ବିହାର ମୁଖ୍ୟମନ୍ତ୍ରୀ ନୀତୀଶ କୁମାରଙ୍କ ଜେଡିୟୁକି ନେଇ ବିବାଦ ଗତ ସପ୍ତାହ ହେବ ଚର୍ଚ୍ଚାରେ ରହିଛି। ରାଷ୍ଟ୍ରୀୟ ଅଧ୍ୟକ୍ଷ ଲଲନ ସିଂହ ଦଳରୁ ଇସ୍ତଫା ଦେଇଛନ୍ତି, ଦେଇନାହାନ୍ତି। ଏନେଇ ସସ୍ପେନ୍ସ ଜାରି ରହିଛି। ଆସନ୍ତା କାଲି ଦିଲ୍ଲୀରେ ଦଳର ରାଷ୍ଟ୍ରୀୟ କାର୍ଯ୍ୟକାରିଣୀ ବୈଠକ ବସିବ। ଏଥିପାଇଁ ଦିଲ୍ଲୀରେ ଅଛନ୍ତି ନୀତୀଶ କୁମାର। ଏହାପୂର୍ବରୁ କିନ୍ତୁ ଦଳର ରାଷ୍ଟ୍ରୀୟ ଅଧ୍ୟକ୍ଷ ପଦରୁ ଇସ୍ତଫା ଦେଇନାହାନ୍ତି ବୋଲି ଦାବି କରୁଥିବା ଲଲନ ସିଂହଙ୍କ ଫଟୋ ପୋଷ୍ଟରରୁ ଗାଏବ୍ ହୋଇଯାଇଛି। ଯାହାକୁ ନେଇ ଏବେ ରାଜନୈତିକ ଚର୍ଚ୍ଚା ଆହୁରି ବଢ଼ିବାରେ ଲାଗିଛି।
ଦିଲ୍ଲୀରେ ହେବାକୁ ଥିବା ଜେଡିୟୁ ଜାତୀୟ କାର୍ଯ୍ୟକାରିଣୀ ବୈଠକ ପୂର୍ବରୁ ନୀତୀଶ କୁମାରଙ୍କ ପୋଷ୍ଟର ପାର୍ଟି ଅଫିସରେ ଲଗାଯାଇଛି। ପୋଷ୍ଟରରେ ଲେଖାଯାଇଛି- 'ରାଜ୍ୟ ଚିହ୍ନିଲା, ବର୍ତ୍ତମାନ ଦେଶ ମଧ୍ୟ ଚିହ୍ନିବ'। ତେବେ ଜେଡିୟୁର ଏହି ପୋଷ୍ଟରରୁ ଦଳର ଜାତୀୟ ସଭାପତି ଲଲନ ସିଂହ ଗାଏବ ଅଛନ୍ତି। ବାସ୍ତବରେ ଲଲନ ସିଂହ ଜେଡିୟୁ ରାଷ୍ଟ୍ରୀୟ ଅଧ୍ୟକ୍ଷ ପଦ ଛାଡିବାକୁ ଚାହୁଁଛନ୍ତି ବୋଲି କୁହାଯାଉଛି।
ଗତ ୨ରୁ ୩ ଦିନ ଧରି ଲଲନ ସିଂହଙ୍କ ଇସ୍ତଫାକୁ ନେଇ କଳ୍ପନାଜଳ୍ପନା ଚାଲିଛି। କୁହାଯାଉଛି ଯେ ନୀତୀଶ କୁମାର ଲଲନ ସିଂହଙ୍କ ଉପରେ ରାଗିଛନ୍ତି। ଏହାର କାରଣ ହେଉଛି ଲଲନ ଏବଂ ଲାଲୁ ଯାଦବଙ୍କ ମଧ୍ୟରେ ଘନିଷ୍ଠତା। ତେଣୁ କୁହାଯାଉଛି ଯେ ଲଲନଙ୍କ ଉପରେ ରାଗିଯାଇ ନୀତୀଶ ତାଙ୍କ ଇସ୍ତଫା ନେଇପାରନ୍ତି।
ଏହା ବ୍ୟତୀତ ନୀତୀଶ କୁମାର ଭାରତ ମିଳିତ ମଞ୍ଚରେ ଲଲନ ସିଂହଙ୍କୁ ଏକ ଗୁରୁତ୍ୱପୂର୍ଣ୍ଣ ଭୂମିକା ଦେଇପାରନ୍ତି ବୋଲି ମଧ୍ୟ କୁହାଯାଉଛି। ସେଥିପାଇଁ ତାଙ୍କଠାରୁ ଏହି ଇସ୍ତଫା ନିଆଯାଉଛି। ତେବେ ଇସ୍ତଫା ଖବରକୁ ଜେଡିୟୁ ବାରମ୍ବାର ପ୍ରତ୍ୟାଖ୍ୟାନ କରିଛି। ଏହାରି ଭିତରେ ନୀତୀଶ କୁମାର କହିଛନ୍ତି, ଏହା ଏକ ସାଧାରଣ ବୈଠକ। ପ୍ରତିବର୍ଷ ଏହି ବୈଠକ ଅନୁଷ୍ଠିତ ହେବ।
ସେପଟେ ଜେଡିୟୁର ବୈଠକକୁ ନେଇ ବିହାର ଉପ-ମୁଖ୍ୟମନ୍ତ୍ରୀ ତେଜସ୍ୱୀ ଯାଦବ ମଧ୍ୟ ପ୍ରତିକ୍ରିୟା ଦେଇଛନ୍ତି। ଲଲନ ସିଂହ, ନୀତୀଶ କୁମାର, ବିଜୟ ଚୌଧୁରୀ ବାରମ୍ବାର ଏହା ଏକ ମିଥ୍ୟା ଖବର ବୋଲି କହି ସାରିଛନ୍ତି। ଆଉ କେତେ ଥର ଏମାନେ ସ୍ପଷ୍ଟୀକରଣ ଦେବେ। ଆମେ ମୁଖ୍ୟମନ୍ତ୍ରୀଙ୍କ ସହ ଅଛୁ। ପ୍ରତ୍ୟେକ ଦଳର ବୈଠକ ହେଉଛି । ଏସବୁ ନର୍ମାଲ୍ .. ଯଦି ଆପଣ ଅଯଥାରେ ମିଥ୍ୟା ଖବରକୁ ଗୁରୁତ୍ୱ ଦେବାକୁ ଚାହାଁନ୍ତି ତେବେ ତାହା କରନ୍ତୁ, ଏଥିରେ କିଛି ଫରକ ପଡ଼ିବ ନାହିଁ ବୋଲି ତେଜସ୍ୱୀ ଯାଦବ କହିଛନ୍ତି।
ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ବିରୋଧରେ ଯଦି କେହି ପ୍ରଧାନମନ୍ତ୍ରୀ ପ୍ରାର୍ଥୀ ହେବା ଭଳି ଯୋଗ୍ୟତା ରଖିଛନ୍ତି, ତାହା ହେଲେ ନୀତୀଶ କୁମାର ଅନ୍ୟତମ। ଏହାରି ଭିତରେ ନୀତୀଶ ନିଜ ଦଳରେ ଯେଉଁ କନ୍ଦଳ ସାମ୍ନାକୁ ଆସିଛି ତାହାକୁ ନେଇ ଏବେ ଅନେକ ରାଜନୈତିକ ପ୍ରେମୀଙ୍କ ମଧ୍ୟରେ ଉତ୍ସୁକତା ବଢ଼ି ଯାଇଛି।