ପୂର୍ବତନ ମନ୍ତ୍ରୀ ତଥା ନିମାପଡ଼ା ବିଧାୟକ ସମୀର ରଞ୍ଜନ ଦାଶଙ୍କ ସବୁ ପ୍ରୟାସ ଫେଲ୍ ମାରିଛି । ବିଜେଡି ଆଜି ତାଙ୍କୁ ଢେଙ୍କାନାଳ ସଂସଦୀୟ କ୍ଷେତ୍ର ପର୍ଯ୍ୟବେକ୍ଷକ ଭାବେ ନିଯୁକ୍ତି ଦେଇ ନିମାପଡ଼ା ବିଧାନସଭା ଆସନ ପାଇଁ ଘୋଷିତ ଦଳୀୟ ଟିକେଟର ପୁନର୍ବିଚାର କରିବ ନାହିଁ ବୋଲି ସ୍ପଷ୍ଟ ସନ୍ଦେଶ ଦେଇଛି । ଏହାସହିତ ଗତ ଦୁଇଦିନ ତଳେ ସମୀରଙ୍କ ସମର୍ଥନରେ ନିମାପଡ଼ା ବିଜେଡିର ଏକ ବୃହତ୍ ଗୋଷ୍ଠୀ ଦଳରୁ ସମୂହ ଇସ୍ତଫା ଦେବାର ଧମକ ମଧ୍ୟ ଦଳକୁ ପ୍ରଭାବିତ କରିନଥିବା ଜଣାପଡ଼ିଛି । ବିଜେଡି ଚାପ ଆଗରେ ମୁଣ୍ଡ ନୁଆଁଇ ସମୀର ନିରବ ରହିବାକୁ ଏକରକମ ବାଧ୍ୟ ହୋଇଥିବା ସାଧାରଣରେ ଚର୍ଚ୍ଚା ।
ସୂଚନା ଅନୁସାରେ ନିମାପଡ଼ା ବିଧାୟକ ସମୀର ରଞ୍ଜନ ଦାଶଙ୍କୁ ଆଜି ଢେଙ୍କାନାଳ ସଂସଦୀୟ କ୍ଷେତ୍ର ପର୍ଯ୍ୟବେକ୍ଷକ ଭାବେ ବିଜେଡି ଆଜି ନିଯୁକ୍ତି ଦେଇଛି। ନିମାପଡ଼ା ବିଧାନସଭା ଆସନରୁ ଚଳିତଥର ସମୀରଙ୍କ ବଦଳରେ ବିଜେପିରୁ ଆସିଥିବା ଦିଲ୍ଲୀପ ନାୟକଙ୍କୁ ବିଜେଡି ପ୍ରାର୍ଥୀ କରିଛି । ଦିଲ୍ଲୀପଙ୍କ ପ୍ରାର୍ଥୀତ୍ୱକୁ ବିରୋଧ କରି ସମୀରଙ୍କ ସମର୍ଥକମାନେ ଗତ କିଛିଦିନ ଧରି ବୈଠକ କରି ଟିକେଟର ପୁନର୍ବିଚାର କରିବା ପାଇଁ ଦଳ ଉପରେ ଚାପ ପକାଇ ଆସୁଥିଲେ । ଏପରିକି ଗତ ଦୁଇଦିନ ତଳେ ନିମାପଡ଼ା ବିଜେଡିର ସମସ୍ତ ଦଳୀୟ କର୍ମକର୍ତ୍ତା ଓ ନିର୍ବାଚିତ ପ୍ରତିନିଧିମାନେ ସମୂହ ଇସ୍ତଫା ଘୋଷଣା କରିବା ସହ ସମୀର ସ୍ୱାଧୀନ ପ୍ରାର୍ଥୀ ଭାବେ ନିର୍ବାଚନ ଲଢ଼ନ୍ତୁ ବୋଲି ପରାମର୍ଶ ଦେଇଥିଲେ । କିନ୍ତୁ ଏହାର ପ୍ରଭାବ ଦଳ ଉପରେ ପଡ଼ିନାହିଁ । ଦିଲ୍ଲୀପଙ୍କ ଟିକେଟ ଉପରେ କୌଣସି ପୁନର୍ବିଚାର କରାଯିବ ନାହିଁ ବୋଲି ଦଳ ସମୀରଙ୍କୁ ରୋକଠୋକ୍ ଶୁଣାଇ ଦେବା ସହ ବିଜେଡି ପାଇଁ କାମ ନକଲେ ତା’ର ପରିଣାମ ଭୟଙ୍କର ହେବ ବୋଲି ତାଙ୍କୁ ଚେତାବନୀ ଦିଆଯାଇଥିବା ବିଜେଡି ମହଲରେ ଚର୍ଚ୍ଚା ।
ପୂର୍ବରୁ ପୁରୀ ଜିଲ୍ଲା ପର୍ଯ୍ୟବେକ୍ଷକ ରଣେନ୍ଦ୍ର ପ୍ରତାପ ସ୍ୱାଇଁ ମଧ୍ୟ ସମୀରଙ୍କ ବିରୁଦ୍ଧରେ ଅନେକ ଅଭିଯୋଗର ତଥ୍ୟପ୍ରମାଣ ସରକାରଙ୍କୁ ମିଳିଥିବାରୁ ତାଙ୍କୁ ଟିକେଟ୍ ଦିଆଗଲାନି ବୋଲି ନିମାପଡ଼ାର ଦଳୀୟ ପଦାଧିକାରୀଙ୍କୁ ସୂଚନା ଦେଇଥିଲେ । ତା’ ସତ୍ତ୍ୱେ ନିମାପଡ଼ା ବିଜେଡିରେ ସମୀରଙ୍କ ସପକ୍ଷରେ ପ୍ରାୟ ୮୦ ପ୍ରତିଶତରୁ ଅଧିକ ଦଳୀୟ କର୍ମୀ, ପଦାଧିକାରୀ ଓ ନିର୍ବାଚିତ ପ୍ରତିନିଧିମାନେ ବାହାରି ତାଙ୍କୁ ଟିକେଟ୍ ଦିଆଯାଉ ବୋଲି ଚାପ ପକାଇ ଆସୁଥିଲେ । ଶେଷ ଅସ୍ତ୍ର ଭାବେ ସେମାନେ ଗତ ୪ତାରିଖରେ ଏକ ବୈଠକ କରି ସମୂହ ଇସ୍ତଫା ନିଷ୍ପତ୍ତି ନେଇଥିଲେ ।
ମାତ୍ର ସମୀରଙ୍କ ଉପରେ ଚାପ ପକାଯାଇ ଦିଲ୍ଲୀପଙ୍କ ପ୍ରାର୍ଥୀତ୍ୱକୁ ବିରୋଧ ନକରିବାକୁ ନିର୍ଦ୍ଦେଶ ଦିଆଯାଇଥିବା ଜଣାପଡ଼ିଛି । ସମୀର ଯେଭଳି ନିମାପଡ଼ାରେ ନରହିବେ ସେଥିପାଇଁ ତାଙ୍କୁ ଢେଙ୍କାନାଳ ସଂସଦୀୟ କ୍ଷେତ୍ର ପର୍ଯ୍ୟବେକ୍ଷକ ଦାୟିତ୍ୱ ଦିଆଯାଇଛି । ସମୀରଙ୍କ ବିରୁଦ୍ଧରେ ଥିବା ୨-୩ଟି ମାମଲାରେ ଅନେକ ତଥ୍ୟ ପ୍ରମାଣ ପୁଲିସକୁ ମିଳିଥିବାରୁ କାର୍ଯ୍ୟାନୁଷ୍ଠାନର ଭୟ ମଧ୍ୟ ଦେଖାଯାଇଥିବା ଜଣାପଡ଼ିଛି ।
ଏସବୁକୁ ଦୃଷ୍ଟିରେ ରଖି ସମୀର ଏବେ ନିରବ ରହିବାକୁ ଏକରକମ ବାଧ୍ୟ ହୋଇଛନ୍ତି । ତେବେ ସମୀରଙ୍କୁ ସମର୍ଥନ କରି ଦିଲ୍ଲୀପଙ୍କ ପ୍ରାର୍ଥୀତ୍ୱକୁ ବିରୋଧ କରି ଆସୁଥିବା ନିମାପଡ଼ା ବିଜେଡିର ଦଳୀୟ କର୍ମକର୍ତ୍ତା ଓ ନିର୍ବାଚିତ ପ୍ରତିନିଧିମାନେ କିଭଳି ଦିଲ୍ଲୀପଙ୍କ ସହ ସାଲିସ୍ କରିବେ ତାକୁ ନେଇ ସଂଶୟ ଲାଗିରହିଛି ।
ଏବେ ସମୀର ନିଜେ ବିଜେଡିର ଚାପ ଓ କାର୍ଯ୍ୟାନୁଷ୍ଠାନ ଭୟ ଆଗରେ ମୁଣ୍ଡ ନୁଆଁଉଛନ୍ତି ନା ନିମାପଡ଼ାର ଦଳୀୟ କର୍ମକର୍ତ୍ତା ଓ ସାଧାରଣ ଲୋକଙ୍କ ଚାପରେ ସ୍ୱାଧୀନ ଭାବେ ନିର୍ବାଚନ ମଇଦାନକୁ ଓହ୍ଲାଉଛନ୍ତି ତାହା ଉପରେ ସମସ୍ତଙ୍କ ନଜର ।