ସାଧାରଣ ନିର୍ବାଚନକୁ ଦୃଷ୍ଟିରେ ରଖି କଂଗ୍ରେସ ଏବେ ନିଜର ବଳ ଗୋଟାଇବାରେ ଲାଗିଛି । ବିଭିନ୍ନ କାରଣରୁ ଦଳୀୟ କାର୍ଯ୍ୟାନୁଷ୍ଠାନର ଶିକାର ହୋଇଥିବା ନେତାମାନଙ୍କୁ ଫେରାଇ ଆଣିବାକୁ ପ୍ରଦେଶ କଂଗ୍ରେସ ଏବେ ପ୍ରୟାସ ଆରମ୍ଭ କରିଛି। ଗତ ଜୁଲାଇ ମାସରେ ନିଲମ୍ବିତ ବିଧାୟକ ମହମ୍ମଦ ମୋକିମ୍ ଓ ବରିଷ୍ଠ ନେତା ଚିରଞ୍ଜିବ ବିଶ୍ୱାଳଙ୍କ ଉପରୁ ନିଲମ୍ବନ ଖୁବଶୀଘ୍ର ପ୍ରତ୍ୟାହାର କରାଯିବ ବୋଲି ଦଳ ସଙ୍କେତ ଦେଇଛି । ଆଉ ନିଲମ୍ବନ ହଟିବା ପରେ ଚିରଞ୍ଜିବ ବିଜେଡିରେ ସାମିଲ ହୋଇପାରନ୍ତି ବୋଲି ଚର୍ଚ୍ଚା ଜୋର ଧରିଛି ।
ପ୍ରଦେଶ କଂଗ୍ରେସ କମିଟି(ପିସିସି) ଶୃଙ୍ଖଳା କମିଟି ଅଧ୍ୟକ୍ଷ ସନ୍ତୋଷ ସିଂ ସାଲୁଜା ଆଜି ସାମ୍ବାଦିକମାନଙ୍କୁ ସୂଚନା ଦେଇ କହିଛନ୍ତି ଯେ, ବିଧାୟକ ମହମ୍ମଦ ମୋକିମ ଓ ପୂର୍ବତନ ବିଧାୟକ ଚିରଞ୍ଜିବ ବିଶ୍ୱାଳଙ୍କ ସମେତ ବରିଷ୍ଠ ନେତାମାନଙ୍କ ଉପରୁ ନିଲମ୍ବନ ଆଦେଶ ପ୍ରତ୍ୟାହାର କରାଯିବାକୁ ଦଳ ନିଷ୍ପତ୍ତି ନେଇଛି । ଖୁବଶୀଘ୍ର ଏନେଇ ନିର୍ଦ୍ଦେଶନାମା ଜାରି ହେବ ବୋଲି ସେ କହିଛନ୍ତି । ଆସନ୍ତା ୬ତାରିଖରେ ଦଳର ନୂଆ ରାଜ୍ୟ ପ୍ରଭାରୀ ଡଃ ଅଜୟ କୁମାର ଆସିବେ ବୋଲି ମଧ୍ୟ ସେ ସୂଚନା ଦେଇଛନ୍ତି ।
ତେବେ ୨୦୧୯ ସାଧାରଣ ନିର୍ବାଚନରେ ପରାଜିତ ହେବାପରଠୁ ସାଂଗଠନିକ କାର୍ଯ୍ୟକ୍ରମରୁ ଦୂରେଇ ରହିଥିବା ଚିରଞ୍ଜିବ ବିଜେଡିରେ ସାମିଲ ହୋଇପାରନ୍ତି ବୋଲି ଚର୍ଚ୍ଚା ଜୋର ଧରିଛି । କଂଗ୍ରେସ ତାଙ୍କୁ ଦଳରୁ ନିଲମ୍ବିତ କରିଥିବାରୁ ସେ ବିଜେଡିରେ ସାମିଲ ହୋଇପାରୁନଥିଲେ । ମାତ୍ର ନିଲମ୍ବନ ହଟିବା ପରେ ଓ ଆଗାମୀ ସାଧାରଣ ନିର୍ବାଚନ ପୂର୍ବରୁ ସେ ବିଜେଡିରେ ଯୋଗ ଦେଇପାରନ୍ତି ବୋଲି ତାଙ୍କ ସମର୍ଥକଙ୍କ ମହଲରୁ ସୂଚନା ମିଳିଛି । ଶ୍ରୀ ବିଶ୍ୱାଳ ଗତ ସାଧାରଣ ନିର୍ବାଚନରେ ପରାଜିତ ହେବାପରଠୁ ଅର୍ଥାତ୍ ଦୀର୍ଘ ପ୍ରାୟ ସାଢ଼େ ୪ବର୍ଷ ଧରି ସାଂଗଠନିକ କାର୍ଯ୍ୟରେ ସକ୍ରିୟ ନାହାନ୍ତି କିମ୍ବା ନିଜର ନିର୍ବାଚନମଣ୍ଡଳୀ ଜଗତସିଂହପୁରରେ ମଧ୍ୟ ବିଶେଷ ଦୃଶ୍ୟମାନ ହେଉନାହାନ୍ତି । ତେଣୁ ସେ ଆଗାମୀ ନିର୍ବାଚନ ଲଢ଼ିବେ କି ନାହିଁ ତାହା ମଧ୍ୟ ସନ୍ଦେହଘେରରେ ରହିଛି । ଅବଶ୍ୟ ନିଲମ୍ବିତ ଚିରଞ୍ଜିବଙ୍କୁ ବିଜେଡି ନିଜ ସହ ସାମିଲ କରିବ କି ନାହିଁ ତାହା ଏବେବି ପ୍ରଶ୍ନବାଚୀ ହୋଇ ରହିଛି ।
Also Read
ଅନ୍ୟପକ୍ଷରେ ପୂର୍ବତନ ମୁଖ୍ୟମନ୍ତ୍ରୀ ଗିରିଧର ଗମାଙ୍ଗଙ୍କ ପତ୍ନୀ ପୂର୍ବତନ ବିଧାୟିକା ହେମା ଗମାଙ୍ଗ ଆସନ୍ତା ୭ତାରିଖରେ କଂଗ୍ରେସରେ ସାମିଲ ହେବେ ବୋଲି ଘୋଷଣା କରିଛନ୍ତି । ତାଙ୍କୁ ଏନେଇ ଏଆଇସିସିରୁ କ୍ଲିଅରାନ୍ସ ମିଳିଛି ଓ ଭୁବନେଶ୍ୱରରେ ପିସିସି ସଭାପତି ଶରତ ପଟ୍ଟନାୟକଙ୍କ ଉପସ୍ଥିତିରେ ସେ ଦଳରେ ସାମିଲ ହେବେ । ମାତ୍ର ତାଙ୍କ ପୁଅ ଶିଶିର ଗମାଙ୍ଗ ଓ ପତି ଗିରିଧର ଗମାଙ୍ଗ କଂଗ୍ରେସରେ ସାମିଲ ହେବାକୁ ସମୟ ଲାଗିବ ବୋଲି ସେ ସୂଚନା ଦେଇଛନ୍ତି । ଶିଶିର କହିଛନ୍ତି ଯେ,ତାଙ୍କ ମା’ ୭ତାରିଖରେ କଂଗ୍ରେସରେ ସାମିଲ ହେବେ । ସେମାନେ ମଧ୍ୟ କଂଗ୍ରେସରେ ସାମିଲ ହେବେ । ଗତ ୪-୫ମାସ ଧରି ଏନେଇ ଆଲୋଚନା ଚାଲିଛି । ଗାନ୍ଧି ପରିବାର ଓ ଏଆଇସିସି ପକ୍ଷରୁ ମଧ୍ୟ ସେମାନଙ୍କ ଘରବାହୁଡ଼ାକୁ ସବୁଜ ସଙ୍କେତ ମିଳିଛି । ତେବେ ଖୁବଶୀଘ୍ର ଏନେଇ ତାରିଖ ଘୋଷଣା ହେବ ବୋଲି ସେ କହିଛନ୍ତି ।
କଂଗ୍ରେସର ନବନିଯୁକ୍ତ ରାଜ୍ୟ ପ୍ରଭାରୀ ଅଜୟ କୁମାର ଆସନ୍ତା ୬ତାରିଖରେ ଦୁଇଦିନିଆ ଓଡ଼ିଶା ଗସ୍ତରେ ଆସି ଦଳର ବରିଷ୍ଠ ନେତାମାନଙ୍କୁ ଭେଟିବା ସହ ସାଂଗଠନିକ ସ୍ଥିତି ଓ କାର୍ଯ୍ୟକ୍ରମର ସମୀକ୍ଷା କରିବେ । ଏହି ଗସ୍ତ ପରେ ପୂର୍ବତନ କେନ୍ଦ୍ରମନ୍ତ୍ରୀ ଶ୍ରୀକାନ୍ତ ଜେନାଙ୍କ ସମେତ ମହମ୍ମଦ ମୋକିମ୍ ଓ ଚିରଞ୍ଜିବ ବିଶ୍ୱାଳଙ୍କ ନିଲମ୍ବନ ନିର୍ଦ୍ଦେଶ ପ୍ରତ୍ୟାହାର ହୋଇପାରେ ବୋଲି ଚର୍ଚ୍ଚା ହେଉଛି ।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
