ଦିଲ୍ଲୀ ବିଧାନସଭା ନିର୍ବାଚନରେ ବିଜେପି ଇତିହାସ ରଚିଛି। ଦୁଇ ତୃତୀୟାଂଶ ଆସନ ସହ ଦୀର୍ଘ ୨୭ ବର୍ଷ ପରେ ବିଜେପି ଦେଶର ରାଜଧାନୀ ଦିଲ୍ଲୀରେ ସରକାର ଗଠନ କରିବାକୁ ଯାଉଛି। ୨୦୧୫ରେ ୩ଟି ଓ ୨୦୨୦ ନିର୍ବାଚନରେ ବିଜେପି ମାତ୍ର ୮ଟି ଆସନ ଜିତିଥିଲା। କିନ୍ତୁ ଏଥର ଆପ୍କୁ ଜଳକା କରି ବିଜେପି ୪୫ରୁ ଅଧିକ ଆସନ ଦିଲ୍ଲୀରେ ଜିତିବାକୁ ଯାଉଛି।
୨୦୧୫ ଓ ୨୦୨୦ରେ ବଡ଼ ବିଜୟ ହାସଲ କରିଥିବା ଆପ୍ ହ୍ୟାଟ୍ରିକ ବିଜୟରୁ ବଞ୍ଚିତ ହୋଇଛି। ଖୋଦ ଦଳର ଜାତୀୟ ଆବାହକ ଅରବିନ୍ଦ କେଜ୍ରିୱାଲ ଓ ନମ୍ବର ୨ ମନୀଷ ସିସୋଦିଆ ନିଜ ନିଜ ଆସନ ବଞ୍ଚାଇବାକୁ ସକ୍ଷମ ହୋଇନାହାନ୍ତି।
କାହିଁକି ହାରିଲା ଆପ୍?
ସରକାରୀ ବିରୋଧୀ ହାୱା: ୨୦୧୫ ଓ ୨୦୨୦ରେ ଆପ୍ ଦିଲ୍ଲୀରେ ରେକର୍ଡ ସଂଖ୍ୟକ ଆସନ ଜିତି ସରକାର ଗଠନ କରିଥିଲେ। ଆପ ତା’ର ଶାସନ ସମୟରେ ସ୍ୱାସ୍ଥ୍ୟ ଓ ଶିକ୍ଷା କ୍ଷେତ୍ରରେ ଭଲ କାମ କରିଥିଲେ। ବିଜୁଳି ଓ ପାଣି ଉପରେ ସବସିଡି ଦେଇ ଭୋଟରଙ୍କୁ ଖୁସି କରିପାରିଥିଲା। ବିଜେପି ଲୋକସଭା ନିର୍ବାଚନ ଗୁଡ଼ିକରେ ଦିଲ୍ଲୀରେ କ୍ଲିନସୁଇପ କରୁଥିଲେ ହେଁ ବିଧାନସଭାରେ ଆପ୍ର ଲହରକୁ ରୋକି ପାରୁ ନଥିଲା।
Also Read
କିନ୍ତୁ ସମୟ ବିତିବା ସହ ପ୍ରତିଶ୍ରୁତି ଦେଇ ପୂରଣ ନ କରିବା ଦିଲ୍ଲୀବାସୀଙ୍କ ମନରେ ଆପ ପ୍ରତି ଅସନ୍ତୋଷ ସୃଷ୍ଟି କରିଥିଲା। ବିଶେଷ କରି ଦିଲ୍ଲୀକୁ ପ୍ରଦୁଷଣ ମୁକ୍ତ କରିବାରେ ଆପ୍ ବିଫଳ ହୋଇଥିଲା। ସେହିପରି ଯମୁନା ବିଷାକ୍ତ ଆପ ବିରୋଧରେ ଜନଅସନ୍ତୋଷକୁ ଆହୁରି ତୀବ୍ର କରିଥିଲା। ଏଥିରୁ ବର୍ତ୍ତିବା ପାଇଁ ଆପ୍ କେନ୍ଦ୍ରରେ କ୍ଷମତାସୀନ ବିଜେପି ସରକାରକୁ ଦୋଷ ଦେଇଥିଲା।
ବିଜେପି ବିକାଶ ପଥରେ ବାଧକ ସାଜିଥିବା ଦିଲ୍ଲୀବାସୀଙ୍କୁ ବୁଝାଇବାକୁ ଚେଷ୍ଟା କରିଥିଲା। ହେଲେ ୧୦ ବର୍ଷ ଶାସନରେ ରହିବା ପରେ ଏପରି ବାହାନାକୁ ଭୋଟର ଆଦୌ ସକାରାତ୍ମକ ଢଙ୍ଗରେ ଗ୍ରହଣ କରି ନଥିଲେ। କେନ୍ଦ୍ର ସହ ଆପ୍ର ବାକଯୁଦ୍ଧ ଚାଲିଥିବା ବେଳେ ବିଜେପି ଡବଲ ଇଞ୍ଜିନ ସରକାରର ନାରା ଦେଇଥିଲା। ଆପ୍ର ୧୦ ବର୍ଷ ଶାସନ ବିରୋଧରେ ବହୁଥିବା ହାୱାରୁ ବିଜେପି ଫାଇଦା ଉଠାଇଥିଲା। ଏହାର ଫଳାଫଳ ମଧ୍ୟ ନିର୍ବାଚନରେ ଦେଖିବାକୁ ମିଳିଛି।
ଶୀଶ ମହଲ: ଚଳିତ ନିର୍ବାଚନରେ ଅରବିନ୍ଦ କେଜ୍ରିୱାଲଙ୍କୁ ଆକ୍ରମଣ କରିବା ପାଇଁ ବିଜେପି ଶୀଶ ମହଲ ଉପରେ ଫୋକସ କରିଥିଲା। କେଜ୍ରିୱାଲ ମୁଖ୍ୟମନ୍ତ୍ରୀ ଥିବା ବେଳେ ତାଙ୍କ ବାସଭବନର ନବୀକରଣ କରିଥିଲେ। ଏହାକୁ କେନ୍ଦ୍ର କରି ବିଜେପି ତାଙ୍କ ବିରୋଧରେ ଶୀଶ ମହଲ ଶବ୍ଦର ପ୍ରୟୋଗ କରିଥିଲା। ଲିକ୍ ହୋଇଥିବା ସିଏଜି ରିପୋର୍ଟ ବିଜେପିର ଆକ୍ରମଣକୁ ଆହୁରି ବଳ ଯୋଗାଇଥିଲା।
କେଜ୍ରିୱାଲଙ୍କ ବାସଭବନର ନବୀକରଣ ପାଇଁ ପ୍ରାଥମିକ ଭାବେ ୭.୯୧ କୋଟି ଟଙ୍କାର ବ୍ୟୟ ଅଟକଳ କରାଯାଇଥିଲା। ୨୦୨୦ରେ କାମ ଦେବା ବେଳକୁ ଏହା ୮.୬୨ କୋଟିରେ ପହଞ୍ଚି ଯାଇଥିଲା। ତେବେ ପୂର୍ତ୍ତ ବିଭାଗ ୨୦୨୨ରେ କାମ ସାରିବା ବେଳକୁ ଏହା ୩୩.୬୬ କୋଟି ଛୁଇଁଥିବା ଲିକ ସିଏଜି ରିପୋର୍ଟରେ ଦାବି କରାଯାଇଥିଲା। ଏହାକୁ ବିଜେପି ମୂଳ ପ୍ରସଙ୍ଗ କରିଥିଲା।
ଆପ୍ ଶୀଶ ମହଲ ବିରୋଧରେ ରାଜମହଲ ଶବ୍ଦ ବ୍ୟବହାର କରି ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଟାର୍ଗେଟ କରିଥିଲା। ଏପରି କି ପ୍ରଧାନମନ୍ତ୍ରୀ ମୋଦିଙ୍କ ବାସଭବନର ଦୃଶ୍ୟ ସାର୍ବଜନୀନ କରିବାକୁ ବିଜେପିକୁ ଚ୍ୟାଲେଞ୍ଜ ଦେଇଥିଲା। କିନ୍ତୁ ବିଜେପି ଶୀଶ ମହଲ ବିରୋଧରେ ବାରମ୍ବାର ପ୍ରଚାର କରିବାରୁ ଏହା ଭୋଟରଙ୍କୁ ରାଜ ମହଲ ଅପେକ୍ଷା ଅଧିକ ପ୍ରଭାବିତ କରିଥିଲା। କାରଣ ଆପ୍ ସ୍ୱଚ୍ଛ ରାଜନୀତି ଓ ଭିଆଇପି ସଂସ୍କୃତି ବିରୋଧରେ ନାରା ଦେଇ କ୍ଷମତାକୁ ଆସିଥିଲା। ଏପରି ସ୍ଥିତିରେ କେଜ୍ରିୱାଲ ବାସଭବନରେ କୋଟି କୋଟି ଟଙ୍କା ଖର୍ଚ୍ଚ କରାଯିବା ଅଭିଯୋଗ ଭୋଟରଙ୍କୁ ଆପ୍ ବିରୋଧରେ ଯିବାକୁ ବାଧ୍ୟ କରିଥିଲା।
ଅବକାରୀ ନୀତି : ଆପ୍ ସରକାରର ଦ୍ୱିତୀୟ ପାଳିରେ ଅବକାରୀ ନୀତି ଦୁର୍ନୀତି ଅଭିଯୋଗ ପୂରା ଦେଶକୁ ଦୋହଲାଇ ଦେଇଥିଲା। ବିବାଦ ଏତେ ବଢ଼ିଥିଲା ଯେ ଆପ୍ ସରକାର ଲାଗୁ କରିଥିବା ଅବକାରୀ ନୀତିକୁ ପ୍ରତ୍ୟାହାର କରି ନେଇଥିଲେ। ଅବକାରୀ ନୀତି ଆଣି ଅରବିନ୍ଦ କେଜ୍ରିୱାଲ ସରକାର ଦିଲ୍ଲୀକୁ ମଦୁଆ ସହରରେ ପରିଣତ କରିଥିବା ବିଜେପି ଅଭିଯୋଗ କରିଥିଲା। ଗୋଟିଏରେ ଗୋଟିଏ ଫ୍ରି ମଦ ବୋତଲ ବ୍ୟବସ୍ଥା ସମସ୍ତଙ୍କୁ ଚକିତ କରିଥିଲା। ଅବକାରୀ ନୀତିରେ କୋଟି କୋଟି ଟଙ୍କାର ଦୁର୍ନୀତି ହୋଇଥିବା ବିଜେପି ଅଭିଯୋଗ କରି ଆପ୍କୁ ଘାଇଲା କରିଥିଲା। ଆପ୍ ସମସ୍ତ ଅଭିଯୋଗକୁ ଖଣ୍ଡନ କରିଥିଲେ ହେଁ ଭୋଟରଙ୍କ ମଧ୍ୟରେ କେଜ୍ରିୱାଲ ସରକାର ପ୍ରତି ସନ୍ଦେହ ବଢ଼ିବାରେ ଲାଗିଥିଲା।
ବିଶେଷ କରି କେନ୍ଦ୍ରୀୟ ଏଜେନ୍ସି ଘଟଣାର ତଦନ୍ତ କରି ଆପର ୩ ହେଭିୱେଟ ଅରବିନ୍ଦ କେଜ୍ରିୱାଲ, ମନୀଷ ସିସୋଦିଆ ଓ ସଞ୍ଜୟ ସିଂହଙ୍କୁ ଗିରଫ କରିବା ପରେ ସମସ୍ତେ ଆପ୍ ସରକାରର ନୈତିକତା ଉପରେ ପ୍ରଶ୍ନ ଉଠାଇଥିଲେ। ଅବକାରୀ ନୀତି ଦୁର୍ନୀତିରେ ଛନ୍ଦି ହୋଇଯାଇଥିବା ଆପ୍ ୨୦୨୦ ନିର୍ବାଚନ ପ୍ରତିଶ୍ରୁତି ଉପରେ ଆଉ ଫୋକସ କରିପାରି ନଥିଲା। ଶେଷରେ ୨୦୨୫ରେ ଦଳକୁ ଗାଦିଚ୍ୟୁତ ହେବାକୁ ପଡ଼ିଛି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
