ସରିଛି ବିଶ୍ୱର ସର୍ବବୃହତ୍ତ ଗଣତନ୍ତ୍ର ରାଷ୍ଟ୍ରରେ ନିର୍ବାଚନ ପର୍ବ। ସମସ୍ତ ସାତଟି ପର୍ଯ୍ୟାୟରେ ନିର୍ବାଚନ ଶେଷ ହେବା ପରେ ଏବେ ଅପେକ୍ଷା ଫଳାଫଳକୁ। ମଙ୍ଗଳବାର(ଜୁନ୍ ୪)ରେ ରେଜଲ୍ଟ ଘୋଷଣା ପରେ ଦେଶରେ ଆରମ୍ଭ ହେବ ନୂଆ ସରକାର। ନିର୍ବାଚନର ଏହି ମାହୋଲ ମଧ୍ୟରେ ଏକ ଗୁରୁତ୍ୱପୂର୍ଣ୍ଣ ଦିଗ ଉପରେ ଆଜି ନଜର ପକାଇବା ଯେ, ପ୍ରାର୍ଥୀଟିଏ କିପରି ହୋଇଥିଲେ ଜନତା ତାଙ୍କୁ ଭୋଟ୍ ଦେବାକୁ ମନ ବଳାନ୍ତି।
ଏକ ଜାତୀୟ ଗଣମାଧ୍ୟମର ସର୍ଭେରେ ଲୋକମାନେ ଖୋଲା ଖୋଲି ସେମାନଙ୍କ ପସନ୍ଦ ବାବଦରେ କହିଛନ୍ତି। ପ୍ରାର୍ଥୀଟିଏ କିପରି ହୋଇଥିଲେ ସେମାନେ ଭୋଟ୍ ଦିଅନ୍ତି, ଜାଣନ୍ତୁ...
ସଚ୍ଚୋଟ ପ୍ରାର୍ଥୀ ଚାହାଁନ୍ତି ଜନତା
ସର୍ବେକ୍ଷଣରେ ୪୫ ପ୍ରତିଶତ ଲୋକଙ୍କ ପାଇଁ ପ୍ରାର୍ଥୀଙ୍କ ସଚ୍ଚୋଟତା ହେଉଛି ପ୍ରଥମ ପ୍ରାଥମିକତା। ଦେଶର ଲୋକମାନେ ଚାହାଁନ୍ତି ଯେ ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରୁଥିବା ପ୍ରାର୍ଥୀମାନେ ସଚ୍ଚୋଟ ହେବା ଉଚିତ୍, ଯାହା ଦ୍ୱାରା ପାରଦର୍ଶିତାର ସହ କାମ ହୋଇପାରିବ ଏବଂ ସେମାନଙ୍କ ସହର କିମ୍ବା ଅଞ୍ଚଳରେ ବିକାଶ କାର୍ଯ୍ୟ ଶୀଘ୍ର ଅଗ୍ରଗତି କରିବ।
ଏପରି କ୍ଷେତ୍ରରେ ୧୩ ପ୍ରତିଶତ ଲୋକ ପାର୍ଟି ଅର୍ଥାତ୍ ଦଳକୁ ଗୁରୁତ୍ୱ ଦିଅନ୍ତି। ନିର୍ବାଚନରେ ଭୋଟ୍ ଦେବା ପୂର୍ବରୁ ସେମାନଙ୍କ ପାଇଁ ଦଳ ଗୁରୁତ୍ୱ ବହନ କରୁଛି। ୧୩ ପ୍ରତିଶତ ଲୋକ ପାର୍ଟି ଦେଖି ଭୋଟ୍ ଦେଇଥାନ୍ତି ବୋଲି ସର୍ଭେରେ କହିଛନ୍ତି।
Also Read
ଲୋକେ ଚାହାଁନ୍ତି ଶିକ୍ଷିତ ପ୍ରାର୍ଥୀ
ଏହି ସର୍ଭେରେ ୧୨ ପ୍ରତିଶତ ଲୋକ କହିଛନ୍ତି ଯେ, ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରୁଥିବା ପ୍ରାର୍ଥୀଙ୍କ ଶିକ୍ଷାଗତ ଯୋଗ୍ୟତା ସେମାନଙ୍କ ପାଇଁ ପ୍ରଥମ ପ୍ରାଥମିକତା। ସେମାନଙ୍କ ପାଇଁ ନେତା ଶିକ୍ଷିତ ହୋଇଥିବା ଅଧିକ ଗୁରୁତ୍ୱପୂର୍ଣ, ଯାହା ଫଳରେ ସେମାନେ ସାଧାରଣ ଲୋକଙ୍କ ସ୍ୱାର୍ଥରେ ସଠିକ୍ ନିଷ୍ପତ୍ତି ନେଇପାରିବେ ବୋଲି କହିଛନ୍ତି। ସେହିପରି ୧୨ ପ୍ରତିଶତ ଲୋକ ପ୍ରାର୍ଥୀଙ୍କ ଅଭିଜ୍ଞତାକୁ ଗୁରୁତ୍ୱ ଦିଅନ୍ତି। ସେମାନଙ୍କ ପାଇଁ ଜଣେ ଅଭିଜ୍ଞ ନେତା ଜରୁରୀ।
କେବଳ ଏତିକି ନୁହେଁ ନିର୍ବାଚନ ସମୟରେ ଦଳ କରୁଥିବା ଘୋଷଣା ପତ୍ରକୁ ମଧ୍ୟ ପ୍ରାଧାନ୍ୟ ଦେଇଥାନ୍ତି ଜନତା। ସର୍ଭେରେ ୬ ପ୍ରତିଶତ ଲୋକ କହିଛନ୍ତି, ସେମାନେ ଘୋଷଣା ପତ୍ରକୁ ଦୃଷ୍ଟିରେ ରଖି ଭୋଟ୍ ଦିଅନ୍ତି। ଦଳ କିମ୍ବା ପ୍ରାର୍ଥୀମାନେ ଘୋଷଣାପତ୍ରରେ କେଉଁ ସମସ୍ୟାକୁ ଗୁରୁତ୍ୱାରୋପ କରିଛନ୍ତି ଏବଂ କେଉଁ ସମସ୍ୟାଗୁଡିକ ପ୍ରାଥମିକତା ଭିତ୍ତିରେ ସମାଧାନ କରିବେ ତାହା ସେମାନଙ୍କ ପାଇଁ ଗୁରୁତ୍ୱପୂର୍ଣ୍ଣ। ସେହିପରି ୫ ପ୍ରତିଶତ ଭୋଟର ପ୍ରାର୍ଥୀଙ୍କ ଲୋକପ୍ରିୟତା ଆଧାରରେ ଭୋଟ୍ ଦେଉଥିବା କହିଛନ୍ତି।
ପ୍ରାର୍ଥୀଙ୍କ ବୟସ ଏବଂ ଜାତି ମଧ୍ୟ ଗୁରୁତ୍ୱପୂର୍ଣ୍ଣ
୨ ପ୍ରତିଶତ ଲୋକଙ୍କ ପାଇଁ ନେତାଙ୍କ ବୟସ ମଧ୍ୟ ଗୁରୁତ୍ୱପୂର୍ଣ୍ଣ। ନେତା କେତେ ଶାରୀରିକ ଓ ସାମାଜିକ ଭାବରେ ସକ୍ରିୟ ତାହା ସେମାନେ ଦେଖନ୍ତି। ୨ ପ୍ରତିଶତ ଲୋକଙ୍କ ପାଇଁ ପ୍ରାର୍ଥୀ ତଥା ନେତାଙ୍କ ଅପରାଧିକ ଇତିହାସ ଗୁରୁତ୍ୱପୂର୍ଣ୍ଣ ହୋଇଥିବାବେଳେ ୨ ପ୍ରତିଶତ ଲୋକ ପ୍ରାର୍ଥୀଙ୍କ ଜାତି ଆଧାରରେ ଭୋଟ୍ ଦେବାକୁ ନିଷ୍ପତ୍ତି ନିଅନ୍ତି। ସେହିପରି ଗୋଟିଏ ପ୍ରତିଶତ ଜନତା ପ୍ରାର୍ଥୀଙ୍କ ସମ୍ପତ୍ତି ମୂଲ୍ୟ ଦେଖି ବିଚାର କରନ୍ତି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
