BJD U-turn : ଉପକୂଳିଆ ନେତାଙ୍କୁ ଜୋନ୍ ଦାୟିତ୍ୱ, ବିବାଦୀୟ ଦିବ୍ୟଶଙ୍କର-ପ୍ରତାପ ଜେନା ବି ସାମିଲ

ନୂଆପଡ଼ା ଭୋଟରଙ୍କ ଉପରେ ଜିଲ୍ଲା ବାହାରର ପ୍ରାର୍ଥୀଙ୍କୁ ଲଦି ଦେଇ ନିର୍ବାଚନୀ ମଇଦାନରେ ଲଢ଼େଇ ପୂର୍ବରୁ ଆତ୍ମସମର୍ପଣ କରିସାରିଥିବା ବିଜେଡି ଆଜି ପୁଣିଥରେ ୟୁ-ଟର୍ଣ୍ଣ ନେଇଛି । ସପ୍ତାହକ ପୂର୍ବରୁ ନୂଆପଡ଼ା ଉପନିର୍ବାଚନ ପରିଚାଳନା ପାଇଁ ଜାରି କରିଥିବା ୧୯ଜଣିଆ କମିଟିରେ ଆମୂଳଚୂଳ ପରିବର୍ତ୍ତନ କରିଛି । କେବଳ ସେତିକି ନୁହେଁ ସଂଶୋଧିତ କମିଟିରେ ଉପକୂଳ ଓଡ଼ିଶାର ପ୍ରାୟ ୨୫ରୁ ଅଧିକ ଆଗଧାଡ଼ିର ନେତାଙ୍କୁ ମଧ୍ୟ ସାମିଲ କରିବାକୁ ଏକରକମ ବାଧ୍ୟ ହୋଇଛି । ମମିତା ମେହେର ହତ୍ୟା-ଗୋବିନ୍ଦ ସାହୁ ଆତ୍ମହତ୍ୟା ମାମଲାରେ ବିବାଦୀୟ ଦିବ୍ୟଶଙ୍କର ମିଶ୍ର ଓ ମାହାଙ୍ଗା ଡବଲ ମର୍ଡର ହତ୍ୟା ଅଭିଯୁକ୍ତ ପ୍ରତାପ ଜେନାଙ୍କୁ ମଧ୍ୟ କମିଟିରେ ସାମିଲ କରିଛି ବିଜେଡି ।

ଉପନିର୍ବାଚନ  ମଇଦାନରେ କଂଗ୍ରେସର ଘାସିରାମ ମାଝୀ ଓ ବିଜେପିର ଜୟ ଢ଼ୋଲକିଆ ନିଜର ପ୍ରଚାର ଜୋରଦାର କରିଥିବାବେଳେ ବାହାର ଜିଲ୍ଲାର ନେତ୍ରୀଙ୍କୁ ବିଜେଡି ପ୍ରାର୍ଥୀ କରିଥିବାରୁ ତା’ର ପ୍ରତିବାଦରେ ଗୁରୁବାର ଦଳର ୨୦୨୪ ସାଧାରଣ ନିର୍ବାଚନରେ ସାଂସଦ ପ୍ରାର୍ଥୀ ଲମ୍ବୋଦର ନିଆଲଙ୍କ ସମେତ ୫୬ଜଣ ସରପଂଚ ଓ ସମିତି ସଭ୍ୟ ଆଜି ବିଜେଡି ଛାଡ଼ି ବିଜେପିରେ ସାମିଲ ହୋଇଛନ୍ତି । ଗତକାଲି ମଧ୍ୟ କୋମନା ବ୍ଲକର ଉପାଧ୍ୟକ୍ଷ ଜୟଦେବ ପ୍ରଧାନ ଓ ଅନ୍ୟ ୧୮ଜଣ ସରପଂଚ ଓ ୯ଜଣ ସମିତି ସଭ୍ୟ ବିଜେଡି ଛାଡ଼ି ବିଜେପିରେ  ଯୋଗ ଦେଇଥିଲେ ।

ନୂଆପଡ଼ା ଉପନିର୍ବାଚନ ପରିଚାଳନା ପାଇଁ ୫୨ଜଣିଆ କମିଟି

ନୂଆପଡ଼ା ଉପନିର୍ବାଚନ ପରିଚାଳନା ପାଇଁ ବିଜେଡି ଚଳିତମାସ ୮ତାରିଖରେ ୩ଟି କମିଟି ଗଠନ କରି ୧୯ଜଣ ନେତାଙ୍କୁ ଦାୟିତ୍ୱ ନ୍ୟସ୍ତ କରିଥିଲା । ଏଥିରେ ଜଣେ ମଧ୍ୟ ଉପକୂଳବର୍ତ୍ତୀ ଜିଲ୍ଲାର ନେତାଙ୍କୁ ସାମିଲ କରାଯାଇ ନଥିଲା । ମାତ୍ର ଆଜି ପ୍ରକାଶିତ ତାଲିକାରେ ମୋଟ ୫୨ଜଣ ନେତାଙ୍କୁ ଦଳ ନୂଆପଡ଼ା ଉପନିର୍ବାଚନ ଦାୟିତ୍ୱ ନ୍ୟସ୍ତ କରିଛି । ସେଥିରେ ୨୫ରୁ ଅଧିକ ଉପକୂଳ ଓଡ଼ିଶାର ଆଗଧାଡ଼ିର ନେତାମାନେ ସାମିଲ ଅଛନ୍ତି । ତେବେ ଏହି କମିଟିରେ ବରିଷ୍ଠ ନେତା ପ୍ରସନ୍ନ ଆଚାର୍ଯ୍ୟ, ଦେବୀପ୍ରସାଦ ମିଶ୍ରଙ୍କ ସମେତ ଟୁକୁନି ସାହୁ, ରୋହିତ ପୂଜାରୀ ଓ ନିରଞ୍ଜନ ବିଶିଙ୍କୁ ବାଦ୍ ଦେଇଛି । ଯଦିଓ ଦେବୀଙ୍କୁ ଛାଡ଼ି ଏହି ସମସ୍ତ ନେତାଙ୍କୁ ପୂର୍ବ କମିଟିରେ ସ୍ଥାନ ମିଳିଥିଲା ।

ସର୍ବେସର୍ବାଙ୍କୁ କ୍ଲିନଚିଟ୍ ପାଇଁ ବିଜେଡି ନେତାଙ୍କ ପ୍ରତିଯୋଗିତା

କୋର କମିଟି ଦ୍ୱାରା ପ୍ରସ୍ତୁତ ସମ୍ଭାବ୍ୟ ପ୍ରାର୍ଥୀ ତାଲିକାକୁ ଅଣଦେଖା କରି ଅନ୍ୟ ଜିଲ୍ଲାରୁ ସ୍ନେହାଙ୍ଗିନୀ ଛୁରିଆଙ୍କୁ ଆଣି ନୂଆପଡ଼ା ଉପନିର୍ବାଚନରେ ପ୍ରାର୍ଥୀ କରାଯିବା ପଛର ରହସ୍ୟ ଉପରୁ ପରଦା ହଟିବାରେ ଲାଗିଛି । ଗତକାଲି ଦଳୀୟ ପ୍ରାର୍ଥୀ ଘୋଷଣା ପରଠୁ ଦଳର ନେତାମାନେ ଯେଭଳି ଢଙ୍ଗରେ ସ୍ନେହାଙ୍ଗିନୀଙ୍କ ପ୍ରାର୍ôଥତ୍ୱକୁ କ୍ୟାମେରା ଆଗରେ ଯଥାର୍ଥ ଦର୍ଶାଇବାକୁ ପ୍ରୟାସ କରୁଛନ୍ତି ତାହା କେବଳ ବିଜେଡିର ଅଘୋଷିତ ସର୍ବେସର୍ବାଙ୍କ ‘ଅଘୋଷିତ ଡିଲ’କୁ ସୁରକ୍ଷା ଦେବାର ପ୍ରୟାସ ବୋଲି ଚର୍ଚ୍ଚା ହେଉଛି । ଯଦିଓ ଦଳର ଅଧିକାଂଶ ନେତା-କର୍ମୀ ଏଭଳି ନିଷ୍ପତ୍ତିକୁ ନାପସନ୍ଦ କରିଛନ୍ତି ଓ ସୋସିଆଲ ମିଡିଆରେ ତୀବ୍ର ପ୍ରତିକ୍ରିୟାଶୀଳ ହେବାରେ ଲାଗିଛନ୍ତି ।

ଦଳ ସୂତ୍ରରୁ ଜଣାପଡ଼ିଛି ଯେ, ଜୟ ଢ଼ୋଲକିଆଙ୍କ ପରିବର୍ତ୍ତେ ସ୍ନେହାଙ୍ଗିନୀଙ୍କୁ ପ୍ରାର୍ଥୀ କରିବା ପାଇଁ ଦଳର ଅଘୋଷିତ ସର୍ବେସର୍ବା ଓ ତାଙ୍କ ଖାସ୍ ଅନୁଗତ ଗତ କିଛିଦିନ ଧରି କସରତ ଚଳାଇଥିଲେ । ଆଉ କୋର୍ ଟିମକୁ ମୋହରା ମଧ୍ୟ ସଜାଇବାକୁ ପଛାଇ ନଥିଲେ । ନିଜର ଅପକର୍ମରୁ ସୁରକ୍ଷିତ ରହିବା ପାଇଁ ବିଜେଡିର ଅଘୋଷିତ ସର୍ବେସର୍ବା ଉପରେ ପଡ଼ି ବିଜେପିକୁ ଖୁସି କରିବା ଚକ୍କରରେ ଜିଲ୍ଲା ବାହାରର ପ୍ରାର୍ଥୀଙ୍କୁ ନୂଆପଡ଼ା ଭୋଟରଙ୍କ ଉପରେ ଲଦି ଦେବାର ରଣନୀତି କରିଛନ୍ତି । ବିଜେଡି ଭୋଟ୍ ବିଭାଜନ ହେଲେ ତା’ର ଅଧିକ ଫାଇଦା ବିଜେପିକୁ ମିଳିବ ବୋଲି ରାଜନୀତିକ ମହଲରେ ଚର୍ଚ୍ଚା ହେଉଛି । 

ସାଧାରଣ ନିର୍ବାଚନରେ ଭିକେ ପାଣ୍ଡିଆନ ନିର୍ବାଚନୀ ପ୍ରଚାର କରିବା ଦ୍ୱାରା ଦଳ ଯେଉଁ ଢଙ୍ଗରେ କ୍ଷତି ସହିଲା ଓ ସରକାରରୁ ବିଦା ହୋଇଗଲା ଏବେ ସେହି ଫର୍ମୂଲାରେ ନୂଆପଡ଼ାବାସୀଙ୍କୁ ଭାବନାତ୍ମକ ଆଘାତ ଦେବା ପାଇଁ ଅନ୍ୟ ଜିଲ୍ଲାରୁ ପ୍ରାୟ ୧୬ମାସ ତଳେ ୨୯ହଜାର ଭୋଟ୍ ବ୍ୟବଧାନରେ ପରାଜିତ ସ୍ନେହାଙ୍ଗିନୀ ଛୁରିଆଙ୍କୁ ଆଣି ନୂଆପଡ଼ାବାସୀଙ୍କ ଉପରେ ଲଦି ଦିଆଯାଇଛି । ଏହାସହିତ ନୂଆପଡ଼ା ବିଜେଡିରେ କେହି ଜଣେବି ଯୋଗ୍ୟ ମହିଳା କିମ୍ବା ପୁରୁଷ ନଥିବା ମଧ୍ୟ ବିଜେଡି ନେତୃତ୍ୱ ସିଧାସଳଖ ପ୍ରମାଣିତ କରିବାକୁ ଚାହିଁଛନ୍ତି । ପରଦା ପଛରେ ରହି ଦଳକୁ ତଳିତଳାନ୍ତ କରିବାରେ ଲାଗିଥିବା ଅଘୋଷିତ ସର୍ବେସର୍ବା ନୂଆପଡ଼ା ଉପନିର୍ବାଚନ ପ୍ରଚାର ମଇଦାନକୁ ବିଜେଡି(BJD) ସୁପ୍ରିମୋ ନବୀନ ପଟ୍ଟନାୟକଙ୍କୁ ଓହ୍ଲାଇ ଉଭୟ ଦଳ ଓ ଦଳପତିଙ୍କ ସମ୍ମାନକୁ ବାଜି ଳଗାଇବାକୁ ପଛାଇ ନଥିବା ଚର୍ଚ୍ଚା ହେଉଛି ।

କାହାକୁ କେଉଁଠି ମିଳିଛି ଦାୟିତ୍ୱ

ନୂଆପଡ଼ା ବ୍ଲକ(୧୮ଜଣ): ନିରଞ୍ଜନ ପୂଜାରୀଙ୍କ ନେତୃତ୍ୱରେ ସଞ୍ଜୟ ଦାସବର୍ମା ,ଅରୁଣ ସାହୁ , ପ୍ରତାପ ଜେନା , ଦିବ୍ୟଶଙ୍କର ମିଶ୍ର , ପ୍ରୀତିରଞ୍ଜନ ଘଡ଼ାଇ,ଧ୍ରୁବ ସାହୁ,ମନୋହର ରନ୍ଧାରୀ ,ପ୍ରଦୀପ ଦିଶାରୀ,ତୁଷାରକାନ୍ତି ବେହେରା, ବ୍ରଜ କିଶୋର ପ୍ରଧାନ, ରମେଶ ଚନ୍ଦ୍ର ବେହେରା,ଶାରଦା ପ୍ରସନ୍ନ ଜେନା,ରୋମାଂଚ ରଞ୍ଜନ ବିଶ୍ୱାଳ,ସୁଦର୍ଶନ ହରିପାଲ,ପ୍ରଶାନ୍ତ କୁମାର ବେହେରା,ଦେବୀ ରଞ୍ଜନ ତ୍ରିପାଠୀ ଓ ନିହାର ରଞ୍ଜନ ବେହେରାଙ୍କୁ ବ୍ଲକର ନିର୍ବାଚନ ପରିଚାଳନା ଦାୟିତ୍ୱ ଦେଇଛି ବିଜେଡି ।

ନୂଆପଡ଼ା ଏନଏସି (୮ଜଣ): ବରିଷ୍ଠ ନେତା ଅତନୁ ସବ୍ୟସାଚୀ ନାୟକଙ୍କ ନେତୃତ୍ୱରେ ଶାରଦା ପ୍ରସାଦ ନାୟକ , ଦେବେଶ ଆଚାର୍ଯ୍ୟ , ମନୋରମା ମହାନ୍ତି , ଦୀପାଳି ଦାସ , ଆୟୁବ ଖାନ୍ , ରୀତା ସାହୁ ଓ ସ୍ୱରୂପ ଦାସ କାର୍ଯ୍ୟ କରିବେ ।

କୋମନା ବ୍ଲକ (୧୮ଜଣ): ସେହିପରି ପ୍ରଣବ ପ୍ରକାଶ ଦାସଙ୍କ ନେତୃତ୍ୱରେ ପ୍ରତାପ ଦେବ , ଅଧିରାଜ ପାଣିଗ୍ରାହୀ , ପୁଷ୍ପେନ୍ଦ୍ର ସିଂହଦେଓ , ଯୋଗେଶ ସିଂହ,ରବି ନନ୍ଦ,ପ୍ରଦୀପ ମାଝୀ ,ନଳିନୀକାନ୍ତ ପ୍ରଧାନ,ବ୍ୟୋମକେଶ ରାୟ,ସୁଶାନ୍ତ କୁମାର ରାଉତ ,ସୁଭାଶିଷ ଖୁଂଟିଆ , ଜଗନ୍ନାଥ ସାରକା , ସରୋଜ ମେହେର,ବିଶ୍ୱରଞ୍ଜନ ମଲ୍ଲିକ,ଅବିନାଶ ସାମଲ, ଈଶ୍ୱର ପାଣିଗ୍ରାହୀ,ରୋହିତ ଯୋଶେଫ ତିର୍କୀ ଓ ଉମାକାନ୍ତ ସାମନ୍ତରାୟ।

ଖରିଆର ରୋଡ୍ ଏନଏସି(୮ଜଣ) : ବରିଷ୍ଠ ନେତା ରଣେନ୍ଦ୍ର ପ୍ରତାପ ସ୍ୱାଇଁଙ୍କ ନେତୃତ୍ୱରେ ବିକ୍ରମ ପଣ୍ଡା , କଳିକେଶ ନାରାୟଣ ସିଂହଦେଓ , ପ୍ରଦ୍ୟୁମ୍ନ ତ୍ରିପାଠୀ , ସୌଭିକ ବିଶ୍ୱାଳ , ଗୌତମ ବୁଦ୍ଧ ଦାସ , ପ୍ରଶାନ୍ତ ମୁଦୁଲି ଏବଂ ରୁଦ୍ର ପ୍ରସାଦ ମହାରଥୀ ନିର୍ବାଚନୀ ପରିଚାଳନା କରିବେ ବୋଲି ଜଣାପଡ଼ିଛି ।