୨୭ବର୍ଷର ଆଂଚଳିକ ଦଳ ବିଜେଡି ଚଳିତ ନିର୍ବାଚନରେ ଶକ୍ତ ପରାଜୟ ପରେ ନେତୃତ୍ୱ ସଙ୍କଟ ଦେଇ ଗତି କରୁଛି । ବିଜେଡି ସୁପ୍ରିମୋ ନବୀନ ପଟ୍ଟନାୟକ ଦଳର ନେତା ଅଛନ୍ତି ସତ କିନ୍ତୁ ନେତୃତ୍ୱ ଓ ରିମୋଟ୍ ଭିକେ ପାଣ୍ଡିଆନଙ୍କ ହାତରେ ପୂର୍ବବତ୍ ରହିଥିବା ପୁଣିଥରେ ପ୍ରମାଣିତ ହୋଇଛି । ପାଣ୍ଡିଆନ ଦଳୀୟ ସଂଗଠନକୁ ନିଜ ନିୟନ୍ତ୍ରଣରେ ରଖିବା ପାଇଁ ପରାଜିତ ତଥା ଲୋକଙ୍କ ଦ୍ୱାରା ପ୍ରତ୍ୟାଖ୍ୟାତ ଦେବୀ ମିଶ୍ରଙ୍କୁ ମୋହରା କରିଥିବା କଥା ପଦାରେ ପଡ଼ିବା ପରେ ବିଜେଡିରେ ବିସ୍ଫୋରକ ପରିସ୍ଥିତି ସୃଷ୍ଟି ହୋଇଛି । ଦଳର ବିଧାୟକ ଓ ସାଂସଦମାନଙ୍କ ମଧ୍ୟରେ ଅସନ୍ତୋଷ ବଢ଼ିବା ସହ ସେମାନେ ଖୋଲାଖୋଲି ଭାବେ ଦେବୀ ମିଶ୍ରଙ୍କୁ ବିରୋଧ ପାଇଁ ସଜବାଜ ହେଉଥିବା ଜଣାପଡ଼ିଛି ।
ସୂଚନା ଅନୁସାରେ, ଦଳର ବିଭିନ୍ନ କାର୍ଯ୍ୟକ୍ରମର ତଦାରଖ ପାଇଁ ଦେବୀ ମିଶ୍ରଙ୍କ ନେତୃତ୍ୱରେ ୧୫ଜଣିଆ କମିଟି ଗତ ଦୁଇଦିନ ତଳେ ଗଢ଼ା ଯାଇଛି । ଏହି କମିଟିରେ ଦଳ ନିଜର ୮ଜଣ ବିଧାୟକଙ୍କୁ ସାମିଲ କରିଛି । କିନ୍ତୁ ବରିଷ୍ଠ ଓ ଆଗଧାଡ଼ିର ନେତାମାନଙ୍କୁ ସାମିଲ ନକରି ତୋଷାମଦକାରୀ ନେତାଙ୍କୁ କମିଟିରେ ଗୁରୁତ୍ୱ ଦେଇଥିବାକୁ ନେଇ ଦଳ ଭିତରେ ଅସନ୍ତୋଷ ବଢ଼ିବାରେ ଲାଗିଛି । ଦଳରେ ବହୁ ବରିଷ୍ଠ ନେତା ଓ ବିଧାୟକ ଥିବା ସତ୍ତ୍ୱେ ପ୍ରାୟ ୨୩ହଜାରରୁ ଅଧିକ ଭୋଟରେ ପରାଜିତ ତଥା ଲୋକଙ୍କ ଦ୍ୱାରା ପ୍ରତ୍ୟାଖ୍ୟାତ ଦେବୀ ମିଶ୍ରଙ୍କୁ କାହିଁକି କମିଟିର ନେତୃତ୍ୱ ଦିଆଗଲା ତାକୁ ନେଇ ଅସନ୍ତୋଷ ଦେଖାଦେଇଛି । ବିଜେଡି ୨ମାସ ପରେ ମଧ୍ୟ ନିଜର ନିର୍ବାଚନୀ ବିପର୍ଯ୍ୟୟର ସମୀକ୍ଷା କରିବାରେ ସକ୍ଷମ ହୋଇନାହିିଁ କି ଦଳର ସମସ୍ତ ଛାମୁଆ ସଂଗଠନକୁ ଭାଙ୍ଗିବାର ମାସେ ପରେ ମଧ୍ୟ ତାକୁ ପୁର୍ନଗଠନ କରି ନାହିଁ । ଯାହାକୁ ନେଇ ଦଳୀୟ ନେତା ଓ କର୍ମୀମାନଙ୍କ ମଧ୍ୟରେ ଆଗରୁ ଅସନ୍ତୋଷ ଚାପି ହୋଇ ରହିଥିଲା । ଏବେ ଦେବୀ ମିଶ୍ରଙ୍କ ନେତୃତ୍ୱରେ କମିଟି ଗଢ଼ାଯିବା ପରେ ଏହି ଅସନ୍ତୋଷ ଉଗ୍ର ରୂପ ଧାରଣ କରିବାରେ ଲାଗିଥିବା ଚର୍ଚ୍ଚା ହେଉଛି । ଦେବୀଙ୍କୁ ସିଧାସଳଖ ବିରୋଧ ପାଇଁ ବିଜେଡିର ବିଧାୟକମାନଙ୍କ ଏକ ବୃହତ୍ ଗୋଷ୍ଠୀ ସଜବାଜ ହେଉଛନ୍ତି ଓ କମିଟିର କାର୍ଯ୍ୟକୁ ଖୋଲା ବିରୋଧ ପାଇଁ ସେମାନେ ଖୁବଶୀଘ୍ର ଦଳର ସୁପ୍ରିମୋ ନବୀନ ପଟ୍ଟନାୟକଙ୍କୁ ଭେଟିପାରନ୍ତି ବୋଲି ଜଣାପଡ଼ିଛି ।
Also Read
ବିଜେଡି ସୂତ୍ର ଅନୁସାରେ, ନବୀନଙ୍କ ‘ପାଣ୍ଡିଆନ ପ୍ରେମ’ ଯୋଗୁ ବିଜେଡି ତଳିତଳାନ୍ତ ହେବାରେ ଲାଗିଛି । ପାଣ୍ଡିଆନଙ୍କ ତ୍ରୁଟିପୂର୍ଣ୍ଣ ରଣନୀତି ଯୋଗୁ ଦଳକୁ ଚଳିତ ନିର୍ବାଚନରେ ବିପର୍ଯ୍ୟୟର ସମ୍ମୁଖୀନ ହେବାକୁ ପଡ଼ିଲା । ନବୀନଙ୍କ ନିରବତାର ଫାଇଦା ନେଇ ପାଣ୍ଡିଆନ ସବୁ ଲୋକସଭା ଆସନକୁ ପରୋକ୍ଷରେ ଟେକି ଦେଇଛନ୍ତି । ଯେଉଁଥିପାଇଁ ୨୭ବର୍ଷ ପରେ ଲୋକସଭାରେ ବିଜେଡିର ପ୍ରତିନିଧିତ୍ୱ ଶୂନ ରହିଛି । ଆଉ ପାଣ୍ଡିଆନ ମନମୁଖୀ କାରବାର ଯୋଗୁ ରାଜ୍ୟସଭାରେ ବି ବିଜେଡି ଛିଡ଼ିବାରେ ଲାଗିଛି । ଦଳର ଜଣେ ସାଂସଦ ଇସ୍ତଫା ଦେଇସାରିଛନ୍ତି ଓ ଆଉ ୩-୪ଜଣ ସାଂସଦ ଚଳିତ ମାସକ ମଧ୍ୟରେ ଦଳ ଛାଡ଼ିବେ ବୋଲି ଚର୍ଚ୍ଚା ହେଉଛି । ଆଉ ଏପଟେ ବିଧାନସଭାରେ ଦଳର ମୋଟ ୫୧ଜଣ ବିଧାୟକ ଥିଲେ ମଧ୍ୟ ପାଣ୍ଡିଆନ ଓ ତାଙ୍କ ଟିମକୁ ତୋଷାମଦ କରୁନଥିବାରୁ ବହୁ ବରିଷ୍ଠ ଅଭିଜ୍ଞ ବିଧାୟକଙ୍କୁ ସଂଗଠନରେ ଅଲୋଡ଼ା ଓ କୋଣଠେସା କରି ରଖାଯାଇଛି । ଯେଉଁଥିପାଇଁ ବିଧାୟକମାନଙ୍କ ମଧ୍ୟରେ ଅସନ୍ତୋଷ ବଢ଼ିବାରେ ଲାଗିଛି ।
ଚର୍ଚ୍ଚା ହେଉଛି, ପରିବର୍ତ୍ତିତ ରାଜନୀତିକ ପରିସ୍ଥିତିରେ ବିଜେଡି ନିଜର ସମସ୍ତ ବିଧାୟକ ଓ ସାଂସଦମାନଙ୍କୁ ଏକଜୁଟ କରି ରଖିବା ପାଇଁ ପଦକ୍ଷେପ ନେବା ପରିବର୍ତ୍ତେ ହାତଗଣତି ତୋଷାମଦକାରୀଙ୍କୁ ଧରି ଯେଭଳି କାର୍ଯ୍ୟକ୍ରମ କରୁଛି ତାହା ଦଳକୁ ପତନ ଆଡ଼କୁ ନେଇଯାଉଛି । ବିଧାୟକ ଓ ସାଂସଦଙ୍କୁ ଏକଜୁଟ୍ କରି ରଖିବାକୁ ପ୍ରାଥମିକତା ଦେବା ବଦଳରେ ବିଜେଡି ଏବେ ପାଣ୍ଡିଆନଙ୍କ ତୁଷ୍ଟୀକରଣରେ ଲିପ୍ତ ଥିବା ନେତାଙ୍କୁ ସଂଗଠନ ଦାୟିତ୍ୱ ଦେଇ ପୁରସ୍କୃତ କରିବାରେ ଲାଗିଛି । ଦେବୀଙ୍କ ନେତୃତ୍ୱରେ ଯେଉଁ ୧୫ଜଣିଆ କମିଟି ଗଠନ ହୋଇଛି, ସେହି କମିଟିକୁ କିଏ କାହିଁକି ଗ୍ରହଣ କରିବ ତାହା ମଧ୍ୟ ଏବେ ଦଳରେ ମୁଖ୍ୟ ଚର୍ଚ୍ଚାର ବିଷୟ ପାଲଟିଛି । ବିଜେଡିର ନିର୍ବାଚନ ବିପର୍ଯ୍ୟୟ ପାଇଁ ପାଣ୍ଡିଆନ ଓ ତାଙ୍କ ଟିମକୁ ‘ଖଳନାୟକ’ ବିବେଚନା କରୁଥିବା ଦଳର ଲକ୍ଷ ଲକ୍ଷ କର୍ମୀ ଓ ନେତାମାନେ ଦଳୀୟ ଶୃଙ୍ଖଳା ପାଇଁ ନିରବ ରହିଛନ୍ତି । କିନ୍ତୁ ବିଜେଡି ନିଜର ଏହି ନିର୍ବାଚନୀ ବିପର୍ଯ୍ୟୟରୁ କିଛି ଶିଖିବା ପରିବର୍ତ୍ତେ ପୁଣିଥରେ ପାଣ୍ଡିଆନଙ୍କୁ କୋଳେଇ ଧରିବା ଓ ପ୍ରତ୍ୟାଖ୍ୟାତ ଦେବୀ ମିଶ୍ରଙ୍କୁ କମିଟିର ନେତୃତ୍ୱ ଦେଇ ପରୋକ୍ଷରେ ପାଣ୍ଡିଆନଙ୍କ ‘ବୋଲକରା କମିଟି’ କରାଯାଇଥିବା ସ୍ପଷ୍ଟ ହୋଇଛି । ଯାହାକି ଦଳରେ ଅଧିକ ଅସନ୍ତୋଷର କାରଣ ହୋଇଛି ।
ଦଳରେ ପ୍ରସନ୍ନ ଆଚାର୍ଯ୍ୟ, ରଣେନ୍ଦ୍ର ପ୍ରତାପ ସ୍ୱାଇଁ, ବଦ୍ରିନାରାୟଣ ପାତ୍ରଙ୍କ ଭଳି ବରିଷ୍ଠ ବିଧାୟକମାନଙ୍କ ସମେତ ନିର୍ବାଚନ ଲଢ଼ି ନଥିବା ବରିଷ୍ଠ ନେତା ଅମର ଶତପଥୀ, ପ୍ରଫୁଲ୍ଲ ଘଡ଼େଇ, ପିନାକୀ ମିଶ୍ର ଓ ରବି ନନ୍ଦଙ୍କ ଭଳି ନେତା ବି ଅଛନ୍ତି । ଯେଉଁମାନଙ୍କୁ ଦଳ ଏବେ ସଂଗଠନ କାର୍ଯ୍ୟରେ ଉପଯୋଗ କରି ଦଳୀୟ କର୍ମୀ ଓ ନେତାମାନଙ୍କ ମଧ୍ୟରେ ଆତ୍ମବିଶ୍ୱାସ ବଢ଼ାଇ ପାରନ୍ତା । କିନ୍ତୁ ତା’ ନକରି ପ୍ରତ୍ୟାଖ୍ୟାତ ଦେବୀ ମିଶ୍ରଙ୍କ ନେତୃତ୍ୱରେ ଏକ ଦନ୍ତହୀନ କମିଟି ଗଢ଼ି କେବଳ ପାଣ୍ଡିଆନଙ୍କୁ ଖୁସି କରିବା ପାଇଁ ପ୍ରୟାସ ହେଇଛି । ଯାହାକୁ ନେଇ ଦଳରେ ଏବେ ବିସ୍ଫୋରକ ପରିସ୍ଥିତି ସୃଷ୍ଟି ହେବାରେ ଲାଗିଛି । ବେଳଥାଉ ଥାଉ ବିଜେଡି ଯଦି ନିଜର ଛାମୁଆ ସଂଗଠନଗୁଡ଼ିକର ପୁର୍ନଗଠନ ନକରେ ଓ ଦେବୀଙ୍କ ମାଧ୍ୟମରେ ସଂଗଠନକୁ ନିୟନ୍ତ୍ରଣ କରିବା ଜିଦରୁ ପାଣ୍ଡିଆନ ନଓହରିନ୍ତି ତା’ହେଲେ ବିଜେଡି ଭୁଶୁଡ଼ିବା ନିଶ୍ଚିତ ବୋଲି ଦଳୀୟ ମହଲରେ ଚର୍ଚ୍ଚା ହେଉଛି ।
TAGS
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
