ଅଜିତ ପାୱାରଙ୍କୁ ମହାରାଷ୍ଟ୍ର ମୁଖ୍ୟମନ୍ତ୍ରୀ ହେବାର ସୁଯୋଗ ମିଳିବା ଉଚିତ୍। ଏନସିପିର ରାଜ୍ୟ ସଭା ସାଂସଦ ପ୍ରଫୁଲ୍ଲ ପଟେଲ ଆଜି ଏପରି ପ୍ରତିକ୍ରିୟା ରଖିଛନ୍ତି।
ନାଗପୁରରେ ଗଣମାଧ୍ୟମକୁ ପ୍ରତିକ୍ରିୟା ଦେଇ ସାଂସଦ ପଟେଲ କହିଛନ୍ତି, ମୁଖ୍ୟମନ୍ତ୍ରୀ ପଦବୀ ଖାଲି ନାହିଁ, ଏ ବିଷୟରେ ଆଲୋଚନା କାହିଁକି କରିବା? ତଥାପି ସେ କହିଛନ୍ତି, "ଅଜିତ ପାୱାର ଜଣେ ଲୋକପ୍ରିୟ ତଥା ହେଭିୱେଟ୍ ନେତା। ସେ ଅନେକ ବର୍ଷ ଧରି ଆମ ଦଳର ନେତୃତ୍ୱ ନେଉଛନ୍ତି। ଯେଉଁମାନେ କାମ କରନ୍ତି ସେମାନେ ଆଜି, ଆସନ୍ତାକାଲି ନହେଲେ ତା' ପର ଦିନ ସୁଯୋଗ ପାଆନ୍ତି। ଅନେକେ ଏହି ସୁଯୋଗ ପାଇଛନ୍ତି। ଅଜିତ ଦାଦା ମଧ୍ୟ ତାହା ପାଇବେ, ଯଦି ଆଜି ନୁହେଁ, ତେବେ ଆସନ୍ତାକାଲି ନହେଲେ ଭବିଷ୍ୟତରେ ସେ ମୁଖ୍ୟମନ୍ତ୍ରୀ ହେବେ। ଆମେ ସେହି ଦିଗରେ କାର୍ଯ୍ୟ କରିବୁ।"
ସେପଟେ କଂଗ୍ରେସ ନେତା ପ୍ରୀତିରାଜ ଚାବନ ନିକଟରେ ଦାବି କରି କହିଥିଲେ ଯେ, ଅଗଷ୍ଟ ୧୦ରେ ଏକନାଥ ସିନ୍ଦେଙ୍କ ସ୍ଥାନରେ ଏନସିପି ନେତା ଅଜିତ ପାୱାରଙ୍କୁ ରାଜ୍ୟ ମୁଖ୍ୟମନ୍ତ୍ରୀ ଭାବରେ ନିଯୁକ୍ତ କରାଯିବ। ମହାରାଷ୍ଟ୍ରର ଉପମୁଖ୍ୟମନ୍ତ୍ରୀ ତଥା ବିଜେପିର ବରିଷ୍ଠ ନେତା ଦେବେନ୍ଦ୍ର ଫଡନାଭିସ୍ ସୋମବାର ଚାବନଙ୍କ ଦାବିକୁ ଖଣ୍ଡନ କରି କହିଥିଲେ, ସିନ୍ଦେ ମୁଖ୍ୟମନ୍ତ୍ରୀ ରହିବେ ଏବଂ ରାଜ୍ୟରେ କୌଣସି ପରିବର୍ତ୍ତନ ହେବାର ନାହିଁ।
ଅଜିତ ପାୱାର ଏବଂ ଅନ୍ୟ ଆଠ ଜଣ ଏନସିପି ବିଧାୟକ ଜୁଲାଇ ୨ରେ ଶିବସେନା-ବିଜେପି ସରକାରରେ ଯୋଗ ଦେଇଥିଲେ। ଅଜିତ ପାୱାର ଉପମୁଖ୍ୟମନ୍ତ୍ରୀ ଭାବରେ ଶପଥ ଗ୍ରହଣ କରିଥିବାବେଳେ ବିଧାୟକମାନେ ମନ୍ତ୍ରୀ ଭାବରେ ଶପଥ ଗ୍ରହଣ କରିଥିଲେ। ପରେ, ଏନସିପି ମୁଖ୍ୟ ଶରଦ ପାୱାରଙ୍କ ପୁତୁରା ଅଜିତ ପାୱାରଙ୍କୁ ଗୁରୁତ୍ୱପୂର୍ଣ୍ଣ ଅର୍ଥ ବିଭାଗ ପ୍ରଦାନ କରାଯାଇଥିଲା।