ରାୟଗଡ଼ା ଜିଲ୍ଲାର ବିଜେଡି ନେତା ତଥା ପୂର୍ବତନ ସାଂସଦ ଏନ.ଭାସ୍କର ରାଓଙ୍କ ବିରୁଦ୍ଧରେ କଂଗ୍ରେସ ଆଜି ସଙ୍ଗୀନ ଅଭିଯୋଗ ଆଣିଛି । ଶ୍ରୀ ରାଓ ନକ୍ସଲମାନଙ୍କୁ ଆର୍ଥିକ ସହାୟତା ଦେଉଛନ୍ତି ଓ ଏହାର କ୍ରାଇମବ୍ରାଂଚ ତଦନ୍ତ କରାଯାଉ ବୋଲି କଂଗ୍ରେସ ଦାବି କରିଛି ।
ଆଜି କଂଗ୍ରେସ ଭବନ ଠାରେ ଏକ ସାମ୍ବାଦିକ ସମ୍ମିଳନୀରେ ପିସିସି ମିଡିଆ ସେଲ୍ ଅଧ୍ୟକ୍ଷ ଗଣେଶ୍ୱର ବେହେରା ରାୟଗଡ଼ାର ବିଜେଡି ନେତା ଏନ୍.ଭାସ୍କର ରାଓଙ୍କ ବିରୋଧରେ ନକ୍ସଲମାନଙ୍କୁ ଅର୍ଥ ସହାୟତା ଦେଉଥିବା ଅଭିଯୋଗର କ୍ରାଇମବ୍ରାଂଚ ତଦନ୍ତ ଦାବି କରିଛନ୍ତି । ଶ୍ରୀ ବେହେରା ଅଭିଯୋଗ ସଂକ୍ରାନ୍ତରେ ବିସ୍ତୃତ ବିବରଣୀ ରଖି କହଛନ୍ତି ଯେ ରାୟଗଡ଼ା ଟ୍ରକ ମାଲିକ ସଂଘର ସଦସ୍ୟ ଗଣମାଧ୍ୟମ ସାମନାରେ ନକ୍ସଲଙ୍କୁ ଅର୍ଥ ସହାୟତା ନିମନ୍ତେ ସେମାନଙ୍କ ଠାରୁ ଟ୍ରକ ପିଛା ୫୦ଟଙ୍କା ଚାନ୍ଦା ଆଦାୟ କରାଯାଉଥିବା କହିଛନ୍ତି । ଏହି ଅଭିଯୋଗ ସତ୍ୟ ହୋଇଥିଲେ ସାଂଘାତିକ । ଟ୍ରକ ମାଲିକ ସଂଘ ୨୦୨୩ ଏପ୍ରିଲ ୧୮ରେ ଭାସ୍କର ରାଓଙ୍କ ବିରୁଦ୍ଧରେ ଆର୍ôଥକ ଅନିୟମିତତା ଓ ତୋଷାରପାତର ଅଭିଯୋଗ ମଧ୍ୟ ରାୟଗଡ଼ା ଥାନାରେ କରିଛନ୍ତି । ପୁଲିସ ଉଭୟ କ୍ଷେତ୍ରରେ ନିରବ ରହିଛି । ସୁତରାଂ ଆଇନ ଏବେ ନିଜ ବାଟରେ ନା ବିଜେଡ଼ି ବାଟରେ ଯାଉଛି ବୋଲି ଶ୍ରୀ ବେହେରା ପ୍ରଶ୍ନ କରିବା ସହ ‘ଆଉ ଆଇନ ତା ବାଟରେ ଯିବ’ ବୋଲି ଦମ୍ଭୋକ୍ତି କାହିଁକି ଏ କ୍ଷେତ୍ରରେ ଶୁଣିବାକୁ ମିଳୁ ନାହିଁ ବୋଲି ପଚାରିଛନ୍ତି ।
ଶ୍ରୀ ବେହେରା ଆହୁରି ମଧ୍ୟ କହିଛନ୍ତି ଯେ, ଜିଲ୍ଲା କଂଗ୍ରେସ ତରଫରୁ ସାଂସଦ ସପ୍ତଗିରି ଉଲ୍ଲାକା ଓ ଜିଲ୍ଲା କଂଗ୍ରେସ ସଭାପତି ଗତ ଏପ୍ରିଲ ୨୫ତାରିଖରେ ସାମ୍ବାଦିକ ସମ୍ମିଳନୀ ଡାକି ଏହି ପ୍ରସଙ୍ଗର ତଦନ୍ତ ଦାବି କରିଥିଲେ ସୁଦ୍ଧା କାର୍ଯ୍ୟାନୁଷ୍ଠାନ ଶୂନ । ସେ ଶାସକ ଦଳକୁ ୩ଟି ପ୍ରଶ୍ନ କରି କହିଛନ୍ତି ଯେ, ରାଜ୍ୟ ସରକାର ଏବେ କାହା ସ୍ୱାର୍ଥରେ? ଆଇନ ସାଥୀରେ ନାଁ ଅପରାଧୀଙ୍କ ସାଥିରେ? ଦ୍ୱିତୀୟରେ ନକ୍ସଲ ମୁକାବିଲା ମାମଲାରେ ସରକାର ଓ ସରକାରୀ ଦଳ ମଧ୍ୟରେ ପରସ୍ପର ବିରୋଧି ଆଭିମୁଖ୍ୟ କାହିଁକି? ତୃତୀୟରେ ମାଓ ମୁକାବିଲା ଉଭୟ କେନ୍ଦ୍ର ଓ ରାଜ୍ୟ ସରକାରଙ୍କ ମିଳିତ ଦାୟିତ୍ୱ ହୋଇଥିବାରୁ କେନ୍ଦ୍ର ସରକାରଙ୍କ ଗୃହ ମନ୍ତ୍ରଣାଳୟ ଏହି ସ୍ପର୍ଶକାତର ମାମଲାରେ ଚୁପ ବସିଛି କାହିଁକି?
ତେଣୁ ରାଜ୍ୟ ସରକାର ଏପରି ସଙ୍ଗୀନ ଅଭିଯୋଗର ସତ୍ୟ ଉଦଘାଟନ ନିମନ୍ତେ ତୁରନ୍ତ କ୍ରାଇମବ୍ରାଂଚ ତଦନ୍ତ ଘୋଷଣା କରନ୍ତୁ । ନଚେତ୍ କଂଗ୍ରେସ ଏହି ପ୍ରସଙ୍ଗକୁ ଧରି ଲୋକଙ୍କ ପାଖକୁ ଯିବ ବୋଲି ଶ୍ରୀ ବେହେରା ଚେତାବନୀ ଦେଇଛନ୍ତି । ଏହି ସାମ୍ବାଦିକ ସମ୍ମିଳନୀରେ ପିସିସି ମୁଖପାତ୍ର ଅମୀୟ ପାଣ୍ଡବ,ରାଜନୀ କୁମାର ମହାନ୍ତି ଓ ଦୀପକ କୁମାର ମହାପାତ୍ର ଉପସ୍ଥିତ ଥିଲେ ।