ରାଜ୍ୟରେ ଦ୍ୱିତୀୟ ପର୍ଯ୍ୟାୟ ଭୋଟଗ୍ରହଣ ପାଇଁ ଆସନ୍ତାକାଲି ପ୍ରଚାର ଶେଷ ହେଉଥିବାବେଳେ ଆଜି ବିଜେଡି ସୁପ୍ରିମୋ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ବିଜେପିର ଷ୍ଟାର ପ୍ରଚାରକମାନଙ୍କୁ ଟାର୍ଗେଟ୍ କରିଛନ୍ତି । ବିଜେପିର କିଛି ମୁଖ୍ୟମନ୍ତ୍ରୀ ଓ କେନ୍ଦ୍ରମନ୍ତ୍ରୀ ଓଡ଼ିଶାକୁ ନିର୍ବାଚନ ସମୟରେ ପଲିଟିକାଲ ଟୁରିଷ୍ଟ ଭଳି ଆସୁଛନ୍ତି ଓ ପରେ ଅଦୃଶ୍ୟ ହୋଇଯାଆନ୍ତି ବୋଲି ନବୀନ କହିଛନ୍ତି । ଆଉ ନବୀନଙ୍କ ଏଭଳି ବୟାନକୁ କଡ଼ା ଭାଷାରେ ଜବାବ ଦେଇଛି ବିଜେପି । ଓଡ଼ିଶାରେ ତାମିଲବାକୁ ଟୁରିଷ୍ଟ ସାଜିଛନ୍ତି । ବହୁ ଟୁରିଜିମ୍ କଲଣି, ଭାଷା ବି ନଷ୍ଟ ହେଲାଣି । ଏବେ ତାମିଲନାଡୁକୁ ଟିକେଟ୍ କାଟି ଓଡ଼ିଶାବାସୀ ବାଟ ଦେଖାଇଦେବେ ବୋଲି ବିଜେପି କହିଛି ।
ଆଜି ସମ୍ବାଦ ସରବରାହ ସଂସ୍ଥା ପିଟିଆଇକୁ ସାକ୍ଷାତକାର ଦେଇ ନବୀନ କହିଛନ୍ତି ଯେ,କିଛି ମୁଖ୍ୟମନ୍ତ୍ରୀ ଓ କେନ୍ଦ୍ରମନ୍ତ୍ରୀ ପଲିଟିକାଲ ଟୁରିଷ୍ଟ ଭଳି କେବଳ ନିର୍ବାଚନ ସମୟରେ ଆସୁଛନ୍ତି । ପରେ ସେମାନେ ଅଦୃଶ୍ୟ ହୋଇଯାଆନ୍ତି । ସେମାନଙ୍କର ଭାଷଣ ଓଡ଼ିଶାର ଲୋକମାନଙ୍କ ଉପରେ କିଛି ପ୍ରଭାବ ପକାଇବ ନାହିଁ । ସେମାନଙ୍କ ମଧ୍ୟରୁ ଅଧିକାଂଶ ଅଶାଳୀନ ଓ ଅପମାନଜନକ ଭାଷା ପ୍ରୟୋଗ କରୁଛନ୍ତି । ଯାହାକି ଅତ୍ୟନ୍ତ ଦୁର୍ଭାଗ୍ୟଜନକ । ମୁଁ ସେସବୁରେ ବିଶ୍ୱାସ କରେନି । ଆଉ ରାଜ୍ୟର ଲୋକମାନେ ମଧ୍ୟ ଏଭଳି ଭାଷାକୁ ପସନ୍ଦ କରନ୍ତି ନାହିଁ ବୋଲି ନବୀନ କହିଛନ୍ତି ।
Also Read
ନବୀନଙ୍କ ଏହି ପ୍ରତିକ୍ରିୟା ଉପରେ କଡ଼ା ଜବାବ ରଖିଛି ବିଜେପି । ଦଳର ରାଜ୍ୟ ମୁଖପାତ୍ର ପୀତାମ୍ବର ଆଚାର୍ଯ୍ୟ କହିଛନ୍ତି ଯେ, ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ୨୫ବର୍ଷ ମଧ୍ୟରେ ୨୫ଥର ବି ନିଜ ନିର୍ବାଚନମଣ୍ଡଳୀ ହିଞ୍ଜିଳିକୁ ଯାଇନଥିବେ । ହିଞ୍ଜିଳିରେ ନବୀନବାବୁ ହିଁ ଟୁରିଷ୍ଟ । ନଚେତ୍ ପ୍ରଧାନମନ୍ତ୍ରୀ ଓ କେନ୍ଦ୍ରମନ୍ତ୍ରୀମାନଙ୍କୁ ଟୁରିଷ୍ଟ କୁହନ୍ତେ ନାହିଁ । ଓଡ଼ିଶାକୁ ସବୁକ୍ଷେତ୍ରରେ ପ୍ରାଧାନ୍ୟ ଦେଇଥିବା ପ୍ରଧାନମନ୍ତ୍ରୀ ଓଡ଼ିଶାରେ ଟୁରିଷ୍ଟ ନୁହଁନ୍ତି । ଯେଉଁ ସରକାରୀ ବାବୁ ଏଠାରେ ଚାକିରି କରିବାକୁ ଆସିଥିଲେ ସେ ହେଉଛନ୍ତି ଓଡ଼ିଶାରେ ଟୁରିଷ୍ଟ । ୨୫ବର୍ଷ ହେଲା ଓଡ଼ିଶାରେ ବହୁ ଟୁରିଜିମ୍ କରିସାରିଲଣି । ଏବେ ସମୟ ଆସିଛି ସ୍ୱାଭିମାନୀ ଓଡ଼ିଆମାନେ ଟିକେଟ୍ କାଟି ତାମିଲନାଡୁକୁ ରାସ୍ତା ଦେଖାଇଦେବେ । ମୁଖ୍ୟମନ୍ତ୍ରୀଙ୍କ ଗୁମାସ୍ତା ଭାବେ ଓଡ଼ିଶା ଲୋକଙ୍କୁ ଶାସନ କରିବାର ଦୁଃସାହାସ କରୁଛନ୍ତି ଅଣଓଡ଼ିଆ ବାବୁ । ଯଦି ଓଡ଼ିଆ ହେବାକୁ ଇଚ୍ଛା ଅଛିୀ ତା’ହେଲେ ନିଜର ସାଜ୍ଞିଆ ‘ପାଣ୍ଡିଆନ’ରୁ ବଦଳାଇ ‘ରାଉତ’ କରିଦିଅନ୍ତୁ । ଅଣଓଡ଼ିଆ ହୋଇ ଓଡ଼ିଆର ପରିଚୟ ଖୋଜୁଛ । ଅଣଓଡ଼ିଆ ବାବୁଙ୍କର ଗର୍ବ, ଆସ୍ପାଳନ ଏତେ ବଢ଼ିଯାଇଛି ଯେ, ଦେଶର ପ୍ରଧାନମନ୍ତ୍ରୀ, ଗୃହମନ୍ତ୍ରୀ ଓ ଅନ୍ୟାନ୍ୟ ଜାତୀୟ ନେତାମାନଙ୍କୁ ଟୁରିଷ୍ଟ ବୋଲି ସମ୍ବୋଧନ କରୁଛନ୍ତି ବୋଲି ସେ କହିଛନ୍ତି ।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
