ବବି ଡରିଲେ, ସୁଲତା ଉଠାଇଲେ: ବିଜେପି ବର୍ଷିଲା, ଚିନ୍ତାରେ ବିଜେଡି

ବିଜେଡି ସଂଗଠନ ସମ୍ପାଦକ ପ୍ରଣବପ୍ରକାଶ ଦାସ ଓରଫ ବବି ନିଜର କଲାକର୍ମ ପାଇଁ ଡରିଲେ । କିନ୍ତୁ ବବିଙ୍କ ଆଶୀର୍ବାଦରେ ସାଂସଦ ହୋଇଥିବା ସୁଲତା ଦେଓ ସେହି ପ୍ରସଙ୍ଗକୁ ଆଜି ରାଜ୍ୟସଭାରେ ଉଠାଇଲେ । ଆଉ ସୁଲତାଙ୍କ ବୟାନ ପରେ ରାଜ୍ୟ ବିଜେପି କଡ଼ା ଭାଷାରେ ବର୍ଷିବା ସହ ରାଜ୍ୟରେ ଛାତ୍ର ଓ ଯୁବଗୋଷ୍ଠୀଙ୍କ ଭବିଷ୍ୟତ ସହ ବିଜେଡି ସରକାର କିଭଳି ଖେଳିଥିଲା ତା’ର ଲମ୍ବାଚଉଡ଼ା  ତାଲିକା ରଖିଛି । ବିଜେପିର ଏଭଳି କଡ଼ା ଆଭିମୁଖ୍ୟ ପରେ ପୂର୍ବରୁ ବ୍ୟାକଫୁଟରେ ଥିବା ବିଜେଡି ଏବେ ଚିନ୍ତାରେ ପଡ଼ିଥିବା ଜଣାପଡ଼ିଛି ।

ବିଜେପି ରାଜ୍ୟ ମୁଖପାତ୍ର ଦିଲ୍ଲୀପ ମଲ୍ଲିକ ଆଜି ଗଣମାଧ୍ୟମକୁ ବିବୃତ୍ତି ଦେଇ କହିଛନ୍ତି ଯେ, ବିଗତ ୨୪ବର୍ଷ ଧରି ଓଡ଼ିଶାର ଲୋକଙ୍କୁ ବିଜେଡି କେବଳ ଧୋକା ଦେଇନାହିଁ ବରଂ ଦିଲ୍ଲୀ ଦରବାରରେ ରାଜ୍ୟର ସ୍ୱାର୍ଥ କଥା ଉଠାଇବାରେ ମଧ୍ୟ ବିଫଳ ରହିଛି । ଆଜି ରାଜ୍ୟସଭାରେ ବିଜେଡି ସାଂସଦ ସୁଲତା ଦେଓଙ୍କ ମୁହଁରେ କଂଗ୍ରେସର ସ୍ୱର ପ୍ରତିଧ୍ୱନିତ ହୋଇଛି । ଲୋକସଭାରେ ଦଳର ବଂଶ ବୁଡ଼ିଯିବା ପରେ ଏବେ ଦିଲ୍ଲୀରେ ନିଜର ରାଜନୈତିକ ଅସ୍ତିତ୍ୱ ବଂଚାଇ ରଖିବା ପାଇଁ ରାଜ୍ୟସଭାରେ ବିଜେଡି ସାଂସଦମାନେ ପ୍ରାଣ ବିକଳରେ କଂଗ୍ରେସ ଡଙ୍ଗାରେ ଚଢ଼ିଯାଇଛନ୍ତି । ରାଜ୍ୟରେ ବିଜେଡି ସରକାର ଅମଳରେ ପ୍ରତିବର୍ଷ ପୁଳାପୁଳା ପ୍ରଶ୍ନପତ୍ର ଲିକ୍ ଘଟଣା ସାମ୍ନାକୁ ଆସିଥିଲା । ପ୍ରତିବର୍ଷ ମାଟ୍ରିକ୍ ଠାରୁ ଆରମ୍ଭ କରି +୨ ଓ ବିଶ୍ୱବିଦ୍ୟାଳୟରେ ପ୍ରଶ୍ନପତ୍ର ଲିକ୍ ଘଟଣା ମଧ୍ୟ ପଦାକୁ ଆସୁଥିଲା । ପୂର୍ବତନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ନିଜେ ସାଧାରଣ ପ୍ରଶାସନ ବିଭାଗ ଦାୟିତ୍ୱରେ ଥିଲେ । ତାଙ୍କରି ବିଭାଗ ଅଧିନରେ ଥିବା ଓଡ଼ିଶା ଲୋକସେବା ଆୟୋଗ, ଓଡ଼ିଶା ଷ୍ଟାଫ ସିଲେକ୍ସନ ଆୟୋଗ, ଓଡ଼ିଶା ସର୍ବଅଡିନେଟ୍ ଷ୍ଟାଫ ସିଲେକ୍ସନ ଆୟୋଗ ପରୀକ୍ଷାରେ ପ୍ରଶ୍ନପତ୍ର ଲିକ୍ ହେବା ସହିତ ‘ଜବ୍ ଫର୍ ସ୍କାମ’ ର‌୍ୟାକେଟ୍ କଥା ସାମ୍ନାକୁ ଆସିଥିଲା । ଏହି ‘ଜବ୍ ଫର୍ ସ୍କାମ୍‌’ ର‌୍ୟାକେଟ୍ ପାଇଁ ଲକ୍ଷଲକ୍ଷ ଓଡ଼ିଆ ଯୁବକଯୁବତୀ ସେମାନଙ୍କର ନ୍ୟାଯ୍ୟ ଅଧିକାର ହରାଇଥିଲେ । କିନ୍ତୁ ଏସବୁ ପ୍ରସଙ୍ଗରେ ସେତେବେଳେ କାର୍ଯ୍ୟାନୁଷ୍ଠାନ ନେବାତ ଦୂରର କଥା ନବୀନ ପଟ୍ଟନାୟକ କୌଣସି ପ୍ରତିକ୍ରିୟା ବି ଦେଲେନି । ବିଜେଡି ଶାସନବେଳେ ବିଭିନ୍ନ ପରୀକ୍ଷାରେ ପୁଳାପୁଳା ପ୍ରଶ୍ନପତ୍ର ଲିକ୍ ହେଉଥିବାବେଳେ ରାଜ୍ୟସଭା ସାଂସଦ ସୁଲତା ଦେଓ କେଉଁଠି ଥିଲେ ବୋଲି ଶ୍ରୀ ମଲ୍ଲିକ ପ୍ରଶ୍ନ କରିଛନ୍ତି ।

ଉଲ୍ଲେଖଯୋଗ୍ୟ, ଆଜି ରାଜ୍ୟସଭାରେ ରାଷ୍ଟ୍ରପତିଙ୍କ ଅଭିଭାଷଣ ଉପରେ ଧନ୍ୟବାଦ ପ୍ରସ୍ତାବ ଆଲୋଚନାରେ ଭାଗ ନେଇ ସାଂସଦ ଶ୍ରୀମତୀ ଦେଓ ବିଜେପିକୁ ବିଭିନ୍ନ ପ୍ରସଙ୍ଗରେ ସମାଲୋଚନା କରିଥିଲେ । ରତ୍ନଭଣ୍ଡାର ଚାବି ହଜିବା, ଶ୍ରୀମନ୍ଦିର ଚାରିଦ୍ୱାର ଖୋଲିବା ଓ ପୂର୍ବତନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ସ୍ୱାସ୍ଥ୍ୟ ଯାଂଚ ପାଇଁ ଏକ କମିଟି ଗଠନ କରିବାକୁ ବିଜେପି କହିଥିବା ଆଦିକୁ ସମାଲୋଚନା କରିବା ସହ ନିଟ୍ ସ୍କାମ ପ୍ରସଙ୍ଗ ଉଠାଇ ୭ବର୍ଷରେ ୭୦ଟି ସ୍କାମ ହୋଇଛି ବୋଲି ଅଭିଯୋଗ କରିଛନ୍ତି ।

ଅନ୍ୟପକ୍ଷରେ ବିଜେଡି ସୂତ୍ରରୁ ମିଳିଥିବା ସୂଚନା ଅନୁସାରେ, ନିଟ୍ ସ୍କାମ ପ୍ରସଙ୍ଗରେ ଗତକାଲି ଅର୍ଥାତ୍ ସୋମବାର ବିଜେଡି ପକ୍ଷରୁ ଏକ ସାମ୍ବାଦିକ ସମ୍ମିଳନୀ କରାଯିବା ସହ ଭୁବନେଶ୍ୱରରେ ବିକ୍ଷୋଭ ପ୍ରଦର୍ଶନ ନିମନ୍ତେ ନିଷ୍ପତ୍ତି ନିଆଯାଇଥିଲା । କିନ୍ତୁ ଏହି ନିଷ୍ପତ୍ତି ନେବାର ମାତ୍ର ୨-୩ ଘଂଟା ମଧ୍ୟରେ ଦଳର ସଂଗଠନ ସମ୍ପାଦକ ପ୍ରଣବପ୍ରକାଶ ଓରଫ ବବି ୟୁ-ଟର୍ଣ୍ଣ ନେଇ ଏହି ନିଟ୍ ସ୍କାମ ପ୍ରସଙ୍ଗରେ ନିରବ ରହିବାକୁ ଦଳୀୟ ନେତାମାନଙ୍କୁ କହିଥିଲେ ବୋଲି ବିଜେଡି ସୂତ୍ରରୁ ଜଣାପଡ଼ିଛି ।

ଚର୍ଚ୍ଚା ହେଉଛି, ଉଭୟ ରାଜ୍ୟ ଓ କେନ୍ଦ୍ରରେ ବିଜେପି ସରକାର କ୍ଷମତାରେ ଥିବାରୁ ବିଜେଡି ନେତୃତ୍ୱ ଓଡ଼ିଶାରେ ଏଭଳି କିଛି ବି ପ୍ରସଙ୍ଗକୁ ନେଇ ରାଜରାସ୍ତାରେ ବିକ୍ଷୋଭ ଅବା ନିର୍ଣ୍ଣାୟକ ଲଢ଼େଇ କରିବାକୁ ଚାହୁଁନାହାନ୍ତି ଯାହାକି ସେମାନଙ୍କ ପାଇଁ ଗୋଡ଼ରେ କୁରାଢ଼ୀ ମାରିବା ସଦୃଶ ହେବ । କାରଣ ୨୪ବର୍ଷର ଶାସନକାଳରେ ବିଜେଡିର ଏହି ପାୱାର କୋଟେରୀର ନେତାମାନେ ପୁଳାପୁଳା ଦୁର୍ନୀତି ଓ ଅନୀତି ସହ ଜଡ଼ିତ ଥିବାରୁ ନିଜର ପାପକୁ ଲୁଚାଇବା ପାଇଁ ସେମାନେ ଏବେ ଦଳକୁ ବନ୍ଧା ପକାଇ ଦେବାକୁ ପଛାଉନଥିବା ବିଜେଡି ମହଲରେ ଚର୍ଚ୍ଚା ହେଉଛି ।