୪ଦିନରେ ୪ ଲୋକସଭା ମଣ୍ଡଳୀରେ ପାଣ୍ଡିଆନଙ୍କ ପ୍ରଚାର, ଶେଷ ସ୍ପର୍ଶ ଦେବେ ନବୀନ

ରାଜ୍ୟରେ ପ୍ରଥମ ପର୍ଯ୍ୟାୟ ନିର୍ବାଚନ ପାଇଁ ନାମାଙ୍କନ ପତ୍ର ଦାଖଲ ପ୍ରକ୍ରିୟା ଶେଷ ହୋଇଥିବାବେଳେ ବିଜେଡି ନିଜର ପ୍ରଚାର ଅଭିଯାନ ଜୋରଦାର କରିଛି । ବିଜେଡିର ଦ୍ୱିତୀୟ ମୁଖ୍ୟ ଭିକେ ପାଣ୍ଡିଆନ ୪ଦିନରେ ପ୍ରଥମ ପର୍ଯ୍ୟାୟରେ ହେବାକୁ ଥିବା ୪ଟି ଲୋକସଭା ଆସନରେ ଦଳୀୟ ପ୍ରାର୍ଥୀଙ୍କ ସପକ୍ଷରେ ପ୍ରଚାର ପାଇଁ ମଇଦାନକୁ ଓହ୍ଲାଇଛନ୍ତି । ବିଜେଡି ସୁପ୍ରିମୋ ନବୀନ ପଟ୍ଟନାୟକ ଏହି ୪ଟି ଲୋକସଭା ଆସନରେ ମେ’ ପ୍ରଥମ ସପ୍ତାହରେ ପ୍ରଚାର କରିବାର କାର୍ଯ୍ୟକ୍ରମ ରହିଛି । ଏହି ୪ଟି ଲୋକସଭା ଆସନ ଓ ଏହା ଅନ୍ତର୍ଗତ ୨୮ବିଧାନସଭା ଆସନରେ ଆସନ୍ତା ମେ’ ୧୩ତାରିଖରେ ମତଦାନ ହେବ ।

ସୂଚନା ଅନୁସାରେ, ବିଜେଡି ସୁପ୍ରିମୋ ଶ୍ରୀ ପଟ୍ଟନାୟକ ଗତ ୨୪ତାରିଖରେ ନିଜ ନିର୍ବାଚନମଣ୍ଡଳୀ ହିଞ୍ଜିଳିରୁ ପ୍ରଚାର ଅଭିଯାନ ଆରମ୍ଭ କରିଛନ୍ତି । ଆସିକା ଲୋକସଭା ଆସନ ଅନ୍ତର୍ଗତ ହିଞ୍ଜିଳିରେ ଉଭୟ ନବୀନ ଓ ପାଣ୍ଡିଆନ ପ୍ରଚାର କରିଥିଲେ । ଏହା ପରଦିନଠୁ ଅର୍ଥାତ୍ ୨୫ତାରିଖରେ ପାଣ୍ଡିଆନ କୋରାପୁଟ ଲୋକସଭା ଆସନ ଓ ଆଜି ନବରଙ୍ଗପୁର ଲୋକସଭା କ୍ଷେତ୍ରକୁ ଯାଇ ଦଳୀୟ ପ୍ରାର୍ଥୀଙ୍କ ସପକ୍ଷରେ ପ୍ରଚାର କରିଛନ୍ତି । ସେ ଆସନ୍ତାକାଲି କଳାହାଣ୍ଡି ସଂସଦୀୟ କ୍ଷେତ୍ରରେ ପ୍ରଚାର କରିବେ । ଏପ୍ରିଲ ୨୯-୩୦ତାରିଖରେ ସେ ବ୍ରହ୍ମପୁର ସଂସଦୀୟ ଆସନରେ ଦଳୀୟ ପ୍ରାର୍ଥୀଙ୍କ ପାଇଁ ପ୍ରଚାର କରିବାର କାର୍ଯ୍ୟକ୍ରମ ରହିଛି । ପାଣ୍ଡିଆନ ଏହି ୪ଟି ସଂସଦୀୟ କ୍ଷେତ୍ରରେ ଦଳୀୟ ପ୍ରଚାର କରିବା ପରେ ନବୀନ ଉକ୍ତ ଲୋକସଭା ଆସନରେ ରୋଡ୍ ଶୋ’ କରିବାର କାର୍ଯ୍ୟକ୍ରମ ରହିଛି । ନବୀନଙ୍କ ପାଇଁ ପ୍ରସ୍ତୁତ ‘ହାଇଟେକ୍ ବସ’ରେ ରୋଡ୍ ଶୋ’ ସହ ସାଧାରଣ ସଭାକୁ ଏଲଇଡି ମାଧ୍ୟମରେ ସମ୍ବୋଧିତ କରିବେ ବୋଲି ଜଣାପଡ଼ିଛି ।

ଏପଟେ ରାଜନୀତିକ ମହଲରେ ଚର୍ଚ୍ଚା ଅନୁସାରେ, ପାଣ୍ଡିଆନ ଦଳୀୟ ପ୍ରାର୍ଥୀଙ୍କ ସପକ୍ଷରେ ପ୍ରଚାର ପାଇଁ ଯାଇ ସାଧାରଣ ସଭାକୁ ସମ୍ବୋଧିତ କରିବାକୁ ଅଧିକାଂଶ ଲୋକେ ସହଜରେ ଗ୍ରହଣ କରିପାରୁନାହାନ୍ତି । ପ୍ରାର୍ଥୀଙ୍କ ନିମନ୍ତେ ଭୋଟ୍ ମାଗିବା ଓ ଦଳୀୟ କର୍ମୀମାନଙ୍କଠୁ ସେମାନଙ୍କର ଆପତ୍ତି-ଅଭିଯୋଗ ସଂକ୍ରାନ୍ତ ଦରଖାସ୍ତ ସଂଗ୍ରହକୁ ସାଧାରଣରେ ତୀବ୍ର ପ୍ରତିକ୍ରିୟା ପ୍ରକାଶ ପାଇଛି । ୨୫ବର୍ଷ ଧରି ନବୀନ ପଟ୍ଟନାୟକ କ୍ଷମତାରେ ରହି ମଧ୍ୟ ସାଧାରଣ ଲୋକଙ୍କ ସମସ୍ୟା ସମାଧାନ କରିବାରେ ସକ୍ଷମ ହୋଇପାରିନାହାନ୍ତି । ଆଉ ଭୋଟକୁ ଦେଖି ପାଣ୍ଡିଆନ ‘ବାହାଘରବେଳେ ବାଇଗଣ ରୁଆ’ ସଦୃଶ ଦରଖାସ୍ତ ସଂଗ୍ରହ କରି ସେମାନଙ୍କର ସମସ୍ୟାର ସମାଧାନ କରିବାର ପ୍ରତିଶ୍ରୁତି ଦେବା ପରୋକ୍ଷରେ ନିର୍ବାଚନ ଆଦର୍ଶ ଆଚରଣ ବିଧିର ଉଲ୍ଲଘଂନ ବୋଲି ଚର୍ଚ୍ଚା ହେଉଛି। ମାତ୍ର ପାଣ୍ଡିଆନଙ୍କ ନୀତି ଓ ନୈତିକତାକୁ ଭୁଲି ଏହି ଅଭିଯୋଗ ସଂଗ୍ରହ କାର୍ଯ୍ୟକ୍ରମ କରୁଥିଲେ ମଧ୍ୟ ରାଜ୍ୟର ଦୁଇ ପ୍ରମୁଖ ବିରୋଧୀ ଦଳ କଂଗ୍ରେସ ଓ ବିଜେପି ନିରବ ରହିଛନ୍ତି। ନିର୍ବାଚନୀ ଖର୍ଚ୍ଚର ହିସାବ ଉପରେ ନିର୍ବାଚନ କମିଶନଙ୍କ ନଜର ରହିଛି କି ନାହିଁ ତାହା ମଧ୍ୟ ସନ୍ଦେହରେ । କାରଣ ପାଣ୍ଡିଆନ ସ୍ୱତନ୍ତ୍ର ଏୟାରକ୍ରାଫ୍ଟ ଓ ହେଲିକପ୍ଟର ମାଧ୍ୟମରେ ବ୍ୟୟବହୁଳ କାର୍ଯ୍ୟକ୍ରମରେ ସାମିଲ ହେଉଥିବା ଦେଖିବାକୁ ମିଳୁଛି ।

ସୂଚନାଯୋଗ୍ୟ, ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କର ମେ’ ମାସ ତମାମ ନିର୍ବାଚନୀ ପ୍ରଚାର କାର୍ଯ୍ୟକ୍ରମ ରହିଛି । ପ୍ରଥମ ପର୍ଯ୍ୟାୟରେ ମେ’ ୧୩ତାରିଖରେ ଭୋଟଗ୍ରହଣ ହେବାକୁ ଥିବା ବ୍ରହ୍ମପୁର, ନବରଙ୍ଗପୁର, କୋରାପୁଟ ଓ କଳାହାଣ୍ଡି ସଂସଦୀୟ କ୍ଷେତ୍ରରେ ନବୀନଙ୍କ ପ୍ରଚାର ୧୧ତାରିଖରେ ଶେଷ ହେବ ବୋଲି ଜଣାପଡ଼ିଛି । ନବୀନ ସମସ୍ତ ୨୧ଟି ଲୋକସଭା ଆସନକୁ ଯାଇ ନିଜର ହାଇଟେକ୍ ବସ୍ ମାଧ୍ୟମରେ ଦଳୀୟ ପ୍ରାର୍ଥୀଙ୍କ ସପକ୍ଷରେ ପ୍ରଚାର କରିବେ ଓ କେତେକ ସ୍ଥାନରେ ସାଧାରଣ ସଭାକୁ ସମ୍ବୋଧିତ କରିବାର କାର୍ଯ୍ୟକ୍ରମ ପ୍ରସ୍ତୁତ ହୋଇଥିବା ଜଣାପଡ଼ିଛି ।