କେନ୍ଦ୍ର ବଜେଟକୁ ନେଇ ବିରୋଧୀ ଦଳ ନେତା ତଥା ବିଜେଡି ସୁପ୍ରିମୋ ନବୀନ ପଟ୍ଟନାୟକ ପ୍ରତିକ୍ରିୟା ରଖିଛନ୍ତି । ତେବେ ରାଜ୍ୟବାସୀଙ୍କୁ ନିର୍ବାଚନୀ ପ୍ରତିଶ୍ରୁତି ଦେଇଥିବା କଥାକୁ ପାଳନ କରାଯାଇନଥିବା କହି ନବୀନ ଆଜି ବିଜେପିକୁ ସମାଲୋଚନା କରିଛନ୍ତି । ମାତ୍ର ୨୦୨୪ ସାଧାରଣ ନିର୍ବାଚନରେ ବିଜେପିର ନିର୍ବାଚନୀ ଇସ୍ତାହାରରେ ଯେଉଁ ପ୍ରତିଶ୍ରୁତି ସାମିଲ ନାହିଁ ସେହି ପ୍ରସଙ୍ଗକୁ ନବୀନ ଓ ତାଙ୍କ ଦଳ ଉତଥାପନ କରିବାକୁ ନେଇ ଏବେ ପ୍ରଶ୍ନ ଉଠିଛି । ନବୀନ ଜାଣିଶୁଣି ମିଛ କହୁଛନ୍ତି ନା ତାଙ୍କ ନାଁରେ ଅନ୍ୟକେହି ଗଣମାଧ୍ୟମକୁ ମିଛ କୁହାଉଛି ତାକୁ ନେଇ ଚର୍ଚ୍ଚା ଆରମ୍ଭ ହୋଇଛି ।
ଆଜି କେନ୍ଦ୍ର ବଜେଟ୍ ଉପରେ ଗଣମାଧ୍ୟମକୁ ଜାରି ପ୍ରେସ୍ ରିଲିଜ୍ ଓ ଭିଡିଓରେ ନବୀନ ପ୍ରତିକ୍ରିୟା ଦେଇ କହିଛନ୍ତି ଯେ, ସ୍ୱତନ୍ତ୍ର ରାଜ୍ୟ ପାହ୍ୟା ପାଇଁ ବିଜେପି ତା’ର ନିର୍ବାଚନୀ ଇସ୍ତାହାରରେ ଓଡ଼ିଶାବାସୀଙ୍କୁ ପ୍ରତିଶ୍ରୁତି ଦେଇଥିଲା । କିନ୍ତୁ ଏହି ପ୍ରତିଶ୍ରୁତିକୁ ବିଚାରକୁ ନିଆଯାଇନି । ଆନ୍ଧ୍ରପ୍ରଦେଶ ଓ ବିହାରକୁ କୋଟିକୋଟି ଟଙ୍କାର ସ୍ୱତନ୍ତ୍ର ପ୍ୟାକେଜ୍ ଦିଆଯାଇଛି । ଓଡ଼ିଶାର ଦୀର୍ଘଦିନର ଦାବି କୋଇଲା ରୟାଲିଟି ସଂଶୋଧନକୁ ମଧ୍ୟ କେନ୍ଦ୍ର ସରକାର ଅଗ୍ରାହ୍ୟ କରିଦେଇଛନ୍ତି । ଏହି କାରଣରୁ ରାଜ୍ୟ ପ୍ରତିବର୍ଷ ହଜାର ହଜାର କୋଟି ଟଙ୍କାର ରାଜସ୍ୱ ହରାଇବ ।
Also Read
ସେପଟେ ବିଜେଡିର ରାଜ୍ୟସଭା ସାଂସଦମାନେ ଚଳିତ କେନ୍ଦ୍ରୀୟ ବଜେଟରେ ଓଡ଼ିଶାକୁ ସ୍ୱତନ୍ତ୍ର ରାଜ୍ୟ ପାହ୍ୟା ମିଳିନଥିବା ପ୍ରସଙ୍ଗ ଉଠାଇ କକ୍ଷତ୍ୟାଗ କରିଛନ୍ତି । ବିହାର ସ୍ୱତନ୍ତ୍ର ରାଜ୍ୟ ପାହ୍ୟା ଦାବି କରୁଥିଲାବେଳେ ଆନ୍ଧ୍ର ଓ ବିହାରକୁ ସ୍ୱତନ୍ତ୍ର ଅତିରିକ୍ତ ସହାୟତା ଦିଆଯାଇଛି । ମାତ୍ର ଓଡ଼ିଶାର ଦାବିକୁ କେନ୍ଦ୍ର ସରକାର ଅଣଦେଖା କରିଛନ୍ତି ବୋଲି ସାଂସଦମାନେ ଅଭିଯୋଗ କରିଛନ୍ତି ।
ତେବେ ବିଜେପି ତା’ର ୨୦୨୪ ସାଧାରଣ ନିର୍ବାଚନୀ ଇସ୍ତାହାରରେ ସ୍ୱତନ୍ତ୍ର ରାଜ୍ୟ ପାହ୍ୟା ନିମନ୍ତେ ପ୍ରତିଶ୍ରୁତି ଦେଇନାହିଁ । ୨୦୧୯ ସାଧାରଣ ନିର୍ବାଚନରେ ବିଜେପି ନିଜର ଇସ୍ତାହାରରୁ ଏହି ପ୍ରତିଶ୍ରୁତିକୁ ବାଦ୍ ଦେଇଥିଲା । ୨୦୨୪ର ଇସ୍ତାହାର ଆଧାରରେ ବିଜେପିକୁ ରାଜ୍ୟବାସୀ ଜନାଦେଶ ଦେଇଛନ୍ତି । ଏହାସତ୍ତ୍ୱେ ବିଜେଡି ସୁପ୍ରିମୋ ନବୀନ ପଟ୍ଟନାୟକ ଓ ତାଙ୍କ ଦଳ ଏହାକୁ ବିଜେପିର ନିର୍ବାଚନୀ ପ୍ରତିଶ୍ରୁତି କହି ରାଜନୀତିକ ବୟାନବାଜି ଜାରି ରଖିଛନ୍ତି । ଏହା ନବୀନଙ୍କ ଅଜ୍ଞତା ନା ଜାଣିଶୁଣି ରାଜନୀତିକ ହଟଚମଟ ପାଇଁ ଏଭଳି ବୟାନ ଜାରି କରୁଛନ୍ତି ବୋଲି ସାଧାରଣରେ ପ୍ରଶ୍ନ ଉଠିଛି ।
ନବୀନ ତାଙ୍କ ବଜେଟ୍ ପ୍ରତିକ୍ରିୟାରେ ପୋଲାଭରମ ପ୍ରସଙ୍ଗରେ ଓଡ଼ିଶା ପ୍ରତି ଅନ୍ୟାୟ ହୋଇଛି ବୋଲି ଅଭିଯୋଗ କରିବା ସହ ଦରଦାମ ବୃଦ୍ଧି ଓ ବେକାରୀ ସମସ୍ୟା ଆଦିକୁ ନେଇ କିଛି ଆଖିଦୃଶିଆ ପଦକ୍ଷେପ ନିଆଯାଇନଥିବା କହିଛନ୍ତି । ସେହିପରି ପ୍ରାକୃତିକ ବିପର୍ଯ୍ୟୟ ପରିଚାଳନା ପାଇଁ ଓଡ଼ିଶା ସ୍ୱତନ୍ତ୍ର ପ୍ୟାକେଜ୍ ଦାବି କରୁଛି । ଏହି ଦାବିକୁ ମଧ୍ୟ ଗ୍ରହଣ କରାଯାଇ ନାହିଁ ।
ନବୀନ କହିଛନ୍ତି ଯେ, ନିର୍ବାଚନ ସମୟରେ ବିଜେପିର ନେତାମାନେ ଓଡ଼ିଶାବାସୀଙ୍କୁ ବହୁତ ବଡ଼ ବଡ଼ କଥା କହିଥିଲେ, କିନ୍ତୁ କେନ୍ଦ୍ର ବଜେଟରେ ଓଡ଼ିଶା ପାଇଁ କିଛି ନାହିଁ । ଅବଶ୍ୟ ଓଡ଼ିଶାର ପର୍ଯ୍ୟଟନ କ୍ଷେତ୍ର ଉପରେ ଅଧିକ ଗୁରୁତ୍ୱ ଦିଆଯାଇଥିବା ନେଇ ସେ ଖୁସି ବ୍ୟକ୍ତ କରିଥିବା ନବୀନ କହିଛନ୍ତି ।
TAGS
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
