ନିର୍ବାଚନୀ କଟକଣା ସତ୍ତ୍ୱେ ମୁଖ୍ୟମନ୍ତ୍ରୀଙ୍କ ପ୍ୟାକେଜ୍ ଘୋଷଣା: ବିରୋଧୀ ଚୁପ୍‌, ନିର୍ବାଚନ କମିଶନ ନିରବ

ଝାରସୁଗୁଡ଼ା ଉପନିର୍ବାଚନ ପାଇଁ ଆଦର୍ଶ ଆଚରଣ ବିଧି ବଳବତ୍ତର ରହିଥିବା ସତ୍ତ୍ୱେ ଝାରସୁଗୁଡ଼ା ନିର୍ବାଚନମଣ୍ଡଳୀର ଏକ ବୃହତ୍ ସମୁଦାୟକୁ ସନ୍ତୁଷ୍ଟ କରିବାକୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଆଜି ଏକ ଲୋଭନୀୟ ପ୍ୟାକେଜ୍ ଘୋଷଣା କରିଛନ୍ତି । ଝାରସୁଗୁଡ଼ା ନିର୍ବାଚନରେ ଅଗରିଆ ସମାଜ ଭୋଟରଙ୍କୁ ଆକୃଷ୍ଟ କରିବା ନିମନ୍ତେ ସେମାନଙ୍କୁ ରାଜଧାନୀ ଭୁବନେଶ୍ୱରରେ ଅଧ ଏକର ଜମି ଓ ୩କୋଟି ଟଙ୍କା ସହାୟତା ରାଜ୍ୟ ସରକାର ଯୋଗାଇ ଦେବେ ବୋଲି ମୁଖ୍ୟମନ୍ତ୍ରୀ ଘୋଷଣା କରିଛନ୍ତି । ତେବେ ଭୋଟ ବେଳେ ଏକ ନିର୍ଦ୍ଦିଷ୍ଟ ସମୁଦାୟକୁ  ତୁଷ୍ଟୀକରଣ ପାଇଁ ମୁଖ୍ୟମନ୍ତ୍ରୀଙ୍କ ଏହି ଘୋଷଣା ସିଧାସଳଖ ନିର୍ବାଚନୀ ଆଚରଣ ବିଧି ଉଲ୍ଲଘଂନ କରୁଥିଲେ ମଧ୍ୟ ବିରୋଧୀ ଦଳ ଚୁପ୍ ରହିଛନ୍ତି । ଏପରିକି ନିର୍ବାଚନ କମିଶନ ମଧ୍ୟ ଏନେଇ ଆପତ୍ତି ନଉଠାଇବା ସାଧାରଣରେ ଚର୍ଚ୍ଚାର ବିଷୟ ପାଲଟିଛି ।

ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟରୁ ଜାରି ସୂଚନା ଅନୁସାରେ, ଅଗରିଆ ସମାଜର ପ୍ରତିନିଧିମାନେ ନିକଟରେ ସେମାନଙ୍କ ବିଭିନ୍ନ ସମସ୍ୟା ନେଇ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଭେଟିଥିଲେ । ସେମାନଙ୍କ ଅନୁରୋଧ ତଥା ଅଗରିଆ ସମାଜର ବୃହତ୍ତର ସ୍ୱାର୍ଥକୁ ଦୃଷ୍ଟିରେ ରଖି ମୁଖ୍ୟମନ୍ତ୍ରୀ ଭୁବନେଶ୍ୱର ନିକଟରେ ଅଗରିଆ ସମାଜ ପାଇଁ ଅଧ ଏକର ଜମି ଯୋଗାଇ ଦିଆଯିବ ବୋଲି ଘୋଷଣା କରିଛନ୍ତି । ଏଥିପାଇଁ ଜମି ଚିହ୍ନଟ ଦିଗରେ ପଦକ୍ଷେପ ନେବାକୁ ମୁଖ୍ୟ ସଚିବଙ୍କୁ ନିର୍ଦ୍ଦେଶ ଦେଇଛନ୍ତି । ଏହି ଅଗରିଆ ସମାଜ ଭବନ ନିର୍ମାଣ ପାଇଁ ସରକାର ମଧ୍ୟ ୩କୋଟି ଟଙ୍କା ମୁଖ୍ୟମନ୍ତ୍ରୀଙ୍କ ସ୍ୱତନ୍ତ୍ର ସହାୟତା ପାଣ୍ଠିରୁ ଯୋଗାଇ ଦେବେ ବୋଲି ଘୋଷଣା କରିଛନ୍ତି । କୃଷି ଉପରେ ନିର୍ଭର କରୁଥିବା ଏହି ସମାଜର ଲୋକମାନେ ମୁଖ୍ୟତଃ ବରଗଡ଼, ସମ୍ବଲପୁର, ଝାରସୁଗୁଡ଼ା, ସୁନ୍ଦରଗଡ଼, କଳାହାଣ୍ଡି, ବଲାଙ୍ଗିର ଓ ଦେବଗଡ଼ ଆଦି ଜିଲ୍ଲାରେ ବସବାସ କରନ୍ତି ବୋଲି ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟ ପକ୍ଷରୁ କୁହାଯାଇଛି ।

ତେବେ ପ୍ରଶ୍ନ ଉଠୁଛି, ଝାରସୁଗୁଡ଼ା ଉପନିର୍ବାଚନ ପାଇଁ ନିର୍ବାଚନୀ ଆଚରଣ ବିଧି ବଳବତ୍ତର ରହିଥିବାବେଳେ ମୁଖ୍ୟମନ୍ତ୍ରୀ ଏଭଳି ଘୋଷଣା କିଭଳି କଲେ । ସେଠାରେ ଏବେ ପ୍ରଚାର ଜୋରସୋରରେ ଚାଲିଥିବାବେଳେ ନିର୍ବାଚନମଣ୍ଡଳୀର ପ୍ରାୟ ୧୮ ପ୍ରତିଶତ ଭୋଟର ହେଉଛନ୍ତି ଅଗରିଆ ସମୁଦାୟର । କଂଗ୍ରେସ ପ୍ରାର୍ଥୀ ତରୁଣ ପାଣ୍ଡେ ଅଗରିଆ ସମୁଦାୟର ଓ ତାଙ୍କ ଭୋଟବ୍ୟାଙ୍କରେ ଛିଦ୍ର କରିବା ନିମନ୍ତେ ଶାସକ ବିଜେଡି ଏବେ ଏଭଳି ପ୍ରଲୋଭନ ଦେଖାଇଥିବା ଚର୍ଚ୍ଚା ହେଉଛି । ଆଦର୍ଶ ଆଚରଣ ବିଧିକୁ ଉଲ୍ଲଘଂନ କରି ଉପନିର୍ବାଚନ ସମୟରେ ମୁଖ୍ୟମନ୍ତ୍ରୀଙ୍କ ଏହି ଘୋଷଣାକୁ ନେଇ ବିରୋଧୀ କଂଗ୍ରେସ ଓ ବିଜେପି ନିରବ ରହିଥିବାବେଳେ ନିର୍ବାଚନ କମିଶନ ମଧ୍ୟ କାହିଁକି ଆପତ୍ତି  ଉଠାଉ ନାହାନ୍ତି ତାହା ଏବେ ସାଧାରଣରେ ପ୍ରଶ୍ନବାଚୀ ସୃଷ୍ଟି କରିଛି ।

ସୂଚନାଯୋଗ୍ୟ, ପଦ୍ମପୁର ଉପନିର୍ବାଚନବେଳେ ଆଦର୍ଶ ଆଚରଣ ବିଧି ବଳବତ୍ତର ଥିବା ସତ୍ତ୍ୱେ ମୁଖ୍ୟମନ୍ତ୍ରୀ ଶ୍ରୀ ପଟ୍ଟନାୟକ କୁଲତା ଓ ମେହେର ସମାଜ ପାଇଁ ଅନୁରୂପ ଘୋଷଣା କରିଥିଲେ । ସେତେବେଳେ ବି ବିରୋଧୀ ଦଳ ଓ ନିର୍ବାଚନ କମିଶନ ନିରବ ରହିଥିଲେ । ପଦ୍ମପୁର ବିଧାନସଭା ନିର୍ବାଚନମଣ୍ଡଳୀରେ ସଂଖ୍ୟାଧିକ କୁଲତା ଓ ମେହେର ସମାଜର ଭୋଟର ଥିବାରୁ ସେମାନଙ୍କୁ ଆକୃଷ୍ଟ କରିବା ପାଇଁ ପୁରୀରେ ଧର୍ମଶାଳା ନିର୍ମାଣ(କୁଲତା ସମାଜ) ଓ ଭୁବନେଶ୍ୱରରେ ଗଙ୍ଗାଧର ମେହେର ଭବନ ନିର୍ମାଣ(ମେହେର ସମାଜ) ନିମନ୍ତେ ସରକାରୀ ସହାୟତା ଘୋଷଣା କରିଥିଲେ ।