ଆଶୀଷ ସିଂଙ୍କ ସ୍ୱାସ୍ଥ୍ୟ ଯାଂଚ ପାଇଁ ୬ଜଣିଆ କମିଟି ଗଢ଼ିଲା ଭୁବନେଶ୍ୱର ଏମସ୍‌

ବିଜେଡି ପାଇଁ ରାଜନୀତି କରିବା ଏବେ ୨୦୧୦ ବ୍ୟାଚ୍ ଆଇପିଏସ୍ ଆଶୀଷ କୁମାର ସିଂଙ୍କୁ ମହଙ୍ଗା ପଡ଼ିଛି । ନିର୍ବାଚନ କମିଶନଙ୍କ କଡ଼ା ଆଭିମୁଖ୍ୟ ଓ ଗତକାଲିର ନିର୍ଦ୍ଦେଶ ଆଧାରରେ ଶ୍ରୀ ସିଂଙ୍କ ସ୍ୱାସ୍ଥ୍ୟ ଯାଂଚ ନିମନ୍ତେ ଭୁବନେଶ୍ୱର ଏମସ୍ କାର୍ଯ୍ୟନିର୍ବାହୀ ନିର୍ଦ୍ଦେଶକ ଆଶୁତୋଷ ବିଶ୍ୱାସଙ୍କ ଅଧ୍ୟକ୍ଷତାରେ ଆଜି ୬ଜଣିଆ କମିଟି ଗଠନ ହୋଇଛି । ଏହି ମେଡିକାଲ ବୋର୍ଡ ପାଖରେ ଆଇପିଏସ୍ ଶ୍ରୀ ସିଂ ଆସନ୍ତାକାଲି(ଗୁରୁବାର) ହାଜର ହୋଇ ନିଜର ସ୍ୱାସ୍ଥ୍ୟ ପରୀକ୍ଷା କରାଇବେ ।

ସୂଚନା ଅନୁସାରେ, ଭୁବନେଶ୍ୱର ଏମସ୍ କାର୍ଯ୍ୟନିର୍ବାହୀ ନିର୍ଦ୍ଦେଶକ ଆଶୁତୋଷ ବିଶ୍ୱାସଙ୍କ ଅଧ୍ୟକ୍ଷତାରେ ଆଜି ୬ଜଣିଆ ଡାକ୍ତରୀ ବୋର୍ଡ ଗଠନ ହୋଇଛି। ଏହି ବୋର୍ଡରେ ବିଭିନ୍ନ ବିଭାଗର ବିଶେଷଜ୍ଞ ଡାକ୍ତର ରହିଛନ୍ତି । ସମ୍ପୃକ୍ତ ଡାକ୍ତରୀ ବୋର୍ଡ ଆଇପିଏସ୍ ଆଶୀଷ ସିଂଙ୍କ ସ୍ୱାସ୍ଥ୍ୟ ଯାଂଚ କରି ୩୧ତାରିଖ ସୁଦ୍ଧା ନିର୍ବାଚନ କମିଶନଙ୍କୁ ରିପୋର୍ଟ ପ୍ରଦାନ କରିବ । ଏହି ଯାଂଚ ରିପୋର୍ଟ ମିଳିବା ପରେ ନିର୍ବାଚନ କମିଶନ ତାଙ୍କ ବିରୁଦ୍ଧରେ ଆଇନଗତ କାର୍ଯ୍ୟାନୁଷ୍ଠାନ ନେବାର ଆଶଙ୍କା ରହିଛି । ବିଜେଡି ସପକ୍ଷରେ ନିର୍ବାଚନ କାର୍ଯ୍ୟରେ ସିଧାସଳଖ ସମ୍ପୃକ୍ତି ପାଇଁ ତୃତୀୟ ମହଲାର ପ୍ରଭାବଶାଳୀ ଅଫିସର୍ ଆଇପିଏସ୍ ଡିଏସ କୁଟ୍ଟେଙ୍କୁ ନିର୍ବାଚନ କମିଶନ ନିଲମ୍ବିତ କରିବା ସହ ଦିଲ୍ଲୀ ବଦଳି କରିସାରିଛନ୍ତି ।

ଉଲ୍ଲେଖଯୋଗ୍ୟ, ରାଜ୍ୟରେ ଅବାଧ ନିର୍ବାଚନକୁ ଦୃଷ୍ଟିରେ ରଖି ନିର୍ବାଚନ କମିଶନ ଗତ ଏପ୍ରିଲ ୨ତାରିଖରେ ଶ୍ରୀ ସିଂଙ୍କୁ କେନ୍ଦ୍ରାଂଚଳ ରେଞ୍ଜ ପୁଲିସ ଆଇଜି ପଦରୁ ହଟାଇ ନିର୍ବାଚନ ସଂକ୍ରାନ୍ତ କାର୍ଯ୍ୟରୁ ଦୂରେଇ ରଖିବାକୁ ନିର୍ଦ୍ଦେଶ ଦେଇଥିଲେ । ମାତ୍ର ରାଜ୍ୟ ସରକାର ତାଙ୍କୁ ଆଇଜି (ମୁଖ୍ୟମନ୍ତ୍ରୀଙ୍କ ସୁରକ୍ଷା) ଭାବେ ନିଯୁକ୍ତି ଦେଇଥିଲେ । ନିର୍ବାଚନ କମିଶନଙ୍କ ତାଗିଦ୍ ଓ ବଦଳି ନିର୍ଦ୍ଦେଶ ପରେ ବି ଶ୍ରୀ ସିଂ ବିଜେଡି ସପକ୍ଷରେ କାର୍ଯ୍ୟ ଜାରି ରଖିଥିବା  ÷ଅଭିଯୋଗରେ ଏପ୍ରିଲ ୫ତାରିଖରେ ବିଜେପି ପକ୍ଷରୁ ଜାତୀୟ ନିର୍ବାଚନ କମିଶନଙ୍କ ନିକଟରେ ପୁଣିଥରେ ତାଙ୍କ ବିରୁଦ୍ଧରେ ଲିଖିତ ଫେରାଦ ହୋଇଥିଲା । ତେବେ ସେସବୁକୁ ଖାତିର ନକରି ଶ୍ରୀ ସିଂ ବିଜେଡିର ନିର୍ବାଚନୀ କାର୍ଯ୍ୟରେ ସିଧାସଳଖ ସମ୍ପୃକ୍ତ ଥିବାର ଖବର ଆସିବା ପରେ ନିର୍ବାଚନ କମିଶନ ତାଙ୍କ ବିରୁଦ୍ଧରେ କଠୋର ଆଭିମୁଖ୍ୟ ପୋଷଣ କରିଥିଲେ । ଯେଉଁଥିପାଇଁ ଶ୍ରୀ ସିଂ ମେ’ ୪ତାରିଖରେ ସ୍ୱାସ୍ଥ୍ୟ ଖରାପ ଦର୍ଶାଇ ଛୁଟିରେ ରହିଥିଲେ ।

କିନ୍ତୁ ପୁଣିଥରେ ଶ୍ରୀ ସିଂଙ୍କ ବିରୁଦ୍ଧରେ ମିଳିଥିବା ଅଭିଯୋଗ ଆଧାରରେ ଗତକାଲି ନିର୍ବାଚନ କମିଶନ ତାଙ୍କର ସ୍ୱାସ୍ଥ୍ୟବସ୍ଥା ଯାଂଚ ପାଇଁ ନିର୍ଦ୍ଦେଶ ଦେଇଛନ୍ତି । ରାଜ୍ୟ ମୁଖ୍ୟ ନିର୍ବାଚନ ଅଧିକାରୀଙ୍କ ମେ’ ୧୭ତାରିଖର ଚିଠି ଆଧାରରେ ଦୁଇ ଆଇପିଏସ୍ ଡିଏସ କୁଟ୍ଟେଙ୍କୁ ନିଲମ୍ବନ କରିବା ସହ ଆଶୀଷ ସିଂଙ୍କ ମେଡିକାଲ ଯାଂଚ ପାଇଁ ନିର୍ଦ୍ଦେଶ ଦେଇଥିଲେ । ଶ୍ରୀ ସିଂ ସ୍ୱାସ୍ଥ୍ୟଗତ କାରଣ ଦର୍ଶାଇ ଛୁଟିରେ ରହିଥିଲେ ମଧ୍ୟ ସେ ବିଜେଡି ପାଇଁ କାମ କରୁଥିବାର ବାରମ୍ବାର ଅଭିଯୋଗ ପରେ ନିର୍ବାଚନ କମିଶନ ଗତକାଲି ତାଙ୍କର ସ୍ୱାସ୍ଥ୍ୟ ଯାଂଚ ନିର୍ଦ୍ଦେଶ ଦେଇଥିଲେ । ଆଜି ୩୦ତାରିଖ ସୁଦ୍ଧା ମେଡିକାଲ ବୋର୍ଡ ଗଠନ ଓ ୩୧ତାରିଖ ସୁଦ୍ଧା ତାଙ୍କ ସ୍ୱାସ୍ଥ୍ୟର ଯାଂଚ ରିପୋର୍ଟ କମିଶନଙ୍କୁ ପଠାଇବାକୁ ଭୁବନେଶ୍ୱର ଏମସ୍ ନିର୍ଦ୍ଦେଶକଙ୍କୁ ନିର୍ଦ୍ଦେଶ ଦିଆଯାଇଛି ।
ଯଦି ଶ୍ରୀ ସିଂ ମିଛରେ ସ୍ୱାସ୍ଥ୍ୟ ଖରାପ ଦର୍ଶାଇ ଛୁଟିରେ ରହିଥିବାର ପ୍ରମାଣ ମିଳେ ତାହା ତାଙ୍କୁ ବେଶ୍ ମହଙ୍ଗା ପଡ଼ିବା ସହ ତାଙ୍କ ଚାକିରି କ୍ୟାରିୟରକୁ ମଧ୍ୟ ପ୍ରଭାବିତ କରିବ ବୋଲି ଆଶଙ୍କା କରାଯାଉଛି ।