ଦୀର୍ଘଦିନର ବ୍ୟବଧାନ ପରେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଆଜି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ସିଧାସଳଖ ଟାର୍ଗେଟ୍ କରିବା ପରେ ବିଜେଡି ଓ ବିଜେପି ମୁହାଁମୁହିଁ ହୋଇଛନ୍ତି । ଇଷ୍ଟଇଣ୍ଡିଆ ପ୍ରତିନିଧିଙ୍କ ସାର୍ଟଫିକେଟ୍ ଲୋଡ଼ା ନାହିଁ, ମୁଖ୍ୟମନ୍ତ୍ରୀ ଜନ୍ମରୁ ସୁନା ଚାମଚରେ ଖାଇଲେ ଓ ଗରିବଙ୍କ ଦୁଃଖ ବୁଝିବେ କେମିତି ବୋଲି କହି କଡ଼ା ଭାଷାରେ ଟାର୍ଗେଟ୍ କରିବା ପରେ ଚିହିଁକି ଉଠିଛି ବିଜେଡି । ଆଉ ଧର୍ମେନ୍ଦ୍ରଙ୍କୁ ନିଜ ‘ଏକ୍ସ’ ହ୍ୟାଣ୍ଡେଲରେ(ଟ୍ୱିଟର) କଟାକ୍ଷ କରିଛନ୍ତି ବିଜେଡି ସଂଗଠନ ସମ୍ପାଦକ ପ୍ରଣବ ପ୍ରକାଶ ଦାସ । “ଭାଇ ଆପଣଙ୍କୁ ଆଇନା ଦେଖାଇଲେ ଏତେ ଚିଡ଼ି ଯାଉଛନ୍ତି କ’ଣ ପାଇଁ ବୋଲି କହି ୩ଟି ପୁରୁଣା ପ୍ରଶ୍ନକୁ ଦୋହରାଇଛନ୍ତି ।” ଆଉ ବବିଙ୍କ ଏହି ଛୁଗୁଲେଇବାକୁ କଡ଼ା ଭାଷାରେ ଜବାବ ଦେଇଛି ବିଜେପି ।
ବିଜେପିର ବ୍ରହ୍ମଗିରି ବିଧାୟକ ଲଳିତେନ୍ଦୁ ବିଦ୍ୟାଧର ମହାପାତ୍ର କଡ଼ା ଭାଷାରେ ବବିଙ୍କୁ ଜବାବ ଦେଇ କହିଛନ୍ତି ଯେ, କ୍ରୀତଦାସ ମାନସିକତା ଥିବା ଲୋକ ଓଡ଼ିଶାର ସ୍ୱାଭିମାନ କଥା କେମିତି ବୁଝିବେ । ବିଜେଡି ନେତାମାନେ ୨୫ବର୍ଷ ମଧ୍ୟରେ କେବେବି ବିଜେପିର ପ୍ରଶ୍ନର ସିଧା ଉତ୍ତର ଦେଉନାହାନ୍ତି । କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ପ୍ରଶ୍ନର ସିଧାସ ଉତ୍ତର ମୁଖ୍ୟମନ୍ତ୍ରୀ କି ବିଜେଡି ଦଳ ଦେବାର ସାହାସ ନାହିଁ । ରକ୍ତଚାପରେ କିଏ ଅଛନ୍ତି, ବିଜେଡି ନେତାମାନେ ନିଜକୁ ନିଜେ ପଚାରିବା ଦରକାର । ମୁଖ୍ୟମନ୍ତ୍ରୀ ଓ ବିଜେଡି ନେତାମାନେ କେଉଁ ଅବସ୍ଥାରେ ଅଛନ୍ତି ଟିକେ ଆତ୍ମସମୀକ୍ଷା କଲେ ଭଲ ହେବ । ପେଟ୍ରୋଲିୟମ ମନ୍ତ୍ରୀ ଥିବାବେଳେ ୨.୪୦ଲକ୍ଷ କୋଟି ଟଙ୍କାରୁ ଅଧିକ ପୁଞ୍ଜିନିବେଶ କେବଳ ଓଡ଼ିଶାରେ ହୋଇଛି।
ଅନୁଗୁଳ ଓ ଢେଙ୍କାନାଳ ଗସ୍ତ କରି ରାଜ୍ୟପାଳ ଯେଉଁ ପତ୍ର ମୁଖ୍ୟମନ୍ତ୍ରୀଙ୍କୁ ଲେଖିଥିଲେ ତା’ର ଉତ୍ତର ସାଧାରଣ ଲୋକଙ୍କୁ ମୁଖ୍ୟମନ୍ତ୍ରୀଙ୍କ ପାଖରୁ ମିଳିନାହିଁ କାହିଁକି । ଅନୁଗୁଳ ଜିଲ୍ଲାରୁ ୬୦ହଜାର କୋଟି ଟଙ୍କା ରାଜ୍ୟ ରାଜକୋଷକୁ ଯାଉଥିବାବେଳେ ଜିଲ୍ଲାର ବିକାଶ ପାଇଁ କେତେ ଟଙ୍କା ଖର୍ଚ୍ଚ ହେଉଛି ତା’ର ହିସାବ ଦେଲେ ଭଲ ହେବ । ବିଜେପିର ପ୍ରଶ୍ନର ଉତ୍ତର ନରଖି ପ୍ରଶ୍ନ ପଚାରିବା ବିଜେଡିର ଅଭ୍ୟାସଗତ ପରମ୍ପରା । ଶାସକ ବିଜେଡିର ଗୁମାସ୍ତାମାନେ ନିଜର ରକ୍ତ ପରୀକ୍ଷା କରିବା ଦରକାର । କାରଣ ସେମାନଙ୍କର ସ୍ୱାସ୍ଥ୍ୟ ଓ ମନ ଭଲ ନଥିବା ଭଳି ଲାଗୁଛି । ବିଜେଡି ନେତା ପ୍ରଣବ ପ୍ରକାଶ ଦାସଙ୍କ ଆଖି ଖରାପ ଅଛି, ନହେଲେ ଚଷମା ଭୁଲ୍ ଅଛି। କ୍ରୀତଦାସ ମାନସିକତା ରଖୁଥିବା ଲୋକ ଓଡ଼ିଆ ତଥା ଓଡ଼ିଶାର ସ୍ୱାଭିମାନ ପ୍ରତି ଆଖି ବୁଜି ଦେଇଛନ୍ତି । ସେଥିପାଇଁ ସେମାନେ ବିଜେପି ପ୍ରଶ୍ନର ଉତ୍ତର ଦେବାକୁ କୁଣ୍ଠାବୋଧ କରୁଛନ୍ତି ବୋଲି ଶ୍ରୀ ମହାପାତ୍ର କହିଛନ୍ତି।
ଉଲ୍ଲେଖଯୋଗ୍ୟ, ବବି ନିଜ ଏକ୍ସ ହ୍ୟାଣ୍ଡଲରେ ଧର୍ମେନ୍ଦ୍ରଙ୍କୁ ଛିଗୁଲେଇ କହିଥିଲେ ଯେ, ଲାଗୁଛି ପ୍ରଶ୍ନ ସବୁ ଶୁଣି ଆପଣ ରାଗିଯାଇଛନ୍ତି । ରକ୍ତଚାପ ବଢ଼ିଯାଇଛି । ଅନ୍ତର୍ଜାତୀୟ ଯୋଗ ଦିବସରେ ଯୋଗ କରିଥିବା ଦେଖିଥିଲି । ଏବେ ନିୟମିତ ଭାବେ ଯୋଗ କରନ୍ତୁ ବୋଲି ବବି କଟାକ୍ଷ କରିଥିଲେ । ଯାହାର ଜବାବ ବିଜେପି ବିଧାୟକ ଶ୍ରୀ ମହାପାତ୍ର ସମାନ ଶୈଳୀରେ ରଖିଥିଲେ।