OR 
“ଦୀର୍ଘ ୨ମାସ ପରେ ଦଳୀୟ ଫୋରମ୍ ମିଳିଥିଲା । ଯାହା ମନକୁ ଆସିଲା ବର୍ଷିଲେ । ସମସ୍ତଙ୍କ ଟାର୍ଗେଟରେ ଭିକେ ପାଣ୍ଡିଆନ, ପ୍ରଣବପ୍ରକାଶ ଦାସ ଓ ମାନସ ମଙ୍ଗରାଜ ଥିଲେ । ନାଁ ନନେଇ ଏହି ୩ଜଣଙ୍କ ଉପରେ ଦଳର ବରିଷ୍ଠ ନେତାମାନେ ଏଭଳି ବର୍ଷିଲେ ଯେ, ବୈଠକ ପୁରା ସରଗରମ ହୋଇଗଲା । ଏପରିକି ଧୀରସ୍ଥିର ରହୁଥିବା ବରିଷ୍ଠ ନେତା ପ୍ରଦୀପ ଅମାତ୍ ବି ନିଜର ଅସନ୍ତୋଷ ଝାଡ଼ିବାକୁ ପଛାଇଲେ ନାହିଁ । ବହୁତ ହୋଇଗଲା, ଆଉ ପାଣ୍ଡିଆନ କି କେହି ନୁହେଁ ସିଧାସଳଖ ନବୀନ ପଟ୍ଟନାୟକ ସଂଗଠନ କଥା ବୁଝନ୍ତୁ । ଆଉ ରାଜ୍ୟସାରା ବୁଲି ସଂଗଠନକୁ ସୁଦୃଢ଼ କରନ୍ତୁ ଓ କର୍ମୀଙ୍କ ଉତ୍ସାହ ବଢ଼ାନ୍ତୁ । ଦଳୀୟ ଜିଲ୍ଲା ପର୍ଯ୍ୟବେକ୍ଷକ ଦରକାର ନାହିଁ କି ସେମାନେ ଯାଇ ଅଯଥା ଗୋଷ୍ଠୀ କରନ୍ତୁ ନାହିଁ ।” ଏଭଳି କିଛି ଢଙ୍ଗରେ ଆଜି ଶଙ୍ଖଭବନରେ ଆୟୋଜିତ ଦେବୀ ମିଶ୍ର କମିଟିର ପ୍ରଥମ ବୈଠକରେ ବର୍ଷିଛନ୍ତି ବିଜେଡିର ବରିଷ୍ଠ ନେତାମାନେ ।
ବିଜେଡି ସୂତ୍ର ଅନୁସାରେ, ଦଳର ନିର୍ବାଚନୀ ବିପର୍ଯ୍ୟୟର ପ୍ରାୟ ୨ମାସ ପରେ ଦଳୀୟ କାର୍ଯ୍ୟକ୍ରମର ସଂଯୋଜନା ଓ ତଦାରଖ ପାଇଁ ଗତ ୩ଦିନ ତଳେ ଦେବୀ ମିଶ୍ରଙ୍କ ନେତୃତ୍ୱରେ ବରିଷ୍ଠ ନେତାମାନଙ୍କୁ ନେଇ ଗଠିତ ୧୫ଜଣିଆ କମିଟିର ଆଜି ପ୍ରଥମ ବୈଠକ ବସିଥିଲା । ଦଳର ଏହି ଫୋରମରେ ସଦସ୍ୟ ଥିବା ବରିଷ୍ଠ ନେତାମାନେ ନିଜ ଭିତରେ ଚାପି ରଖିଥିବା ଅସନ୍ତୋଷ ବ୍ୟକ୍ତ କରି କଡ଼ା ଭାଷାରେ ପାଣ୍ଡିଆନ, ବବି ଓ ମାନସ ମଙ୍ଗରାଜଙ୍କ ମାମଲାତିକୁ ଦୋଷ ଦେଇଥିଲେ । ଏହି ୩ଜଣଙ୍କୁ ଇଙ୍ଗିତ କରି ସେମାନଙ୍କ ପାଇଁ ଦଳ ନିର୍ବାଚନୀ କ୍ଷତି ସହିଲା ଓ ତଳିତଳାନ୍ତ ହୋଇଛି ବୋଲି କହିବାକୁ ପଛାଇନଥିଲେ ।
Also Read
ସୂଚନା ଅନୁସାରେ ଆଜିର ବୈଠକରେ ବରିଷ୍ଠ ନେତା ବିକ୍ରମ କେଶରୀ ଆରୁଖ ସିଧାସଳଖ ମାନସ ମଙ୍ଗରାଜଙ୍କ ନାଁ ନେଇ ଗଞ୍ଜାମ ଜିଲ୍ଲା ସଂଗଠନକୁ ନଷ୍ଟ କରିଦେଇଥିବା ଅଭିଯୋଗ ଆଣିଥିଲେ । ମଙ୍ଗରାଜ ଦଳର ପର୍ଯ୍ୟବେକ୍ଷକ କହି ଜିଲ୍ଲାରେ ବିଜେଡି ସଂଗଠନକୁ ବିପର୍ଯ୍ୟସ୍ତ କରି ଦେଇଥିବା କହିବା ସହ ଅତ୍ୟନ୍ତ କଡ଼ା ଭାଷାରେ ବର୍ଷିଥିଲେ । ଏପରିକି ଏଭଳି ଅନଭିଜ୍ଞ ଲୋକମାନଙ୍କୁ ପର୍ଯ୍ୟବେକ୍ଷକରେ ବସାଇ ଦଳକୁ ତଳିତଳାନ୍ତ କରିଦିଆଯାଇଛି । ତେଣୁ ଦଳରେ ଆଉ ଜିଲ୍ଲା ପର୍ଯ୍ୟବେକ୍ଷକ ଦରକାର ନାହିଁ ବୋଲି ପ୍ରସ୍ତାବ ଦେଇଥିଲେ ।
ସେହିପରି ବରିଷ୍ଠ ନେତା ପ୍ରଦୀପ ଅମାତ୍ ମଧ୍ୟ ସଂଗଠନର ପରିଚାଳନାକୁ ନେଇ ଅସନ୍ତୋଷ ଝାଡ଼ିଥିଲେ । କାହା ନାଁ ନନେଇ ସେ ସଂଗଠନ ମନଇଚ୍ଛା ଚାଳିଥିବା ବୋଲି କହିଥିଲେ । ଜିଲ୍ଲା ପର୍ଯ୍ୟବେକ୍ଷକମାନେ ଯାଇ ଜିଲ୍ଲାରେ ଗୋଷ୍ଠୀ ରାଜନୀତି କରୁଥିଲେ । ପଶ୍ଚିମଓଡ଼ିଶାରୁ ରାଜ୍ୟସଭା କିଏ ଯିବେ ସେନେଇ କାହାସହ ପରାମର୍ଶ କରାଯାଉ ନଥିଲା । ଏପରିକି କିଏ ବିଧାୟକ ପ୍ରାର୍ଥୀ ହେବ ତାହା ବି ବରିଷ୍ଠ ନେତାମାନଙ୍କ ସହ ବିଚାରବିମର୍ଶ କରାଗଲାନି । ଏବେ ମମତା ମହନ୍ତ ପଳାଇଲେ । ତେଣୁ ଦଳରେ ଆଉ କାହାରି ଆବଶ୍ୟକତା ନାହିଁ । ନବୀନ ପଟ୍ଟନାୟକ ନିଜେ ଏକା ସବୁ ବୁଝନ୍ତୁ ବୋଲି ସେ ବୈଠକରେ ପ୍ରସ୍ତାବ ଦେଇଥିବା ସୂଚନା ମିଳିଛି ।
ବରିଷ୍ଠ ନେତା ଶାରଦା ନାୟକ ସିଧାସଳଖ ପାଣ୍ଡିଆନଙ୍କ ନାଁ ନେଇ ସେ ଜଣେ କୁଶଳୀ ପ୍ରଶାସକ ମାତ୍ର ରାଜନେତା ନୁହଁନ୍ତି । ତେଣୁ ନବୀନ ପଟ୍ଟନାୟକ ସଂଗଠନ କଥା ବୁଝନ୍ତୁ ବୋଲି ସେ ପ୍ରସ୍ତାବ ଦେଇଥିଲେ ।
ସେହିପରି ବରିଷ୍ଠ ନେତ୍ରୀ ସେହ୍ନାଙ୍ଗିନୀ ଛୁରିଆ ଦଳର ପରାଜୟ ପାଇଁ ମନମୁଖୀ ନିଆଯାଇଥିବା ନିଷ୍ପତ୍ତିକୁ ଦାୟୀ କରିଥିଲେ । ଏମବିକେ,ସିଆରପିଙ୍କ ଦରମା ବଢ଼ାଇ ଦିଆଗଲା । ଇସି ସଦସ୍ୟଙ୍କ ପାରିଶ୍ରମିକ ବଢ଼ିଲା । ଏସବୁ ଯୋଗୁ ମହିଳା ଏସଏଚଜି ସଦସ୍ୟମାନେ ଅସନ୍ତୁଷ୍ଟ ହେଲେ । ସେ ଦଳର ମହିଳା ସଭାନେତ୍ରୀ ଭାବେ ସଂଗଠନକୁ ଅଧିକ ସୁଦୃଢ଼ କରିବା ପାଇଁ ବାରମ୍ବାର ପାଣ୍ଠି ମାଗିଲେ ମଧ୍ୟ ତାଙ୍କୁ ଦିଆଗଲାନି । ଯେଉଁଥିପାଇଁ ଦଳର ମହିଳା ସଂଗଠନ କାର୍ଯ୍ୟ କରିବାର ସୁଯୋଗ ପାଇଲା ନାହିଁ ବୋଲି ଅଭିଯୋଗ କରିଥିବା ଜଣାପଡ଼ିଛି ।
ବରିଷ୍ଠ ବିଧାୟକ ଅରୁଣ କୁମାର ସାହୁ ତୁରନ୍ତ ଦଳର ଯୁବ, ଛାତ୍ର ଓ ମହିଳା ସଂଗଠନକୁ ସୁଦୃଢ଼ କରାଯାଉ ବୋଲି କହିଥିଲେ । ସମସ୍ତ ଜିଲ୍ଲା କମିଟିକୁ ପୁର୍ନଗଠନ ଓ ୬ଟି ଜୋନାଲ କମିଟି ଗଠନ କରିବାକୁ ପ୍ରସ୍ତାବ ଦେବା ସହ ସଂଗଠନର ପରିଚାଳନାକୁ ନେଇ ମଧ୍ୟ ଅସନ୍ତୋଷ ବ୍ୟକ୍ତ କରିଥିବା ସୂଚନା ମିଳିଛି ।
ସେହିପରି ବିଧାୟକ ପ୍ରତାପ କେଶରୀ ଦେବ ମଧ୍ୟ ବୁଲେଇକି ନିଜର ଅସନ୍ତୋଷ ବ୍ୟକ୍ତ କରିଥିବା ଜଣାପଡ଼ିଛି । ଦଳର ବିପର୍ଯ୍ୟୟ କାହିଁକି ହେଲା ତା’ର କାରଣ ସମସ୍ତଙ୍କୁ ଜଣାଅଛି । ସେ ବିଷୟରେ ଅଧିକ ଆଲୋଚନା ନକରି ଆଗକୁ ବଢ଼ିବା ପାଇଁ ସେ ପରାମର୍ଶ ଦେଇଥିବା ଜଣାପଡ଼ିଛି ।
ବିଧାୟକ ଦେବେଶ ଆଚାର୍ଯ୍ୟ ମଧ୍ୟ ବୈଠକରେ ନିଜର ଅସନ୍ତୋଷ ବ୍ୟକ୍ତ କରି କହିଥିଲେ ଯେ, ସମସ୍ତେ ବିଜେଡିକୁ ଏବେ ବିଜେପିର ଗୋଡ଼ାଣିଆ କହୁଛନ୍ତି । ତେଣୁ ବିଜେପି ପ୍ରତି ଦଳର ଆଭିମୁଖ୍ୟ କ’ଣ ରହିବ ତାହା ସ୍ପଷ୍ଟ କରାଯାଉ ବୋଲି ଦାବି କରିଥିଲେ ।
ବରିଷ୍ଠ ନେତା ପ୍ରତାପ ଜେନା ମଧ୍ୟ ସଂଗଠନର ପରିଚାଳନାକୁ ନେଇ ନିଜର ଅସନ୍ତୋଷ ବ୍ୟକ୍ତ କରିଥିବା ସୂଚନା ମିଳିଛି । ଅପରାହ୍ନରେ କମିଟିର ସଦସ୍ୟମାନେ ଦେବୀ ମିଶ୍ରଙ୍କ ନେତୃତ୍ୱରେ ନବୀନ ନିବାସ ଯାଇ ବୈଠକରେ ଯିଏ ଯାହା ମତ ଦେଇଥିଲେ ସେ ସଂକ୍ରାନ୍ତ ଲିଖିତ ପ୍ରସ୍ତାବକୁ ଦଳର ସୁପ୍ରିମୋ ନବୀନ ପଟ୍ଟନାୟକଙ୍କୁ ଦେଇଥିଲେ । ନବୀନ ମଧ୍ୟ ପ୍ରାୟ ୪୦ମିନିଟ୍ ଧରି ସବୁ ନେତାମାନଙ୍କର ମତାମତ ନେଇଥିଲେ । ଦଳର ନେତାମାନେ ଅନ୍ୟ କାହାରିକୁ ନେତା ଭାବେ ଆଉ ସହ୍ୟ କରିବା ମୁଡରେ ନଥିବା ମଧ୍ୟ ଖୋଲାଖୋଲି ମତ ଦେବାକୁ ପଛାଇ ନଥିବା ଜଣାପଡ଼ିଛି ।
ନବୀନ ସବୁ ଶୁଣିବା ପରେ ସେ ନିଜେ ନିୟମିତ ଶଙ୍ଖ ଭବନ ଯିବେ ଓ ରାଜ୍ୟତମାମ ବୁଲିବେ ବୋଲି ସଦସ୍ୟମାନଙ୍କୁ ଆଶ୍ୱସ୍ତ କରିଛନ୍ତି । ଖୁବଶୀଘ୍ର ରାଜ୍ୟସ୍ତରୀୟ କମିଟି ଓ ବିଭିନ୍ନ ଛାମୁଆ କମିଟି ଗଠନ କରାଯିବ ବୋଲି ନବୀନ କହିଛନ୍ତି । ଦଳୀୟ ପାଣ୍ଠିରେ ହେଲିକପ୍ଟର ଭଡ଼ାରେ ଆଣି ଆସନ୍ତା ଅକ୍ଟୋବର ୨ରୁ ଦଳର ଏକମାସ ବ୍ୟାପୀ ପଦଯାତ୍ରା କାର୍ଯ୍ୟକ୍ରମରୁ ନବୀନଙ୍କ ରାଜ୍ୟବୁଲା ଆରମ୍ଭ ହେବାର ସମ୍ଭାବନା ରହିଥିବା ଜଣାପଡ଼ିଛି ।
TAGS
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
