ଓଡ଼ିଶା ରାଜ୍ୟପାଳ ରଘୁବର ଦାସ ନିଜ ପଦବୀ ଓ କ୍ଷମତାର ଦୁରୂପଯୋଗ କରି ଝାଡ଼ଖଣ୍ଡ ବିଧାନସଭା ନିର୍ବାଚନ ପ୍ରଚାରରେ ଲିପ୍ତ ଅଛନ୍ତି ବୋଲି କଂଗ୍ରେସ ଅଭିଯୋଗ କରିଛି । ରାଜ୍ୟପାଳ ଭଳି ସମ୍ବିଧାନିକ ପଦବୀର ଖୋଲା ଉଲ୍ଲଘଂନ କରୁଥିବା ରଘୁବର ଦାସଙ୍କ ବିରୁଦ୍ଧରେ ତୁରନ୍ତ କାର୍ଯ୍ୟାନୁଷ୍ଠାନ ପାଇଁ କଂଗ୍ରେସ ଆଜି ନିର୍ବାଚନ କମିଶନଙ୍କ ନିକଟରେ ଫେରାଦ ହୋଇଛି ।
ଓଡ଼ିଶା କଂଗ୍ରେସ ପ୍ରଭାରୀ ଡଃ ଅଜୟ କୁମାର ଆଜି ଜାତୀୟ ନିର୍ବାଚନ କମିଶନଙ୍କ ନିକଟକୁ ଚିଠି ଲେଖି ଝାଡ଼ଖଣ୍ଡ ବିଧାନସଭା ନିର୍ବାଚନ ପ୍ରଚାରରେ ଓଡ଼ିଶା ରାଜ୍ୟପାଳ ରଘୁବର ଦାସ ସକ୍ରିୟ ଭାବେ ସାମିଲ ଥିବା ନେଇ ଅଭିଯୋଗ କରିଛନ୍ତି । ସେ ଜାମସେଦପୁର-ପୂର୍ବ ବିଧାନସଭା କ୍ଷେତ୍ରର ବିଜେପି ପ୍ରାର୍ଥୀ ତାଙ୍କ ବୋହୂ ପୂର୍ଣ୍ଣିମା ଦାସଙ୍କ ସପକ୍ଷରେ ପ୍ରଚାର କରୁଛନ୍ତି । ଜାମସେଦପୁର-ପୂର୍ବ ବିଧାନସଭା ନିର୍ବାଚନମଣ୍ଡଳୀର ବିଜେପି ବୁଥ୍ କମିଟି ସଦସ୍ୟଙ୍କ ସହ ରାଜ୍ୟପାଳ ଶ୍ରୀ ଦାସ କ୍ରମାଗତ ବୈଠକ କରୁଥିବା ନେଇ ଫଟୋ ଓ ଖବରମାନ ସ୍ଥାନୀୟ ସମ୍ବାଦପତ୍ରରେ ପ୍ରକାଶ ପାଉଛି । ସୋସିଆଲ ମିଡିଆରେ ମଧ୍ୟ ଏସବୁ ଫଟୋ ଓ ଖବର ଉପଲବ୍ଧ ଅଛି । ତେବେ ଓଡ଼ିଶାର ରାଜ୍ୟପାଳ ଭଳି ଏକ ସମ୍ବିଧାନିକ ପଦବୀରେ ଥିବା ଶ୍ରୀ ଦାସ କାହିଁକି ଜାମସେଦପୁର-ପୂର୍ବ ବିଧାନସଭା କ୍ଷେତ୍ରର ବୁଥସ୍ତରୀୟ ବୈଠକରେ ସାମିଲ ହେଉଛନ୍ତି ତାହା ସ୍ପଷ୍ଟ କରିବା ଦରକାର ।
ଏଭଳି ନିର୍ବାଚନ ପ୍ରଚାରରେ ସାମିଲ ହୋଇ ଶ୍ରୀ ଦାସ ସମ୍ବିଧାନର ଖୋଲା ଉଲ୍ଲଘଂନ କରୁଛନ୍ତି । ରାଜ୍ୟପାଳ ଭଳି ସର୍ବୋଚ୍ଚ ସାମ୍ବିଧାନିକ ପଦବୀ ଓ ଦାୟିତ୍ୱର ସମ୍ପୂର୍ଣ୍ଣ ଅସମ୍ମାନ କରୁଛନ୍ତି,ଯାହାକି କଦାପି ଗ୍ରହଣୀୟ ନୁହେଁ । ରାଜନୀତିରୁ ଊର୍ଦ୍ଧ୍ୱକୁ ଉଠି ରାଜ୍ୟପାଳ ଉଭୟ କେନ୍ଦ୍ର ସରକାର ଓ ରାଜ୍ୟ ମଧ୍ୟରେ ସେତୁ ଭାବେ କାର୍ଯ୍ୟ କରିଥାନ୍ତି । କିନ୍ତୁ ରାଜ୍ୟପାଳ ଶ୍ରୀ ଦାସ ନିର୍ବାଚନ ପ୍ରଚାରରେ ସାମିଲ ହେବା ହିଁ ସମ୍ବିଧାନିକ ପ୍ରାବଧାନ ଓ ନିୟମ ଉପରେ ପ୍ରଶ୍ନବାଚୀ ସୃଷ୍ଟି କରିଛି । ସରକାରିଆ କମିଶନ ତାଙ୍କ ସୁପାରିଶରେ, ‘ରାଜ୍ୟପାଳ ପଦବୀ’ର ସମ୍ମାନକୁ ଦୃଷ୍ଟିରେ ରଖି ରାଜ୍ୟପାଳ ଭାବେ ନିଯୁକ୍ତି ପାଉଥିବା ବ୍ୟକ୍ତି ସ୍ଥାନୀୟ ରାଜନୀତିରୁ ନିଜକୁ ଦୂରେଇ ରଖିବେ ବୋଲି ଉଲ୍କେଖ କରିଥିବା ଡଃ ଅଜୟ କୁମାର ଦର୍ଶାଇଛନ୍ତି ।
ଶ୍ରୀ କୁମାର ଆହୁରି ମଧ୍ୟ ଅଭିଯୋଗ କରିଛନ୍ତି ଯେ, ଝାଡ଼ଖଣ୍ଡ ନିର୍ବାଚନକୁ ଦୃଷ୍ଟିରେ ରଖି ବିଗତ କିଛିମାସ ଧରି ଓଡ଼ିଶା ରାଜଭବନକୁ ରାଜନୀତିକ ଆଡ୍ଡା ଭାବେ ରାଜ୍ୟପାଳ ଶ୍ରୀ ଦାସ ବ୍ୟବହାର କରୁଛନ୍ତି । ପରିତାପର କଥା, ନିର୍ବାଚନ କମିଶନ ଏସବୁ ଜାଣି ନିରବ ରହିଛନ୍ତି ଓ କାର୍ଯ୍ୟାନୁଷ୍ଠାନ କରିବାରେ ବିଫଳ ହୋଇଛନ୍ତି ବୋଲି ଅଭିଯୋଗ କରିବା ସହ ସମ୍ବିଧାନର ସୁରକ୍ଷା ଓ ସ୍ୱାର୍ଥ ପାଇଁ ତୁରନ୍ତ ଏହି ପ୍ରସଙ୍ଗରେ କାର୍ଯ୍ୟାନୁଷ୍ଠାନ ନେବାକୁ ଅଜୟ କୁମାର ଦାବି କରିଛନ୍ତି ।