କ୍ୟାବିନେଟ୍ ମନ୍ତ୍ରୀ ନବ ଦାସଙ୍କ ହତ୍ୟା ମାମଲାରେ ତଦନ୍ତ ପ୍ରକ୍ରିୟା କ’ଣ ହେବ ସେ ନେଇ ଖୁବଶୀଘ୍ର ସରକାର ନିଷ୍ପତ୍ତି ନେବେ । ଏବେ ବିଭିନ୍ନ ତଥ୍ୟ ଧୀରେଧୀରେ ସାମ୍ନାକୁ ଆସୁଛି । ଆଉ ସେହି ସବୁ ତଥ୍ୟକୁ ହୁଏତ ଆଗାମୀ ଦିନରେ ତଦନ୍ତ ପରିସରଭୁକ୍ତ କରାଯିବ । ପୂର୍ବରୁ ଭୟର ବାତାବରଣ ଥିଲା। ନବଙ୍କ ହତ୍ୟା କାହିଁକି ହେଲା, କିଏ କଲା ଓ ଷଡ଼ଯନ୍ତ୍ରରେ କିଏ ଭାଗିଦାର ଥିଲେ ସେସବୁ କଥା ଆଗାମୀ ଦିନରେ ନିଶ୍ଚିତ ଭାବେ ଲୋକଲୋଚନକୁ ଆସିବ । ଆଜି ଏଭଳି କିଛି ପ୍ରତିକ୍ରିୟା ରଖିଛନ୍ତି ରାଜ୍ୟ ଆଇନ ମନ୍ତ୍ରୀ ପୃଥ୍ୱୀରାଜ ହରିଚନ୍ଦନ । ଆଉ ମନ୍ତ୍ରୀଙ୍କ ଏହି ବୟାନ ହିଁ ପରୋକ୍ଷରେ ନବ ଦାସ ହତ୍ୟା ମାମଲାର ପୁନଃତଦନ୍ତ ପାଇଁ ସରକାର ବିଚାର କରୁଥିବା ମଧ୍ୟ ସ୍ପଷ୍ଟ ହୋଇଛି ।
ନବ ଦାସ ହତ୍ୟା ମାମଲାରେ ଗୁରୁବାର ଗଣମାଧ୍ୟମକୁ ରାଜ୍ୟ ସରକାରଙ୍କ ଦୁଇଜଣ ମନ୍ତ୍ରୀ ପ୍ରତିକ୍ରିୟା ରଖିଛନ୍ତି । ରାଜସ୍ୱ ମନ୍ତ୍ରୀ ସୁରେଶ ପୂଜାରୀ ଓ ଆଇନ ମନ୍ତ୍ରୀ ଶ୍ରୀ ହରିଚନ୍ଦନ । ନବଙ୍କ ହତ୍ୟାବେଳେ ସ୍ଥାନୀୟ ସାଂସଦ ଥିବା ତଥା ବର୍ତ୍ତମାନର ରାଜସ୍ୱ ମନ୍ତ୍ରୀ ଶ୍ରୀ ପୂଜାରୀ କହିଛନ୍ତି ଯେ, ସେସମୟରେ ବହୁତ ତଥ୍ୟ ଦେଇଥିଲି । ଆଜି ବି ଦେଉଛି । ସେସବୁ ଆଇସୋଲେସନରେ ରହିଛି । ବିସ୍ତାର ଭାବେ ଆଗକୁ ସେସମ୍ପର୍କରେ ଆଲୋଚନା ହେବ ।
Also Read
ସେହିପରି ଆଇନ ମନ୍ତ୍ରୀ ଶ୍ରୀ ହରିଚନ୍ଦନ ତାଙ୍କ ପ୍ରତିକ୍ର୍ରିୟାରେ କହିଛନ୍ତି ଯେ, ତଦନ୍ତ ପ୍ରକ୍ରିୟା କ’ଣ ହେବ ସେ ନେଇ ସରକାର ଆଗକୁ ଖୁବଶୀଘ୍ର ନିଷ୍ପତ୍ତି ନେବେ । ପୂର୍ବ ସରକାର ସମୟରେ ଭୟର ବାତାବରଣ ଥିବାରୁ ଅନେକ ଲୋକ ମୁହଁ ଖୋଲୁନଥିଲେ । ଏପରିକି ନବ ଦାସଙ୍କ ପରିବାର ଲୋକ ମଧ୍ୟ ମୁହଁ ଖୋଲିବାକୁ ସାହାସ କରୁନଥିଲେ । ସେ ଭୟ ଦୂରେଇ ଯାଇଛି । ତେଣୁ ଅନେକ ତଥ୍ୟ ଧୀରେଧୀରେ ସାମ୍ନାକୁ ଆସିବା ଆରମ୍ଭ ହୋଇଛି । ଆଉ ସେହି ସବୁ ତଥ୍ୟକୁ ହୁଏତ ଆଗାମୀ ଦିନରେ ତଦନ୍ତ ପରିସରଭୁକ୍ତ କରାଯିବ । ସବୁ ଘଟଣାକୁ ତଦନ୍ତ ପରିସରଭୁକ୍ତ କଲେ ଜଣେ ବିଶିଷ୍ଟ ବ୍ୟକ୍ତିଙ୍କର ମୃତ୍ୟୁ କାହିଁକି ହେଲା, କିଏ କଲା,ଷଡ଼ଯନ୍ତ୍ରରେ କିଏ ଭାଗିଦାରୀ ଥିଲେ । ସେସବୁ କଥା ଆଗାମୀ ଦିନରେ ନିଶ୍ଚିତ ଭାବେ ଆସିବ ବୋଲି ଆଇନମନ୍ତ୍ରୀ ଶ୍ରୀ ହରିଚନ୍ଦନ ଆଶାବାଦୀ ଅଛନ୍ତି ।
ଅନ୍ୟପକ୍ଷରେ, ନବ ଦାସଙ୍କ ହତ୍ୟାର ତଦନ୍ତ ସିବିଆଇ ଦ୍ୱାରା କରିବା ପାଇଁ ତାଙ୍କ ଝିଅ ତଥା ଝାରସୁଗୁଡ଼ାର ପୂର୍ବତନ ବିଧାୟିକା ଦୀପାଳି ଦାସ ଗଣମାଧ୍ୟମକୁ ଦେଇଥିବା ବୟାନ ଏବେ ବିଜେଡି ନିମନ୍ତେ ଚିନ୍ତାର ବିଷୟ ପାଲଟିଛି । ସିବିଆଇ ତଦନ୍ତ କାହିଁକି ଚାହୁଁଛନ୍ତି ତାହା ଦର୍ଶାଇବା ପାଇଁ ନବଙ୍କ ପରିବାର ସଦସ୍ୟଙ୍କୁ ଲିଖିତ ଭାବେ ଯଥାର୍ଥ କାରଣ ଦେବାକୁ ପଡ଼ିବ । ନବ ହତ୍ୟା ମାମଲାର ଶୁଣାଣି ଚାଲିଥିବା ଝାରସୁଗୁଡ଼ା ଜିଲ୍ଲା କୋର୍ଟ ନା ମୁଖ୍ୟମନ୍ତ୍ରୀ ନା ହାଇକୋର୍ଟ ମୁଖ୍ୟ ବିଚାରପତିଙ୍କୁ ଲିଖିତ ଭାବେ ଦେବେ ସେନେଇ ନବଙ୍କ ପରିବାର ଲୋକେ ଏବେ ଓକିଲଙ୍କ ବିଚାରବିମର୍ଶ କରୁଥିବା ଜଣାପଡ଼ିଛି । ବିଜେଡି ସହ ଜଡ଼ିତ ଥିବା ଓଡ଼ିଶା ହାଇକୋର୍ଟର ଜଣେ ବରିଷ୍ଠ ଓକିଲଙ୍କ ସହଯୋଗ ନେବା ପାଇଁ ନବଙ୍କ ପରିବାରକୁ ନବୀନ ନିବାସ ପକ୍ଷରୁ ପରାମର୍ଶ ଦିଆଯାଇଥିବା ସୂଚନା ମିଳିଛି ।
TAGS
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
