ରାଜ୍ୟରେ ସଦ୍ୟ ସମାପ୍ତ ହୋଇଥିବା ସାଧାରଣ ନିର୍ବାଚନରେ ବିଜେଡି ନିଜର ପ୍ରାର୍ଥୀମାନଙ୍କୁ ଲଢ଼ିବା ପାଇଁ ଟିକେଟ୍ ସହ ୫୪.୬୦କୋଟି ଟଙ୍କା ଦେଇଛି । ପ୍ରମୁଖ ବିରୋଧୀ ଦଳ କଂଗ୍ରେସ ଚଳିତ ନିର୍ବାଚନରେ ୧୪ଟି ବିଧାନସଭା ଓ ଗୋଟିଏ ଲୋକସଭା ଆସନରେ ବିଜୟୀ ହୋଇଥିଲେ ମଧ୍ୟ ଦଳ ତା’ର ପ୍ରାର୍ଥୀଙ୍କୁ ଟଙ୍କାଟିଏ ବି ନିର୍ବାଚନୀ ଖର୍ଚ୍ଚ ଦେଇନାହିଁ । ସେହିପରି ଓଡ଼ିଶାରେ ଉଭୟ ଲୋକସଭା ଓ ବିଧାନସଭା ନିର୍ବାଚନରେ ମଇଦାନକୁ ଓହ୍ଲାଇଥିବା ସିପିଆଇଏମଏଲ୍, ଆମ୍ ଆଦମୀ ପାର୍ଟି ଓ ବିଏସପି ଟଙ୍କାଟିଏ ଖର୍ଚ୍ଚ କରିନଥିବାବେଳେ ସମାଜବାଦୀ ପାର୍ଟି ୨୯ଲକ୍ଷ ଟଙ୍କା ଖର୍ଚ୍ଚ କରିଥିବା ନିର୍ବାଚନ କମିଶନଙ୍କ ନିକଟରେ ଦାଖଲ ତଥ୍ୟରୁ ଜଣାପଡ଼ିଛି । ଅବଶ୍ୟ ବିଜେଡି ନିଜର ଆଂଶିକ ଖର୍ଚ୍ଚ ଦାଖଲ କରି କେବଳ ପ୍ରାର୍ଥୀଙ୍କୁ ଦେଇଥିବା ଟଙ୍କାର ହିସାବ ସାର୍ବଜନୀନ କରିଛି । ମାତ୍ର ବିଜେଡି ନିଜର ନିର୍ବାଚନୀ ପରିଚାଳନା, ଷ୍ଟାର ପ୍ରଚାରକ ଓ ଅନ୍ୟାନ୍ୟ ମାଧ୍ୟମରେ ପ୍ରଚାର ଅଭିଯାନରେ କେତେ ଟଙ୍କା ଖର୍ଚ୍ଚ କରିଛି ତା’ର ହିସାବ ଦେଇନାହିଁ ।
ଜାତୀୟ ନିର୍ବାଚନ ଆୟୋଗଙ୍କ ନିକଟରେ ବିଜେଡି ଦାଖଲ କରିଥିବା ତଥ୍ୟ ଅନୁସାରେ, ଦଳ ନିଜର ସମସ୍ତ ୨୧ଜଣ ଲୋକସଭା ପ୍ରାର୍ଥୀଙ୍କୁ ଟିକେଟ୍ ସହ ୫୦ଲକ୍ଷ ଟଙ୍କା ଲେଖାଏଁ ନିର୍ବାଚନୀ ଖର୍ଚ୍ଚ ଦେଇଥିଲା । ଯଦିଓ ବିଜେଡିର ଜଣେ ବି ପ୍ରାର୍ଥୀ ଲୋକସଭା ନିର୍ବାଚନରେ ବିଜୟୀ ହୋଇନାହାନ୍ତି । ମାତ୍ର ଦଳ ସେହି ୨୧ଜଣ ପ୍ରାର୍ଥୀଙ୍କୁ ମୋଟ ୧୦.୫୦କୋଟି ଟଙ୍କା ଦେଇଛି । ସେହିପରି ଦଳ ନିଜର ସମସ୍ତ ୧୪୭ଟି ବିଧାୟକ ପ୍ରାର୍ଥୀଙ୍କୁ ୩୦ଲକ୍ଷ ଟଙ୍କା ଲେଖାଏଁ ଦେଇଛି । ଦଳର ସୁପ୍ରିମୋ ନବୀନ ପଟ୍ଟନାୟକ ଦୁଇଟି ଆସନରେ ଲଢ଼ିବା ପାଇଁ ୬୦ଲକ୍ଷ ଟଙ୍କା ନେଇଥିବାବେଳେ ଅନ୍ୟ ୧୪୫ଜଣ ପ୍ରାର୍ଥୀ ଦଳଠାରୁ ୩୦ଲକ୍ଷ ଟଙ୍କା ଲେଖାଏଁ ନେଇଛନ୍ତି । ବିଧାୟକ ପ୍ରାର୍ଥୀମାନଙ୍କୁ ଦଳ ମୋଟ ୪୪.୧୦କୋଟି ଟଙ୍କା ଦେଇଛି । ଦଳର କୋଷାଧ୍ୟକ୍ଷ ସୁବାସ ସିଂ ଦାଖଲ କରିଥିବା ତଥ୍ୟ ଅନୁସାରେ ସମସ୍ତ ୨୧ ସାଂସଦ ପ୍ରାର୍ଥୀ ଓ ୧୪୭ ବିଧାୟକ ପ୍ରାର୍ଥୀଙ୍କୁ ମୋଟ ୫୪.୬୦କୋଟି ଟଙ୍କା ଦଳ ନିର୍ବାଚନ ଲଢ଼ିବା ପାଇଁ ଦେଇଥିଲା । ଦଳ ଏହି ସମସ୍ତ ପାଣ୍ଠି ଆରଟିଜିଏସ୍ ମାଧ୍ୟମରେ ସମ୍ପୃକ୍ତ ପ୍ରାର୍ଥୀଙ୍କ ବ୍ୟାଙ୍କ ଆକାଉଣ୍ଟକୁ ଦେଇଥିବା ଶ୍ରୀ ସିଂ ଦର୍ଶାଇଛନ୍ତି ।
ଅନ୍ୟପକ୍ଷରେ କଂଗ୍ରେସ କୋଷାଧ୍ୟକ୍ଷ ଅଜୟ ମାକେନ୍ ଦାଖଲ କରିଥିବା ତଥ୍ୟ ଅନୁସାରେ ଦଳ ଓଡ଼ିଶାରେ ବିଧାନସଭା ନିର୍ବାଚନ ପାଇଁ କୌଣସି ପ୍ରାର୍ଥୀଙ୍କୁ ଟଙ୍କାଟିଏ ଦେଇନାହିଁ । ଯଦିଓ ଦଳ ୧୪୫ଟି ଆସନରେ ନିଜର ପ୍ରାର୍ଥୀ ଦେଇଥିଲା କିନ୍ତୁ କୌଣସି ପ୍ରାର୍ଥୀଙ୍କୁ ନିର୍ବାଚନ ଲଢ଼ିବା ପାଇଁ ପାଣ୍ଠି ଦେଇନଥିବା ନିର୍ବାଚନ ଆୟୋଗଙ୍କୁ ଅବଗତ କରିଛି ।
ସେହିପରି ସମାଜବାଦୀ ପାର୍ଟି କେବଳ କଳାହାଣ୍ଡି ଲୋକସଭା ଆସନରେ ଦଳୀୟ ପ୍ରାର୍ଥୀ ଶିବ ହାତୀଙ୍କୁ ୫ଲକ୍ଷ ଟଙ୍କା ଦେଇଥିବାବେଳେ ଅନ୍ୟ ୧୨ଜଣ ବିଧାୟକ ପ୍ରାର୍ଥୀଙ୍କୁ ୨ଲକ୍ଷ ଟଙ୍କା ଲେଖାଏଁ ଦେଇଥିବା ନିର୍ବାଚନ ଆୟୋଗଙ୍କୁ ଜଣାଇଛି । ସମାଜବାଦୀ ପାର୍ଟି କେନ୍ଦ୍ରାପଡ଼ା ଲୋକସଭା ଆସନର ପାଟକୁରା, ମହାକାଳପଡ଼ା, ରାଜନଗର, ସାଲେପୁର ଓ ମାହାଙ୍ଗା ବିଧାନସଭା ଆସନ,ଫୁଲବାଣୀ ବିଧାନସଭା ଆସନ ଓ କଳାହାଣ୍ଡି ଲୋକସଭା ଅନ୍ତର୍ଗତ ନୂଆପଡ଼ା, ଖଡ଼ିଆଳ,ଧର୍ମଗଡ଼, ଭବାନୀ ପାଟଣା, ଲାଞ୍ଜିଗଡ଼ର ଦଳୀୟ ପ୍ରାର୍ଥୀଙ୍କୁ ୨ଲକ୍ଷ ଟଙ୍କା ଲେଖାଏଁ ନିର୍ବାଚନୀ ଖର୍ଚ୍ଚ ଦେଇଥିବା ଦର୍ଶାଇଛି।
ଅନ୍ୟପକ୍ଷରେ ବିଜେପି ରାଜ୍ୟରେ କେତେ ଟଙ୍କା ନିର୍ବାଚନରେ ଖର୍ଚ୍ଚ କରିଛି ତା’ର ତଥ୍ୟ ନିର୍ବାଚନ ଆୟୋଗଙ୍କ ୱେବସାଇଟରେ ସାର୍ବଜନୀନ ହୋଇନଥିବା ଜଣାପଡ଼ିଛି ।