ଭୁବନେଶ୍ୱର ଲୋକସଭା ଆସନକୁ ହାତେଇବା ପାଇଁ ବିଜେଡି ନିଜର କଳବଳକୌଶଳ ଲଗାଇଥିଲେ ମଧ୍ୟ ଦଳର ସାଂସଦ ପ୍ରାର୍ଥୀ ମନ୍ମଥ ରାଉତରାୟଙ୍କ ଅତୀତର ଅପରାଧିକ କାର୍ଯ୍ୟ ଏବେ ତାଙ୍କପାଇଁ ମହଙ୍ଗା ସାବ୍ୟସ୍ତ ହେବାରେ ଲାଗିଛି । ବିଜେଡି ରାଜ୍ୟସଭା ସାଂସଦ ମୁନ୍ନା ଖାଁଙ୍କ ଉପରେ ଆକ୍ରମଣ ଘଟଣାରେ ସମ୍ପୃକ୍ତ ମନ୍ମଥଙ୍କୁ ଏବେ ଦଳ ନିଜର ସାଂସଦ ପ୍ରାର୍ଥୀ କରିଥିଲେ ମଧ୍ୟ ଭାବେ ଦଳୀୟ କର୍ମୀମାନଙ୍କ ମଧ୍ୟରେ ତାଙ୍କର ଗ୍ରହଣୀୟତାକୁ ନେଇ ସାଧାରଣରେ ପ୍ରଶ୍ନ ଉଠିଛି । ଏପଟେ ମନ୍ମଥଙ୍କ ପିତା କଂଗ୍ରେସ ବିଧାୟକ ସୁର ରାଉତରାୟ ନିୟମିତ ଗଣମାଧ୍ୟମରେ ନାନାଦି ପ୍ରକାରର ବୟାନ ଓ ତାଙ୍କ ପାରିବାରିକ ଡ୍ରାମାକୁ ଭୁବନେଶ୍ୱର ସଚେତନ ଭୋଟର ସହଜରେ ହଜମ କରିପାରୁନଥିବା ଚର୍ଚ୍ଚା ହେଉଛି ।
ଜଟଣୀ ଥାନାରେ ରୁଜୁ ମାମଲା ଅନୁସାରେ ବିଜେଡିର ବର୍ତ୍ତମାନର ସାଂସଦ ପ୍ରାର୍ଥୀ ମନ୍ମଥ ନିଜର ୨ଜଣ ସହଯୋଗୀଙ୍କ ସହ ୨୦୨୧ ଡିସେମ୍ବର ୧୭ତାରିଖରେ ଜଟଣୀ ବଜାରରେ ବିଜେଡି ରାଜ୍ୟସଭା ସାଂସଦ ମୁନ୍ନା ଖାଁଙ୍କ ଗାଡ଼ି ଉପରକୁ ଅଣ୍ଡାମାଡ଼ କରିଥିଲେ । ଏହାସହିତ ମାରଣାସ୍ତ୍ର ଧରି ଅଶାଳୀନ ଭାଷାରେ ଗାଳିଗୁଲଜ ସହ ସାଂସଦଙ୍କ ଡ୍ରାଇଭରଙ୍କ ଗଳା ଚିପି ଥିବା ନେଇ ଥାନାରେ ଅଭିଯୋଗ ହୋଇଥିଲା । ସାଂସଦ ମୁନ୍ନା ଖାଁ ‘ବିଜୁ ସ୍ୱାସ୍ଥ୍ୟ କଲ୍ୟାଣ କାର୍ଡ’ ବାଂଟିବାକୁ ଯାଉଥିବାବେଳେ ତାଙ୍କ ଗାଡ଼ି ଉପରେ ଏହି ଆକ୍ରମଣ ହୋଇଥିବା ଜଟଣୀ ଥାନାରେ ରୁଜୁ ଏଫଆଇଆରରେ ଉଲ୍ଲେଖ ରହିଛି । ମନ୍ମଥ ଓ ତାଙ୍କ ଦୁଇ ସହଯୋଗୀଙ୍କ ନାଁରେ ଜଟଣୀ ପୁଲିସ ଆଇପିସିର ଧାରା-୧୪୭,୩୨୩,୨୯୪,୩୪୧,୫୦୬ ଓ ୧୪୯ରେ ମାମଲା ରୁଜୁ କରିଥିଲା । ଏହି କେସ ନମ୍ବର-୦୬୭/୨୦୨୧ ବୋଲି ଜଣାପଡ଼ିଛି । ତେବେ ମନ୍ମଥ ନିଜର ନାମାଙ୍କନ ପତ୍ର ସହ ଦେଇଥିବା ସତ୍ୟପାଠରେ ଏହି କେସ୍ ସମ୍ପର୍କରେ କିଛି ଉଲ୍ଲେଖ କରିନାହାନ୍ତି କି କେସ୍ ଏବେ କେଉଁ ସ୍ଥିତିରେ ତାହା ଜଣାପଡ଼ିନି ।
ସେହିପରି ଚଳିତମାସ ୮ତାରିଖରେ ନିବାଚନୀ ଶୋଭାଯାତ୍ରାବେଳେ ଜଟଣୀର ବିଜେଡି ପୌରାଧ୍ୟକ୍ଷ ଅନନ୍ତ ବେହେରାଙ୍କ ଉପରେ ସୁରଙ୍କ ସମର୍ଥକମାନେ ଆକ୍ରମଣ କରିଥିଲେ । ଏନେଇ ଥାନାରେ ମଧ୍ୟ ଶ୍ରୀ ବେହେରା ଲିଖିତ ଅଭିଯୋଗ କରିôଥଲେ ।
ସୁର ଓ ତାଙ୍କ ପୁଅ ମନ୍ମଥଙ୍କ ଏଭଳି କାର୍ଯ୍ୟକଳାପକୁ ନେଇ ଜଟଣୀରେ ଏବେ ବିଜେଡି ଭୋଟ୍ ଦୁଇଫାଳ ହୋଇ ରହିଛି । ସୁରଙ୍କ ସମର୍ଥକମାନେ ବିଜେଡି ବିଧାୟକ ପ୍ରାର୍ଥୀ ବିଭୂତିବଳବନ୍ତରାୟଙ୍କୁ ଭୋଟ୍ ନଦେଇ କଂଗ୍ରେସ ପ୍ରାର୍ଥୀ ସନ୍ତୋଷ ଜେନାଙ୍କୁ ଦେବେ ବୋଲି କହୁଥିବା ଚର୍ଚ୍ଚା ହେଉଛି । ବିଭୂତି ଓ ସୁରଙ୍କ ଗୋଷ୍ଠୀ ମଧ୍ୟରେ ଚାଲିଥିବା ଛକାପଞ୍ଝା ଯୋଗୁ ବିଜେଡିକୁ ଜଟଣୀରେ ବେଶ୍ କ୍ଷତି ସହିବାକୁ ପଡ଼ିବ ବୋଲି ଦଳୀୟ ମହଲରେ ଆଶଙ୍କା କରାଯାଉଥିବା ଜଣାପଡ଼ିଛି ।
ଏସବୁ ବ୍ୟତୀତ ମନ୍ମଥ ତାଙ୍କ ପତ୍ନୀଙ୍କଠୁ ୨୦୧୦ ମସିହାରୁ ଦୂରେଇ ରହୁଥିବା ନେଇ ନିର୍ବାଚନୀ ସତ୍ୟପାଠରେ ଉଲ୍ଲେଖ କରିଥିଲେ ମଧ୍ୟ ଏପର୍ଯ୍ୟନ୍ତ ପତ୍ନୀଙ୍କୁ ମାସିକ କ୍ଷତିପୂରଣ ଦେଉନଥିବା ସୂଚନା ମିଳିଛି । ଏପରିକି ଏହି ମାମଲା ଏବେବି କୋର୍ଟଙ୍କ ବିଚାରାଧୀନ ରହିଥିବା ଜଣାପଡ଼ିଛି । ମନ୍ମଥ ତାଙ୍କ ପତ୍ନୀଙ୍କଠୁ ୧୪ବର୍ଷ ଧରି ଅଲଗା ରହିଥିବାବେଳେ ମାନବିକତା ଦୃଷ୍ଟିରୁ ମାସିକ କ୍ଷତିପୂରଣ ନଦେବା ଏବଂ ଗଣମାଧ୍ୟମକୁ ପତ୍ନୀଙ୍କ ସହ ସମ୍ପର୍କକୁ ନେଇ ମିଛ ସଫେଇ ଦେଇଥିବାକୁ ମଧ୍ୟ ଭୁବନେଶ୍ୱରର ସଚେତନ ଭୋଟର ସହଜରେ ଗ୍ରହଣ କରୁନଥିବା ଚର୍ଚ୍ଚା ହେଉଛି ।
ସୁରଙ୍କ ପୁଅଙ୍କୁ ଟିକେଟ୍ ଦେଇ ବିଜେଡି ଭୁବନେଶ୍ୱର ସିଟ୍ ହାତେଇବାକୁ ଯେଉଁ ଗୋଟିଚାଳନା କରିଥିଲା ତାହା ଏବେ ଖୋଦ୍ ବିଜେଡି ବଡ଼ପଣ୍ଡାଙ୍କ ମୁଣ୍ଡବ୍ୟଥା ବଢ଼ାଇ ଦେଇଛି । କେବଳ ଜଟଣୀ ନୁହେଁ ବେଗୁନିଆ, ଖୋର୍ଦ୍ଧା, ଏକାମ୍ର ଓ ଭୁବନେଶ୍ୱର ମଧ୍ୟ ନିର୍ବାଚନମଣ୍ଡଳୀରେ ମନ୍ମଥଙ୍କ ସପକ୍ଷରେ ଭୋଟ କରିବା ଏବେ ବିଜେଡି ପାଇଁ ପ୍ରମୁଖ ଚ୍ୟାଲେଞ୍ଜ ପାଲଟିଛି ବୋଲି ଚର୍ଚ୍ଚା ହେଉଛି ।