଛନ୍ତି । ସେ କହିଛନ୍ତି ଯେ, ବିଜେପି ହେଉଛି ରଙ୍ଗବୋଳା ଓ ନାମ ପରିବର୍ତ୍ତନର ସରକାର । ଆମ ସରକାରର ୨୪ଟି ଯୋଜନାର ନାଁ ପରିବର୍ତ୍ତନ କରିଥିଲେ । ଏବେ ୨୫ତମ ଯୋଜନାର ନାଁ ପରିବର୍ତ୍ତନ କଲେ । ଆମ ଶାସନ ଆଉ କିଛି ନୁହେଁ ବରଂ ଆମ ସରକାର ଥିବାବେଳେ ‘ମୋ ସରକାର’ର କପି-ପେଷ୍ଟ । ରାଜ୍ୟରେ ବିଜେଡି ସରକାର ଥିବାବେଳେ ‘ମୋ ସରକାର’କୁ ଜାତୀୟସ୍ତରରେ ପ୍ରଶଂସା ମିଳିଥିଲା । ନିତି ଆୟୋଗ, ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟଠୁ ଆରମ୍ଭ କରି ବିଭିନ୍ନସ୍ତରରେ ପ୍ରଶଂସା ମିଳିଥିଲା । ଏବେ ଏହି ସରକାର କପି-ପେଷ୍ଟ କରି ଶାସନକୁ ଆଗେଇ ନେବାକୁ ଚାହୁଁଛନ୍ତି । ମାତ୍ର ଅଧା ବାଟ ଯାଇ ଝୁଣ୍ଟିବା ନିଶ୍ଚିତ । ରକ୍ତାକ୍ତ ହୋଇ ବିଫଳ ହେବେ ବୋଲି ବିଜେଡି ଅଭିଯୋଗ କରିଛି ।

ସୂଚନାଯୋଗ୍ୟ ଯେ, ବର୍ତ୍‌ତମାନ ଅନଲାଇନ ଜରିଆରେ ସରକାର ୩୨ଟି ବିଭାଗର ୪୨୮ଟି ସେବା ଯୋଗାଇ ଦେଉଛନ୍ତି । ‘ଆମ ଶାସନ’ କାର୍ଯ୍ୟକ୍ରମର ପ୍ରଥମ ପର୍ଯ୍ୟାୟରେ ୮ଟି ବିଭାଗର ୧୩ଟି ସେବା ପାଇଁ ଫିଡ଼ବ୍ୟାକ୍ ବ୍ୟବସ୍ଥା ଆରମ୍ଭ ହୋଇଛି ।