ଲୋକସଭା ନିର୍ବାଚନ ପୂର୍ବରୁ ମଧ୍ୟପ୍ରଦେଶରେ କଂଗ୍ରେସକୁ ଲାଗିଛି ବଡ଼ ଝଟକା। ଦଳର ବରିଷ୍ଠ ନେତା, ଗାନ୍ଧି ପରିବାରର ଅତ୍ୟନ୍ତ ଘନିଷ୍ଠ ତଥା ପୂର୍ବତନ କେନ୍ଦ୍ରମନ୍ତ୍ରୀ ସୁରେଶ ପଚୌରୀ କଂଗ୍ରେସକୁ ବାଏବାଏ କହିଛନ୍ତି।
ତାଙ୍କ ସହ ପୂର୍ବତନ ସାଂସଦ ଗଜେନ୍ଦ୍ର ସିଂହ ରାଜୁଖେଡୀ ଓ ଦଳର କିଛି ପୂର୍ବତନ ବିଧାୟକ ମଧ୍ୟ କଂଗ୍ରେସ ଛାଡ଼ିଛନ୍ତି। ଏମାନେ ସମସ୍ତେ କଂଗ୍ରେସ ଛାଡ଼ିବା ସହ ଭୋପାଲରେ ଆୟୋଜିତ ମିଶ୍ରଣ ପର୍ବରେ ବିଜେପିରେ ସାମିଲ ହୋଇଛନ୍ତି।
ମଧ୍ୟପ୍ରଦେଶର ମୁଖ୍ୟମନ୍ତ୍ରୀ ମୋହନ ଯାଦବ, ରାଜ୍ୟ ଭିଜେପି ସଭାପତି ଭିଡି ଶର୍ମା ଓ ପୂର୍ବତନ ମୁଖ୍ୟମନ୍ତ୍ରୀ ଶିବରାଜ ସିଂହ ଚୌହାନଙ୍କ ଉପସ୍ଥିତିରେ କଂଗ୍ରେସ ଛାଡ଼ିଥିବା ନେତାମାନେ ପଦ୍ମ ଧରିଛନ୍ତି। ଭୋପାଲ ସ୍ଥିତ ବିଜେପି ମୁଖ୍ୟାଳୟରେ ଏହି ମିଶ୍ରଣ ପର୍ବ ଅନୁଷ୍ଠିତ ହୋଇଥିଲା।
ପଚୌରୀ ଓ ଗଜେନ୍ଦ୍ର ସିଂହଙ୍କ ବ୍ୟତୀତ ବିଜେପିରେ ମିଶିଥିବା ପୂର୍ବତନ କଂଗ୍ରେସ ବିଧାୟକମାନେ ହେଲେ ସଞ୍ଜୟ ଶୁକ୍ଳା, ଅର୍ଜୁନ ପାଲିୟା ଓ ବିଶାଲ ପଟେଲ।
ପଚୌରୀ ଗାନ୍ଧି ପରିବାରର ଏକଦା ଘନିଷ୍ଠ ଥିଲେ। କଂଗ୍ରେସ କ୍ଷମତାରେ ଥିବା ବେଳେ ସେ ପ୍ରତିରକ୍ଷା ମନ୍ତ୍ରଣାଳୟର ରାଷ୍ଟ୍ରମନ୍ତ୍ରୀ ଥିଲେ। ସେହିପରି କଂଗ୍ରେସ ତାଙ୍କୁ ୪ ଥର ରାଜ୍ୟସଭାକୁ ମଧ୍ୟ ପଠାଇଥିଲା। ଏକଦା ସେ ମଧ୍ୟପ୍ରଦେଶ କଂଗ୍ରେସର ସଭାପତି ଓ ରାଜ୍ୟ ଯୁବ କଂଗ୍ରେସର ଅଧ୍ୟକ୍ଷ ଭାବେ ମଧ୍ୟ କାର୍ଯ୍ୟ କରିଥିଲେ।
ଗଜେନ୍ଦ୍ର ସିଂହ ରାଜୁଖେଡି ଜଣେ ଆଦିବାସୀ ନେତା ଭାବେ ବେଶ ପରିଚିତ। ସେ ୧୯୯୮, ୧୯୯୯ ଓ ୨୦୦୯ରେ କଂଗ୍ରେସ ଟିକେଟରୁ ୩ ଥର ଧର ଆସନରୁ ଲୋକସଭାକୁ ଯାଇଥିଲେ। କଂଗ୍ରେସରେ ସାମିଲ ହେବା ପୂର୍ବରୁ ସେ ୧୯୯୦ରେ ବିଜେପି ଟିକେଟରୁ ବିଧାୟକ ମଧ୍ୟ ହୋଇଥିଲେ।