ସୂର୍ଯ୍ୟ ନାରାୟଣ ପାତ୍ର ଥିଲେ ବିଜୁ ଜନତା ଦଳ (ବିଜେଡି)ର ବରିଷ୍ଠ ନେତା ତଥା ବିଧାୟକ। ସେ ୭ ଥର ବିଧାୟକ ହୋଇଥିଲେ। ବହୁ ଗୁରୁତ୍ୱପୂର୍ଣ୍ଣ ବିଭାଗର ମନ୍ତ୍ରୀ ତଥା ବିଧାନସଭାର ବାଚସ୍ପତି ପଦରେ ବସିଥିଲେ। ଏହା ସତ୍ତ୍ୱେ ତାଙ୍କ ପାର୍ଥିବ ଶରୀର ଯାଇ ପାରିଲା ନାହିଁ ଭୁବନେଶ୍ୱର ସ୍ଥିତ ବିଜୁ ଜନତା ଦଳର ମୁଖ୍ୟ କାର୍ଯ୍ୟାଳୟ- ‘ଶଙ୍ଖ ଭବନ’କୁ। ଯାହାକୁ ନେଇ ଏବେ ଚର୍ଚ୍ଚା ଜୋର ଧରିଛି।
କାହିଁକି ସୂର୍ଯ୍ୟଙ୍କ ପାର୍ଥିବ ଶରୀର ଶଙ୍ଖ ଭବନକୁ ନିଆଗଲାନି? ସୂର୍ଯ୍ୟଙ୍କ ଭଳି ଦଳର ଜଣେ ବରିଷ୍ଠ ନେତାଙ୍କ କ୍ଷେତ୍ରରେ କାହିଁକି ଏଭଳି କରାଗଲା?ଦିବଙ୍ଗତ ସୂର୍ଯ୍ୟ ପାତ୍ରଙ୍କ ପ୍ରତି ଏ କି ପ୍ରକାର ଶ୍ରଦ୍ଧାଞ୍ଜଳି? ମରଶରୀର ଶଙ୍ଖ ଭବନକୁ ନନେବା ଲାଗି କାହାର ନିର୍ଦ୍ଦେଶ ଥିଲା କି? ସୂର୍ଯ୍ୟଙ୍କ ପାର୍ଥିବ ଶରୀର ଶଙ୍ଖ ଭବନକୁ ଯାଇଥିଲେ କ’ଣ ମାରା ହୋଇଯାଇଥାନ୍ତା କି? ଏପରି ଅନେକ ପ୍ରଶ୍ନ ଲୋକଙ୍କ ମନରେ ଉଙ୍କି ମାରୁଛି।
ଏ ସଂପର୍କରେ ବିଜେଡି ପକ୍ଷରୁ କିନ୍ତୁ ଏଯାଏଁ କୌଣସି ସ୍ପଷ୍ଟୀକରଣ ଦିଆଯାଇନି। ସୂର୍ଯ୍ୟ ନାରାୟଣ ପାତ୍ରଙ୍କ ପରିବାର ପକ୍ଷରୁ ମଧ୍ୟ କୌଣସି ପ୍ରକ୍ରିୟା ମିଳିନାହିଁ।
ଗତକାଲି ସୂର୍ଯ୍ୟ ପାତ୍ରଙ୍କ ପାର୍ଥିବ ଶରୀର ଦିଗପହଣ୍ଡିକୁ ନିଆଯିବା ପୂର୍ବରୁ ଶଙ୍ଖ ଭବନ ଓ ବିଧାନସଭା ପରିସରରୁ ନିଆଯିବାକୁ ସ୍ଥିର ହୋଇଥିଲା। କିନ୍ତୁ ମରଶରୀରକୁ ଶଙ୍ଖ ଭବନ ନିଆନଯାଇ ଏହା ପାର୍ଶ୍ୱରେ ଥିବା ଏକ ସରକାରୀ କ୍ୱାର୍ଟର୍ସ ପରିସରରେ ଅଟକିଥିଲା ଆମ୍ବୁଲାନ୍ସ। ସେହିଠାରେ ହିଁ ଦଳର ନେତା ଓ କର୍ମୀମାନେ ଶ୍ରଦ୍ଧାଞ୍ଜଳି ଜଣାଇଥିଲେ।
ସୂଚନାଯୋଗ୍ୟ, ଶନିବାର ସନ୍ଧ୍ୟାରେ ଦିବଂଗତ ନେତା ସୂର୍ଯ୍ୟ ନାରାୟଣ ପାତ୍ରଙ୍କର ପରଲୋକ ହୋଇଥିଲା। ଭୁବନେଶ୍ୱରର ଏକ ଘରୋଇ ହସ୍ପିଟାଲରେ ଚିକିତ୍ସାଧୀନ ଅବସ୍ଥାରେ ସେ ଶେଷ ନିଃଶ୍ୱାସ ତ୍ୟାଗ କରିଥିଲେ। ମୃତ୍ୟୁ ବେଳକୁ ତାଙ୍କୁ ୭୫ ବର୍ଷ ହୋଇଥିଲା।