ନବୀନଙ୍କୁ ଭେଟିଲେ ମୁଖ୍ୟମନ୍ତ୍ରୀ-ରାଜ୍ୟପାଳ: ଉପରାଷ୍ଟ୍ରପତି ନିର୍ବାଚନ ନିଷ୍ପତ୍ତି ନେବ ବିଜେଡି ‘ରାଜନୀତିକ ବ୍ୟାପାର କମିଟି’

ପୂର୍ବତନ ମୁଖ୍ୟମନ୍ତ୍ରୀ ତଥା ବିଜେଡି ସୁପ୍ରିମୋ ନବୀନ ପଟ୍ଟନାୟକଙ୍କୁ ୪୮ଘଣ୍ଟା ବ୍ୟବଧାନରେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଓ ରାଜ୍ୟପାଳ ହରିବାବୁ କମ୍ଭାମପଟିଙ୍କ ଭେଟଘାଟକୁ ନେଇ ରାଜ୍ୟ ରାଜନୀତି ସରଗରମ ହୋଇଛି ।  ଯଦିଓ ଏହି ସାକ୍ଷାତକୁ ସୌଜନ୍ୟମୂଳକ ବୋଲି ସରକାରୀ ଭାବେ କୁହାଯାଉଛି ତଥା ନବୀନଙ୍କ ସ୍ୱାସ୍ଥ୍ୟବସ୍ଥା ବୁଝିବା ପାଇଁ ଉଭୟ ମୁଖ୍ୟମନ୍ତ୍ରୀ ଓ ରାଜ୍ୟପାଳ ନବୀନ ନିବାସ ଯାଇଥିବାର ସନ୍ଦେଶ ଦିଆଯାଉଛି ତେବେ ବିଜେଡି ଶିବିରରେ ଏହାକୁ ନେଇ କମ୍ପନ ସୃଷ୍ଟି ହୋଇଥିବା ଜଣାପଡ଼ିଛି ।

ଉପରାଷ୍ଟ୍ରପତି ନିର୍ବାଚନ ପ୍ରସଙ୍ଗରେ ଦଳର ଆଭିମୁଖ୍ୟ କ’ଣ ରହିବ ତା’ର ନିଷ୍ପତ୍ତି ଦଳର ରାଜନୀତିକ ବ୍ୟାପାର କମିଟି(ପିଏସି) ନିର୍ଦ୍ଧାରଣ କରୁ ବୋଲି ନବୀନ ନିର୍ଦ୍ଦେଶ ଦେଇଥିବା ନିର୍ଭରଯୋଗ୍ୟ ସୂତ୍ରରୁ ସୂଚନା ମିଳିଛି । ଯାହାକି ବିଜେଡିର ପିଏସି ସଦସ୍ୟମାନଙ୍କ ଅଡ଼ୁଆ ବଢ଼ାଇଛି ବୋଲି ଚର୍ଚ୍ଚା ।

୪୮ଘଣ୍ଟା ମଧ୍ୟରେ ନବୀନଙ୍କୁ ଭେଟିଲେ ମୁଖ୍ୟମନ୍ତ୍ରୀ-ରାଜ୍ୟପାଳ

ବିଜେଡି ସୁପ୍ରିମୋ ନବୀନ ପଟ୍ଟନାୟକଙ୍କୁ ନବୀନ ନିବାସରେ ୨୩ତାରିଖ ପୂର୍ବାହ୍ନରେ ମୁଖ୍ୟମନ୍ତ୍ରୀ ଶ୍ରୀ ମାଝୀ ଓ ୨୫ତାରିଖ ପୂର୍ବାହ୍ନରେ ରାଜ୍ୟପାଳ ଶ୍ରୀ କମ୍ଭାମପଟି ସାକ୍ଷାତ କରିଛନ୍ତି । ଏହି ଭେଟଘାଟକୁ ସରକାରୀ ଭାବେ ସୌଜନ୍ୟମୂଳକ ବୋଲି ଦର୍ଶାଯାଉଛି ।  ନବୀନ ସମ୍ ହସ୍ପିଟାଲରେ ଚିକିତ୍ସାଧୀନ ଥିବାବେଳେ ତାଙ୍କୁ ଭେଟିବା ପାଇଁ ବିଜେପି ସରକାର ଦୁଇ କ୍ୟାବିନେଟ୍ ମନ୍ତ୍ରୀ ମୁକେଶ ମହାଲିଙ୍ଗ ଓ ପୃଥ୍ୱୀରାଜ ହରିଚନ୍ଦନ ହସ୍ପିଟାଲ ଯିବା, ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ତାଙ୍କୁ ଫୋନ୍ କରି ସ୍ୱାସ୍ଥ୍ୟବସ୍ଥାର ତଦାରଖ କରିବା ଓ ଏବେ ୪୮ଘଣ୍ଟା ନପୁରୁଣୁ ଉଭୟ ମୁଖ୍ୟମନ୍ତ୍ରୀ ଓ ରାଜ୍ୟପାଳ ତାଙ୍କୁ ଭେଟିବା ରାଜନୀତିକ ମହଲରେ ଚର୍ଚ୍ଚାର ବିଷୟ ପାଲଟିଛି ।

ଯଦିଓ ନବୀନଙ୍କର ଜୁନ୍ ୨୨ତାରିଖରେ ମୁମ୍ବାଇର କୋକିଳାବେନ୍ ହସ୍ପିଟାଲରେ ଏକ ବଡ଼ଧରଣର ଅସ୍ତ୍ରୋପଚାର ହୋଇଥିଲା ଓ ସେ ଜୁଲାଇ ୧୨ତାରିଖରେ ଭୁବନେଶ୍ୱର ଫେରିବା ପରେ ତାଙ୍କୁ ବିଜେଡି ପକ୍ଷରୁ ବିଶାଳ ଶୋଭାଯାତ୍ରାରେ ବିମାନବନ୍ଦରରୁ ନବୀନ ନିବାସ ପର୍ଯ୍ୟନ୍ତ ପାଛୋଟି ଅଣାଯାଇଥିଲା । ସେବେଠୁ ସେ ନବୀନ ନିବାସରେ ଥିଲେ ମଧ୍ୟ ତାଙ୍କୁ ଭେଟିବା କିମ୍ବା ତାଙ୍କ ସ୍ୱାସ୍ଥ୍ୟବସ୍ଥା ଜାଣିବା ପାଇଁ ମୁଖ୍ୟମନ୍ତ୍ରୀ ଓ ରାଜ୍ୟପାଳ କେହି ନବୀନ ନିବାସ ଯାଇନଥିଲେ କି ଫୋନ୍ ମାଧ୍ୟମରେ ବି ତାଙ୍କ ସହ କଥା ହୋଇନଥିଲେ ବୋଲି ସୂଚନା ମିଳିଛି । ଏବେ ଅଚାନକ ଏଭଳି ତତ୍ପରତା ପଛରେ କ’ଣ କାରଣ ରହିଛି ତାକୁ ନେଇ ରାଜନୀତିକ ମହଲରେ ନାନାଦି ଚର୍ଚ୍ଚା ଓ ଆକଳନ ଜାରି ରହିଛି ।

ପିଏସିକୁ ଦେଲେ ଦାୟିତ୍ୱ, ନିଷ୍ପତ୍ତି ଜଣାଅ

‘ସମଦୂରତ୍ୱ’ ଆଭିମୁଖ୍ୟର ଡିଣ୍ଡିମ ପିଟୁଥିବା ବିଜେଡି ବିଗତ ଏକ ଦଶନ୍ଧି ଧରି କେନ୍ଦ୍ରରେ କ୍ଷମତାସୀନ ବିଜେପି ନେତୃତ୍ୱାଧୀନ ଏନଡିଏ ସରକାରକୁ ଉପରେ ପଡ଼ି ବହୁ ଗୁରୁତ୍ୱପୂର୍ଣ୍ଣ ବିଲ୍ ଓ ପ୍ରସଙ୍ଗରେ ନିଜର ସମର୍ଥନ ଦେଇଆସିଛି । ଏପରିକି ରାଜ୍ୟରେ କ୍ଷମତାଚ୍ୟୁତ ହେବାପରେ ମଧ୍ୟ ୱକଫ୍ ବିଲରେ ବିଜେଡି ନିଜର ସମର୍ଥନ ଦେବା ସହ ଅପରେସନ୍ ସିନ୍ଦୂର ପ୍ରସଙ୍ଗରେ ମଧ୍ୟ କେନ୍ଦ୍ର ସରକାରଙ୍କୁ ସୁହାଇବା ଭଳି ନିଜର ପକ୍ଷ ରଖିଥିଲା । ମାତ୍ର ଦଳ ଭିତରେ ରହିଥିବା ଅସନ୍ତୋଷକୁ ଦେଖି ବିଜେଡିର ଏହି ସର୍ବୋଚ୍ଚ ନୀତି ନିର୍ଦ୍ଧାରକ କମିଟି(ପିଏସି)କୁ ଦଳର ଆଭିମୁଖ୍ୟ ସ୍ଥିର କରି ଲିଖିତ ଭାବେ ଜଣାଇବାକୁ କୁହାଯାଇଥିବା ନିର୍ଭରଯୋଗ୍ୟ ସୂତ୍ରରୁ ସୂଚନା ମିଳିଛି ।

ନବୀନ ଓ ତାଙ୍କ ଖାସ୍ ତଥା ବିଜେଡି ସର୍ବେସର୍ବାଙ୍କର ଏଭଳି ଆଭିମୁଖ୍ୟ ଦଳର ପିଏସି ସଦସ୍ୟମାନଙ୍କ ଅକଲଗୁଡ଼ୁମ୍ କରିଦେଇଛି । ଯଦିଓ କେନ୍ଦ୍ରରେ ବିଜେପି ଶୀର୍ଷ ନେତୃତ୍ୱଙ୍କ ସହ ନବୀନ-ପାଣ୍ଡିଆନଙ୍କ ସମ୍ପର୍କ କାହାକୁ ଅଛପା ନାହିଁ ଓ ଉପରାଷ୍ଟ୍ରପତି ନିର୍ବାଚନରେ ବିଜେପି ନେତୃତ୍ୱାଧୀନ ଏନଡିଏ ପ୍ରାର୍ଥୀଙ୍କୁ ସମର୍ଥନ ଦେବାର ଚାପ ମଧ୍ୟ ବିଜେଡି ଉପରେ ରହିଛି । କିନ୍ତୁ ଏସବୁ ସତ୍ତ୍ୱେ ଦଳର କର୍ମୀ ଓ ନେତାମାନଙ୍କ ମୁଡକୁ ପରଖି ‘ପିଏସି’ ନିଜର ନିଷ୍ପତ୍ତି ଜଣାଇବା  ଏକରକମ ପିଏସି ସଦସ୍ୟମାନଙ୍କ ପାଇଁ ‘ଏପଟେ ବାଘ,ସେପଟେ କୁମ୍ଭୀର’ ସଦୃଶ ହୋଇଛି ।

ବିଜେପି ଶୀର୍ଷ ନେତୃତ୍ୱଙ୍କ ସହ ନବୀନ-ପାଣ୍ଡିଆନଙ୍କ ସମ୍ପର୍କକୁ ଅଣଦେଖା କରି ଯଦି ଦଳର ‘ରାଜନୀତିକ ବ୍ୟାପାର କମିଟି’ ପ୍ରତ୍ୟକ୍ଷ ବା ପରୋକ୍ଷରେ ବିରୋଧ କରିବାର ନିଷ୍ପତ୍ତି ନେବ ତାହା ଉଭୟ ନବୀନ-ପାଣ୍ଡିଆନଙ୍କୁ କ୍ଷୁବ୍ଧ କରିବାର ଆଶଙ୍କା ରହିଛି । ଆଉ ଏପଟେ ରାଜ୍ୟର ସାମ୍ପ୍ରତିକ ରାଜନୀତିକ ପରିସ୍ଥିତି ଯାହା ତାକୁ ଦୃଷ୍ଟିରେ ରଖି ଉପରାଷ୍ଟ୍ରପତି ନିର୍ବାଚନରେ ଏନଡିଏ ପ୍ରାର୍ଥୀଙ୍କୁ ବିଜେଡି ସମର୍ଥନ ଦେବାର ନିଷ୍ପତ୍ତି ଯଦି ‘ରାଜନୀତିକ ବ୍ୟାପାର କମିଟି’ ନିଏ ତା’ହେଲେ ଏହି କମିଟିର ସଦସ୍ୟମାନଙ୍କୁ ମଧ୍ୟ ଦଳୀୟ କର୍ମୀ-ନେତାଙ୍କ ଆକ୍ରୋଶର ସମ୍ମୁଖୀନ ହେବାକୁ ପଡ଼ିବାର ଆଶଙ୍କା ରହିଛି ।

ଅବଶ୍ୟ ଏହା ସତ୍ୟ ଯେ, ଦଳର ୭ଜଣ ରାଜ୍ୟସଭା ସାଂସଦ ଥିବାବେଳେ ସେମାନଙ୍କ ଉପରେ ସାମାନ୍ୟତମ କର୍ତ୍ତୃତ୍ୱ ‘ପିଏସି’ର ନାହିଁ । ଆଉ ପିଏସିର ସଦସ୍ୟ ଥିବା ପ୍ରଣବପ୍ରକାଶ ଦାସ, ସଞ୍ଜୟ ଦାସବର୍ମା, ନିରଞ୍ଜନ ପୂଜାରୀ, ଟୁକୁନି ସାହୁ, ସସ୍ମିତ ପାତ୍ର ଓ ସନ୍ତୃପ୍ତ ମିଶ୍ର ଆଦି ସମସ୍ତେ ହେଉଛନ୍ତି ପାଣ୍ଡିଆନପନ୍ଥୀ । ମାତ୍ର ବର୍ତ୍ତମାନର ରାଜନୀତିକ ପରିସ୍ଥିତିରେ ନବୀନଙ୍କ ଭାବମୂର୍ତ୍ତି ଓ ଦଳୀୟ କର୍ମୀ-ନେତାଙ୍କ ଆକ୍ରୋଶରୁ ନିଜକୁ ସୁରକ୍ଷିତ ରଖିବା ପାଇଁ ପାଣ୍ଡିଆନ ବେଶ୍ ସନ୍ତର୍ପଣରେ ରାଜନୀତିକ ଗୋଟିଚାଳନା କରି ‘ପିଏସି’କୁ ଆଗକୁ ଆଣିଥିବା କୁହାଯାଉଛି । ଏହି ପିଏସି ସଦସ୍ୟମାନେ ଯାହା ନିଷ୍ପତ୍ତି ନେବେ ତାହା ମଧ୍ୟ ବିଜେଡିରେ ସେମାନଙ୍କର ରାଜନୀତିକ ଭବିଷ୍ୟତକୁ ନିର୍ଦ୍ଧାରଣ କରିବ ବୋଲି ଚର୍ଚ୍ଚା ହେଉଛି ।

ସୂଚନାଯୋଗ୍ୟ,  ଜୁଲାଇ ୨୬ତାରିଖରେ ଶଙ୍ଖଭବନରେ ବିଜେଡି ସମନ୍ୱୟ କମିଟି ଅଧ୍ୟକ୍ଷ ଦେବୀପ୍ରସାଦ ମିଶ୍ରଙ୍କ ଅଧ୍ୟକ୍ଷତାରେ କୋରଟିମ୍ ସଦସ୍ୟମାନଙ୍କ ଏକ ବୈଠକ ବସି ଉପରାଷ୍ଟ୍ରପତି ନିର୍ବାଚନରେ ଏନଡିଏ ପ୍ରାର୍ଥୀଙ୍କୁ ବିରୋଧ କରିବା ପାଇଁ ନିଷ୍ପତ୍ତି ହୋଇଥିଲା । ଏହି ନିଷ୍ପତ୍ତିକୁ ମଧ୍ୟ ନବୀନ ନିବାସକୁ ଆଗୁଆ ଅବଗତ କରାଇବାକୁ ଦେବୀଙ୍କୁ ଦାୟିତ୍ୱ ନ୍ୟସ୍ତ ହୋଇଥିଲା । ମାତ୍ର ବିଜେଡିର ଅଘୋଷିତ ସର୍ବେସର୍ବା ପାଣ୍ଡିଆନଙ୍କ ଖାସ୍ ଅନୁଗତ ପ୍ରଣବପ୍ରକାଶ ଓରଫ ବବିଙ୍କ ଚାପରେ ଦଳ ‘ବିରୋଧ’ ନୁହେଁ ‘ଅନୁପସ୍ଥିତ’ ରହିବ ବୋଲି ନବୀନ ନିବାସକୁ ଦେବୀ ଅବଗତ କରାଇଥିବା ସୂଚନା ମିଳିଛି । ଏହି ଘଟଣା ଗଣମାଧ୍ୟମକୁ ଆସିବା ପରେ ଏବେ ପିଏସିକୁ ଚୂଡ଼ାନ୍ତ ନିଷ୍ପତ୍ତି ନେବାକୁ କୁହାଯାଇଥିବା ଦଳୀୟ ସୂତ୍ରରୁ ଜଣାପଡ଼ିଛି ।