୪ ଲୋକସଭା ଓ ୨୮ ବିଧାନସଭା ପାଇଁ ପ୍ରାର୍ଥିପତ୍ର ଦାଖଲ ଆରମ୍ଭ: ପୁରୁଷଙ୍କ ତୁଳନାରେ ଅଧିକ ମହିଳା ଭୋଟର

ରାଜ୍ୟରେ ପ୍ରଥମ ପର୍ଯ୍ୟାୟ ନିର୍ବାଚନ ପାଇଁ ଆଜି ବିଧିବଦ୍ଧ ବିଜ୍ଞପ୍ତି ଜାରି ସହ ନାମାଙ୍କନ ପତ୍ର ଦାଖଲ ପ୍ରକ୍ରିୟା ଆରମ୍ଭ ହୋଇଛି । ରାଜ୍ୟର ୪ଟି ଲୋକସଭା ଓ ୨୮ଟି ବିଧାନସଭାରେ ହେବାକୁ ଥିବା ନିର୍ବାଚନରେ ମୋଟ ୬୨ଲକ୍ଷ ୮୪ହଜାର ୬୪୯ଜଣ ଭୋଟର ନିଜର ମତାଧିକାର ସାବ୍ୟସ୍ତ କରିବେ । ମାତ୍ର ଏଥିରେ ମହିଳା ଭୋଟରଙ୍କ ସଂଖ୍ୟା ପୁରୁଷଙ୍କ ତୁଳନାରେ ୯୧,୫୨୮ ଅଧିକ ରହିଛି । ସୁରକ୍ଷା ଦୃଷ୍ଟିରୁ କେତେକ ନିର୍ବାଚନମଣ୍ଡଳୀରେ ଭୋଟ ଗ୍ରହଣ ସମୟକୁ ଅପରାହ୍ନ ୪ଟା ଓ ୫ଟା ପର୍ଯ୍ୟନ୍ତ କରାଯାଇଛି । ପ୍ରଚଣ୍ଡ ଗ୍ରୀଷ୍ମପ୍ରବାହକୁ ଦୃଷ୍ଟିରେ ରଖି ଶିଶୁ ଓ ବୟସ୍କ ବ୍ୟକ୍ତିମମାନଙ୍କୁ ନେଇ ର‌୍ୟାଲି ଓ ରୋଡ୍ ଶୋ’ ନକରିବା ପାଇଁ ପରାମର୍ଶ ଦିଆଯାଇଛି।

ଆଜି ଏସମ୍ପର୍କରେ ଏକ ସାମ୍ବାଦିକ ସମ୍ମିଳନୀରେ ରାଜ୍ୟ ମୁଖ୍ୟ ନିର୍ବାଚନ ଅଧିକାରୀ ନିକୁଞ୍ଜ ବିହାରୀ ଧଳ ସୂଚନା ଦେଇ କହିଛନ୍ତି ଯେ, ରାଜ୍ୟରେ ନିର୍ବାଚନକୁ ମୁକ୍ତ,ଅବାଧ, ନିରପେକ୍ଷ,ତ୍ରୁଟିଶୂନ୍ୟ ଓ ଶାନ୍ତିଶୃଙ୍ଖଳାର ସହ ପରିଚାଳନା ନିମନ୍ତେ ସବୁ ରାଜନୀତିକ ଦଳଗୁଡ଼ିକର ସହଯୋଗ ଲୋଡ଼ାଯାଇଛି । ରାଜ୍ୟରେ ପ୍ରଥମ ପର୍ଯ୍ୟାୟରେ ୪ଟି ଲୋକସଭା କଳାହାଣ୍ଡି, ବ୍ରହ୍ମପୁର, ନବରଙ୍ଗପୁର ଓ କୋରାପୁଟ ସମେତ ଏହା ଅନ୍ତର୍ଗତ ସମସ୍ତ ୨୮ଟି ବିଧାନସଭାରେ ଆସନ୍ତା ମେ’ ୧୩ତାରିଖରେ ମତଦାନ ହେବ । ଏଥିପାଇଁ ଆଜିଠୁ ନାମାଙ୍କନ ପତ୍ର ଦାଖଲ ପ୍ରକ୍ରିୟା ଆରମ୍ଭ ହୋଇଛି ଓ ଏହା ୨୫ତାରିଖ ପର୍ଯ୍ୟନ୍ତ ଚାଲିବ । ଏପ୍ରିଲ ୨୬ରେ ନାମାଙ୍କନ ପତ୍ର ଯାଂଚ, ୨୯ରେ ପ୍ରାର୍ଥୀପତ୍ର ପ୍ରତ୍ୟାହାରର ଶେଷ ତାରିଖ ରହିଛି । ଏହି ୪ଟି ଲୋକସଭା ଆସନରେ ମୋଟ ୭୨୮୯ ମତଦାନ କେନ୍ଦ୍ର ଖୋଲାଯାଇଛି । ମାର୍ଚ୍ଚ ୧୬ରୁ ଆଜିସୁଦ୍ଧା ଏହି ୪ ଲୋକସଭା ନିର୍ବାଚନମଣ୍ଡଳୀରୁ ୫୮୭ଟି ଅଭିଯୋଗ ଆସିଛି ଓ ୫୮୨ଟି ଅଭିଯୋଗ ଉପରେ କାର୍ଯ୍ୟାନୁଷ୍ଠାନ ନିଆଯାଇଛି । ୩୦.୩୭କୋଟି ଟଙ୍କାର ସାମଗ୍ରୀ ଜବତ ହୋଇଛି।

କଳାହାଣ୍ଡି ଲୋକସଭା ନିର୍ବାଚନମଣ୍ଡଳୀରେ ମୋଟ ୧୭ଲକ୍ଷ ୨୧୯ଜଣ ଭୋଟର ଥିବାବେଳେ ସେଥିରେ ୧୮ରୁ ୨୯ବର୍ଷ ବୟସ ମଧ୍ୟରେ ୪,୩୫,୧୫୯ଜଣ ଭୋଟର ଅଛନ୍ତି । ସେହିପରି ନବରଙ୍ଗପୁର ଲୋକସଭା ମଣ୍ଡଳୀରେ ମୋଟ ୧୫ଲକ୍ଷ ୧୩ହଜାର ୭୫୬ଜଣ ଭୋଟର ଥିବାବେଳେ ୧୮ରୁ ୨୯ବର୍ଷ ବୟସ ମଧ୍ୟରେ ୪ଲକ୍ଷ ୩୭ହଜାର ୨୧୯ଜଣ ଅଛନ୍ତି । ବ୍ରହ୍ମପୁର ନିର୍ବାଚନମଣ୍ଡଳୀରେ ମୋଟ ୧୫.୯୦ଲକ୍ଷ ଭୋଟର ଥିବାବେଳେ କୋରାପୁଟରେ ୧୪.୮୦ଲକ୍ଷ ଭୋଟର ଅଛନ୍ତି । ଏହି ୪ ନିର୍ବାଚନ ମଣ୍ଡଳୀରେ ମୋଟ ୬୨ଲକ୍ଷ ୮୪ହଜାର ୬୪୯ଜଣ ଭୋଟର ଥିବାବେଳେ ସେଥିରେ ମହିଳା ଭୋଟରଙ୍କ ସଂଖ୍ୟା ୩୧,୮୭,୭୭୧ଜଣ ଓ ପୁରୁଷ ଭୋଟରଙ୍କ ସଂଖ୍ୟା ୩୦,୯୬,୨୪୩ । ତୃତୀୟ ଲିଙ୍ଗ ଭୋଟରଙ୍କ ସଂଖ୍ୟା ୬୩୫ ବୋଲି ମୁଖ୍ୟ ନିର୍ବାଚନ ଅଧିକାରୀ ସୂଚନା ଦେଇଛନ୍ତି।