OR 
ମୁଖ୍ୟମନ୍ତ୍ରୀଙ୍କ ବ୍ୟକ୍ତିଗତ ସଚିବ ବାରମ୍ବାର ନିୟମ ଉଲ୍ଲଘଂନ କରୁଥିବାର ଅଭିଯୋଗ ଆସୁଛି ଓ କେନ୍ଦ୍ର ସରକାର ବାରମ୍ବାର କାର୍ଯ୍ୟାନୁଷ୍ଠାନ ନେବା ପାଇଁ ମୁଖ୍ୟ ସଚିବଙ୍କୁ କହୁଛନ୍ତି । କିନ୍ତୁ ରାଜ୍ୟର ମୁଖ୍ୟ ସଚିବ ରହସ୍ୟଜନକ ନିରବତା ଅବଲମ୍ବନ କରିଛନ୍ତି । ମୁଖ୍ୟମନ୍ତ୍ରୀଙ୍କ ବ୍ୟକ୍ତିଗତ ସଚିବଙ୍କ ପାଇଁ ମଂଚ ବାନ୍ଧିବା ଓ ଚେୟାର ପକାଇବାକୁ ଯଦି ବିଜେଡିର ଦୁଇ ବରିଷ୍ଠ ନେତା ପ୍ରସନ୍ନ ଆଚାର୍ଯ୍ୟ ଓ ଦେବୀ ମିଶ୍ରଙ୍କୁ ଯଦି ଖୁସି ଲାଗୁଛି, ତେବେ ଆମର କିଛି କହିବାର ନାହିଁ ଓ ସେମାନେ ତାଙ୍କ ବିବେକକୁ ପଚାରିକି କାର୍ଯ୍ୟ କରନ୍ତୁ ବୋଲି ବିଜେପି କହିଛି ।
ଆଜି ରାଜ୍ୟ କାର୍ଯ୍ୟାଳୟରେ ବିଜେପି ମୁଖପାତ୍ର ସତ୍ୟବ୍ରତ ପଣ୍ଡା ଏକ ସାମ୍ବାଦିକ ସମ୍ମିଳନୀରେ ଅଭିଯୋଗ କରିଛନ୍ତି ଯେ, ରାଜ୍ୟରେ କିଛି ମାସ ହେବ ଗଣତନ୍ତ୍ର ଭୁଶୁଡ଼ି ପଡ଼ିଥିବା ଭଳି ମନେ ହେଉଛି । ମୁଖ୍ୟମନ୍ତ୍ରୀଙ୍କ ବ୍ୟକ୍ତିଗତ ସଚିବ ରାଜ୍ୟର ବିଭିନ୍ନ ଅଂଚଳ ବୁଲି ଯେଉଁଭଳି ଭାବରେ ବିକାଶର ମିଛ କାହାଣୀର ଡିଣ୍ଡିମ ପିଟୁଛନ୍ତିି, ତାହା ଭାରତବର୍ଷରେ ଏକ ଆଶ୍ଚର୍ଯ୍ୟଜନକ ଘଟଣା । ସେହିପରି କୋଟି କୋଟି ଟଙ୍କା ଜବତ ହୋଇଥିବା ଲାଂଚୁଆ ଅଫିସର ଓ ହତ୍ୟା ଅଭିଯୁକ୍ତଙ୍କ ସହିତ ବିଭିନ୍ନ ସ୍ଥାନରେ ଦୃଶ୍ୟମାନ ହେବା ରାଜ୍ୟରେ ୫-ଟିର ସ୍ୱଚ୍ଛତା ପ୍ରତି ସନ୍ଦେହ ସୃଷ୍ଟି କରିଛି ।
Also Read
ରାଜ୍ୟର ମୁଖ୍ୟମନ୍ତ୍ରୀଙ୍କ ବ୍ୟକ୍ତିଗତ ସଚିବ ଯଦି ବିଭିନ୍ନ ଅଂଚଳକୁ ଯାଇ ଜିଲ୍ଲାର ବିକାଶ ଓ ସମସ୍ୟା ବୁଝିବେ ତା'ହେଲେ ମନ୍ତ୍ରୀ, ସାଂସଦ, ବିଧାୟକ, ଜିଲ୍ଲା ପରିଷଦ ସଦସ୍ୟ, ସରପଂଚମାନଙ୍କ ଭୂମିକା କଣ? ବ୍ୟକ୍ତିଗତ ସଚିବଙ୍କ ପାଇଁ କଣ ଗସ୍ତର ପୂର୍ବ ପ୍ରସ୍ତୁତି କରାଇବା ? ଚେୟାର ପକାଇବା ସହ ମଂଚ ବାନ୍ଧିବା ? ବିଜୁ ଜନତା ଦଳର ସଭାପତି ନବୀନ ପଟ୍ଟନାୟକ ଏହାର ଉତ୍ତର ରଖିବେ କି ? ବିଜେଡିର ମନ୍ତ୍ରୀ, ସାଂସଦ, ବିଧାୟକ କଣ ଅଣଦେଖା ଓ ଅଦରକାରୀ ହୋଇପଡିଛନ୍ତି କି? ଯେଉଁଥିପାଇଁ ବ୍ୟକ୍ତିଗତ ସଚିବ ସ୍ୱତନ୍ତ୍ର ପ୍ଲେନ ଓ ହେଲିକପ୍ଟରରେ ବିଭିନ୍ନ ଜିଲ୍ଲାକୁ ଯାଇ ରାଜକୋଷରୁ ଲକ୍ଷ ଲକ୍ଷ ଟଙ୍କା ଖର୍ଚ୍ଚ କରିବା ସହ ସଭା ଓ ସମିତି ନାଁରେ କୋଟି କୋଟି ଟଙ୍କା କରୁଛନ୍ତି । ଏସବୁ ପିସି ଟଙ୍କା ବୋଲି ଚର୍ଚ୍ଚା ହେଉଛି ଓ ଏହାକୁ ଏକ ନାଟକୀୟ ଢଙ୍ଗରେ ଲୋକ ସମସ୍ୟାକୁ ବୁଝିବାର ବାହାନା କରି ସେ ଆତ୍ମପ୍ରଚାର କରୁଛନ୍ତି ବୋଲି ଶ୍ରୀ ପଣ୍ଡା କହିଛନ୍ତିି ।
ବ୍ୟକ୍ତିଗତ ସଚିବଙ୍କ ବାରମ୍ବାର ନିୟମ ଉଲ୍ଲଂଘନର ଅଭିଯୋଗ କେନ୍ଦ୍ରରୁ ଆସୁଛି, ମୁଖ୍ୟ ଶାସନ ସଚିବ କ’ଣ ପାଇଁ କାର୍ଯ୍ୟାନୁଷ୍ଠାନ ନେଉନାହାନ୍ତି? ରାଜ୍ୟର ମୁଖ୍ୟ ଶାସନ ସଚିବ ରହସ୍ୟଜନକ ନୀରବତା ଭାଙ୍ଗି ନିଜର ପଦ ମର୍ଯ୍ୟାଦା ରକ୍ଷା କରନ୍ତୁ ।
— BJP Odisha (@BJP4Odisha) July 3, 2023
ବିଜେପି ସଭାପତିଙ୍କ ସହ ଅନେକ ନେତୃବୃନ୍ଦ ଡିଓପିଟି ବିଭାଗରେ ବ୍ୟକ୍ତିଗତ ସଚିବଙ୍କ ନିୟମ ଉଲ୍ଲଂଘନ… pic.twitter.com/OHgXzjkqWl
ବିଜେପି ରାଜ୍ୟ ସଭାପତି ମନମୋହନ ସାମଲ ଓ ଭୁବନେଶ୍ୱର ସାଂସଦ ଅପରାଜିତା ଷଡ଼ଙ୍ଗୀଙ୍କ ଅଭିଯୋଗ ଉପରେ କାର୍ଯ୍ୟାନୁଷ୍ଠାନ ଗ୍ରହଣ ପାଇଁ ମୁଖ୍ୟ ସଚିବଙ୍କୁ କେନ୍ଦ୍ର ସରକାର ଚିଠି ଦେଇଛନ୍ତି । ଅନୁରୂପ ଭାବେ ବ୍ୟକ୍ତିଗତ ସଚିବଙ୍କ କାର୍ଯ୍ୟକଳାପ ବାବଦରେ ଗତ ମାର୍ଚ୍ଚ ଓ ଏପ୍ରିଲ ମାସରେ ଦୁଇଟି ଅଭିଯୋଗ ଉପରେ କେନ୍ଦ୍ର କାର୍ମିକ ମନ୍ତ୍ରଣାଳୟ ମୁଖ୍ୟ ସଚିବଙ୍କୁ ଚିିଠି ଲେଖିଥିଲେ । ଏ ସବୁ ଅଭିଯୋଗ ଉପରେ କାର୍ଯ୍ୟାନୁଷ୍ଠାନ ଗ୍ରହଣ କରିବା ପାଇଁ ମୁଖ୍ୟ ସଚିବଙ୍କ ପାଖରୁ ସାଧାରଣ ପ୍ରଶାସନ ବିଭାଗର ଅଧିକାରୀ ସୁରେନ୍ଦ୍ର କୁମାରଙ୍କ ପାଖକୁ ଯାଇଛି ଓ ସେ ଏ ପର୍ଯ୍ୟନ୍ତ ସେହି ଚିଠିଗୁଡ଼ିକୁ କେବଳ ନିଜ ପାଖରେ ରଖି ଆତ୍ମସନ୍ତୋଷ ପ୍ରକାଶ କରୁଛନ୍ତି । ଏସବୁ ପ୍ରସଙ୍ଗରେ ରାଜ୍ୟର ମୁଖ୍ୟ ସଚିବ ରହସ୍ୟଜନକ ନୀରବତା ଭାଙ୍ଗି ନିଜର ପଦ ମର୍ଯ୍ୟାଦା ରକ୍ଷା କରନ୍ତୁ ବୋଲି ବିଜେପି କହିଛି ।
ସେହିପରି ବିଜେଡିର ବରିଷ୍ଠ ନେତା ପ୍ରସନ୍ନ ଆଚାର୍ଯ୍ୟ ଓ ଦେବୀ ମିଶ୍ରଙ୍କୁ ମଧ୍ୟ ବିଜେପି କଡ଼ା ସମାଲୋଚନା କରିଛି । ପ୍ରସନ୍ନ ଆଚାର୍ଯ୍ୟଙ୍କ ପିତା ସ୍ୱର୍ଗତ କୃତାର୍ଥ ଆଚାର୍ଯ୍ୟ, ଯେ ଜଣେ ଗାନ୍ଧୀବାଦୀ ବ୍ୟକ୍ତି ଓ ପଦ୍ମଶ୍ରୀ ପୁରସ୍କାର ପାଇଥିଲେ । ସାମାଜିକ ଜୀବନରେ ତାଙ୍କର ବହୁତ ଭଲ ଅବଦାନ ଥିଲା । ଆଉ ଦେବୀ ମିଶ୍ର ଓଡ଼ିଶା ରାଜନୀତିରେ ଦୀର୍ଘବର୍ଷ ଧରି ବିଧାୟକ ଓ ମନ୍ତ୍ରୀ ଭାବେ ତାଙ୍କର ଦାୟିତ୍ୱ ତୁଲାଉଛନ୍ତି । କିନ୍ତୁ ମୁଖ୍ୟମନ୍ତ୍ରୀଙ୍କ ବ୍ୟକ୍ତିଗତ ସଚିବଙ୍କ ସପକ୍ଷରେ ଏହି ଦୁଇ ନେତା ଯେଉଁ ଭଳି ଭାବେ ବକ୍ତବ୍ୟ ରଖିଛନ୍ତିି, ଏହା କେବଳ ନିଜକୁ ରାଜନୀତିରେ ବଂଚାଇ ରଖିବା ପାଇଁ ବାଧ୍ୟ ହେଉଥିଲା ଭଳି ମନେ ହେଉଛି । ଯଦି ବ୍ୟକ୍ତିଗତ ସହାୟକ ପାଇଁ ଯଦି ମଂଚ ବାନ୍ଧିବା ଓ ଚେୟାର ପକାଇବାରେ ସେମାନଙ୍କୁ ଖୁସି ଲାଗୁଛି । ତା’ହେଲେ ସେମାନେ ତାଙ୍କର ବିବେକକୁ ପଚାରନ୍ତୁ ବୋଲି ଶ୍ରୀ ପଣ୍ଡା କଟାକ୍ଷ କରିଛନ୍ତି ।
ଏହି ସାମ୍ବାଦିକ ସମ୍ମିଳନୀରେ ବିଜେପି ରାଜ୍ୟ ମିଡିଆ ସେଲ୍ ମୁଖ୍ୟ ଦିଲ୍ଲୀପ ମଲ୍ଲିକ ଉପସ୍ଥିତ ଥିଲେ ।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
