ରାଜ୍ୟର ପ୍ରଥମ ବିଜେପି ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କ ବ୍ୟକ୍ତିଗତ ସଚିବ(ପିଏସ) ଭାବେ ୨୦୦୬ ବ୍ୟାଚ୍ ଆଇଏଏସ୍ ମନୋଜ କୁମାର ସାହୁ ଦାୟିତ୍ୱ ସମ୍ଭାଳିପାରନ୍ତି । ଏନେଇ ଓଡ଼ିଶା ସରକାରଙ୍କ ପକ୍ଷରୁ ପ୍ରକ୍ରିୟା ଆରମ୍ଭ ହୋଇଥିବା ଜଣାପଡ଼ିଛି । ଶ୍ରୀ ସାହୁଙ୍କ ବ୍ୟତୀତ ମୁଖ୍ୟମନ୍ତ୍ରୀଙ୍କ ବ୍ୟକ୍ତିଗତ ସଚିବ ଭାବେ ଆଇଏଏସ୍ ସୁଧାଂଶୁ ମୋହନ ସାମଲ, ଅରିନ୍ଦମ ଡାକୁଆ ଓ ଅନୁପମ ଶାହଙ୍କ ନାଁକୁ ନେଇ ମଧ୍ୟ ପାୱାର କରିଡରରେ ଚର୍ଚ୍ଚା ।
ସୂଚନା ଅନୁସାରେ, ଏଜିଏମୟୁଟି କ୍ୟାଡ଼ରର ୨୦୦୬ ବ୍ୟାଚ୍ ଆଇଏଏସ୍ ଅଫିସର ମନୋଜ କୁମାର ସାହୁ ରାଜ୍ୟର ପ୍ରଥମ ବିଜେପି ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କ ବ୍ୟକ୍ତିଗତ ସଚିବ ଭାବେ ଅବସ୍ଥାପିତ ହେବାର ସମ୍ଭାବନା ରହିଛି । ଶ୍ରୀ ସାହୁ ଏବେ ଉପନିର୍ବାଚନ ଆୟୋଗ ଭାବେ ନୂଆଦିଲ୍ଲୀରେ କାର୍ଯ୍ୟ କରୁଛନ୍ତି । ଓଡ଼ିଶା ସରକାରଙ୍କ ଅନୁରୋଧରେ କେନ୍ଦ୍ର ସରକାର ଶ୍ରୀ ସାହୁଙ୍କ ନିର୍ବାଚନ ଆୟୋଗରେ ବର୍ଦ୍ଧିତ ଡେପୁଟେସନ ଅବଧିକୁ ସମାପ୍ତ କରି ଓଡ଼ିଶାକୁ ଡେପୁଟେସନରେ ପଠାଇପାରନ୍ତି ବୋଲି ବିଜେପି ସୂତ୍ରରୁ ଜଣାପଡ଼ିଛି । ଶ୍ରୀ ସାହୁଙ୍କ ଘର ଜଗତସିଂହପୁରର ବାଲିକୁଦା ବ୍ଲକରେ ଓ ସେ ପୂର୍ବରୁ କେନ୍ଦ୍ରମନ୍ତ୍ରୀ ଜୁଏଲ ଓରାମଙ୍କ ବ୍ୟକ୍ତିଗତ ସଚିବ ଭାବେ ଦାୟିତ୍ୱ ତୁଲାଇ ସାରିଛନ୍ତି । ଓଡ଼ିଶାରେ କାର୍ଯ୍ୟ କରିନଥିବା କିନ୍ତୁ ଓଡ଼ିଶାକୁ ଭଲଭାବେ ଜାଣିଥିବା ଜଣେ ଓଡ଼ିଆ ଅଫିସରଙ୍କୁ ମୋହନ ମାଝୀଙ୍କ ବ୍ୟକ୍ତିଗତ ସଚିବ ଭାବେ ନିଯୁକ୍ତି ଦେଇ ପ୍ରଶାସନିକ ବ୍ୟବସ୍ଥାରେ ପାରଦର୍ଶିତା ଆଣିବାକୁ ବିଜେପି ଯୋଜନା କରିଛି । ତେବେ ସରକାରୀ ଭାବେ ଶ୍ରୀ ସାହୁଙ୍କ ନିଯୁକ୍ତିକୁ ନେଇ କୌଣସି ସୂଚନା ମିଳିପାରିନାହିଁ ।
ଅନ୍ୟପକ୍ଷରେ ଓଡ଼ିଶା କ୍ୟାଡ଼ରର ୨୦୧୦ ବ୍ୟାଚ ଆଇଏଏସ୍ ସୁଧାଂଶୁ ମୋହନ ସାମଲ, ୨୦୧୧ ବ୍ୟାଚ୍ ଆଇଏଏସ୍ ଅରିନ୍ଦମ ଡାକୁଆ ଓ ୨୦୧୨ ବ୍ୟାଚ୍ ଆଇଏଏସ୍ ଅନୁପମ ଶାହଙ୍କ ନାଁ ମଧ୍ୟ ଚର୍ଚ୍ଚାରେ ରହିଛି ।
ସୂଚନାଯୋଗ୍ୟ, ମୁଖ୍ୟମନ୍ତ୍ରୀ ଶ୍ରୀ ମାଝୀ ଆଜିଠୁ ଲୋକସେବା ଭବନସ୍ଥିତ ମୁଖ୍ୟମନ୍ତ୍ରୀ କାର୍ଯ୍ୟାଳୟରୁ ନିଜର କାର୍ଯ୍ୟ ଆରମ୍ଭ କରିଛନ୍ତି । ପୂର୍ବରୁ ସେ ରାଜ୍ୟ ଅତିଥି ଭବନରେ ଅସ୍ଥାୟୀ ଅଫିସ୍ ଖୋଲି କାର୍ଯ୍ୟ କରୁଥିଲେ ।