Naveen in Chakravyuh: ନବୀନଙ୍କୁ ଘେରିବାକୁ ଚକ୍ରବ୍ୟୁହ , ପାଣ୍ଡିଆନଙ୍କ ଇସାରାରେ ନାଚୁଛନ୍ତି କି ସ୍ନେହାଙ୍ଗିନୀ,ସୁଜାତାଙ୍କ ଏଂଟ୍ରି ପାଇଁ ‘ଫାଇନାଲ୍ ଗେମ୍‌’

ବିଜେଡିର ୨୯ତମ ପ୍ରତିଷ୍ଠା ଦିବସ ପାଳନକୁ ଆଉ ମାତ୍ର ଦୁଇ ଦିନ ବାକି ଥିବାବେଳେ ଦଳର ଆଭ୍ୟନ୍ତରୀଣ କନ୍ଦଳ ଚରମ ସୀମାରେ ପହଂଚିଛି। ଦଳର ସୁପ୍ରିମୋ ନବୀନ ପଟ୍ଟନାୟକଙ୍କୁ ବ୍ଲାକମେଲ୍ ଓ ଚାପ ସୃଷ୍ଟି କରିବା ପାଇଁ ଏକ ବଡ଼ ଧରଣର ଷଡ଼ଯନ୍ତ୍ର ଆରମ୍ଭ ହୋଇଛି । ପାଣ୍ଡିଆନ ଦମ୍ପତିଙ୍କ ନବୀନ ନିବାସରୁ ରହସ୍ୟମୟ ଦୂରତ୍ୱ ଓ ବିଜୁ ମହିଳା ଜନତା ଦଳ ସଭାନେତ୍ରୀ ସ୍ନେହାଙ୍ଗିନୀ ଛୁରିଆଙ୍କ ନେତୃତ୍ୱରେ ମହିଳା ବ୍ରିଗେଡ଼ର ଅଚାନକ ସକ୍ରିୟତା  ବିଜେଡି ରାଜନୀତିରେ କମ୍ପନ ସୃଷ୍ଟି କରିଛି ।

ପାଣ୍ଡିଆନଙ୍କ ପତ୍ନୀ ସୁଜାତାଙ୍କୁ ଦଳର ଗୁରୁତ୍ୱପୂର୍ଣ୍ଣ ଦାୟିତ୍ୱ ଦେବା ପାଇଁ ଏହି ‘ପ୍ରେସର ପଲିଟିକ୍ସ’କୁ ସୁଚିନ୍ତିତ ଢଙ୍ଗରେ କାର୍ଯ୍ୟକାରୀ କରାଯାଉଥିବା ସୂଚନା ମିଳିଛି ।  ତେବେ ନବୀନଙ୍କ ନାଁ ନେଇ ସ୍ନେହାଙ୍ଗିନୀ କିଭଳି ଦଳୀୟ ନେତ୍ରୀମାନଙ୍କୁ ଏକଜୁଟ କରୁଛନ୍ତି ଓ ଅପରାହ୍ନରେ ନବୀନଙ୍କୁ ଭେଟିବା ପାଇଁ ତାଙ୍କୁ କିଏ କିଭଳି ଅନୁମତିର ବ୍ୟବସ୍ଥା କରାଇଲା ତାହା ଏବେ ବିଜେଡି ନେତାମାନଙ୍କ ମଧ୍ୟରେ ଚର୍ଚ୍ଚାର ବିଷୟ ପାଲଟିଛି। ବିଜେଡିର ଅଘୋଷିତ ସର୍ବେସର୍ବା ଭିକେ ପାଣ୍ଡିଆନଙ୍କ ଇଙ୍ଗିତରେ ତାଙ୍କର ଖାସ୍ ଅନୁଗତ ଥିବା ନବୀନ ନିବାସର ଜଣେ ବରିଷ୍ଠ ଅଧିକାରୀ ହିଁ ଏହି ଭେଟଘାଟର ଆୟୋଜନ କରିଥିବା ଜଣାପଡ଼ିଛି ।

ଦଳର ୨୯ତମ ପ୍ରତିଷ୍ଠା ଦିବସ ପୂର୍ବରୁ ବିଜେଡି ସୁପ୍ରିମୋ ନବୀନ ପଟ୍ଟନାୟକଙ୍କ ଉପରେ ମାତ୍ରାଧିକ ଚାପ ଓ ତାଙ୍କୁ ଘେରିବା ପାଇଁ ଚକ୍ରବ୍ୟୁହ ପ୍ରସ୍ତୁତ ହୋଇଛି । ସ୍ନେହାଙ୍ଗିନୀ ଆଜି ଅପରାହ୍ନ ସାଢ଼େ ୪ଟାରେ ଦଳର ବରିଷ୍ଠ ନେତ୍ରୀମାନଙ୍କୁ ଧରି ନବୀନ ନିବାସ ଯାଇ ନବୀନ ପଟ୍ଟନାୟକଙ୍କୁ ଭେଟିବାର କାର୍ଯ୍ୟକ୍ରମ ରହିଛି । ସୂଚନା ମୁତାବକ, ଗତକାଲି ଅପରାହ୍ନରୁ ସ୍ନେହାଙ୍ଗିନୀ ନିଜେ ଦଳର ବିଭିନ୍ନ ନେତ୍ରୀମାନଙ୍କୁ ଫୋନ୍ କରି “ନବୀନ ବାବୁ ଡକାଇଛନ୍ତି” ବୋଲି କହି ଏକଜୁଟ କରିଛନ୍ତି । ନବୀନ ନିବାସରୁ କୌଣସି ଅଫିସିଆଲ୍ ଡାକରା ନଥାଇ ସ୍ନେହାଙ୍ଗିନୀ ନିଜ ଆଡୁ ଏହି ମେଳି କରିବା ଘଟଣା ସନ୍ଦେହଘେରରେ ।

ନୂଆପଡ଼ା ଉପନିର୍ବାଚନରେ ବିଜେଡି ପ୍ରାର୍ଥୀ ସ୍ନେହାଙ୍ଗିନୀଙ୍କ ଲଜ୍ଜାଜନକ ପରାଜୟ ବିଜେଡି ଇତିହାସରେ ଏକ କଳଙ୍କିତ ଅଧ୍ୟାୟ ହୋଇ ରହିଛି । ଦଳର ମହିଳା ସଭାନେତ୍ରୀ ସ୍ନେହାଙ୍ଗିନୀ ସେଠାରେ ପ୍ରାର୍ଥୀ ହୋଇଥିଲେ ମଧ୍ୟ ଦଳ ସେଠାରେ ତୃତୀୟ ସ୍ଥାନରେ ରହିବାକୁ ବିଜେଡିର କର୍ମୀ-ନେତାମାନେ ସହଜରେ ହଜମ କରିପାରିନାହାନ୍ତି । ନୂଆପଡ଼ାବାସୀଙ୍କୁ ଅପମାନିତ କରି ଜିଲ୍ଲା ବାହାରରୁ ସ୍ନେହାଙ୍ଗିନୀଙ୍କୁ ପ୍ରାର୍ଥୀ କରାଯିବା ଯୋଗୁ ଦଳର ବିପର୍ଯ୍ୟୟ ହେବାକୁ ନେତାମାନେ ସିଧାସଳଖ ସ୍ୱୀକାର କରୁଥିଲେ ମଧ୍ୟ ତାଙ୍କୁ କିଏ ପ୍ରାର୍ଥୀ କରିଥିଲା ତାହା ଆଜିର ଘଟଣାକ୍ରମ ପରେ ସ୍ପଷ୍ଟ ହେବାରେ ଲାଗିଛି ।

ଦଳର ନେତାମାନଙ୍କ ପରାମର୍ଶକୁ ଅଣଦେଖା କରି ସ୍ନେହାଙ୍ଗିନୀକୁ ପ୍ରାର୍ଥୀ ଭାବେ ଲଦି ଦେବା ପାଇଁ ପାଣ୍ଡିଆନ ଦମ୍ପତି ହିଁ ଷଡ଼ଯନ୍ତ୍ର କରି ସଫଳ ହୋଇଥିଲେ । ଏବେ ସେହି ପାଣ୍ଡିଆନ ଦମ୍ପତିଙ୍କ ଇସାରାରେ ନବୀନ ନିବାସ ଯାଇ ସୁଜାତାଙ୍କ ସପକ୍ଷରେ ଲବି କରିବାର ନେତୃତ୍ୱ ସ୍ନେହାଙ୍ଗିନୀ ନେଇଥିବା ଚର୍ଚ୍ଚା ହେଉଛି ।

ପାଣ୍ଡିଆନ ଓ ତାଙ୍କ ଖାସ୍ ଅନୁଗତ ପ୍ରଣବପ୍ରକାଶ ଦାସ ଓରଫ ବବିଙ୍କ ମଧ୍ୟରେ ଆନୁଷ୍ଠାନିକ ବିଜେଡି ଦଖଲକୁ ନେଇ ଚାଲିଥିବା ଛକାପଞ୍ଝା ମଧ୍ୟରେ ଦଳର ସୁପ୍ରିମୋ ନବୀନ ପଟ୍ଟନାୟକଙ୍କୁ ତାଙ୍କ ହାତଗଢ଼ା ଦଳରେ କୋଣଠେସା ସହ ଏକଘରିକିଆ କରିବାକୁ ମଧ୍ୟ ଷଡ଼ଯନ୍ତ୍ର ଆରମ୍ଭ ହୋଇଛି । ଦଳରେ ସୁଜାତାଙ୍କ ଆନୁଷ୍ଠାନିକ ଏଣ୍ଟ୍ରିକୁ ନବୀନ ‘ଗ୍ରୀନ୍ ସିଗନାଲ’ ଦେଉନଥିବାରୁ ପାଣ୍ଡିଆନ ଦମ୍ପତି ଏବେ ‘ଇମୋସନାଲ ଅତ୍ୟାଚାର’ ଆରମ୍ଭ କରିଦେଇଥିବା ଚର୍ଚ୍ଚା ହେଉଛି । ନବୀନଙ୍କ ଉପରେ ସମ୍ପୂର୍ଣ୍ଣ ନିୟନ୍ତ୍ରଣ ରଖିଥିବା ପାଣ୍ଡିଆନ ହଠାତ୍ ଚଳିତମାସ ମଧ୍ୟରେ ମାତ୍ର ୩-୪ଦିନ ନବୀନ ନିବାସ ଆସିବା ଏବଂ ତାଙ୍କ ଅନୁପସ୍ଥିତିରେ ନିୟମିତ ନବୀନ ନିବାସ ଆସୁଥିବା ସୁଜାତା ବିଗତ ଦୁଇସପ୍ତାହ ଧରି ଆଉ ନଆସିବା ଏହାର ବିରାଟ ସଙ୍କେତ ବୋଲି କୁହାଯାଉଛି ।

ନବୀନ ବୟାସାଧିକ୍ୟ ଶାରୀରିକ ଅସୁସ୍ଥତା ଓ ଅସହାୟତାର ସୁଯୋଗ ନେଇ ତାଙ୍କୁ ମାନସିକ ସ୍ତରରେ ଦୁର୍ବଳ କରିବା ଓ ବାଧ୍ୟ ହୋଇ ସୁଜାତାଙ୍କୁ ‘ସେକେଣ୍ଡ ଇନ୍ କମାଣ୍ଡ’ ଘୋଷଣା କରାଇବା ପାଇଁ ଏହି ମାରାତ୍ମକ ରଣନୀତି ପ୍ରୟୋଗ ସହ ସ୍ନେହାଙ୍ଗିନୀଙ୍କୁ ବି ମୋହରା କରାଯାଇଛି ବୋଲି ଚର୍ଚ୍ଚା ।

 ପାଣ୍ଡିଆନ ଓ ବବିଙ୍କ କ୍ଷମତା ଲଢେଇରେ ବିଜେଡି ଏବେ ଦୁଇ ଫାଳ ହେବାକୁ ବସିଛି । ଗୋଟିଏପଟେ ସ୍ନେହାଙ୍ଗିନୀଙ୍କୁ ମୋହରା କରି ପାଣ୍ଡିଆନ ଗୋଷ୍ଠୀର ‘ବ୍ଲାକମେଲିଂ’ ଓ ଅନ୍ୟପଟେ ବବିଙ୍କ ବିଦ୍ରୋହ ଓ ଅସ୍ଥିରତାର ପ୍ରୟାସ । ସୁଜାତାଙ୍କ ଏଂଟ୍ରି ନହେଲେ ଦଳ ବୁଡ଼ିଯିବ ବୋଲି ନବୀନଙ୍କୁ ଡରାଇ ତାଙ୍କ ନେତୃତ୍ୱକୁ ଦୁର୍ବଳ କରାଯାଉଛି । ଦୀର୍ଘବର୍ଷ ଧରି ଏକଚାଟିଆ ଶାସନ କରିଥିବା ନବୀନ ପଟ୍ଟନାୟକ ଆଜି ନିଜ ଦଳରେ କୋଣଠେସା ହୋଇପଡ଼ିଛନ୍ତି, ଯାହା ରାଜ୍ୟ ରାଜନୀତି ପାଇଁ ଏକ ବଡ଼ ଚେତାବନୀ  ବୋଲି ଚର୍ଚ୍ଚା ହେଉଛି ।