OR 
ରାଜ୍ୟରେ ବଢ଼ି ଚାଲିଥିବା ପିସି କାରବାରକୁ ତୁରନ୍ତ ବନ୍ଦ କରିବା ସହ ଖାଲି ପଡ଼ିଥିବା ୨.୨୬ଲକ୍ଷ ପଦବୀରେ ରାଜ୍ୟର ବେକାର ଯୁବକଯୁବତୀଙ୍କୁ ନିଯୁକ୍ତି ସମେତ ମୋଟ ୯ଦଫା ଦାବିରେ ପ୍ରଦେଶ କଂଗ୍ରେସ ଆସନ୍ତା ୧୮ତାରିଖ ଶୁକ୍ରବାର ସବୁ ବ୍ଲକ ଘେରାଉ କରିବ । ରାଜ୍ୟ ସରକାରଙ୍କ ଜନମାରଣ ନୀତି ଓ ଦୁର୍ନୀତି-ଅନିୟମିତତା ପ୍ରତିବାଦରେ ବ୍ଲକ ଘେରାଉ କରାଯିବ ବୋଲି ପ୍ରଦେଶ କଂଗ୍ରେସ କମିଟି ପକ୍ଷରୁ କୁହାଯାଇଛି ।
Also Read
ଆଜି କଂଗ୍ରେସ ଭବନରେ ଆୟୋଜିତ ଏକ ସାମ୍ବାଦିକ ସମ୍ମିଳନୀରେ ପିସିସି ସଭାପତି ଶରତ ପଟ୍ଟନାୟକ ଗଣମାଧ୍ୟମକୁ ସୂଚନା ଦେଇ କହିଛନ୍ତି ଯେ, ରାଜ୍ୟର ବ୍ଲକଗୁଡ଼ିକରେ ପିସି କାରବାର ବଢ଼ିଚାଲିଛି । ଏହା ତୁରନ୍ତ ବନ୍ଦ ହେବା ଦରକାର । ଟାଟା ପାୱାର କମ୍ପାନୀ ଦ୍ୱାରା ରାଜ୍ୟରେ ବାରମ୍ବାର ପାୱାର କଟ୍, ଲୋ’ ଭୋଲଟେଜ୍ ସମସ୍ୟାରେ ସାଧାରଣ ଲୋକେ ହନ୍ତସନ୍ତ ହେଉଛନ୍ତି । ବିଦ୍ୟୁତ ଦର ମଧ୍ୟ ଅପେକ୍ଷାକୃତ ଅଧିକ ରହିଛି । ଏହାକୁ ତୁରନ୍ତ ପ୍ରତ୍ୟାହାର କରାଯାଉଛି ।
ରାଜ୍ୟରେ ଏବେ ୨.୨୬ଲକ୍ଷ ସରକାରୀ ପଦବୀ ଖାଲି ପଡ଼ିଛି । ସରକାର ଏହି ପଦବୀଗୁଡ଼ିକରେ ବେକାର ଯୁବକଯୁବତୀମାନଙ୍କୁ ନିଯୁକ୍ତି ଦିଅନ୍ତୁ । ବହୁ ସଂଖ୍ୟାରେ ଶିକ୍ଷିତ ଯୁବକଯୁବତୀ ବେକାର ହୋଇ ବୁଲୁଛନ୍ତି । ସେହିପରି ଧାନକିଣାବେଳେ ଚାଷୀଠୁ କଟନୀଛଟନୀ ନାଁରେ ଯେଉଁ ଧାନ ରଖାଯାଉଛି ତାକୁ ମଧ୍ୟ ତୁରନ୍ତ ବନ୍ଦ କରାଯାଉ । ଏସବୁ ଘଟଣାରେ ରାଜ୍ୟ ସରକାରଙ୍କ ଉଦାସୀନତା,ଦୁର୍ନୀତି ଓ ଅନିୟମିତତା ପ୍ରତିବାଦରେ କଂଗ୍ରେସ ଆସନ୍ତା ୧୮ତାରିଖରେ ରାଜ୍ୟର ସବୁ ବ୍ଲକ ଘେରାଉ କରିବା ସହ ପ୍ରତିବାଦ ସଭା କରିବ । ଏହି କାର୍ଯ୍ୟକ୍ରମରେ ଦଳର କର୍ମୀ, ସମର୍ଥକ, ପଂଚାୟତ ଓ ବ୍ଲକ ସଭାପତିଙ୍କଠୁ ଆରମ୍ଭ କରି ବିଧାୟକ, ପୂର୍ବତନ ବିଧାୟକ,ପୂର୍ବତନ ସାଂସଦ ଓ ଦଳୀୟ ପଦାଧିକାରୀମାନଙ୍କୁ ଯୋଗ ଦେବାକୁ କୁହାଯାଇଛି ।
ଏହି ସାମ୍ବାଦିକ ସମ୍ମିଳନୀରେ ପିସିସି ନିର୍ବାଚନ କମିଟି ସଭାପତି ବିଜୟ କୁମାର ପଟ୍ଟନାୟକ ଓ ମିଡିଆ ସେଲ୍ ମୁଖ୍ୟ ଗଣେଶ୍ୱର ବେହେରା ଉପସ୍ଥିତ ଥିଲେ ।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
