ବିଜେଡିକୁ ମହଙ୍ଗା ପଡ଼ିପାରେ ଦଳୀୟ ଗୋଷ୍ଠୀକନ୍ଦଳ । ଭୁବନେଶ୍ୱରରେ ବିଜେଡିର ଦୁଇ ବରିଷ୍ଠ ନେତା ଅଶୋକ ଚନ୍ଦ୍ର ପଣ୍ଡା ଓ ବିଧାୟକ ଅନନ୍ତ ନାରାୟଣ ଜେନାଙ୍କୁ ସାଧାରଣ ନିର୍ବାଚନ ପୂର୍ବରୁ ଓ ପରେ ଦୁଇ କର୍ପୋରେଟର ଅମରେଶ ଜେନା(ବାଇଁଆ) ଓ ବିରଂଚି ନାରାୟଣ ମହାସୁପକାର (ଲିଟୁ) ଖୋଲାଖୋଲି ବିରୋଧ କରିବାର ସାଇଡଇଫେକ୍ଟ ଏବେ ଭୁବନେଶ୍ୱର ମହାନଗର ନିଗମ(ବିଏମସି) ରାଜନୀତିକୁ ଉଷ୍ମ କରିଦେଇଛି।
ଅଶୋକ ଓ ଅନନ୍ତଙ୍କ ସମର୍ଥକ କର୍ପୋରେଟରମାନେ ସିଧାସଳଖ ନହେଲେ ମଧ୍ୟ ମେୟର ସୁଲୋଚନା ଦାସଙ୍କୁ ବୁଲେଇବଙ୍କେଇ ବିରୋଧ କରିବା ଆରମ୍ଭ କରିଛନ୍ତି । ଆଉ ସୁଲୋଚନାଙ୍କ ବିରୁଦ୍ଧରେ ଅନାସ୍ଥା ପ୍ରସ୍ତାବ ଆଣି ଉଭୟ ଅଶୋକ ଓ ଅନନ୍ତ ଭୁବନେଶ୍ୱର ରାଜନୀତିରେ ନିଜର ଦମ୍ ଦେଖାଇବାକୁ ଯୋଜନା କରିଥିବା ସୂଚନା ମିଳିଛି।
ବିଜେଡିର ପୂର୍ବତନ ସଂଗଠନ ସମ୍ପାଦକ ପ୍ରଣବପ୍ରକାଶ ଦାସ(ବବି)ଙ୍କ ଛତ୍ରଛାୟାରେ ରହି ବାଇଁଆ ଓ ଲିଟୁ ବିଏମସି ରାଜନୀତିରେ ବାରମ୍ବାର ଅସ୍ଥିରତା ସୃଷ୍ଟି କରୁଥିବା ଏବଂ ମେୟରଙ୍କ ସନ୍ଦେହଜନକ ଭୂମିକା ଉପରେ ପୂର୍ଣ୍ଣଚ୍ଛେଦ ପକାଇବାକୁ ଅଶୋକ ଓ ଅନନ୍ତଙ୍କ ଗୋଷ୍ଠୀ ଏବେ ନିର୍ଣ୍ଣାୟକ ଲଢ଼େଇ ପାଇଁ ସଜବାଜ ହେଉଥିବା ଜଣାପଡ଼ିଛି ।
ମିଳିଥିବା ସୂଚନା ଅନୁସାରେ, ବିଭିନ୍ନ କାରଣକୁ ନେଇ ଅସନ୍ତୁଷ୍ଟ ଥିବା ବିଜେଡିର ୩୦ରୁ ଅଧିକ କର୍ପୋରେଟର ଖୁବଶୀଘ୍ର ମେୟର ସୁଲୋଚନା ଦାସଙ୍କ ବିରୁଦ୍ଧରେ ଅନାସ୍ଥା ପ୍ରସ୍ତାବ ଆଣିବାର ସମ୍ଭାବନା ରହିଛି । ବିଜେପିର ୧୦ଜଣ ଓ କିଛି ସ୍ୱାଧୀନ କର୍ପୋରେଟରଙ୍କ ସମର୍ଥନରେ ମେୟରଙ୍କୁ ପଦଚ୍ୟୁତ କରି ଉଭୟ ଅଶୋକ ଓ ଅନନ୍ତ ଦଳ ପାଖରେ ନିଜର ପତିଆରା ଦେଖାଇବାକୁ ରଣନୀତି କରିଛନ୍ତି । ବିଶେଷକରି ବାଇଁଆ ଓ ଲିଟୁ ବାରମ୍ବାର ବୟାନବାଜି ସତ୍ତ୍ୱେ ସେମାନଙ୍କ ବିରୁଦ୍ଧରେ ଶୃଙ୍ଖଳାଗତ କାର୍ୟ୍ୟାନୁଷ୍ଠାନ ନହେବା ଏବଂ ବବି ତାଙ୍କୁ ଏସବୁରେ ସହଯୋଗ କରୁଥିବାକୁ ଆଉ ସହଜରେ ହଜମ କରିବା ମୁଡରେ ଅଶୋକ ଓ ଅନନ୍ତଙ୍କ ସମର୍ଥକମାନେ ନଥିବା ଜଣାପଡ଼ିଛି।
Also Read
ସେଥିପାଇଁ ମେୟରଙ୍କ ବିରୁଦ୍ଧରେ ଅନାସ୍ଥା ପ୍ରସ୍ତାବ ଆଣି ବବିଙ୍କ ମାମଲାତି ଏବଂ ବାଇଁଆ ଓ ଲିଟୁଙ୍କ ରାଜନୀତିକ ପତିଆରା ଉପରେ ପୂର୍ଣ୍ଣଚ୍ଛେଦ ପକାଇବାକୁ ଅଶୋକ ଓ ଅନନ୍ତ ଗୋଷ୍ଠୀ ହାତ ମିଳାଇଥିବା ଜଣାପଡ଼ିଛି । ବାଇଁଆ ଓ ଲିଟୁଙ୍କ ୧୫ଦିନିଆ କାରଣଦର୍ଶାଅ ନୋଟିସ କେବଳ ‘ଧର୍ମକୁ ଆଖିଠାର’ ମାରିବା ସଦୃଶ ବୋଲି ଅଶୋକଙ୍କ ଗୋଷ୍ଠୀ ନିଜ ନାମ ଗୁପ୍ତ ରଖିବା ସର୍ତ୍ତରେ କହିଛନ୍ତି । ବିଜେଡିରେ କୌଣସି ନେତାଙ୍କୁ କାରଣଦର୍ଶାଅ ନୋଟିସ୍ ଜାରି ହେବାର ନଜିର ପ୍ରାୟତଃ ନାହିଁ । ସିଧାସଳଖ ଆକ୍ସନ ହୋଇଥାଏ । ଯଦି ବି ନୋଟିସ୍ ଜାରି ହୋଇଛି ତା’ହେଲେ ଜବାବ ରଖିବା ପାଇଁ ସପ୍ତାହେ ଯଥେଷ୍ଟ ହୋଇଥାନ୍ତା । କିନ୍ତୁ ବାଇଁଆ ଓ ଲିଟୁଙ୍କୁ ପରୋକ୍ଷରେ ସୁରକ୍ଷା ଦେବା ପାଇଁ ଏଭଳି ଚକ୍ରବ୍ୟୁହ ରଚନା କରାଯାଇଛି ବୋଲି ଅଶୋକଙ୍କ ସମର୍ଥକ ଥିବା ଜଣେ କର୍ପୋରେଟର କହିଛନ୍ତି ।
ବାରମ୍ବାର ଦାବି ସତ୍ତ୍ୱେ ଲିଟୁ ଓ ବାଇଁଆଙ୍କ ଉପରେ ଦଳ କିଛି କାର୍ୟ୍ୟାନୁଷ୍ଠାନ କରୁନଥିବାକୁ ନେଇ ଏହି ଗୋଷ୍ଠୀ କ୍ଷୁବ୍ଧ ଅଛନ୍ତି । ଏପରିକି ବିଗତ ୩ମାସ ଧରି ମେୟରଙ୍କଠୁ ଆବଶ୍ୟକ ସହଯୋଗ ମଧ୍ୟ ମିଳୁନାହିଁ ବୋଲି ସେମାନେ ଅଭିଯୋଗ କରିଛନ୍ତି । ଏସବୁକୁ ଦୃଷ୍ଟିରେ ରଖି ସେମାନେ ଅନାସ୍ଥା ପ୍ରସ୍ତାବ ଆଣି ମେୟରଙ୍କୁ ପଦଚ୍ୟୁତ କରି ଦଳରେ ଚାଲିଥିବା କନ୍ଦଳ ଉପରେ ପୂର୍ଣ୍ଣଚ୍ଛେଦ ପକାଇବାକୁ ଏହି ଗୋଷ୍ଠୀ ଚାହିଁଛି । ସାଧାରଣ ନିର୍ବାଚନ ପୂର୍ବରୁ ବାଇଁଆ ଓ ଲିଟୁ ଖୋଲାଖୋଲି ଭାବେ ଦଳର ଦୁଇ ବିଧାୟକ ପ୍ରାର୍ଥୀ ଅଶୋକ ଓ ଅନନ୍ତଙ୍କୁ ବିରୋଧ କରି ସମାନ୍ତରାଳ ସଭାସମିତି କରିବା ଏବଂ ସେମାନଙ୍କୁ ଏଥିପାଇଁ ଦଳର ଏକ ନିର୍ଦ୍ଦିଷ୍ଟ ଗୋଷ୍ଠୀ ପ୍ରୋତ୍ସାହିତ କରିବାରୁ ଅଶୋକଙ୍କୁ ପରାଜିତ ହେବାକୁ ପଡ଼ିଥିଲା।
ଆଉ ଅନନ୍ତ ସ୍ୱଳ୍ପ ଭୋଟ୍ ବ୍ୟବଧାନରେ ନିଜର ସିଟ୍ ବଂଚାଇବାକୁ ସକ୍ଷମ ହୋଇଥିଲେ । ତେବେ ସାଧାରଣ ନିର୍ବାଚନରେ ଦଳର ବିପର୍ୟ୍ୟୟ ପରେ ମଧ୍ୟ ବାଇଁଆ ଓ ଲିଟୁ ପୂର୍ବଭଳି ଦଳରେ ଅସ୍ଥିରତା ସୃଷ୍ଟି କଲାଭଳି ବୟାନବାଜି କରିବା ଯୋଗୁ ଜିଲ୍ଲା ସଭାପତି ସୁଶାନ୍ତ ରାଉତ ନେତାଙ୍କ ଗଣମାଧ୍ୟମରେ ବୟାନକୁ ନେଇ କଟକଣା ଜାରି କରିଥିଲେ । କିନ୍ତୁ ଦଳୀୟ ଶୃଙ୍ଖଳାକୁ ଭଙ୍ଗ କରି ଏହି ବାଇଁଆ ଓ ଲିଟୁ ବୟାନବାଜି କରିବା ସହ ବାରମ୍ବାର ନବୀନ ନିବାସ ଯାଇ ସେମାନଙ୍କ ପତିଆରା ଦେଖାଇବାକୁ ପ୍ରୟାସ କରିଥିଲେ।
ବାଇଁଆ ଓ ଲିଟୁଙ୍କ ଏଭଳି କାର୍ୟ୍ୟକୁ ଅଶୋକ ଓ ଅନନ୍ତଙ୍କ ସମର୍ଥକ କର୍ପୋରେଟରମାନେ ବିରୋଧ କରୁଥିବାବେଳେ ମେୟର ଶ୍ରୀମତୀ ଦାସଙ୍କଠୁ ମଧ୍ୟ ବିଭିନ୍ନ କାରଣରୁ ସେମାନଙ୍କୁ ଆଶାନୁରୂପକ ସହଯୋଗ ମିଳୁନଥିଲା । ଯାହାକି ଦଳ ଭିତରେ ଦିନକୁ ଦିନ ବିସ୍ପୋରକ ପରିସ୍ଥିତି ସୃଷ୍ଟି କରିଥିଲା । ଗତ ସପ୍ତାହରେ ଶଙ୍ଖ ଭବନରେ କର୍ପୋରେଟରମାନଙ୍କ ବୈଠକ ଓ ପରେ ବିଏମସି କାର୍ୟ୍ୟାଳୟରେ ବୈଠକବେଳେ ଅଶୋକ ଓ ଅନନ୍ତଙ୍କ ସମର୍ଥକମାନେ ଖୋଲାଖୋଲି ଭାବେ ଏସବୁକୁ ବିରୋଧ କରିଥିଲେ । ପରିସ୍ଥିତି ଏପରି ହୋଇଥିଲା ଯେ, ବିଏମସି କାର୍ୟ୍ୟାଳୟରେ ବୈଠକକୁ ମଧ୍ୟ ବର୍ଜନ କରିବାକୁ ପଛାଇ ନଥିଲେ ।
ଉଲ୍ଲେଖଯୋଗ୍ୟ, ଭୁବନେଶ୍ୱର ମହାନଗର ନିଗମରେ ମୋଟ ୬୭ଜଣ କର୍ପୋରେଟରଙ୍କ ମଧ୍ୟରୁ ବିଜେଡିର ୪୮ଜଣ, ବିଜେପିର ୧୦ଜଣ ଓ ୯ଜଣ ସ୍ୱାଧୀନ କର୍ପୋରେଟର ଅଛନ୍ତି । ମହାନଗର ନିର୍ବାଚନ ଜିତିବା ପରେ ସମସ୍ତ ୯ ସ୍ୱାଧୀନ କର୍ପୋରେଟର ଆସି ବିଜେଡିରେ ସାମିଲ ହୋଇଥିଲେ । କିନ୍ତୁ ଇତିମଧ୍ୟରେ ଜଣେ ସ୍ୱାଧୀନ କର୍ପୋରେଟର ବିଜେଡି ଛାଡ଼ି ବିଜେପିରେ ସାମିଲ ହୋଇଛନ୍ତି।
ମେୟରଙ୍କ ବିରୁଦ୍ଧରେ ଅନାସ୍ଥା ଆଣିବାକୁ ହେଲେ ଦୁଇ ତୃତୀୟାଂଶ କର୍ପୋରେଟର ବା ୪୫ଜଣ କର୍ପୋଟେରଙ୍କ ସହମତି ଜରୁରୀ । ବିଜେପିର ୧୦ଜଣ ଓ ଜଣେ ସ୍ୱାଧୀନ କର୍ପୋରେଟରଙ୍କୁ ମିଶାଇ ୧୧ଜଣ ଥିବାବେଳେ ଅଶୋକ-ଅନନ୍ତଙ୍କ ପାଖରେ ପ୍ରାୟ ୩୫ଜଣ କର୍ପୋରେଟରଙ୍କ ସମର୍ଥନ ରହିଛି । ତେଣୁ ‘ଘର ପଛେ ପୋଡ଼ୁ, ମୂଷା ମରିବା’ ନ୍ୟାୟରେ ଏବେ ଦଳୀୟ କନ୍ଦଳ ଓ ଅଣଦେଖାକୁ ସମାପ୍ତ କରିବା ପାଇଁ ଅଶୋକ ଓ ଅନନ୍ତ ଗୋଷ୍ଠୀର କର୍ପୋରେଟରମାନେ ଏହି ଅନାସ୍ଥା ପ୍ରସ୍ତାବ ଆଣିପାରନ୍ତି । ଆଉ ଶାସକ ବିଜେପି ମଧ୍ୟ ଏଭଳି ବିବାଦରୁ ନିଜର ରାଜନୀତିକ ଫାଇଦା ଉଠାଇବାକୁ ପଛାଇବ ନାହିଁ ବୋଲି ଚର୍ଚ୍ଚା ହେଉଛି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
