BJP Win: ନୂଆପଡ଼ାରେ ‘ଜୟ’ଙ୍କ ବୃହତ୍ ବିଜୟ: ବିଜେଡିକୁ ପଛରେ ପକାଇ କଂଗ୍ରେସ ରନର୍ସ ଅପ୍‌

ନୂଆପଡ଼ା ବିଧାନସଭା ଉପନିର୍ବାଚନରେ ବିଜେପି ପ୍ରାର୍ଥୀ ଜୟ ଢ଼ୋଲକିଆଙ୍କ ବୃହତ୍ ବିଜୟ ହୋଇଛି । ସମସ୍ତ ୨୯ରାଉଣ୍ଡ ଭୋଟ୍ ଗଣତି ପରେ ବିଜେପିର ଜୟ ନିଜର ନିକଟତମ ପ୍ରତିଦ୍ୱନ୍ଦ୍ୱୀ କଂଗ୍ରେସ ପ୍ରାର୍ଥୀ ଘାସିରାମ ମାଝୀଙ୍କଠୁ ୮୩୭୮୪ଖଣ୍ଡ ଭୋଟ ବ୍ୟବଧାନରେ ବିଜୟୀ ହୋଇଛନ୍ତି । ଜୟଙ୍କୁ ମୋଟ ୧,୨୩,୮୬୯ ଭୋଟ୍ (୫୮.୨୭%) ମିଳିଛି, ଯାହାକି ରାଜ୍ୟରେ ବିଜେପି ପାଇଁ ଏକ ବୃହତ ବିଜୟ । ଏହି ରେକର୍ଡ଼ ବିଜୟ କେବଳ ଭୋଟ୍ ବ୍ୟବଧାନ ଦୃଷ୍ଟିରୁ ବଡ଼ ନୁହେଁ, ବରଂ ଓଡ଼ିଶା ରାଜନୀତିରେ ଏକ ଗୁରୁତ୍ୱପୂର୍ଣ୍ଣ ପରିବର୍ତ୍ତନର ସଙ୍କେତ ଦେଇଛି । ନୂଆପଡ଼ାର ଜନାଦେଶ ରାଜ୍ୟରେ ଦୀର୍ଘ ୨୪ବର୍ଷ ଧରି ଶାସନ କରିଥିବା ଏକନମ୍ବର ଦଳ ବିଜେଡିକୁ ତୃତୀୟ ସ୍ଥାନକୁ ଠେଲି ଦେଇଛି ।

ଜୟ ଢୋଲକିଆଙ୍କ ଐତିହାସିକ ସଫଳତା 

ବିଜେପି ପ୍ରାର୍ଥୀ ଜୟ ଢୋଲକିଆ ନିଜର ନିକଟତମ ପ୍ରତିଦ୍ୱନ୍ଦ୍ୱୀ କଂଗ୍ରେସର ଘାସିରାମ ମାଝୀଙ୍କୁ ୮୩,୭୪୮ ଭୋଟର ବିଶାଳ ବ୍ୟବଧାନରେ ପରାସ୍ତ କରିଛନ୍ତି । ଢୋଲକିଆଙ୍କୁ ମୋଟ ୧,୨୩,୭୫୭ ଇଭିଏମ୍ ଭୋଟ୍ ଏବଂ ୧୧୨ଟି ପୋଷ୍ଟାଲ୍ ଭୋଟ୍ ମିଳିଛି । ବିଜେପି ପାଇଁ ନୂଆପଡ଼ାରେ ଏହା ଏକ ନିର୍ଣ୍ଣାୟକ ଜନାଦେଶ, ଯାହା ଦଳର ସାଂଗଠନିକ ପ୍ରଭାବକୁ ବଢ଼ାଇବାରେ ସହାୟକ ହେବ ଓ ପଶ୍ଚିମ ଓଡ଼ିଶା ରାଜନୀତିରେ ବିଜେପିକୁ ଏକ ମଜବୁତ ସ୍ଥିତିରେ ରଖିଛି । ଏହି ବିଶାଳ ଭୋଟ୍ ବ୍ୟବଧାନ ରାଜ୍ୟରେ ମୋହନ ମାଝୀ ନେତୃତ୍ୱାଧୀନ ବିଜେପି ସରକାର ଓ କେନ୍ଦ୍ରର ମୋଦି ସରକାର ସପକ୍ଷରେ ଜନାଦେଶ ବୋଲି କୁହାଯାଉଛି।

କଂଗ୍ରେସ ରିଟର୍ଣ୍ଣ: ବିଜେଡିକୁ ପଛରେ ପକାଇଲା

କଂଗ୍ରେସ ପ୍ରାର୍ଥୀ ଘାସିରାମ ମାଝୀ ଏହି ଉପନିର୍ବାଚନରେ ଚମତ୍କାର ପ୍ରଦର୍ଶନ କରିଛନ୍ତି । ସେ ମୋଟ ୪୦,୧୨୧ ଭୋଟ୍ (୧୮.୮୭%) ହାସଲ କରି ମୁଖ୍ୟ ବିରୋଧୀ ଦଳ ବିଜେଡିକୁ ପଛରେ ପକାଇ ଦ୍ୱିତୀୟ ସ୍ଥାନରେ ରହିଛନ୍ତି । ଆଜି ଭୋଟ୍ ଗଣତିର ପ୍ରାରମ୍ଭିକ ୪ର୍ଥ ଓ ୫ମ ରାଉଣ୍ଡରେ ସେ ବିଜେଡି ପ୍ରାର୍ଥୀ ସ୍ନେହାଙ୍ଗିନୀ ଛୁରିଆଙ୍କୁ ପଛରେ ପକାଇଥିଲେ । ମାତ୍ର ପରେ ବିଜେଡି ପ୍ରାର୍ଥୀ ତାଙ୍କୁ ପଛରେ ପକାଇ ଦେଇଥିଲେ । କିନ୍ତୁ ୧୭ତମ ରାଉଣ୍ଡ ପରଠାରୁ ଶ୍ରୀ ମାଝୀ କ୍ରମାଗତ ଭାବେ ବିଜେଡିକୁ ପଛରେ ପକାଇ ଶେଷ ରାଉଣ୍ଡ ଗଣତି ପର୍ଯ୍ୟନ୍ତ ଦ୍ୱିତୀୟ ସ୍ଥାନରେ ରହିଥିଲେ ।  ରାଜ୍ୟରେ ଦୀର୍ଘବର୍ଷ ଧରି ଦୁର୍ବଳ ସ୍ଥିତିରେ ଥିବା କଂଗ୍ରେସ ଦ୍ୱିତୀୟ ସ୍ଥାନରେ ରହିବା ବିଜେଡିକୁ ଶକ୍ତଧକ୍କା ହୋଇଛି । ଆଉ ରାଜ୍ୟରେ କଂଗ୍ରେସ ନିଜର ସ୍ଥିତି ସୁଦୃଢ଼ କରିବା ପାଇଁ ଏକ ସୁଯୋଗ ପାଇଥିବା ଚର୍ଚ୍ଚା ହେଉଛି ।

ବିଜେଡିର ଦୁର୍ବଳ ପ୍ରଦର୍ଶନ: ନବୀନଙ୍କ ପ୍ରଚାର ସତ୍ତ୍ୱେ ତୃତୀୟ ସ୍ଥାନରେ

ମୁଖ୍ୟ ବିରୋଧୀ ଦଳ ବିଜେଡି ପାଇଁ ଏହି ନିର୍ବାଚନ(nuapada byelection) ଏକ ବଡ଼ ଝଟକା ସାବ୍ୟସ୍ତ ହୋଇଛି । ଦଳର ପୂବର୍ତନ ବିଧାୟିକା ତଥା ମହିଳା ସଭାନେତ୍ରୀ ସ୍ନେହାଙ୍ଗିନୀ ଛୁରିଆଙ୍କୁ ମାତ୍ର ୩୮,୪୦୮ ଭୋଟ୍ (୧୮.୦୭%) ମିଳିଛି, ଯାହା ତାଙ୍କୁ ତୃତୀୟ ସ୍ଥାନରେ ରଖିଛି । ନୂଆପଡ଼ା ବିଜେଡିର ଗଡ଼ ଥିଲା ତଥା ଦିବଂଗତ ରାଜେନ୍ଦ୍ର ଢ଼ୋଲକିଆ ମଧ୍ୟ ବିଜେଡିରୁ ପ୍ରତିନିଧିତ୍ୱ କରୁଥିଲେ । ଏତେ କମ୍ ଭୋଟ୍ ପାଇବା ଓ କଂଗ୍ରେସ ପ୍ରାର୍ଥୀଙ୍କଠାରୁ ପଛରେ ରହିବା ବିଜେଡି ପାଇଁ ଆଗାମୀ ଦିନରେ ଏକ ରାଜନୀତିକ ସଙ୍କଟ ସୃଷ୍ଟି କରିବାର ଆଶଙ୍କା ରହିଛି ।

ବିଜେଡି ସୁପ୍ରିମୋ ନବୀନ ପଟ୍ଟନାୟକ ଦୁଇ ଦୁଇଥର ନୂଆପଡ଼ା ଯାଇ ପ୍ରାର୍ଥୀଙ୍କ ସପକ୍ଷରେ ପ୍ରଚାର କରିବା, ଦଳର ଶତାଧିକ ନେତା ଗ୍ରାଉଣ୍ଡ ମ୍ୟାନେଜମେଂଟ କରିବା ପରେ ମଧ୍ୟ ଜିଲ୍ଲା ବାହାର ପ୍ରାର୍ଥୀଙ୍କୁ ନୂଆପଡ଼ାବାସୀ ଗ୍ରହଣ କରିନଥିବା ସ୍ପଷ୍ଟ ହୋଇଛି । ଏହି ଜନାଦେଶ ଦଳର ପାରମ୍ପରିକ ଭୋଟକୁ ଦଳଠୁ ଛଡ଼ାଇ ନେଇଛି । ଏହି ନିର୍ବାଚନକୁ ସମ୍ମାନର ପ୍ରଶ୍ନ କରିଥିବା ଦଳ ପାଇଁ ଏହା ଆତ୍ମସମୀକ୍ଷା କରିବାର ଆବଶ୍ୟକତାକୁ ଦର୍ଶାଉଛି ।

ମହିଳା ଭୋଟରଙ୍କ ନିର୍ଣ୍ଣାୟକ ଭୂମିକା: ୫୧% ମହିଳାଙ୍କ ଭାଗିଦାରୀ

ଏହି ଉପନିର୍ବାଚନରେ ମୋଟ ୨,୧୨,୩୮୫ ଭୋଟର ମତଦାନ କରିଥିଲେ । ସମୁଦାୟ ୨,୫୪,୪୯୭ ପଞ୍ଜୀକୃତ ଭୋଟରଙ୍କ ମଧ୍ୟରୁ ୧,୦୮,୩୮୩ ମହିଳା (୫୧.୧୩%) ଏବଂ ୧,୦୩,୮୫୭ ପୁରୁଷ (୪୮.୮୭%) ଭୋଟ୍ ଦେଇଥିଲେ । ମହିଳା ଭୋଟରଙ୍କ ଏହି ସକ୍ରିୟ ଭାଗିଦାରୀ ନିର୍ବାଚନ ଫଳାଫଳକୁ ପ୍ରଭାବିତ କରିବାରେ ଏକ ବଡ଼ ଭୂମିକା ଗ୍ରହଣ କରିଛି, ଯାହା ଏହି ନିର୍ବାଚନକୁ ଏକ ନୂଆ ସାମାଜିକ ଦିଗ ଦେଇଛି ।

ଶକ୍ତିଶାଳୀ ହେବେ ବିଜେପି ଓ ମୋହନ, ବିଜେଡିରେ ବଢ଼ିବ କନ୍ଦଳ

ଜୟ ଢୋଲକିଆଙ୍କ ଏହି ବୃହତ୍ ବିଜୟ ବିଜେପି ପାଇଁ ପଶ୍ଚିମ ଓଡ଼ିଶାରେ ରାଜନୈତିକ ସ୍ଥିତିକୁ ଆହୁରି ମଜବୁତ କରିଛି ତଥା ଆଗାମୀ ପଂଚାୟତ ନିର୍ବାଚନ ପାଇଁ ଉପଯୁକ୍ତ ପରିବେଶ ସୃଷ୍ଟି କରିଛି । ଏହା ରାଜ୍ୟରେ ମୁଖ୍ୟମନ୍ତ୍ରୀ ମୋହନ ମାଝୀ ସରକାରର ଲୋକାଭିମୁଖୀ କାର୍ଯ୍ୟ ଓ ବଳିଷ୍ଠ ନେତୃତ୍ୱକୁ ପ୍ରମାଣିତ କରିବା ସହ ବିଜେପି ସାଂଗଠନକୁ ମଧ୍ୟ ସୁଦୃଢ଼ କରାଇବ ବୋଲି ଆକଳନ ହେଉଛି ।

 ସେହିପରି ଦୀର୍ଘବର୍ଷ ଧରି ଅସ୍ତିତ୍ୱ ସଙ୍କଟରେ ଥିବା କଂଗ୍ରେସ ପାଇଁ ନୂଆପଡ଼ାର ଜନାଦେଶ ଜୀବନ୍ୟାସ ସଦୃଶ ହୋଇଛି। ଦଳ ସେଠାରେ ଦ୍ୱିତୀୟ ସ୍ଥାନ ହାସଲ କରିବା ଏକ ସକାରାତ୍ମକ ଦିଗକୁ ଉନ୍ମୁକ୍ତ କରିଛି । ଯାହାକୁ ଆଧାର କରି ଦଳ ତା'ର ଭବିଷ୍ୟତ ରଣନୀତି ପ୍ରସ୍ତୁତ କରିପାରିବ । ଅନ୍ୟପକ୍ଷରେ ବିଜେଡି ପାଇଁ ଜନାଦେଶ ସ୍ପଷ୍ଟ ଚେତାବନୀ ହୋଇଛି । ନିଜର ସାଂଗଠନିକ ସ୍ଥିତିକୁ ସୁଦୃଢ଼ କରିବା ପାଇଁ ଦଳକୁ ଆତ୍ମଚିନ୍ତନ କରିବାର ଆବଶ୍ୟକତା ରହିଛି ।

 ଅଘୋଷିତ ସର୍ବେସର୍ବା ଭିକେ ପାଣ୍ଡିଆନ ପରଦା ପଛରେ ରହି ଗୋଟିଚାଳନା କରିବା ଓ ନିଷ୍ପତ୍ତି ଲଦି ଦେବା ଦଳ ପାଇଁ ବୁମେରାଂ ହେବାରେ ଲାଗିଛି । ଯାହା ଆଗାମୀ ଦିନରେ ବିଜେଡି କନ୍ଦଳକୁ ଉଗ୍ର ରୂପ ଦେବାର ଆଶଙ୍କା ରହିଛି । ନୂଆପଡ଼ାର ଜନତା ଏଥର ପରିବର୍ତ୍ତନକୁ ବାଛିଛନ୍ତି ଓ ଦିବଂଗତ ବିଧାୟକ ରାଜେନ୍ଦ୍ର ଢ଼ୋଲକିଆଙ୍କ ଦାୟାଦ ଜୟଙ୍କୁ ନିଜର ପ୍ରତିନିଧି ଭାବେ ନିର୍ବାଚିତ କରିଛନ୍ତି ।

ଉଲ୍ଲେଖଯୋଗ୍ୟ, ବିଜେଡି ବିଧାୟକ ରାଜେନ୍ଦ୍ର ଢ଼ୋଲକିଆଙ୍କ ମୃତ୍ୟୁ ଯୋଗୁ ନୂଆପଡ଼ାରେ ଉପନିର୍ବାଚନ ଅନୁଷ୍ଠିତ ହୋଇଥିଲା ।