OR 
ଏଣିକି ଅଙ୍ଗନବାଡ଼ି ସୁପରଭାଇଜର ଚାକିରି ପାଇଁ ସ୍ନାତକ ଡିଗ୍ରୀ ଜରୁରୀ । ଏଥିପାଇଁ ରାଜ୍ୟ ସରକାର ପ୍ରଚଳିତ ଓଡ଼ିଶା ଶିଶୁ ଓ ମହିଳା କଲ୍ୟାଣ ସେବା ସଂଶୋଧନ ରୁଲସ-୧୯୮୯ ରେ ସଂଶୋଧନ କରିଛନ୍ତି । ରାଜ୍ୟ କ୍ୟାବିନେଟ୍ ଆଜି ଏହି ସଂଶୋଧନ ପ୍ରସ୍ତାବ ସମେତ ୫ଟି ବିଭାଗର ମୋଟ ୬ଟି ପ୍ରସ୍ତାବକୁ ଅନୁମୋଦନ କରିଛନ୍ତି ।
ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କ ଅଧ୍ୟକ୍ଷତାରେ ଅନୁଷ୍ଠିତ ରାଜ୍ୟ କ୍ୟାବିନେଟ ବୈଠକରେ ଅବକାରୀ ବିଭାଗର ୨ଟି ପ୍ରସ୍ତାବ ସମେତ ଜଳସମ୍ପଦ, ବିଭାଗ, ଅନୁସୂଚିତ ଜାତି ଓ ଜନଜାତି ବିଭାଗ, ମହିଳା ଓ ଶିଶୁବିକାଶ, ସ୍ୱାସ୍ଥ୍ୟ ଓ ପରିବାର କଲ୍ୟାଣ ବିଭାଗର ଗୋଟିଏ ଲେଖାଏଁ ପ୍ରସ୍ତାବକୁ ଅନୁମୋଦନ ମିଳିଛି । ସମନ୍ୱିତ ରୋଗୀ ପରିବହନ ଓ ସ୍ୱାସ୍ଥ୍ୟ ସହାୟତା ସେବା ଅନ୍ତର୍ଗତ ଜରୁରୀକାଳୀନ ମେଡିକାଲ ଆମ୍ବୁଲାନ୍ସ ସେବା ଯୋଜନା(୧୦୮ ଆମ୍ବୁଲାନ୍ସ ସେବା) ପାଇଁ ୫ବର୍ଷ ମଧ୍ୟରେ ୨୩୯୮ କୋଟି ଟଙ୍କା ଖର୍ଚ୍ଚ ପ୍ରସ୍ତାବକୁ ମଞ୍ଜୁରୀ ମିଳିଛି । ଏହାସହିତ ଅନୁସୂଚିତ ଜାତି ଓ ଜନଜାତି ବିଭାଗରେ ୨୪ଟି ନୂଆ ପଦବୀ ସୃଷ୍ଟି, ଆନନ୍ଦପୁର ମେଗା ଜଳସେଚନ ପ୍ରକଳ୍ପ ପାଇଁ ୧୦୮କୋଟି ଟଙ୍କା ମଞ୍ଜୁରୀ, ଅଙ୍ଗନବାଡ଼ି ସୁପରଭାଇଜର ପଦବୀରେ ଚୟନଭିତ୍ତିକ ନିଯୁକ୍ତି ନିମନ୍ତେ ଜଣେ ଅଙ୍ଗନବାଡ଼ି କର୍ମୀଙ୍କୁ ସ୍ନାତକ ଡିଗ୍ରୀ ହାସଲ କରିବା ଜରୁରୀ ବୋଲି ଆଗତ ପ୍ରସ୍ତାବକୁ କ୍ୟାବିନେଟ୍ ଅନୁମୋଦନ କରିଛନ୍ତି । ଏହାସହିତ ଅବକାରୀ କନେଷ୍ଟବଳଙ୍କ କ୍ୟାଡ଼ରକୁ ଡିଭିଜିନାଲ କ୍ୟାଡ଼ରରୁ ଜିଲ୍ଲା କ୍ୟାଡ଼ରରେ ପରିବର୍ତ୍ତନ ଏବଂ ଓଡ଼ିଶା ଅବକାରୀ ନିୟମରୁ ଏକ୍ଟ୍ରା ଆୱାର ଅପରେସନ୍ ଫି’କୁ ଡିଷ୍ଟିଲାରୀ, ବଟଲିଂ ୟୁନିଟ୍ ଓ ବ୍ରିୱେରୀ ୟୁନିଟଗୁଡ଼ିକ ନିମନ୍ତେ ଛାଡ଼ କରିବା ପ୍ରସ୍ତାବକୁ ମଧ୍ୟ କ୍ୟାବିନେଟ୍ ମଞ୍ଜୁରୀ ମିଳିଛି ।
୧. ଓଡ଼ିଶା ଲୋୟାର ଏକ୍ସାଇଜ ସର୍ଭିସ (ସଂଶୋଧନ) ନିୟମ, ୨୦୨୫
ଅବକାରୀ କନେଷ୍ଟବଳ କ୍ୟାଡରକୁ ବିଭାଗୀୟ (ଡିଭିଜନାଲ) ସ୍ତରରୁ ଜିଲ୍ଲା (ଡିଷ୍ଟ୍ରିକ୍ଟ) ସ୍ତରକୁ ପରିବର୍ତ୍ତନ କରିବା ପାଇଁ "ଓଡ଼ିଶା ଲୋୟାର ଏକ୍ସାଇଜ ସର୍ଭିସ (ନିଯୁକ୍ତି ଓ ସେବା ସର୍ତ୍ତ) ସଂଶୋଧନ ନିୟମ, ୨୦୨୫" ରାଜ୍ୟ କ୍ୟାବିନେଟ୍ ଅନୁମୋଦନ କରିଛନ୍ତି। ୨୦୨୩ ନିୟମାବଳୀରେ ଜିଲ୍ଲା କ୍ୟାଡର ଅନୁଯାୟୀ ନିଯୁକ୍ତି ଓ ସେବା ପରିଚାଳନାକୁ ସୁଗମ କରିବା ପାଇଁ କେତେକ ନିୟମ ସଂଶୋଧନ କରିଯାଇଛି।
ଏହା ସହିତ, ଓଡ଼ିଶା ଏକ୍ସାଇଜ ନିୟମ, ୨୦୧୭ର ନିୟମ ୭୯କୁ ଓଡ଼ିଶା ଏକ୍ସାଇଜ ଆଇନ, ୨୦୦୮ର ଧାରା ୯୦ ଅନୁଯାୟୀ ସଂଶୋଧନ କରାଯାଇଛି। ଏହି ସଂଶୋଧନ ଅନୁଯାୟୀ ଡିଷ୍ଟିଲାରୀ, ବଟଲିଂ ୟୁନିଟ୍ ଓ ବ୍ରିୟୁଅରୀ ୟୁନିଟ୍ଗୁଡ଼ିକ ପାଇଁ ଅତିରିକ୍ତ ଘଣ୍ଟା ପରିଚ ୟୁନିଟ୍ ପରିଚାଳନା ଫି’ରୁ ଛାଡ଼ ଦିଆଯାଇଛି। ଏହା ବ୍ୟବସାୟର ସୁଗମତାକୁ ପ୍ରୋତ୍ସାହନ ଦେବ, ଉତ୍ପାଦନ କ୍ଷମତା ବୃଦ୍ଧି କରିବ, ନିବେଶ ଆକର୍ଷଣ କରିବ ଏବଂ ରାଜ୍ୟରେ ରୋଜଗାର ସୁଯୋଗ ସୃଷ୍ଟି କରିବ।
୨. ଜରୁରୀକାଳୀନ ଆମ୍ବୁଲାନ୍ସ ସେବା (EMAS) ଯୋଜନା
ରାଜ୍ୟ କ୍ୟାବିନେଟ୍ ଆଇପିଟିଏଚଏଚଏସ-ଫେଜ୍ -୨ ଅଧୀନରେ "ଜରୁରୀକାଳୀନ ଆମ୍ବୁଲାନ୍ସ ସେବା (EMAS)" ଯୋଜନାକୁ ୨୦୨୩-୨୪ରୁ ୨୦୨୭-୨୮ ପର୍ଯ୍ୟନ୍ତ କାର୍ଯ୍ୟକାରୀ କରିବା ପାଇଁ ଅନୁମୋଦନ କରିଛନ୍ତି। ଭାରତ ସରକାରଙ୍କ ସ୍ୱାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରଣାଳୟ ଏବଂ ଓଡ଼ିଶା ସରକାରଙ୍କ ମିଳିତ ଉଦ୍ୟମରେ ଜାତୀୟ ଆମ୍ବୁଲାନ୍ସ ସେବା ଅଧୀନରେ ଏହି ଯୋଜନା ୫ ମାର୍ଚ୍ଚ ୨୦୧୩ରୁ ଓଡ଼ିଶାରେ କାର୍ଯ୍ୟକାରୀ ହେଉଛି।
EMAS-108 ସେବା ମାଧ୍ୟମରେ ରାଜ୍ୟର ଜନତାଙ୍କୁ ମାଗଣାରେ ଜରୁରୀକାଳୀନ ପ୍ରାକ୍-ହସ୍ପିଟାଲ ଚ12 ଚିକିତ୍ସା ସେବା ଯୋଗାଇ ଦିଆଯାଉଛି। ୮୬୬ଟି ଆମ୍ବୁଲାନ୍ସ (୪୧୧ଟି ALS, ୪୪୯ଟି BLS ଓ ୬ଟି ବୋଟ୍ ଆମ୍ବୁଲାନ୍ସ) ମାଧ୍ୟମରେ ଏହି ସେବା ୨୪x୭ କେନ୍ଦ୍ରୀୟ କଲ୍ ସେନ୍ଟର ଦ୍ୱାରା ପରିଚାଳିତ ହେଉଛି। ଏହି ଯୋଜନା ମାଧ୍ୟମରେ ପ୍ରତିବର୍ଷ ପ୍ରାୟ ୧୧-୧୨ ଲକ୍ଷ ଜରୁରୀ ରୋଗୀ (ଗର୍ଭବତୀ ମହିଳା ଓ ଶିଶୁ ସମେତ)ଙ୍କୁ ୨୦ ମିନିଟ୍ ମଧ୍ୟରେ ନିର୍ଦ୍ଦିଷ୍ଟ ସରକାରୀ ସ୍ୱାସ୍ଥ୍ୟ କେନ୍ଦ୍ରକୁ ପହଞ୍ଚାଇବା ଲକ୍ଷ୍ୟ ରଖାଯାଇଛି।
ଏହି ସେବା ଏକ ଘରୋଇ ଏଜେନ୍ସି ଦ୍ୱାରା ପରିଚାଳିତ ହେଉଛି, ଯାହାଙ୍କୁ ଖୋଲା ଟେଣ୍ଡର ପ୍ରକ୍ରିୟା ମାଧ୍ୟମରେ ମନୋନୀତ କରାଯାଇଛି। ପ୍ରକଳ୍ପର ଅର୍ଥନୀତି ରିମ୍ବର୍ସମେଣ୍ଟ ଆଧାରିତ ଚୁକ୍ତି ଅନୁଯାୟୀ ପରିଚାଳିତ ହେଉଛି। ୫ ବର୍ଷ ପାଇଁ ମୋଟ ୨୩୯୮. ୪୫ କୋଟି ଟଙ୍କା ବ୍ୟୟବରାଦ କରାଯାଇଛି।
୩. ଓଡ଼ିଶା ଶିଶୁ ଓ ମହିଳା କଲ୍ୟାଣ ସେବା (ସଂଶୋଧନ) ନିୟମ, ୨୦୨୫
ଓଡ଼ିଶା ଶିଶୁ ଓ ମହିଳା କଲ୍ୟାଣ ସେବା (ସଂଶୋଧନ) ନିୟମ, ୨୦୨୫କୁ ଅନୁମୋଦନ କରିଛନ୍ତି। ଏହି ସଂଶୋଧନ ଅନୁଯାୟୀ ଅଙ୍ଗନୱାଡ଼ି କର୍ମୀମାନଙ୍କ ପାଇଁ ଜୁନିୟର ଗ୍ରେଡ୍ ସେବାରେ(ସୁପରଭାଇଜର) ନିଯୁକ୍ତି ପାଇଁ ଶିକ୍ଷାଗତ ଯୋଗ୍ୟତା ପରିବର୍ତ୍ତନ କରାଯାଇଛି। ୧୯୮୯ ନିୟମାବଳୀ ଅନୁଯାୟୀ ପୂର୍ବରୁ ହାଇସ୍କୁଲ ସାର୍ଟିଫିକେଟ (HSC) ବା ସମକକ୍ଷ ଯୋଗ୍ୟତା ଆବଶ୍ୟକ ଥିଲା। ନୂଆ ନିୟମ ଅନୁଯାୟୀ ନୂତନ ଅଙ୍ଗନୱାଡ଼ି କର୍ମୀମାନଙ୍କୁ କୌଣସି ମାନ୍ୟତାପ୍ରାପ୍ତ ବିଶ୍ୱବିଦ୍ୟାଳୟରୁ ସ୍ନାତକ (ଗ୍ରାଜୁଏସନ) ବା ସମକକ୍ଷ ପରୀକ୍ଷାରେ ଉତ୍ତୀର୍ଣ୍ଣ ହେବାକୁ ହେବ। ତେବେ, ଏହି ନୂଆ ନିୟମ ବର୍ତ୍ତମାନର ଅଙ୍ଗନୱାଡ଼ି କର୍ମୀମାନଙ୍କ ଉପରେ ଲାଗୁ ହେବ ନାହିଁ। ସେମାନେ ପୂର୍ବ ଯୋଗ୍ୟତା (HSC) ଆଧାରରେ ନିଯୁକ୍ତି ପାଇଁ ବିବେଚିତ ହେବେ। ଏହି ପରିବର୍ତ୍ତନ ଟେକ୍ନୋଲୋଜି, ଆଇଟି ଓ ବୈଜ୍ଞାନିକ ପଦ୍ଧତିର ବୃଦ୍ଧି ସହିତ ଶିଶୁ ଯତ୍ନ ଓ ଗର୍ଭାବସ୍ଥା ପରିଚାଳନାରେ ଉନ୍ନତ ସେବା ଯୋଗାଇବାକୁ ଲକ୍ଷ୍ୟ ରଖିଛି।
୪. ଓଡ଼ିଶା କଲ୍ୟାଣ ସେବା ଓ ଓଡ଼ିଶା ସବଅର୍ଡିନେଟ୍ କଲ୍ୟାଣ ସେବାର ପୁନର୍ଗଠନ
ଅନୁସୂଚିତ ଜାତି, ଅନୁସୂଚିତ ଜନଜାତି, ସଂଖ୍ୟାଲଘୁ ଓ ପଛୁଆ ବର୍ଗଙ୍କ କଲ୍ୟାଣ କାର୍ଯ୍ୟକୁ ସୁଦୃଢ଼ କରିବା ପାଇଁ ଓଡ଼ିଶା କଲ୍ୟାଣ ସେବା (OWS) ଓ ଓଡ଼ିଶା ସବଅର୍ଡିନେଟ୍ କଲ୍ୟାଣ ସେବା (OSWS) କ୍ୟାଡରର ପୁନର୍ଗଠନ ଅନୁମୋଦିତ ହୋଇଛି। ନୂଆ ଯୋଜନା, ଆଇଟିଡିଏ, ମାଇକ୍ରୋ ପ୍ରୋଜେକ୍ଟ, ଆବାସିକ ବିଦ୍ୟାଳୟ ଓ ହଷ୍ଟେଲ ପରିଚାଳନା ପାଇଁ ଅଧିକ ଅଧିକାରୀଙ୍କ ଆବଶ୍ୟକତା ଦୃଷ୍ଟିରୁ ଏହି ପଦକ୍ଷେପ ନିଆଯାଇଛି।
ଏହି ପୁନର୍ଗଠନରେ ବିଭିନ୍ନ ପଦବୀରେ ମୋଟ ୨୪ଟି ନୂଆ ପୋଷ୍ଟ ସୃଷ୍ଟି କରାଯିବ:
• ଅତିରିକ୍ତ ଜିଲ୍ଲା କଲ୍ୟାଣ ଅଧିକାରୀ (ADWO): ୨ଟି
• ଡେପୁଟି ଡାଇରେକ୍ଟର: ୧୧ଟି
• ଯୁଗ୍ମ ନିର୍ଦ୍ଦେଶକ (ଜଏଣ୍ଟ ଡାଇରେକ୍ଟର): ୮ଟି
• ଅତିରିକ୍ତ ନିର୍ଦ୍ଦେଶକ (ଆଡିସନାଲ ଡାଇରେକ୍ଟର): ୩ଟି
ଏହା ବିଶେଷତଃ ଆଦିବାସୀ ଓ ଅତି ଦୁର୍ବଳ ଆଦିବାସୀ ଗୋଷ୍ଠୀ (PVTGs)ଙ୍କ ସାମଗ୍ରିକ ଉନ୍ନୟନ ପାଇଁ କାର୍ଯ୍ୟକାରିତାକୁ ବୃଦ୍ଧି କରିବ।
୫. ଆନନ୍ଦପୁର ବ୍ୟାରେଜ ପ୍ରୋଜେକ୍ଟ ପାଇଁ ଜଳସେଚନ ବ୍ୟବସ୍ଥା
ରାଜ୍ୟ କ୍ୟାବିନେଟ୍ କେନ୍ଦୁଝର ଜିଲ୍ଲାରେ ଆନନ୍ଦପୁର ବ୍ୟାରେଜ ପ୍ରୋଜେକ୍ଟ ଅଧୀନରେ ଜଳସେଚନ ବ୍ୟବସ୍ଥା ନିର୍ମାଣ ପାଇଁ ରୂ. ୧୦୮ କୋଟି ଓ ୧ ପଇସା (GST ବ୍ୟତୀତ) ମୂଲ୍ୟରେ ଟେଣ୍ଡରକୁ ଅନୁମୋଦନ କରିଛନ୍ତି। ଏହି ପ୍ରୋଜେକ୍ଟରେ ନିମ୍ନଲିଖିତ କାର୍ଯ୍ୟ ଅନ୍ତର୍ଭୁକ୍ତ:
(କ) ବୈତରଣୀ ଲେଫ୍ଟ ବ୍ୟାଙ୍କ କେନାଲ (BLBC)ରେ RD ୦.୦୦ କି.ମି.ରୁ ୨୮.୫୦ କି.ମି. ପର୍ଯ୍ୟନ୍ତ ୨୨୨୧ ହେକ୍ଟର ଚାଷଯୋଗ୍ୟ କମାଣ୍ଡ ଏରିଆ (CCA) ପାଇଁ ଜଳସେଚନ ଓ କମାଣ୍ଡ ଏରିଆ ଡେଭେଲପମେଣ୍ଟ (CAD)।
(ଖ) ବୈତରଣୀ ରାଇଟ ବ୍ୟାଙ୍କ କେନାଲ (BRBC)ରେ RD ୦.୦୦ କି.ମି.ରୁ ୯.୦୦ କି.ମି. ପର୍ଯ୍ୟନ୍ତ ୧୨୨୯ ହେକ୍ଟର CCA ପାଇଁ ଜଳସେଚନ ଓ CAD।
ମୋଟ ୩୪୫୦ ହେକ୍ଟର CCAକୁ ଭୂତଳ ପାଇପ୍ଲାଇନ୍ ଜଳସେଚନ ବ୍ୟବସ୍ଥା (ଗ୍ରାଭିଟି ଫ୍ଲୋ) ମାଧ୍ୟମରେ ଜଳସେଚନ ଯୋଗାଇ ଦିଆଯିବ। ଏହି ପ୍ରୋଜେକ୍ଟ କେନ୍ଦୁଝର ଓ ବାଲେଶ୍ୱର ଜିଲ୍ଲାରେ ୬୦,୦୦୦ ହେକ୍ଟର ଜଳସେଚନ ଲକ୍ଷ୍ୟରେ ଥିବା ଇଣ୍ଟିଗ୍ରେଟେଡ ଆନନ୍ଦପୁର ବ୍ୟାରେଜ ପ୍ରୋଜେକ୍ଟର ଏକ ଅଂଶ। ଏହା EPC-ଟର୍ନକି ଆଧାରରେ ନିର୍ମାଣ ହେବ ଏବଂ କମିଶନ୍ଡ ପ୍ରୋଜେକ୍ଟର ପରିଚାଳନା ଓ ରକ୍ଷଣାବେକ୍ଷଣ ମଧ୍ୟ ଅନ୍ତର୍ଭୁକ୍ତ ହେବ। କାର୍ଯ୍ୟ ୧୮ ମାସ ମଧ୍ୟରେ ସମାପ୍ତ ହେବ। ଏହା କେନ୍ଦୁଝର ଜିଲ୍ଲାର ଆନନ୍ଦପୁର, ହାତଡ଼ିହି ଓ ଘସିପୁରା ବ୍ଲକ୍ର ଚାଷୀମାନଙ୍କୁ ଜଳସେଚନ ସୁବିଧା ଯୋଗାଇ ସାମାଜିକ-ଅର୍ଥନୈତିକ ଅବସ୍ଥାରେ ଉନ୍ନତି ଆଣିବ।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
